Οτθέ σο μπεσάας, μο ντατ ισινέ πρεσβύτερος κι Ενωμένη Κχανγκιρί του Καναδά. Οτθάρ, κάθε Κυριακή μπουτσσαβέλας μι πφενιά ντα μαν κο κατηχητικός, σο ισινέ εκ σχολείος σο σικλιαρέλας ι θρησκειάκε. Σοράν, 11 ο σαάτι, τζάας λέσαρ κι κχανγκιρί. Κο απόγευμας, τζάας αμαρέ νταγιάσαρ κι Αίθουσα Βασιλείας. Ισινέ εύκολος τι αγαβάς ι διαφορά σο τθερένας ανταλά ντούι θρησκείες.

Μι ντάι κερντάς λάφι ι νεβέ πραγματένγκε σο πακιάλας κο Μπομπ ντα κι Μάριον Χάτσεσον, σο ισινέ αμαλά λάσαρ μπουτ μπρεσά. Δεχτιντέ βον-ντα ι αλήθεια. Κο 1958, ο Μπομπ ντα η Μάριον Χάτσεσον λιντέ μαν ντα πουμαρέ τρινέ τσσαβέν ντα γκιλάμ κι Διεθνή Συνέλευση Θείον Θέλημα κι Νέα Υόρκη, σο ατσσικιαρντάς οχτώ ντιβεσά. Ακανά αγαβάβα ότι έπρεπε τι κερέν μπουτ προσπάθεια για τι λεν-μαν πουμέντζαρ, αλλά ανταγιά συνέλευση ισινέ εκ κατά πο σουκάρ πράγματα σο τζουβντιλόμ.

Κάνα ισινόμας τερνό, τζουβντιάας σε εκ κτήμας ντα μπεϊντίναβας τι φροντίναβ ο ζώα. Σκεφτίναβας τι αβάβ κτηνίατρος. Μι ντάι βακερντάς-λες ανταβά εκχέ πρεσβυτερόσκε. Βοβ αντάς μι γκοντιάτε λατσσιμάσαρ ότι τζουβντιάσα κο «τελευταία ντιβεσά» ντα πουτσλάς-μαν σαρ κα επηρεάντιβελας μι φιλία ι Ιεχωβάσαρ άμα κα τζάβας μερικά μπρεσά κο πανεπιστήμιος. (2 Τιμ. 3:1) Οτθάρ, αποφασιντόμ μα τι τζαβ κο πανεπιστήμιος.

 Σκεφτίναβας όμως σο κα κεράβας κάνα κα τελειώναβας ο λύκειος. Παρόλο σο νικιάβας κο έργος κάθε σαββατοκύριακος, να μπεϊντίναβας ο έργος ντα να σκεφτίναβας ότι κα μπορίναβας τι αβάβ σκαπανέας. Μο ντατ ντα μο κακ, σο να ισινέ Μάρτυρες, βακερένας μάνγκε τι ασταράβ εκ μπουτί μπουτ σαατίντζαρ σε εκ μπαρί ασφαλιστική εταιρία κο Τορόντος. Μο κακ τθερέλας εκ μπαρί θέση οτθέ, ντα αντικάς δεχτιντόμ.

Κο Τορόντος, νακχάβας ο πο μπουτ σαάτι μι μπουτιάτε ντα κο παρέες οντουλέντζαρ σο να ισινέ Μάρτυρες. Οτθάρ, μπουτ φαρ χασαράβας ο συναθροίσεις ντα ο έργος. Κι αρχή, μπεσάβας μι παππούσαρ σο να ισινέ Μάρτυρας, αλλά κάνα μουλό έπρεπε τι μπεσάβ γιαβερτθέ.

