1. Σόσκε ισινάμ σίγουροι ότι τζουβντιάσα κο «τελευταία ντιβεσά»;

ΣΑΡΕ οντουλά σο μπιάντιλε σοράν κατά 1914, τζουβντιόνα σαρί πουμαρί ζωή κο «τελευταία ντιβεσά» ανταλέ ντουνιάσκε. (2 Τιμ. 3:1) Σαρέ ασουντάμ οντουλένγκε σο βακερντάς ο Ιησούς ανταλέ βακιτίσκε. Αντρέ ανταλέντε ισί ο τζένγκια, η μποκχ, ο σεισμοί, ο νασφαλίματα, ο μπέτι πράγματα σο αβένα ατζέ πιο μπουτ ντα η κόντρα σο τζάνα ο τζενέ ι Ιεχωβάσκε λαόσαρ. (Ματθ. 24:3, 7-9, 12· Λουκ. 21:​10-12) Ντα τθεράσα ντικχλό τζενέν τι αβέν αντικάς σαρ βακερντάας ο απόστολος Παύλος. (Ντικχ ο πλαίσιος « Σαρ Ισί ο Τζενέ Ακανά») Σαρ λαός ι Ιεχωβάσκο, ισινάμ σίγουροι ότι τζουβντιάσα «κο τελευταία ντιβεσά».​—Μιχ. 4:1.

2. Καλέ ερωτησιέντε πρέπει τι απαντίνας;

² Ακανά σο νακχλέ αζόμ μπρεσά κατά 1914 πρέπει τι τζουβντιάσα κο τέλος κι “τελευταίε ντιβεσένγκο”. Αφού ο τέλος ισί αζόμ πασέ, πρέπει τι τζανάς ο απαντήσεις ακαλέ ερωτησιέντε: Καλά πράγματα κα αβέν-πες κο τέλος κι “τελευταίε ντιβεσένγκο”; Ντα σο μανγκέλα ο Ιεχωβά τι κεράς καζόμ μπεκλεντίνασα τι αβέν-πες ανταλά;

3. Καβά λάφι κα βακερέν ο τθεμά σαρ σικαβέλα η προφητεία ι εδαφιόνγκι 1 Θεσσαλονικείς 5:​1-3;

³ Διαβάνεν 1 Θεσσαλονικείς 5:​1-3. Ο Παύλος κερέλα λάφι “ι Ιεχωβάσκε ντιβεσέσκε”. Ατθέ ανταβά λάφι βακέρντιβελα ι βακιτίσκε σο κα αρχίνελ αζομάν σο ο κυβερνήσεις κα τσσουβέν-λεν ι Μπαρέ Βαβυλωνάσαρ, σο ισί σαρέ ο ψεύτικες θρησκείες ι ντουνιάσκε, ντα κα τελειώνελ κο Αρμαγεδδώνας. (Αποκ. 16:​14, 16· 17:5) Χάνικ πριν τι αρχίνελ οντουβά «ντιβές», ο τθεμά κα βακερέν: «Ειρήνη ντα ασφάλεια!» Ασουνάσα ασακέ  λάφια κατά αρχηγοί ι ντουνιάσκε κάνα βακερένα ότι ο τθεμά αρακχένα-λεν γιαβερέ τθεμέντζαρ. * Όμως, ο λάφι «ειρήνη ντα ασφάλεια» σο βακερέλα η Γραφή κα αβέλ κάτι διαφορετικός. Σόσκε; Κάνα κα βακέρντιβελ, ο τζενέ μπορεί τι πακιάν ότι ο αρχηγοί κερντέ ι ντουνιάς τι αβέλ πιο ασφαλής. Αλλά κι πραγματικότητα, κα αρχίνελ η «μπαρί στεναχώρια» ντα κα αβέλ «ξαφνική καταστροφή».​—Ματθ. 24:21.

