1. Σαρ σικαβένα οντουλά σο ντένα λατρεία ι Ιεχωβάς ότι μανγκένα ο εκ ι γιαβερές;

ΣΑΡΟ κο ντουνιάς, οντουλά σο ντένα λατρεία ι Ιεχωβάς ισί εκ φαμιλί. Ισί πφραλά ντα πφενιά σο μανγκένα ο εκ ι γιαβερές. (1 Ιωάννη 4:​16, 21) Ισί φαρ σο κερένα μπαρέ θυσίες πουμαρέ πφραλένγκε, αλλά ο πιο μπουτ φαρ σικαβένα πουμαρί αγάπη μπουτέ χουρντέ πραγματέντζαρ σο κερένα λένγκε. Για παράδειγμας, μπορεί τι βακερέν εκ λατσσό λάφι πουμαρέ πφραλένγκε ή τι σικαβέν λένγκε λατσσιπέ. Κάνα σκεφτίνασα ι γιαβερέν, μοιάζασα αμαρέ Νταντέστε σο ισί κο ουρανός.​—Εφεσίους 5:1.

2. Σαρ μοιάζελας ο Ιησούς πι Νταντέστε κάνα σικαβέλας αγάπη;

² Ο Ιησούς μοιάζελας τέλεια πι Νταντέστε. Πάντα σικαβέλας λατσσιπέ κο γιαβερά. Βακερντάς: «Ελάν μάντε, σαρέ τουμέν σο μαρένα-τουμέν ντα τθερένα μπουτ φορτία οπρά-τουμέντε, ντα με κα λοκχιαράβ-τουμέν». (Ματθαίος 11:​28, 29) Κάνα μοιάζασα κο Ιησούς ντα “πφαμπάσα οντουλέσκε σο να ντένα-λες  σημασία”, κα κεράς ι Ιεχωβάς τι χαιρίνελ ντα κα χαιρίνας αμέν-ντα. (Ψαλμός 41:1) Ανταλέ μαθημάστε, κα ντικχάς σαρ μπορίνασα τι σκεφτίνας αμαρί φαμιλί, αμαρέ πφραλέν ντα πφενίν ντα οντουλέν σο αρακχάσα κο έργος.

3. Σαρ μπορίνελα εκ μουρς τι σκεφτίνελ πι ρομνιά; (Ντικχ ι φωτογραφία σο ισί κι αρχή)

³ Ο παντριμέ μουρσά πρέπει τι ντεν ο παράδειγμας ντα τι σικαβέν καζόμ μπουτ πφαμπόνα πουμαρέ φαμιλιάκε. (Εφεσίους 5:​25· 6:4) Η Γραφή βακερέλα ότι βον πρέπει τι σκεφτίνεν ντα τι αγαβέν πουμαρέ ρομνίν. (1 Πέτρου 3:7· υποσημείωση) Εκ μουρς σο αγαβέλα πι ρομνιά τζανέλα ότι παρόλο σο μπουτέ πραγματέντε ισί διαφορετικός πι ρομνιάταρ, νανέ πιο λατσσό λάταρ. (Γένεση 2:​18) Πφαμπόλα για το αισθήματα λάκε, εκτιμίνελα-λα ντα σικαβέλα λάκε σεβασμός. Εκ τζουβέλ κατά Καναδάς βακερντάς: «[Μο ρομ] ποτές να πακιάλα ότι μο αισθήματα να τθερένα σημασία ούτε βακερέλα: “Δεν πρέπει τι νιωθίνες αντικάς”. Επίσης, ασουνέλα-μαν με προσοχή. Κάνα βοηθίνελα-μαν τι διορθώναβ μι άποψη εκχέ πραγμάστε, κερέλα-λες ανταβά λατσσιμάσαρ».

4. Σαρ μπορίνελα εκ μουρς τι σικαβέλ ότι πφαμπόλα για το αισθήματα πι ρομνιάκε με το τρόπος σο συμπεριφερίντιβελα κο γιαβερά τζουβλιά;

⁴ Εκ μουρς σο πφαμπόλα για το αισθήματα πι ρομνιάκε ποτές να περέλα γιαβερέ τζουβλίνγκε ούτε σικαβέλα λένγκε ενδιαφέρον σο νανέ σωστός. Ντα να κερέλα-λες ανταβά ούτε κο κοινωνικά δίκτυα ούτε κο Ίντερνετ. (Ιώβ 31:1) Επίσης, να ντικχέλα ιστοσελίδες σο νανέ λατσσέ. Ατσσόλα πιστός πι ρομνιάτε επειδή μανγκέλα-λα ντα επειδή μανγκέλα ι Ιεχωβάς ντα μισίνελα ο γκεραλιπέ.​—Διαβάνεν Ψαλμός 19:​14· 97:10.

5. Σαρ μπορίνελα εκ ρομνί τι σκεφτίνελ πι ρομές;

⁵ Κάνα εκ μουρς σικαβέλα αγάπη σαρ ο Ιησούς Χριστός, σο ισί ο σορό σαρέ ι μουρσένγκο, κα αβέλ πιο εύκολος λέσκε ρομνιάκε τι τθερέλ «μπαρό σεβασμός» λέσκε. (Εφεσίους 5:​22-25, 33) Ντα κάνα βόι σεβάνελα-λες, κα προσπαθίνελ τι αγαβέλ λέσκε αισθήματα ντα τι συμπεριφερίντιβελ λέσκε λατσσιμάσαρ κάνα βοβ ασχολίντιβελα ι κχανγκιριάκε πραγματέντζαρ ή κάνα πρέπει τι αντιμετωπίνελ προβλήματα. Εκ πφραλ κατά Βρετανία βακερέλα: «Μερικές φορές, μι ρομνί αγαβέλα ότι κάτι απασχολίνελα-μαν επειδή ντικχέλα ότι μι συμπεριφορά αλλάνελα. Κάνα αβέλα-πες ανταβά, ακολουθίνελα ι αρχή σο ισί κο εδάφιος Παροιμίες 20:5, ατζέ-ντα αν κα χρειαζίντιβελ τι μπεκλεντίνελ τι αβέλ ο σωστός σαάτι για τι σικλιόλ σο σκεφτίναβα, αν βέβαια ισί κάτι σο αβέλα-πες τι βακεράβ-λες λάκε».