Ο ζευγάρι Χάτσεσον, σο λιντέας-μαν πουμέντζαρ κι συνέλευση κο 1958, ισινέ σαρ μο ντατ ντα μι ντάι. Βακερντέ μάνγκε τι μπεσάβ λένγκε κχερέστε ντα βοηθιντέ-μαν τι αβάβ πο ζουρανό πνευματικά. Κο 1960, μπολντιλόμ γιεκ λένγκε τσσαβέσαρ, με τον Τζον. Ο Τζον αρχισάλο ο σκαπανικός, ντα ανταβά τσσιντιντάς μαν-ντα τι κεράβ πο μπουτ πράγματα κο έργος. Ο πφραλά κι κχανγκιρί ντικχλέ μι πρόοδος, ντα εκ ντιβές αβιλόμ υπηρέτης Σχολής Θεοκρατικής Διακονίας. a

Κο 1966, παντρισάλομ με τη Ράντι Μπεργκ, σο ισινέ εκ σκαπάνισσα σο μπεϊντίνελας ο έργος ντα μανγκέλας μπουτ τι τζαλ οτθέ σο η ανάγκη ισινέ πο μπαρί. Ο επίσκοπος περιοχής σικαντάς αμένγκε μπαρό ενδιαφέρον ντα βακερντάς αμένγκε τι τζας τι βοηθίνας κι κχανγκιρί κι Ορίλια του Οντάριο. Οτθάρ, γκιντιντάμ αμαρέ πράγματα ντα μετακομισάλαμ οτθέ.

Μόλις ερεσλάμ κι Ορίλια, αρχισάλομ με-ντα ο τακτικός σκαπανικός. Η αγάπη σο τθερέλας η Ράντι ι εργόσκε κερντάς μαν-ντα τι μανγκάβ ο έργος! Κάνα κερντόμ μπαρέ προσπάθειες για τι αβάβ λατσσό σκαπανέας, αρχισάλομ τι νιωθίναβ χαρά καζόμ χρησιμοποιήναβας ι Γραφή ντα ντικχάβας ι τζενέν τι αγαβέν ι αλήθεια. Σο μπαρί ευλογία ισινέ τι βοηθίνας εκχέ λατσσέ αντρογυνός σο μπεσέλας κι Ορίλια τι αλλάνελ πι ζωή ντα τι υπηρετίνελ ι Ιεχωβάς!

Εκ φαρ σο γκιλάμας κο Τορόντος, αρακχλόμ τον Άρνολντ Μακ Νάμαρα, σο ισινέ εκ κατά υπεύθυνα πφραλά κο Μπέθελ. Πουτσλάς-μαν άμα κα μανγκάας τι κεράς ειδικός σκαπανικός. Με αμέσως απαντιντόμ: «Βα, μανγκάσα! Κάι τι αβέλ εκτός κατά Κεμπέκ!» Κο Καναδάς, ο τζενέ σο κερένας λάφι αγγλικά τθερένας ρατσισμός οντουλένγκε σο κερένας λάφι γαλλικά ντα μπεσένας κο Κεμπέκ, ιτιρί κατά φασαρίες σο κερένας. Ντα ανταβά επηρεαντάας-μαν. Οντουβά βακίτι, ο τζενέ κο Κεμπέκ τζάνας κόντρα κι κυβέρνηση ντα μανγκένας τι νασέλ ο Κεμπέκ κατά Καναδάς.

Ο Άρνολντ απαντιντάς: «Ο Κεμπέκ ισί ο μόνος τθαν σο ο γραφείος τμήματος μπουτσσαβέλα ειδικέ σκαπανίν ανταγιά στιγμή». Δεχτιντόμ αμέσως τι τζας. Τζανάβας ότι η Ράντι μπεϊντίνελας τι υπηρετίνελ οτθέ. Πο σοράν, αγαντόμ ότι ανταγιά ισινέ εκ κατά πο λατσσέ αποφάσεις αμαρέ ζωγιάτε!

