ΚΟ ΜΠΡΕΣΑ σο ισινόμας χουρντό, να αλλάνενας μπουτ πράγματα κο σχολείος ντα κι πόλη σο τζουβντιάβας. Κο σχολείος, τθεράβας ι ίδιε συμμαθητέν κατά πρώτη μέχρι κι τελευταία τάξη. Κι πόλη, ο πιο μπουτ τζενέ τζανένας ο εκ ι γιαβερές.

Ντονταλάι κατά Λίμπερτι ισινέ χουρντέ κτήματα σο καλλιεργίνενας πιο μπουτ καλαμπόκι. Κάνα μπιάντιλομ, μο ντατ κερέλας μπουτί εκχέ τζενέστε σο τθερέλας κτήματα. Κι εφηβεία, σικλιλόμ τι οδηγίναβ τρακτέρ ντα τι κεράβ μπουτί κο χωράφια.

Να τζανάβα σαρ ισί τι τθερές τερνέ νταντές. Κάνα μπιάντιλομ, μο ντατ ισινέ 56 μπρεσένγκο ντα μι ντάι 35. Όμως, μο ντατ ισινέ ζουρανό. Μανγκέλας ι σκληρή μπουτί ντα σικλιαρντάς σαρέ πι τσσαβέν-ντα τι μανγκέν-λα. Ποτές να τθερέλας μπουτ λοβέ, αλλά τθεράας εκ τθαν τι μπεσάς, σέα τι ιριάς ντα χαμπέ για τι χας. Ντα ισινέ πάντα πασέ αμέντε. Μο ντατ ισινέ 93 μπρεσένγκο κάνα μουλό. Μι ντάι μουλί 86 μπρεσένγκι. Καέκ κατά ντούι να υπηρετίνελας ι Ιεχωβάς. Εκ μι πφραλένταρ, όμως, υπηρετίνελα πιστά σαρ πρεσβύτερος κατά 1972.

Μι ντάι ασχολίντιβελας μπουτ ι θρησκειάσαρ. Κάθε Κυριακή, λέλας-αμέν κι κχανγκιρί σο τθερένας ο Βαπτιστές. Κάνα ισινόμας 12 μπρεσένγκο, ασουντόμ  πρώτη φαρ για την Τριάδα. Οτθάρ, πουτσλόμ μι νταγιά: «Σαρ αβέλα-πες ο Ιησούς τι αβέλ εμ ο Τσσαβό εμ ο Ντατ;» Ατζέ ντάβα-μαν γκοντί λάκι απάντηση: «Μο τσσαβό, ανταβά ισί μυστήριος. Ναστί αγαβάσα-λες αμέν». Μάνγκε ισινέ σίγουρα μυστήριος. Αλλά κάνα ισινόμας περίπου 14 μπρεσένγκο, μπολντιλόμ εκχέ χουρντέ λενιάτε. Μπολντέ-μαν κο πανί τριν φαρ, εκ φαρ ι Νταντέσκε, εκ φαρ ι Τσσαβέσκε ντα εκ φαρ ι άγιε πνευμάσκε!

Κο γυμνάσιος, τθεράβας εκχέ αμαλές σο κχελέλας μποξ ντα κερντάς μαν-ντα τι κχελάβ μποξ. Αρχισάλομ τι κεράβ προπόνηση ντα γραφίντιλομ σε εκ ομάδα μποξ, κο Χρυσά Γάντια. Να ισινόμας μπουτ λατσσό, οτθάρ παρατιντόμ-λεν αφού κχελντόμ χάνικ αγώνες. Πιο σοράν, καλιντέ-μαν κο στρατός ντα μπουτσσάντιλομ κι Γερμανία. Καζόμ υπηρετίναβας οτθέ, ο υπεύθυνοι μπουτσσαντέ-μαν σε εκ στρατιωτική σχολή σόσκε πακιάνας ότι κα μπορίναβας τι αβάβ λατσσό αρχηγός. Μανγκένας τι ατσσάβ κο στρατός. Αλλά με να μανγκάβας τι ατσσάβ, οτθάρ κο 1956, αφού τελειωντόμ ο ντούι μπρεσά σο έπρεπε τι υπηρετίναβ, νασλόμ. Χάνικ πιο σοράν όμως, τσσουντόμ-μαν εκχέ μπουτ διαφορετικέ στρατόστε.