4. (α) Σο να τζανάσα ατζέκ ι λαφίσκε «ειρήνη ντα ασφάλεια»; (β) Σο τζανάσα ανταλέ λαφίσκε;

⁴ Τζανάσα μερικά πράγματα ι λαφίσκε «ειρήνη ντα ασφάλεια». Αλλά ισί γιαβερά πράγματα σο να τζανάσα-λεν. Να τζανάσα σο κα κερέλ ι αρχηγόν ανταλέ ντουνιάσκε τι βακερέν ανταβά λάφι ή σαρ κα βακέρντιβελ. Ντα να τζανάσα άμα κα βακέρντιβελ σάντε εκ φαρ ή μπουτ φαρ. Σο-ντα τι αβέλ-πες, τζανάσα ακαβά: Ο αρχηγοί ι ντουνιάσκε ναστί ανένα ειρήνη κο ντουνιάς, οντουλέσκε δεν πρέπει τι χουχάντιβας κατά λάφι σο κα βακερέν. Η Γραφή βακερέλα αμένγκε τι τθεράς αμαρί γκοντί για τι αγαβάς κάνα κα ασούντιβελ ανταβά λάφι. Κα σικαβέλ ότι αβιλό ο σαάτι τι αρχίνελ «ο ντιβές ι Ιεχωβάσκο»!

5. Σαρ βοηθίνενα-αμέν ο εδάφια 1 Θεσσαλονικείς 5:​4-6 τι αβάς έτοιμοι “ι Ιεχωβάσκε ντιβεσέσκε”;

⁵ Διαβάνεν 1 Θεσσαλονικείς 5:​4-6. Ο λάφια ι Παυλόσκε σικαβένα αμένγκε σο τι κεράς για τι αβάς έτοιμοι “ι Ιεχωβάσκε ντιβεσέσκε”. Δεν πρέπει τι «σοβάς σαρ ο γιαβερά». Πρέπει τι «ατσσάς τζανγκαντέ». Για παράδειγμας, πρέπει τι τθεράς αμαρέ γιακχά πουταρντέ για μα τι ανακατούντιβας κο πολιτικά ανταλέ ντουνιάσκε. Άμα κα κεράας-λες ανταβά, κα “τθεράας σχέση ανταλέ ντουνιάσαρ”. (Ιωάν. 15:​19) Τζανάσα ότι σάντε η Βασιλεία ι Ντεβλέσκι κα ανέλ ειρήνη κο ντουνιάς.

6. Σο πρέπει τι κερέν ο τζενέ ντα σόσκε μανγκάσα τι βοηθίνας-λεν;

⁶ Να ερεσέλα σάντε τι ατσσάς τζανγκαντέ αμέν, πρέπει τι βοηθίνας ι γιαβερέν-ντα τι τζανγκάντιβεν ντα τι σικλιόν σο βακερντάας η Γραφή ότι κα αβέλας-πες κο ντουνιάς. Μα τι μπιστράς ότι, κάνα κα αρχίνελ η μπαρί στεναχώρια, κα αβέλ μπουτ αργά τι λεν ο τζενέ ι Ιεχωβάσκο ντρομ. Άκ’ σόσκε ισί αζόμ σημαντικός τι κεράς ο έργος ακανά! *

7. Σο μανγκέλα αμένταρ ο Ιεχωβά ακανά;

⁷ Κο χάνικ σαάτι σο ατσσόλα μέχρι τι αρχίνελ λέσκο «ντιβές», ο Ιεχωβά μανγκέλα αμένταρ τι κεράς μπουτ πράγματα κο έργος. Πρέπει τι αβάς σίγουροι ότι “τθεράσα μπουτ πράγματα τι κεράς κο έργος κι Κυριόσκο”. (1 Κορ. 15:​58) Ο Ιησούς βακερντάας καβά έργος κα κεράας. Κάνα κερντάς λάφι σαρέ ι σημαντικέ πραγματένγκε σο κα αβένας-πες κο τελευταία ντιβεσά, βακερντάς ακαβά-ντα: «Σαρέ κο τθεμά, πρέπει  πρώτα τι βακέρντιβεν ο λατσσέ αμπέρια». (Μάρκ. 13:4, 8, 10· Ματθ. 24:​14) Ανέν τουμαρέ γκοντιάτε ακαβά: Κάθε φαρ σο τζάνα κο έργος, βοηθίνενα τι νικιόλ μπαγιά ανταγιά προφητεία ι Γραφιάκι!