Αφού κερντάμ για παντς εβδομάδες μαθήματα για τι σικλιάς γαλλικά, η Ράντι ντα με εκχέ γιαβερέ αντρογυνόσαρ γκιλάμ κο Ριμουσκί, περίπου 540 χιλιόμετρα βορειοανατολικά κατά Μόντρεαλ. Τθεράας ατζέ μπουτ τι σικλιάς, ντα ανταβά αγαντίντιλο ξεκάθαρα εκχέ συναθροισιάτε, κάνα διαβαντόμ κάποιες ανακοινώσεις. Αντίς τι βακεράβ ότι κι συνέλευση σο κα τθεράας, κα αβένας πφραλά κατά Αυστρία, χρησιμοποιηντόμ εκ λάφι σο μοιάζελας ανταλέσαρ ντα βακερντόμ ότι ο πφραλά ισινέ μπαρέ τσιρικλέ.

Κο Ριμουσκί, αμέν ο σταρ συνεργαζίντιβαας σταρέ μπίπαντριμε πφενίντζαρ σο πφαμπόνας ι εργόσκε, ντα ι ζευγαρίσαρ Ιμπερντό ντα λένγκε ντουέ τσσαΐντζαρ. Η φαμιλί Ιμπερντό νοικιαντάς εκ κχερ σο τθερέλας εφτά δωμάτια, ντα σαρέ ο σκαπανείς σο μπεσάας οτθέ βοηθίναας κο ενοίκιος. Ο πο μπουτ φαρ μπεσάας οτθέ από 12 μέχρι 14 τζενέ. Η Ράντι ντα με, σο ισινάμας ειδικοί σκαπανείς, νικιάας κο έργος πρωί, μεσημέρι ντα ιράτ, οτθάρ εκτιμίναας-λες μπουτ σο πάντα ισινέ εκ τζενό τι αβέλ αμέντζαρ κο έργος, ατζέ-ντα κο βεν, σο κερέλας μπουτ σιλ ιράτ.

Αβιλάμ αζόμ πασέ οντουλέ πιστέ σκαπανίντζαρ σο νιωθίναας-λεν σαρ αμαρί φαμιλί. Μπάζιμα τσσουβάας γιακ αβρί ντα μπεσάας ντονταλάι λάταρ σαρέ γιεκ. Γιαβερά φαρ, κανονίναας τι κεράς σαρέ διάφορα πιτάκια. Εκ κατά πφραλά ισινέ μουσικός, οτθάρ κο Σάββατα ιράτ μπουτ φαρ γκιλιαβάας ντα κχελάας.

Ο τζενέ κο Ριμουσκί μπεϊντίνενας τι σικλιόν ι Γραφιάκε! Αντρέ παντζέ μπρεσέντε, τθεράας ι χαρά τι ντικχάς μπερεκέτι τζενέν τι κερέν πρόοδος ντα τι μπολντιόν. Η κχανγκιρί μπαριλί ντα ισινάμας περίπου 35 πφραλά.

Κο Κεμπέκ, σικλιλάμ μπουτ πράγματα καζόμ κεράας έργος. Ντικχάας σαρ ο Ιεχωβά βοηθίνελας-αμέν κο έργος ντα σαρ ντέλας-αμέν οντουλά σο χρειαζίντιβαας. Επίσης, σικλιλάμ τι μανγκάς ι τζενέν σο κερένας λάφι γαλλικά, λένγκι τσσιπ ντα λένγκι κουλτούρα. Ανταβά βοηθιντάς-αμέν τι μανγκάς γιαβέρ-ντα κουλτούρες.​—2 Κορ. 6:13.