Πριν τι σικλιάβ ι αλήθεια, τθεράβας λάθος άποψη για τη συμπεριφορά σο πρέπει τι τθερέλ εκ πραγματικός μουρς. Επηρεασάλομας κατά σινεμάδες ντα κατά ντουνιάς. Πακιάβας ότι ο μουρσά σο κερένας λάφι ι Γραφιάκε να ισινέ πραγματικά μουρσά. Αλλά αρχισάλομ τι σικλιάβ κάποια πράγματα σο αλλαντέ μι ζωή. Εκ ντιβές σο οδηγίναβας κι πόλη μι λολί κούρσα, ντούι τερνέ ρακλιά κερντέ νόημας τι σταματίναβ. Ισινέ ο χουρντέ πφενιά μι τζαμουτρέσκε, σο παντρισάλοας μι πιο μπαρέ πφενιάσαρ. Οντουλά τερνέ ρακλιά ισινέ Μάρτυρες ι Ιεχωβάσκε. Κάποτε, ντινέας-μαν ι Σκοπιά ντα ο Ξύπνα!, αλλά ισινέ δύσκολος τι αγαβάβ ι Σκοπιά. Οντιά φαρ όμως, καλιντέ-μαν κι Μελέτη Βιβλίου Εκκλησίας πουμαρέ κχερέστε, δηλαδή εκχέ χουρντέ συναθροισιάτε σο διαβάνενας ι Γραφή ντα συζητίνενας. Βακερντόμ λένγκε ότι κα σκεφτίναβας-λες. Βον πουτσλέ ασαμάσαρ: «Ντέσα το λάφι;» Ντα με βακερντόμ: «Βα».

Παρόλο σο μετανιωσάλομ σο ντινόμ μο λάφι, πακιάβας ότι έπρεπε τι ατσσικιαράβ-λες. Οτθάρ οντιά ιράτ, γκιλόμ κι συνάθροιση. Ο χουρντέ κερντέ μάνγκε ι πιο μπαρί εντύπωση. Ναστί πακιάβας καζόμ μπουτ πράγματα τζανένας ι Γραφιάκε! Παρόλο σο τζάβας κι κχανγκιρί μι νταγιάσαρ κάθε Κυριακή, τζανάβας μπουτ χάνικ πράγματα ι Γραφιάκε. Ακανά μανγκάβας μπαγιά τι σικλιάβ πιο μπουτ, οτθάρ δεχτισάλομ τι κεράβ μελέτη. Εκ κατά πρώτα πράγματα σο σικλιλόμ ισινέ ότι ο ναβ σο τθερέλα ο Παντοδύναμος Ντεβέλ ισί Ιεχωβά. Μερικά μπρεσά πιο τζανγκλέ, κάνα πουτσλόμας μι νταγιά ι Ιεχωβάσκε Μαρτυρένγκε, βόι βακερντάς: «Βον ντένα λατρεία εκχέ πφουρές σο βακερένα λέσκε Ιεχωβά». Αλλά ακανά νιωθίναβας ότι μο γιακχά πουτάρντιβενας!

Κερντόμ πρόοδος μπουτ σουγκό, σόσκε τζανάβας ότι αρακχλόμ ι αλήθεια. Κο 1957, κο Μάρτιος, αφού νακχλέας σάντε εννιά μάσεκ από αζομάν σο γκιλόμ κι πρώτη συνάθροιση, μπολντιλόμ. Η άποψη σο τθεράβας ι ζωγιάκε αλλαξάλι. Χαιρίναβα σο σικλιλόμ κατά Γραφή σαρ ισί ο πραγματικός μουρς. Ο Ιησούς ισινέ τέλειος μουρς. Ισινέ πιο ζουρανό σαρέ κατά γιαβερά μουρσά. Όμως, αντίς τι ανακατούντιβελ κο καβγκάδες, «μουκχλάς πο νεαυτός τι ταλαιπωρίντιβελ», αντικάς σαρ βακέρντιλοας. (Ησαΐας 53:2, 7) Σικλιλόμ ότι εκ αληθινός μαθητής ι Ιησούσκο «πρέπει τι αβέλ ήρεμος σαριλέντζαρ».​—2 Τιμόθεο 2:24.