8. Σαρ τζανάσα ότι ο έργος ι Βασιλειάκο μπαριόλα ατζέκ;

⁸ Σο κα βακεράς ι εργόσκε; Κάθε μπρες, ανταβά έργος μπαριόλα. Για παράδειγμας, ανέν τουμαρέ γκοντιάτε καζόμ τζενέ βακερένα ο λατσσέ αμπέρια σαρό κο ντουνιάς ανταλέ τελευταίε ντιβεσέντε. Κο 1914, ισινέ 5.155 πφραλά 43 τθεμέντε. Αντιβές, ισί περίπου 8,5 εκατομμύρια πφραλά 240 τθεμέντε! Ντα αμαρό έργος να τελειωσάλο. Πρέπει τι συνεχίνας τι βακεράς ι τζενένγκε ότι σάντε η Βασιλεία ι Ντεβλέσκι κα νασκιαρέλ σαρέ αμαρέ προβλήματα.​—Ψαλμ. 145:​11-13.

9. Σόσκε δεν πρέπει τι τσσιναβάς τι βακεράς ο αμπέρια ι Βασιλειάκε;

⁹ Ο έργος ι Βασιλειάκο κα τελειώνελ σάντε κάνα κα βακερέλ-λες ο Ιεχωβά. Καζόμ σαάτι ατσσόλα για τι σικλιόν ο τζενέ ι Ιεχωβά Ντεβλέσκε ντα ι Ιησού Χριστόσκε; (Ιωάν. 17:3) Να τζανάσα. Τζανάσα όμως ότι, μέχρι τι αρχίνελ η μπαρί στεναχώρια, σαρέ οντουλά σο “λένγκο γκι μανγκέλα τι σικλιόλ ι αλήθεια σο ντέλα ζωή για πάντα” μπορίνενα τι ασουνέν ο λατσσέ αμπέρια ντα τι λεν ι Ιεχωβάσκο ντρομ. (Πράξ. 13:​48) Σαρ κα βοηθίνας-λεν πριν τι αβέλ μπουτ αργά;

10. Σο ντέλα-αμέν ο Ιεχωβά για τι σικλιαράς ι αλήθεια κο τζενέ;

¹⁰ Αντράλ κατά οργάνωση, ο Ιεχωβά ντέλα-αμέν σαρέ οντουλά σο χρειαζίντιβασα για τι σικλιαράς ι αλήθεια κο τζενέ. Για παράδειγμας, λάσα σικλιαριπέ κι συνάθροιση σο κεράσα αντρέ κι εβδομάδα. Ανταγιά συνάθροιση σικλιαρέλα-αμέν σο τι βακεράς ι πρώτη φαρ σο τζάσα ντα κο επανεπισκέψεις. Ντα σικλιάσα σαρ τι κεράς μελέτες. Η οργάνωση ι Ιεχωβάσκι ντινάς-αμέν ο Εργαλεία για τι Σικλιαράς. Ανταλά εργαλεία βοηθίνενα-αμέν . . .

• τι πουτράς συζητήσεις,

• τι κεράς ι τζενέν τι μανγκέν τι ασουνέν ο λατσσέ αμπέρια,

• τι κεράς ι τζενέν τι μανγκέν τι σικλιόν πιο μπουτ,

• τι σικλιαράς ι αλήθεια οντουλέντε σο κεράσα μελέτη ντα

• τι βακεράς οντουλένγκε σο μανγκένα τι σικλιόν τι τζαν αμαρέ ιστοτοπόστε ντα κι Αίθουσα Βασιλείας.

 Σίγουρα, να ερεσέλα σάντε τι τθεράς ανταλά εργαλεία. Πρέπει τι χρησιμοποιήνας-λεν. * Για παράδειγμας, άμα κα τθερέν εκ λατσσί συζήτηση εκχέ τζενέσαρ ντα κα μουκχέν λέσκε εκ φυλλάδιος ή περιοδικός, κα τθερέλ τι διαβάνελ κάτι μέχρι τι κερέν λέσαρ λάφι πάλι. Ο κάθε εκ αμένταρ πρέπει τι ντικχέλ σαρ κα κερέλ μπουτ πράγματα κο έργος κάθε μάσεκ.