Οτθέ σο να μπεκλεντίναας-λες, ο γραφείος τμήματος μανγκλάς αμένταρ τι μετακομίνας κι πόλη Τρακαντί, πασέ κι ντεριάβ, ανατολικά κατά Νιου Μπράνσγουικ. Ανταβά αντάς μερικές δυσκολίες, σόσκε μόλις κερντάμας εκ συμβόλαιος για τι νοικιάνας εκ κχερ, ντα με τθεράβας συμβόλαιος για τι κεράβ μπουτί σαρ δάσκαλος χάνικ σαάτια κι εβδομάδα. Επίσης, μερικοί κατά τζενέ σο κεράας-λεν μελέτη, μόλις αβιλέας ευαγγελιζόμενοι. Εκτός σαρέ ανταλένταρ, αζομάν χτίναας εκ Αίθουσα Βασιλείας.

Προσευχίντιβαας σαρό ο σαββατοκύριακος ανταλέσκε ντα γκιλάμ τι ντικχάς ο Τρακαντί, σο ισινέ μπουτ διαφορετικός κατά Ριμουσκί. Αλλά  αποφασιντάμ ότι, αφού ο Ιεχωβά μανγκέλας τι τζας οτθέ, κα τζάας. Δοκιμαντάμ ι Ιεχωβάς ντα ντικχλάμ-λες τι λελ αμένταρ σαρέ ο εμπόδια. (Μαλ. 3:​10) Επειδή η Ράντι τθερέλας εκ ζουρανί φιλία ι Ιεχωβάσαρ, να ντικχέλας πο νεαυτός ντα μπεϊντίνελας τι ασάλ, η μετακόμιση να δυσκολιντάς-αμέν μπουτ.

Ο μόνος πρεσβύτερος αμαρέ νεβέ κχανγκιριάτε ισινέ ο Ρόμπερτ Ρος. Βοβ ντα λέσκι ρομνί, η Λίντα, κερντέας σκαπανικός οτθέ ντα, κάνα μπιάντιλο λένγκο πρώτος τσσαβό, αποφασιντέ τι ατσσόν οτθέ. Ατζέ-ντα καζόμ μπαριαρένας πουμαρέ χουρντέ τσσαβές, ντένας-αμέν μπαρί ζορ σόσκε πουτρένας αμένγκε πουμαρό κχερ ντα πφαμπόνας ι εργόσκε.

Αφού κεράας σκαπανικός κο Τρακαντί ντούι μπρες, μπεκλεντίνελας αμένγκε ατζέκ εκ έκπληξη: Καλιντέ-αμέν τι υπηρετίνας κο έργος περιοδεύοντα επισκόπου. Υπηρετιντάμ εφτά μπρες κο περιοχές σο κερένα λάφι αγγλικά ντα σοράν διορισάλαμ εκχέ περιοχιάτε σο κερένα λάφι γαλλικά κο Κεμπέκ. Ο επίσκοπος περιφερείας σο τθεράας κο Κεμπέκ, ο Λεόνς Κρεπό, ισαρέλας-μαν μι ομιλιένγκε. Αλλά σοράν πάντα πουτσέλας-μαν: «Σαρ κα μπορίνεας τι βακερές ατζέ πο ξεκάθαρα σο πρέπει τι κερέν ο πφραλά;» b Ανταλά λάφια βοηθιντέ-μαν τι σικλιαράβ πο απλέ τροπόσαρ ντα τι βακεράβ ο συγκεκριμέ σημεία σο πρέπει τι κερέν ο πφραλά.