 Ο γιαβέρ μπρες, κο 1958, αρχισάλομ ο σκαπανικός. Σοράν όμως, έπρεπε τι τσσιναβάβ-λες για χάνικ. Σόσκε; Αποφασιντόμας τι παντρίναβ ι Γκλοριάσαρ, σο ισινέ εκ οντουλέ ντουέ ρακλίνταρ σο καλιντέας-μαν κι συνάθροιση! Ποτές να μετανιωσάλομ σο λιντόμ ανταγιά απόφαση. Η Γκλόρια ισινέ θησαυρός αζομάν, σαρ ισί αντιβές-ντα. Μάνγκε, τθερέλα πιο μπαρί αξία ατζέ-ντα κατά πιο πααλίς διαμάντι, ντα χαιρίναβα μπουτ σο παντρισάλομ λάσαρ! Ακανά κα βακερέλ τουμένγκε βόι χάνικ λάφια πέσκε:

«Ισινάμας 17 πφραλά. Μι ντάι ισινέ πιστή Μάρτυρας. Μουλί κάνα ισινόμας 14 μπρεσένγκι. Σοράν, μο ντατ αρχισάλο μελέτη. Επειδή μουλίας αμαρί ντάι, μο ντατ κερντάς εκ συμφωνία με το διευθυντής ι σχολειόσκο. Μι πιο μπαρί πφεν κα τελειώνελας ατζεχάνικ ο λύκειος, ντα μο ντατ πουτσλάς αν κα μπορίναας τι τζας κο σχολείος εκ ντιβές με, εκ ντιβές βόι. Αντικάς, εκ τανί αμένταρ μπορίνελας τι μπεσέλ κχερέ για τι αρακχαβέλ ι χουρντέν ντα τι κερέλ χαμπέ μέχρι τι αβέλ αμαρό ντατ κατά μπουτί. Ο διευθυντής συμφωνιντάς, ντα κεράας-λες ανταβά μέχρι σο τελειωντάς μι πφεν ο σχολείος. Ντούι φαμιλιά κερένας-αμέν μελέτη, ντα 11 αμένταρ κατά τσσαβέ αβιλάμ Μάρτυρες ι Ιεχωβάσκε. Μανγκάβας μπουτ ο έργος, παρόλο σο πάντα ισινόμας μπουτ λατζανί. Μο ρομ, ο Σαμ, βοηθιντάς-μαν ανταλέστε σαρέ ανταλά μπρεσά».

Παντρισάλαμ κο 1959, κο Φεβρουάριος. Απολαμβάναας ο σκαπανικός γιεκ. Κο Ιούλιος οντουλέ μπρεσέσκο, κερντάμ αίτηση για τι υπηρετίνας κο Μπέθελ. Μανγκάας μπουτ τι υπηρετίνας κο κεντρικά γραφεία. Εκ αγαπητός πφραλ, ο Σάιμον Κρέικερ, κερντάς λάφι αμέντζαρ. Βακερντάς αμένγκε ότι αζομάν κο Μπέθελ να δεχτίνενας αντρογυνόν. Ποτές να τσσιναντάμ τι μανγκάς τι υπηρετίνας κο Μπέθελ, αλλά νακχλέ μπουτ μπρεσά μέχρι τι τζας οτθέ.

