Μερικά τζενέ σο διαβάνενα σουγκό ανταγιά ιστορία σκεφτιντέ-λες ανταβά. Αλλά ανταλά εδάφια κερένα λάφι ντουέ τζενένγκε σο τθερένας ο ναβ Μεφιβοσθέ, ντα αμέν μπορίνασα τι σικλιάς κάτι μπουτ σημαντικός οντουλέσταρ σο αβιλό-πες ανταλέ ιστοριάτε.

Ο βασιλιάς Σαούλ ι Ισραηλίσκο τθερέλας εφτά τσσαβέν ντα ντουέ τσσαΐν. Ο πρώτος τσσαβό λέσκο ισινέ ο Ιωνάθαν. Σοράν, ο βασιλιάς κερντάς εκχέ τσσαβές ι Ρεσφάσαρ σο βακερένας λέσκε Μεφιβοσθέ. Ο Ιωνάθαν-ντα τθερέλας εκχέ τσσαβές σο βακερένας λέσκε Μεφιβοσθέ. Οτθάρ, ο βασιλιάς Σαούλ τθερέλας εκχέ τσσαβές ντα εκχέ αγγονίς ι ίδιε ναβέσαρ, Μεφιβοσθέ.

Ο βασιλιάς Σαούλ γκιλό κόντρα ι Γαβαωνιτέντζαρ σο τζουβντιόνας κο Ισραήλ ντα προσπαθιντάς τι μουνταρέλ-λεν. Σαρ ντικχίντιβελα, μπουτ Γαβαωνίτες μουλέ. Ανταβά ισινέ μπαρό λάθος. Σόσκε; Επειδή αζομάν σο τζουβντιόλας ο Ιησούς του Ναυή, ο Ισραηλίτες αρχηγοί κερντέας συμφωνία τι τθερέν ειρήνη ι Γαβαωνιτέντζαρ.​—Ιησ. Ναυή 9:​3-27.

Ανταγιά συμφωνία τθερένας-λα κο μπρεσά-ντα κι βασιλιάσκε Σαούλ. Ο βασιλιάς να ατσσικιαρντάς ι συμφωνία, ντα προσπαθιντάς τι μουνταρέλ ι Γαβαωνιτέν. Αντικάς, ο Σαούλ ντα λέσκι φαμιλί τθερένας λένγκο ρατ οπρά-πουμέντε. (2 Σαμ. 21:1) Τελικά, αβιλό βασιλιάς ο Δαβίδ. Ο Γαβαωνίτες σο να μουλέ, βακερντέ λέσκε ανταλέ σοβαρέ πραγμάσκε. Ο Δαβίδ πουτσλάς-λεν σο έπρεπε τι αβέλ-πες για τι ιτσσάρντιβελ ανταγιά μπέτι αμαρτία σο κερντάς ο Σαούλ ντα τι ευλογίνελ ο Ιεχωβά ο τθεμ. Αντίς τι μανγκέν λοβέ, ο Γαβαωνίτες μανγκλέ εφτά τσσαβέν ι Σαουλίσκε για τι μουνταρέν-λεν. (Αριθ. 35:​30, 31) Ο Δαβίδ κερντάς οντουβά σο μανγκλέ.​—2 Σαμ. 21:​2-6.

Ο Σαούλ ντα ο Ιωνάθαν μουλέας κο τζένγκι, αλλά ο τσσαβό ι Ιωναθανίσκο ο Μεφιβοσθέ ισινέ τζουβντό. Ατσσιλόας ανάπηρος από εκ ατύχημας σο τθερέλας κάνα ισινέ χουρντό ντα να γκιλό παλάλ πι παππούστε κάνα τσσουντάς-λεν ι Γαβαωνιτέντζαρ. Ο Δαβίδ κερντάας συμφωνία ι Ιωναθανίσαρ ότι κα αβένας αμαλά, ντα ανταγιά συμφωνία κα κερέλας λατσσιπέ κι Ιωναθανίσκε τσσαβέ, σο αντρέ λέντε ισινέ ο Μεφιβοσθέ-ντα. (1 Σαμ. 18:1· 20:​42) Η ιστορία βακερέλα: «Ο βασιλιάς [Δαβίδ] πφαμπιλό ι Μεφιβοσθέσκε, σο ισινέ τσσαβό ι Ιωναθανίσκο ντα αγγόνι ι Σαουλίσκο, επειδή χαλιλίας σοβέλ ανγκλάλ κο Ιεχωβά».​—2 Σαμ. 21:7.

Ο Δαβίδ κερντάς οντουβά σο μανγκλέ λέσταρ ο Γαβαωνίτες. Ντινάς ντουέ τσσαβέν ι Σαουλίσκε, σο εκ τανό λένταρ βακέρντιβελας Μεφιβοσθέ, ντα παντζέ αγγονίν ι Σαουλίσκε. (2 Σαμ. 21:8, 9) Ανταλέσαρ σο κερντάς ο Δαβίδ, ο τθεμ τθερέλας ι ευλογία ι Ιεχωβάσκι.

Ανταβά σο αβιλό-πες σικλιαρέλα-αμέν κάτι μπουτ σημαντικός. Ο νόμος ι Ντεβλέσκο ισινέ ξεκάθαρος. Βακερέλας: «Ο τσσαβέ δεν πρέπει τι μερέν οντουλένγκε σο κερένα λένγκε νταντά». (Δευτ. 24:​16) Ο Ιεχωβά να κα δεχτίνελας οντουβά σο αβιλό-πες κο ντούι τσσαβέ κι Σαουλίσκε ντα κο παντς αγγόνια λέσκε άμα ισινέ αθώοι. Οντουβά νόμος βακερέλας ακαβά-ντα: «Ο κάθε εκ κα μερέλ σάντε πιρέ αμαρτιάκε». Ντικχίντιβελα ότι οντουλά εφτά τζενέ σο μουλέ τσσουντέας-λεν βον-ντα ι Γαβαωνιτέντζαρ. Οτθάρ, ποκιντέ πουμαρέ αμαρτιάκε.

Ανταγιά ιστορία σικαβέλα ότι εκ τζενό να αβέλα-πες τι σκεφτίνελ ή τι βακερέλ ότι κερντάς σο βακέρντιλο λέσκε για τι αρακχέλ δικαιολογίες εκχέ γκεραλέ πραγμάσκε σο κερντάς. Εκ γκοντιαβέρ παροιμία βακερέλα: «Κερ ίσιος ο ντρομ τι πιντρένγκο, ντα κάι-ντα πφιρέσα κα αβές αρακχαντό».​—Παρ. 4:​24-27· Εφεσ. 5:15.