Εκ διορισμός σο να κα μπιστράβ-λες ποτές ισί οντουβά σο τθεράβας κι Διεθνή Συνέλευση «Νικηφόρος Πίστις» κο Μόντρεαλ κο 1978. Κεράβας μπουτί κι Υπηρεσία Τροφίμων. Μπεκλεντίναας 80.000 τζενένγκε, ντα έπρεπε τι κεράς λένγκε χαμπέ εκχέ νεβέ τροπόσαρ. Σαρέ ισινέ νεβέ: ο πράγματα σο κα χρησιμοποιήναας, ο χαμπίματα ντα ο τρόπος σο κα κεράας ο χαμπέ. Τθεράας περίπου 20 μπαρέ ψυγεία, σο μπάζιμα χαλάντιβενας. Επίσης, εκ ντιβές πο τζανγκλέ κατά συνέλευση υπαρχίντιβελας εκ αγώνας. Οτθάρ, μπορισάλαμ τι τσσουβάς-αμέν αντρέ κο στάδιος για τι ετοιμάνας-λες ι ιράτ πριν τι αρχίνελ ι συνέλευση. Ντα έπρεπε τι πφαμπαράς ο φούρνοι πριν τι ντισιόλ για τι κεράς ο πρωινός! Κχινίλαμ, αλλά σικλιλόμ μπουτ κατά πφραλά σο κεράβας λέντζαρ μπουτί σόσκε ισινέ μπουτιαρνέ, τθερένας σουκάρ ιδιότητες ντα ισινέ χαρούμενοι. Αβιλόμ πασέ λέντζαρ, ντα ισινάμ λατσσέ αμαλά μέχρι αντιβές. Ισινάμ μπουτ χαρούμενοι σο γκιλάμ οντουλέ σημαντικέ συνελευσιάτε κο Κεμπέκ, οτθέ σο υπαρχίντιβελας μπουτ διωγμός κο μπρεσά 1940 μέχρι 1960!

Σικλιλόμ μπουτ πράγματα κατά γιαβερά υπεύθυνα πφραλά κο μπαρέ συνελεύσεις σο αβένας-πες κο  Μόντρεαλ. Εκ φαρ, ο Ντέιβιντ Σπλέιν, σο ακανά ισί κο Κυβερνών Σώμας, ισινέ ο υπεύθυνος κο γραφείος κι συνελευσιάκο. Πο σοράν, εκχέ γιαβερέ συνελευσιάτε, κάνα μανγκλέ μάνταρ τι λαβ ανταβά διορισμός, ο Ντέιβιντ βοηθιντάς-μαν μπουτ.

Κο 2011, σοράν από 36 σουκάρ μπρεσά σο υπηρετιντόμ σαρ περιοδεύων επίσκοπος, καλιντέ-μαν τι σικλιαράβ κι Σχολή για τους Πρεσβυτέρους των Εκκλησιών. Αντρέ ντουέ μπρεσέντε, η Ράντι ντα με σοτάμ σε 75 διαφορετικά κρεβάτια, αλλά σαρέ αμαρέ θυσίες αξίνενας. Κο τέλος κι κάθε εβδομαδάκο, ο πρεσβύτεροι ισινέ πφερντέ εκτίμηση σόσκε ντικχένας καζόμ μπουτ μανγκέλας ο Κυβερνών Σώμας τι τθερέν ο πρεσβύτεροι ζουρανί φιλία ι Ιεχωβάσαρ.

Πο σοράν, σικλιαρντόμ κι Σχολή για Ευαγγελιστές της Βασιλείας. Ο μαθητές μπουτ φαρ ισινέ κχινέ ντα αγχωμέ σόσκε τθερένας πφερντό πρόγραμμας: μαθήματα κι τάξη περίπου εφτά σαάτια κο ντιβές, διάβασμας τριν σαάτια κάθε ιράτ, ντα σταρ ή παντς διορισμοί κι εβδομάδα. Με ντα ο γιαβέρ πφραλ σο σικλιαρέλας μάντζαρ βακεράας λένγκε ότι ναστί κα κερένας-λεν σαρέ ανταλά άμα να κα τθερένας ι Ιεχωβάσκι βοήθεια. Να κα μπιστράβ ποτές καζόμ μπουτ σαστίνενας ο μαθητές κάνα ντικχένας ότι, επειδή στηρίντιβενας κο Ιεχωβά, μπορίνενας τι κερέν πο μπουτ οντουλένταρ σο αμντίνενας.