Γραφιντάμ εκ γράμμας κο κεντρικά γραφεία ντα μανγκλάμ τι μπουτσσαβέν-αμέν τι υπηρετίνας οτθέ σο ισινέ πιο μπαρί ανάγκη. Ντινέ-αμέν σάντε εκ τθαν τι τζας: ο Πάιν Μπλαφ κο Αρκάνσας. Οντουλά ντιβεσά, ισινέ ντούι κχανγκιριά κο Πάιν Μπλαφ. Κι εκ ισινέ παρνέ πφραλά ντα κι γιαβέρ καλέ. Μπουτσσαντέ-αμέν κι κχανγκιρί κι καλένγκι σο οτθέ ισινέ σάντε 14 ευαγγελιζόμενοι.

Μπορεί τι σκεφτίνενα σόσκε ο Μάρτυρες ι Ιεχωβάσκε ξεχωρίνενας ι καλέ πφραλέν κατά παρνέ. Η απάντηση ισί ότι οντουλά μπρεσά ναστί κεράας γιαβέρτουλους. Ισινέ παράνομος ο καλέ ντα ο παρνέ τι γκιντίντιβεν γιεκ, σαρ για παράδειγμας κο κχανγκιριά. Επίσης, υπαρχίντιβελας μπουτ βία. Μπουτέ τθανέντε, ο πφραλά νταρένας ότι κάποιοι κα καταστραφίνενας ι Αίθουσα Βασιλείας άμα ο ντούι φυλές κερένας συναθροίσεις γιεκ. Ασακέ πράγματα αβένας-πες. Αν ο καλέ πφραλά κερένας έργος κχερ κχερέστε κο γειτονιές κι παρνένγκε, κα ασταρένας-λεν ντα μπορεί τι νταπένας-λεν ντα. Άρα, για τι αβέλ-πες ο έργος, ντάας καν κο νόμοι ντα τθεράας ι ελπίδα ότι ο πράγματα κα αλλάνενας.

Αμαρό έργος να ισινέ πάντα εύκολος. Κάνα κεράας έργος καλέντε, μπορεί τι μπασκιαράας ι πόρτα εκχέ παρνέ φαμιλιάκι χωρίς τι μανγκάς. Έπρεπε τι αποφασίνας σουγκό αν κα κεράας εκ παρουσίαση ή αν κα βακεράας απλά ότι κερντάμ λάθος ντα κα νασάας. Αντικάς ισινέ ο πράγματα αζομάν.

Σαρ σκαπανείς, έπρεπε τι νικαβάς λοβέ για τι τθεράς ο απαραίτητα. Κο πιο μπουτ μπουτιά σο κεράας, λάας τριν δολάρια κο ντιβές. Η Γκλόρια κερέλας μπουτί σαρ βοηθός μερικέ κχερέντε. Εκχέ κχερέστε μουκχένας-μαν τι βοηθίναβ-λα για τι τελειώνελ πιο σουγκό. Οτθέ ντένας-αμέν χαμπέ-ντα. Κάθε εβδομάδα, η Γκλόρια σιδερώνελας ο σέα εκχέ γιαβερέ φαμιλιάκε. Με κεράβας μπουτί κι αυλή, καθαρίναβας ο τζάμια ντα κεράβας γιαβερά-ντα μπουτιά αβρί. Κο κχερ εκχέ παρνέ φαμιλιάκο, καθαρίναας ο τζάμια. Η Γκλόρια καθαρίνελας αντράλ ντα με αβριάλ. Ανταγιά μπουτί ατσσικιαρέλας σαρό ο ντιβές, οτθάρ ντένας-αμέν χαμπέ. Η Γκλόρια χάλας αντρέ κο κχερ αλλά όχι γιεκ ι φαμιλιάσαρ. Με χάβας αβρί κο γκαράζ, αλλά να πειράνελας-μαν. Ο χαμπέ ισινέ μπουτ σουκάρ. Οντιά φαμιλί ισινέ λατσσέ τζενέ, αλλά επηρεάντιβενας κατά γιαβερά. Ντάβα-μαν γκοντί εκ φαρ σο σταματιντάμας σε εκ βενζινάδικος. Αφού πφερντάμ ο ρεζερβουάρ, πουτσλόμ εκχέ παρνέ τζενές σο κερέλας μπουτί οτθέ αν κα μπορίνελας η Γκλόρια τι χρησιμοποιήνελ ο κινέφι. Βοβ ντικχλάς-μαν χολιάσαρ ντα βακερντάς: «Ισί κλειδωμέ».