11. Σόσκε κερντιλέ ο Μαθήματα ι Γραφιάκε κατά Ίντερνετ;

¹¹ Κάτι γιαβέρ σο σικαβέλα σαρ βοηθίνελα ο Ιεχωβά ι τζενέν τι σικλιόν ι αλήθεια ισί ο Μαθήματα ι Γραφιάκε κατά Ίντερνετ σο ισί κο ιστότοπος jw.org^®. Σόσκε κερντιλέ ανταλά μαθήματα; Κάθε μάσεκ, μπουτ τζενέ σαρό κο ντουνιάς ρόντενα τι σικλιόν ι Γραφιάκε κο Ίντερνετ. Ο μαθήματα αμαρέ ιστοτοπόστε βοηθίνενα ι τζενέν τι αρχίνεν τι σικλιόν ι αλήθεια σο ισί κο Λάφι κι Ντεβλέσκο. Ισί γιαβερά τζενέ σο ασουνένα-τουμέν αλλά σακιντίνενα τι κερέν μελέτη. Σικαβέν λένγκε ο μαθήματα κο ιστότοπος ή μπουτσσαβέν λένγκε ο σύνδεσμος για τι τζαν κορκορέ οτθέ. *

12. Σο σικλιόλα εκ τζενό κατά Μαθήματα ι Γραφιάκε σο ισί κο Ίντερνετ;

¹² Ο Μαθήματα ι Γραφιάκε κατά Ίντερνετ κερένα λάφι ακαλέ πραγματένγκε: «Η Αγία Γραφή ντα Οντουβά σο Κερντάς-λα τι Γραφίντιβελ», «Σημαντικά Τζενέ ι Γραφιάκε» ντα «Ο Λάφια ι Γραφιάκε Ντένα Ελπίδα». Ανταλέ μαθηματένταρ εκ τζενό κα σικλιόλ:

• Σαρ η Γραφή βοηθίνελα ι τζενέν

• Κον ισί ο Ιεχωβά, ο Ιησούς ντα ο άγγελοι

• Σόσκε κερντάς ο Ντεβέλ ι τζενέν

• Σόσκε ισί βάσανα ντα γκεραλιπέ κο ντουνιάς

Ο μαθήματα σικαβένα επίσης σαρ ο Ιεχωβά . . .

• κα νασκιαρέλ ο βάσανα ντα ο μεριπέ,

• κα ανέλ ι μουλέν πάλι κι ζωή ντα

• κα ανέλ πι Βασιλεία για τι νασκιαρέλ ι τζενένγκε κυβερνήσεις, σο ναστί βοηθίνενα ι τζενέν.

13. Ερεσέλα τι κερέλ εκ τζενό μαθήματα κατά Ίντερνετ; Εξηγίνεν.

¹³ Να ερεσέλα τι κερέλ εκ τζενό μαθήματα κατά Ίντερνετ. Πρέπει τι κερέλ μελέτη-ντα. Ο Ιησούς ντινάς-αμέν ο προνόμιος τι κεράς μαθητέν. Πακιάσα ότι ο τζενέ κα διαβάνεν ο μαθήματα κατά Ίντερνετ, κα μπεϊντίνεν οντουλά σο σικλιόνα ντα κα μανγκέν τι σικλιόν πιο μπουτ. Αντικάς, μπορεί τι μανγκέν τι κερέν μελέτη κατά Γραφή. Κο τέλος κι κάθε μαθημάσκο, ο τζενέ διαβάνενα ότι μπορίνενα τι μανγκέν εκχέ Μαρτυράσταρ τι σικλιαρέλ-λεν κατά Γραφή. Αμαρέ ιστοτοπόστε, πιο μπουτ από 230 τζενέ σαρό κο ντουνιάς μανγκένα μελέτη κάθε ντιβές! Ανταβά σικλιαριπέ ισί μπουτ σημαντικός!