Μι ντάι σικαβέλας μπαρό ενδιαφέρον ι γιαβερένγκε, ντα ανταβά βοηθίνελας ι τζενέν σο κερέλας-λεν μελέτη τι κερέν πρόοδος, ντα βοηθιντάς ατζέ-ντα μι νταντές τι ηρεμίνελ ντα μα τι τζαλ κόντρα κι αλήθεια. Τριν ντιβεσά σοράν μι νταγιάκε μεριμάσταρ, σαστισάλαμ κάνα ντικχλάμ μι νταντές τι αβέλ κι Αίθουσα Βασιλείας για τι ασουνέλ εκ ομιλία. Ντα να τσσιναντάς τι τζαλ κο συναθροίσεις ο γιαβερά 26 μπρεσά. Παρόλο σο να μπολντιλό ποτές, ο πρεσβύτεροι βακερένας μάνγκε ότι πάντα αβέλας πρώτος κο συναθροίσεις κάθε εβδομάδα.

Μι ντάι ισινέ εκ μπουτ λατσσό παράδειγμας μάνγκε ντα μι πφενίνγκε. Μο τριν-ντα πφενιά πουμαρέ ρομέντζαρ υπηρετίνενα πιστά ι Ιεχωβάς. Ο ντούι μι πφενίνταρ υπηρετίνενα κο Μπέθελ​—η εκ τανί κι Πορτογαλία ντα η γιαβέρ κι Αϊτή.

Η Ράντι ντα με ισινάμ ακανά ειδικοί σκαπανείς κο Χάμιλτον του Οντάριο. Κάνα ισινάμας κο έργος περιοδεύοντα επισκόπου, μπεϊντίναας τι τζας γιεκ γιαβερέ πφραλέντζαρ κο επανεπισκέψεις ντα κο μελέτες σο τθερένας. Αλλά ακανά χαιρίνασα τι ντικχάς αμαρέ μελέτες τι κερέν πρόοδος. Ντα καζόμ αβάσα πο πασέ ι πφραλέντζαρ ντα ι πφενίντζαρ αμαρέ νεβέ κχανγκιριάτε, λάσα ζορ σόσκε ντικχάσα καζόμ ο Ιεχωβά στηρίνελα-λεν εμ λατσσέ εμ μπέτι βακιτίντε.

Καζόμ σκεφτίνασα αμαρί ζωή, εκτιμίνασα μπουτ ο μπαρό ενδιαφέρον σο σικαντέ αμένγκε αζόμ μπουτ τζενέ. Αμέν-ντα προσπαθίνασα τι σικαβάς μπαρό ενδιαφέρον ι γιαβερένγκε αντράλ αμαρέ γκίσταρ, ντα τι βοηθίνας-λεν τι κερέν ο πο λατσσό κι υπηρεσία κι Ιεχωβάσκι. (2 Κορ. 7:6, 7, υποσ.) Για παράδειγμας, εκχέ φαμιλιάτε, η ρομνί, λάκο τσσαβό ντα λάκι τσσάι κερένας ο τριν-ντα τακτικός σκαπανικός. Πουτσλόμ ι ρομές άμα σκεφτιντάας ποτές ο σκαπανικός. Βοβ βακερντάς ότι στηρίνελας τρινέ σκαπανίν. Αζομάν πουτσλόμ-λες: «Μπορίνεσα τούι τι στηρίνες-λεν πο λατσσές κατά Ιεχωβά;» Βακερντόμ λέσκε ότι κα αβέλας σουκάρ τι τθερέλ βοβ-ντα ι χαρά σο τθερένας βον. Σιοβ μασεκά πο σοράν, αρχισάλο ο σκαπανικός.

Η Ράντι ντα με κα συνεχίνας τι κεράς λάφι «κο πο τερνέ τζενέ» “ι μπουτ σουκάρ πραγματένγκε σο κερντάς” ο Ιεχωβά ντα μανγκάσα βον-ντα τι απολαμβάνεν λέσκι υπηρεσία καζόμ απολαμβάνασα-λα αμέν.​—Ψαλμ. 71:​17, 18.