Οκιά μπάνταρ, νακχάας μπουτ σουκάρ ι πφραλέντζαρ ντα απολαμβάναας αμαρό έργος! Κάνα γκιλάμ πρώτη φαρ κο Πάιν Μπλαφ, μπεσλάμ κο πφραλ σο ισινέ ο υπηρέτης ι κχανγκιριάκο αζομάν. Λέσκι ρομνί να ισινέ ατζέ κι αλήθεια, ντα η Γκλόρια αρχισάλι τι κερέλ-λα μελέτη. Με αρχισάλομ τι κεράβ μελέτη λένγκε τσσαγιά ντα λένγκε τζαμουτρές. Εμ η ντάι εμ η τσσάι αποφασιντέ τι υπηρετίνεν ι Ιεχωβάς ντα μπολντιλέ.

Τθεράας λατσσέ αμαλέν κι κχανγκιρί κι παρνένγκι. Καλίνενας-αμέν πουμαρέ κχερέντε για τι χας, αλλά μπορίναας τι τζας σάντε κάνα αράτιβελας για μα τι ντικχέλ-αμέν καέκ. Η Κου Κλουξ Κλαν, εκ οργάνωση σο μανγκέλα ο ρατσισμός ντα ι βία, επηρεάνελας μπουτ ι τζενέν αζομάν. Εκ ιράτ, ντάβα-μαν γκοντί ότι ντικχλόμ εκχέ μουρσές σο μπεσέλας κι ανγκλαϊνί αυλή πι κχερέστε τι ιρίλ εκ παρνό σεντόνι ντα κουκούλα, σαρ ιρίνας οντουλά σο υποστηρίνενας ι Κου Κλουξ Κλαν. Σαρέ ανταλά όμως να τσσιναντέ ι πφραλέν τι σικαβέν λατσσιπέ. Εκ νιλάι, χρειαζίντιβαας λοβέ για τι τζας κι συνέλευση ντα εκ πφραλ συμφωνιντάς τι κινέλ αμαρό αυτοκίνητος για τι μπορίνας τι τζας. Εκ ντιβές, αφού νακχλό εκ μάσεκ, ισινάμας μπουτ κχινέ σόσκε κερντάμας έργος κχερ κχερέστε αντρέ κι κάψα ντα μπουτ μελέτες. Κάνα βουρτισάλαμ κχερέ ντικχλάμ κάτι σο να μπεκλεντίναας-λες. Ισινέ αμαρό αυτοκίνητος, παρκαρισμέ ανγκλάλ αμαρέ κχερέστε! Εκ σημείωμας κο τζάμι βακερέλας: «Ο αυτοκίνητος ισί πάλι τουμαρό. Δεχτίνεν ανταβά δώρος τουμαρέ πφραλέσταρ».

Εκ γιαβέρ-ντα λατσσιπέ ατσσιλό μι γκοντιάτε. Κο 1962, καλιντέ-μαν τι νακχάβ ι Σχολή Διακονίας της Βασιλείας κο Σάουθ Λάνσινγκ, κι Νέα Υόρκη. Η σχολή ατσσικιαρέλας εκ σαστό μάσεκ ντα ντέλας εκπαίδευση κο πφραλά σο τθερένας ι ευθύνη κο κχανγκιριά, κο περιοχές ντα κο περιφέρειες. Αλλά κάνα καλιντέ-μαν, ισινόμας μπι-μπουτιάκο ντα να τθεράβας μπουτ λοβέ. Όμως, εκ τηλεφωνική εταιρία κο Πάιν Μπλαφ λιντάας μάνταρ συνέντευξη μπουτιάκε. Αν κα λένας-μαν κι μπουτί, κα αβάβας ο πρώτος καλό σο κα κερέλας μπουτί οντουλέ εταιριάτε. Τελικά βακερντέ μάνγκε ότι κα λένας-μαν κι μπουτί. Σο κα κεράβας; Να τθεράβας λοβέ για τι τζαβ κι Νέα Υόρκη. Σκεφτίναβας σοβαρά τι δεχτίναβ οντιά μπουτί ντα μα τι τζαβ κι σχολή. Ισινόμας έτοιμος τι γραφίναβ εκ επιστολή κο Μπέθελ αλλά αζομάν αβιλό-πες κάτι σο να κα μπιστράβ ποτές.