14. Σο πρέπει τι προσπαθίνας τι κεράς ντα σόσκε, σαρ βακερέλα ο Ιησούς κο εδάφια Ματθαίος 28:​19, 20;

¹⁴ Διαβάνεν Ματθαίος 28:​19, 20. Καζόμ κεράσα μελέτες, πρέπει τι κεράς σο νακχέλα αμαρέ βαστένταρ για τι “κεράς μαθητέν . . . , ντα τι σικλιαράς-λεν τι κερέν σαρέ οντουλά σο βακερντάς [ο Ιησούς]”. Πρέπει τι βοηθίνας ι τζενέν τι αγαβέν καζόμ σημαντικός ισί τι τσσίντεν κατά Ιεχωβά ντα λέσκε Βασιλειάταρ. Πρέπει τι κεράς ο πιο λατσσό για τι βοηθίνας-λεν τι κερέν οντουλά σο σικλιόνα, τι ντεν πουμαρό λάφι ότι κα τζουβντιόν ι Ιεχωβάσκε ντα τι μπολντιόν. Σάντε αζομάν κα ατσσόν τζουβντέ κι Ιεχωβάσκο ντιβές.​—1 Πέτρ. 3:21.

15. Καλέ πραγμάσκε νανέ-αμέν σαάτι, ντα σόσκε;

 ¹⁵ Σαρ βακερντάμ πιο οπρέ, ατσσόλα μπουτ χάνικ σαάτι μέχρι τι αβέλ ο τέλος ανταλέ ντουνιάσκο. Οντουλέσκε, νανέ-αμέν σαάτι τι συνεχίνας ι μελέτη τζενέντζαρ σο να κερένα αλλαγές για τι σικαβέν ότι μανγκένα τι αβέν μαθητές ι Χριστόσκε. (1 Κορ. 9:​26) Ο έργος πρέπει τι αβέλ-πες ακανά! Ισί μπουτ τζενέ ατζέ σο πρέπει τι ασουνέν ο αμπέρια ι Βασιλειάκε πριν τι αβέλ μπουτ αργά.

16. Σο πρέπει τι κεράς σαρέ σαρ βακερένα ο εδάφια Αποκάλυψη 18:2, 4, 5, 8; (Ντικχ ι υποσημείωση-ντα)

¹⁶ Διαβάνεν Αποκάλυψη 18:2, 4, 5, 8. Ανταλά εδάφια σικαβένα κάτι γιαβέρ σο μανγκέλα ο Ιεχωβά πι υπηρετόνταρ. Πρέπει τι αγαντίντιβελ ότι σαρέ ο αληθινοί Χριστιανοί ατσσόνα ντουρ κατά Μπαρί Βαβυλώνα. Πριν τι σικλιόλ ι αλήθεια, εκ τζενό σο κερέλα μελέτη μπορεί τι ισινέ κι ψεύτικη θρησκεία. Μπορεί τι τζάλας οτθέ σο ντένας λατρεία ο τζενέ οντουλέ θρησκειάκε ντα τι κερέλας οντουλά σο κερένας βον. Ή μπορεί τι ντέλας λοβέ ανταλέ θρησκειάτε. Για τι αβέλ ευαγγελιζόμενος εκ ασακό τζενό, πρέπει τι τσσιναβέλ ντιπ κατά ψεύτικη θρησκεία. Πρέπει τι μπουτσσαβέλ εκ γράμμας για τι βακερέλ ότι νασέλα πι πουρανέ κχανγκιριάταρ ή εκχέ γιαβερέ τροπόσαρ τι τσσιναβέλ ντιπ λάταρ ντα σαρέ κατά γιαβερά οργανώσεις σο τθερένα σχέση ι Μπαρέ Βαβυλωνάσαρ. *

17. Σο μπουτί δεν πρέπει τι κερέλ εκ Χριστιανός, ντα σόσκε;