Εκ ντιβές ντισάρα, μπασκιαρντάς αμαρί πόρτα εκ πφεν αμαρέ κχανγκιριάταρ σο ο ρομ λάκο να ισινέ κι αλήθεια. Ντινάς-μαν εκ φάκελος πφερντό λοβέ. Βόι ντα μερικά λάκε χουρντέ τσσαβένταρ ιστίνας χαράματα για τι κερέν μπουτί κο παμπούκια. Κερντέ-λες ανταβά για τι νικαβέν ο λοβέ σο χρειαζίντιβαβας για τι μπορίναβ τι τζαβ κι Νέα Υόρκη. Η πφεν βακερντάς: «Τζα κι σχολή, σίκλιο καζόμ πιο μπουτ πράγματα μπορίνεσα ντα έλα τι σικλιαρές-αμέν!» Χάνικ πιο σοράν, πουτσλόμ κι τηλεφωνική εταιρία αν κα μπορίναβας τι ασταράβ μπουτί παντς εβδομάδες πιο σοράν. Βακερντέ μάνγκε εκ μπαρό «Όχι!» Αλλά να τθερέλας σημασία. Λιντόμας μι απόφαση. Χαιρίναβα μπουτ σο να ασταρντόμ μπουτί οτθέ!

 Τθερέλα η Γκλόρια-ντα τι βακερέλ τουμένγκε κάτι οντουλένταρ σο ντέλα-πες γκοντί κατά Πάιν Μπλαφ: «Μανγκλόμ μπουτ οντουβά τομέας! Τθεράβας 15 με 20 μελέτες. Οτθάρ, νικιάας κο έργος κχερ κχερέστε ντισάρα ντα σοράν κεράας αμαρέ μελέτες, μπάζιμα μέχρι 11 αρατί. Νακχάας μπουτ σουκάρ κο έργος! Κα μπεσάβας χαράσαρ οτθέ. Κι πραγματικότητα, να μανγκάβας τι αλλάνας διορισμός ντα τι αρχίνας ο έργος περιοχής, αλλά ο Ιεχωβά τθερέλας κάτι γιαβέρ πι γκοντιάτε». Σίγουρα τθερέλας.

Ενώ κεράας σκαπανικός κο Πάιν Μπλαφ, κερντάμ αίτηση για τι αβάς ειδικοί σκαπανείς. Μπεκλεντίναας ότι κα διορίντιβαας. Σόσκε; Επειδή τζανάας ότι αμαρό επίσκοπος περιφερείας μανγκέλας τι βοηθίνας εκχέ κχανγκιριάτε κο Τέξας ντα τι τζας οτθέ σαρ ειδικοί σκαπανείς. Μπεϊντιντάμ μπουτ ανταγιά ιδέα. Ο ντιβεσά νακχένας, αλλά καζόμ-ντα τι μπεκλεντίναας εκ απάντηση, ο γραμματοκιβώτιος ατσσόλας τσουτσό. Τελικά, εκ ντιβές αβιλί εκ επιστολή. Διορισάλαμας κο έργος περιοχής! Ισινέ Ιανουάριος 1965. Ο πφραλ Λίον Γουίβερ, σο ακανά ισί συντονιστής κι Επιτροπή Τμήματος κο Ηνωμένες Πολιτείες, διορισάλοας βοβ-ντα επίσκοπος περιοχής αζομάν.

Αγχώντιβαβας σο κα αβάβας επίσκοπος περιοχής. Περίπου εκ μπρες πιο τζανγκλέ, ο επίσκοπος περιφερείας, ο Τζέιμς Α. Τόμσον, ντικχλάας αν τθεράβας ο προσόντα τι αβάβ επίσκοπος. Εξηγιντάς μάνγκε λατσσιμάσαρ κατέ κα μπορίναβας τι αβάβ πιο λατσσό ντα βακερντάς μάνγκε σο ικανότητες χρειαζίντιβελα εκ λατσσό επίσκοπος περιοχής. Κάνα αρχισάλομ ο έργος περιοχής, αγαντόμ μπουτ σουγκό καζόμ χρειαζίντιβαβας λέσκε συμβουλές. Ο πφραλ Τόμσον ισινέ ο πρώτος επίσκοπος περιφερείας σο υπηρετιντόμ λέσαρ κάνα διορισάλομ. Σικλιλόμ μπουτ πράγματα οντουλέ πιστέ πφραλέσταρ.

Οντουλά ντιβεσά, ο επίσκοπος περιοχής λέλας μπουτ χάνικ εκπαίδευση. Εκ εβδομάδα τθεράβας ι ευκαιρία τι παρατηρίναβ εκχέ επισκοπός καζόμ υπηρετίνελας εκχέ κχανγκιριάτε. Ι γιαβέρ εβδομάδα, βοβ παρατηριντάς-μαν καζόμ υπηρετίναβας εκχέ γιαβερέ κχανγκιριάτε. Ντινάς-μαν μερικές συμβουλές. Αλλά σοράν ατσσιλάμ κορκορέ. Ντάβα-μαν γκοντί ότι βακεράβας κι Γκλόρια: «Πρέπει τι νασέλ ακανά;» Αλλά καζόμ νακχέλας ο καιρός, αγαντόμ κάτι σημαντικός. Πάντα υπαρχίντιβενα λατσσέ πφραλά σο μπορίνενα τι βοηθίνεν-τουτ, αλλά σάντε αν κα μουκχές-λεν τι βοηθίνεν-τουτ. Εκτιμίναβα μπουτ ι βοήθεια σο λιντόμ ασακέ πφραλένταρ σο τθερένας εμπειρία, σαρ ο πφραλ Τζέιμς Ρ. Μπράουν, σο αζομάν ισινέ επίσκοπος, ντα ο Φρεντ Ρασκ κατά φαμιλί Μπέθελ.

Ο ρατσισμός ισινέ παντού οντουλά ντιβεσά. Εκ φαρ, οντουλά σο υποστηρίνενας ι Κου Κλουξ Κλαν  νικίστιλε κο ντρομά σε εκ πόλη σο τζάας κο Τενεσί. Εκ γιαβέρ φαρ, ντάβα-μαν γκοντί ότι ισινάμας κο έργος ντα σταματισάλαμας ι πφραλέντζαρ εκχέ μαγαζίστε για τι χας. Κάνα γκιλόμ κο κινέφι, εκ άγριος τζενό με τατουάζ σο τθερένας ο ρατσιστές ιστίντιλο ντα πελό παλά-μάντε. Αλλά εκ παρνό πφραλ, σο ισινέ μπουτ πιο ζουρανό εμ μάνταρ εμ λέσταρ, ντινάς αντρέ ντα πουτσλάς-μαν: «Ισινάν εντάξει, πφραλ Χερντ;» Οντουβά άγριος τζενό νασλό σουγκό χωρίς τι χρησιμοποιήνελ ο κινέφι. Σαρέ ανταλά μπρεσά, αγαντόμ ότι ο πραγματικός λόγος σο υπαρχίντιβελα ο ρατσισμός νανέ ο χρώμας κο δέρμας, αλλά η αμαρτία σο ισί αντρέ σαρέ κο τζενέ. Επίσης, σικλιλόμ ότι ο πφραλά ισί πφραλά σο-ντα χρώμας τι τθερέν, ντα κα ντεν πουμαρί ζωή τούκε άμα κα χρειαζίντιβελ.