¹⁷ Εκ αληθινός Χριστιανός πρέπει τι αβέλ σίγουρος ότι λέσκι μπουτί να τθερέλα καέκ σχέση ι Μπαρέ Βαβυλωνάσαρ. (2 Κορ. 6:​14-17) Για παράδειγμας, ναστί ασταρέλα μπουτί εκχέ κχανγκιριάτε. Εκ Χριστιανός σο τθερέλα αφεντικός δεν πρέπει τι κερέλ μπαρί μπουτί τθανέντε σο τθερένα σχέση ι ψεύτικε θρησκειάσαρ. Άμα η μπουτί ισί λέσκι, σίγουρα να κα μανγκέλ ούτε κα δεχτίνελ τι κερέλ μπουτί ι Μπαρέ Βαβυλωνάκε. Σόσκε μανγκάσα τι ατσσάς σταθεροί ανταλέστε; Επειδή να μανγκάσα τι τθεράς καέκ σχέση ι μπουτιέντζαρ ντα ι αμαρτιέντζαρ σο κερένα ο ψεύτικες θρησκείες σο ισί μελαλέ κι Ντεβλέσκε γιακχά.​—Ησ. 52:​11. *

18. Σαρ ατσσιλό σταθερός κο αρχές κι Γραφιάκε εκ πφραλ;

 ¹⁸ Μπουτ μπρεσά πιο τζανγκλέ, εκ εργολάβος μανγκλάς εκχέ πρεσβυτερόσταρ, σο τθερέλας πιρί μπουτί, τι τζαλ εκχέ κχανγκιριάτε κι πόλη σο μπεσέλας για τι κερέλ εκ χουρντί μπουτί. Ο εργολάβος τζανέλας ότι ο πφραλ ποτές να κερέλας μπουτί κχανγκιρίντε. Αλλά ανταγιά φαρ να αρακχέλας τζενές τι κερέλ ι μπουτί. Ο πφραλ όμως ατσσιλό σταθερός κο αρχές κι Γραφιάκε ντα να γκιλό οντουλέ μπουτιάτε. Ι γιαβέρ εβδομάδα, κι εφημερίδα ισινέ εκ φωτογραφία σο σικαβέλας εκχέ γιαβερέ ξυλουργός τι τσσουβέλ εκ σταυρός κι κχανγκιρί. Άμα ο πφραλ κα τζάλας οντουλέ μπουτιάτε, κι εφημερίδα μπορεί τι αβέλας λέσκι φωτογραφία. Καζόμ μπουτ κα περέλας κο γιακχά κι πφραλένγκε άμα κα κερέλας-λες ανταβά! Ντα ανέν τουμαρέ γκοντιάτε σαρ κα νιωθίνελας ο Ιεχωβά.

19, 20. (α) Σο σικλιλάμ μέχρι ακανά; (β) Σο γιαβέρ πρέπει τι σικλιάς;

¹⁹ Σαρ βακερέλα η Γραφή, η σημαντική προφητεία σο μπεσάσα τι αβέλ-πες ατζεχάνικ κο ντουνιάς ισί ότι ο τθεμά κα βακερέν «ειρήνη ντα ασφάλεια». Οντουλένταρ σο σικλιαρντάς-αμέν ο Ιεχωβά, τζανάσα ότι ο τθεμά ναστί κα ανέν αληθινή ειρήνη σο κα ατσσόλ. Σο πρέπει τι κεράς πριν τι βακέρντιβελ ανταβά λάφι ντα πριν τι αβέλ η ξαφνική καταστροφή; Ο Ιεχωβά μανγκέλα τι κεράς μπουτ πράγματα κο έργος για τι βακεράς ο αμπέρια ι Βασιλειάκε ντα τι κεράς πιο μπουτ μαθητέν. Καζόμ κεράσα-λες ανταβά, πρέπει τι ατσσάς ντουρ κατά ψεύτικη θρησκεία. Αντρέ κο πράγματα σο πρέπει τι κεράς ισί τι τσσιναβάς ντιπ κατά Μπαρί Βαβυλώνα ντα μα τι κεράς μπουτί σο τθερέλα σχέση λάσαρ.

²⁰ Κα αβέν-πες γιαβερά-ντα πράγματα κο «τελευταία ντιβεσά». Επίσης, ισί γιαβερά-ντα πράγματα σο μανγκέλα αμένταρ ο Ιεχωβά. Καλά ισί ανταλά, ντα σαρ κα ετοιμάνας-αμέν σαρέ οντουλένγκε σο κα αβέν-πες ατζεχάνικ; Κα ντικχάς κο γιαβέρ μάθημας.