Ισινάμας 12 μπρεσά κο έργος περιοχής ντα 21 μπρεσά κο έργος περιφερείας. Ανταλά μπρεσά τθεράας μπαρέ ευλογίες ντα μπουτ εμπειρίες σο ενθαρρυντέ-αμέν. Αλλά ανγκλ’ αμέντε ισινέ ατζέκ εκ ευλογία. Κο 1997, κο Αύγουστος, οντουβά σο μανγκάας μπουτ μπρεσά αβιλό-πες μπαγιά. Καλιντέ-αμέν τι υπηρετίνας κο Μπέθελ κο Ηνωμένες Πολιτείες. Ανταβά αβιλό-πες 38 μπρεσά αφού κερντάμ αίτηση πρώτη φαρ. Ο γιαβέρ μάσεκ, αρχισάλαμ αμαρί υπηρεσία κο Μπέθελ. Αμντισάλομας ότι ο υπεύθυνα πφραλά κο Μπέθελ μανγκένας τι βοηθίναβ για χάνικ, αλλά να αβιλέ-πες αντικάς ο πράγματα.

Κι αρχή διορισάλομ κο Τμήμας Υπηρεσίας. Οτθέ σικλιλόμ μπουτ πράγματα! Ο πφραλά οτθέ λένα μπουτ σημαντικές ντα δύσκολες ερωτήσεις σο κερένα ο πρεσβύτεροι ντα ο επίσκοποι περιοχής σαρό κο τθεμ. Εκτιμίναβα ι υπομονή ντα ι βοήθεια ι πφραλένγκι σο ντινέ-μαν εκπαίδευση. Αλλά πακιάβα ότι, αν κα διορίντιβαβας πάλι οτθέ, κα τθεράβας τι σικλιάβ μπουτ πράγματα ατζέκ οντουλέ πφραλένταρ.

Η Γκλόρια ντα με μανγκάσα μπουτ ι ζωή κο Μπέθελ. Πάντα μπεϊντίναας τι ιστιάς νωρίς, ντα ανταγιά συνήθεια σίγουρα βοηθίνελα κο Μπέθελ. Αφού νακχλό περίπου εκ μπρες, αρχισάλομ τι υπηρετίναβ σαρ βοηθός κι Επιτροπή Υπηρεσίας σο τθερέλα ο Κυβερνών Σώμας. Κο 1999, διορισάλομ τι υπηρετίναβ κο Κυβερνών Σώμας. Σικλιλόμ μπουτ πράγματα ανταλέ διορισμόστε. Αλλά ο πιο σημαντικός πράγμας σο σικλιλόμ ισί ότι ο σορό κι Χριστιανική κχανγκιρί νανέ εκ τζενό, αλλά ο Ιησούς Χριστός.

Κάνα σκεφτίναβα μι ζωή, μπάζιμα νιωθίναβα χάνικα σαρ ο προφήτης Αμώς. Ο Ιεχωβά ντινάς σημασία οντουλέ ταπεινέ τσομπανής σο κερέλας εκ απλή μπουτί κο χχελιά, σο χάνας-λεν αζομάν σάντε ο τσορορέ. Όμως, ο Ντεβέλ διοριντάς-λες τι αβέλ προφήτης ντα ευλογιντάς-λες μπουτ οντουλέ διορισμόστε. (Αμώς 7:​14, 15) Ο Ιεχωβά ντινάς σημασία μαν-ντα, ι τσσαβές εκχέ τσορορέ τζενέσκο σο ισινέ αγρότης κο Λίμπερτι κι Ιντιάνα, ντα ντινάς-μαν αζόμ μπουτ ευλογίες σο ναστί βακεράβα-λεν σαρέ! (Παροιμίες 10:​22) Παρόλο σο ισινόμας τσορορό κι αρχή, ακανά νιωθίναβα χουλανό πνευματικά, μπουτ πιο χουλανό από ό,τι κα μπορίναβας τι σκεφτίναβ!