6. Σαρ μπορίνασα σαρέ τι ενθαρρύνας ι τσσαβέν τι σκεφτίνεν ι γιαβερέν ντα τι σικαβέν λατσσιπέ, ντα σαρ κα βοηθίντιβεν ο τσσαβέ;

⁶ Κάνα ο ντατ ντα η ντάι σκεφτίνενα ο εκ ι γιαβερές, ντένα λατσσό παράδειγμας πουμαρέ τσσαβέντε. Πρέπει επίσης τι σικλιαρέν πουμαρέ τσσαβέν τι σκεφτίνεν ι γιαβερέν ντα τι σικαβέν λατσσιπέ. Για παράδειγμας, μπορίνενα τι σικλιαρέν-λεν μα τι τθάβντεν κι Αίθουσα Βασιλείας. Ή κάνα ισί εκχέ παρεάτε, μπορίνενα τι βακερέν  πουμαρέ τσσαβένγκε τι μπεκλεντίνεν τι τσσουβέν πέσκε χαμπέ πρώτα ο μπαρέ. Σίγουρα σαρέ κι κχανγκιρί μπορίνενα τι υποστηρίνεν ι νταντέν ντα ι νταΐν. Οτθάρ, πρέπει τι ισαράς εκχέ τσσαβές κάνα κερέλα κάτι λατσσό, σαρ για παράδειγμας, κάνα πουτρέλα αμένγκε ι πόρτα. Ανταβά κα κερέλ ι τσσαβές τι νιωθίνελ λατσσές ντα κα βοηθίνελ-λες τι σικλιόλ ότι «ισί πιο ευτυχισμέ εκ τζενό όταν ντέλα παρά όταν λέλα».​—Πράξεις 20:35.

7. Σαρ σκεφτιντάς ο Ιησούς εκχέ κασουκές, ντα σο μπορίνασα τι σικλιάς κατά Ιησούσκο παράδειγμας;

⁷ Εκ ντιβές σο ο Ιησούς ισινέ κι Δεκάπολη, «αντέ λέσκε εκχέ κασουκέ τζενές σο κερέλας λάφι με δυσκολία». (Μάρκος 7:​31-35) Ο Ιησούς κερντάς-λες λατσσές, αλλά όχι ανγκλάλ κο γιαβερά. Σόσκε; Επειδή οντουβά τζενό να ασουνέλας, μάλλον να νιωθίνελας άνετα κάνα ισινέ μπουτ τζενέ πασέ λέστε. Ο Ιησούς αγαντάς σαρ νιωθίνελας ντα οτθάρ λιντάς-λες εκχέ τθανέστε σο να ισινέ τζενέ ντα κερντάς-λες λατσσές. Αμέν ναστί κεράσα θαύματα, αλλά πρέπει τι σκεφτίνας ο ανάγκες ντα ο αισθήματα αμαρέ πφραλένγκε ντα τι σικαβάς λένγκε λατσσιπέ. Ο απόστολος Παύλος γραφιντάς: «Τι σκεφτίνας ντα τι βοηθίνας ο εκ ι γιαβερές για τι σικαβάς αγάπη ντα τι κεράς λατσσέ πράγματα». (Εβραίους 10:​24) Ο Ιησούς αγαβέλας σαρ νιωθίνελας οντουβά τζενό ντα σικαντάς λέσκε λατσσιπέ. Σο σουκάρ παράδειγμας αμένγκε!

8, 9. Σαρ μπορίνασα τι σικαβάς ότι πφαμπάσα ι πφουρένγκε ντα ι νασφαλένγκε; (Βακερέν παραδείγματα)

⁸ Τι σκεφτίνεν ι πφουρέν ντα ι νασφαλέν. Οντουβά σο σικαβέλα ότι ισινάμ αληθινοί Χριστιανοί ισί η αγάπη, όχι ο μπουτ πράγματα σο κεράσα. (Ιωάννης 13:​34, 35) Η αγάπη τσσίντελα-αμέν τι κεράς σο νακχέλα αμαρέ βαστέσταρ για τι βοηθίνας ι πφουρέ ή ι νασφαλέ πφραλέν τι τζαν κο συναθροίσεις ντα τι κερέν έργος. Βοηθίνασα-λεν ατζέ-ντα άμα νανέ αμένγκε εύκολος ή ατζέ-ντα άμα ναστί κερένα μπουτ πράγματα. (Ματθαίος 13:​23) Ο Μάικλ, σο ισί σε αναπηρικός καροτσάκι, εκτιμίνελα μπουτ ι βοήθεια σο ντέλα-λες λέσκι φαμιλί ντα ο πφραλά λέσκε κχανγκιριάταρ. Βοβ βακερέλα: «Χάρη κι βοήθεια σο ντένα-μαν σαρέ, μπορίναβα τι τζαβ κο πιο μπουτ συναθροίσεις ντα τι κεράβ έργος τακτικά. Μπεϊντίναβα μπουτ ι δημόσια μαρτυρία».

⁹ Σε μπουτ Μπέθελ, ισί πιστά πφραλά ντα πφενιά σο ισί πφουρέ ή νασφαλέ. Ο πφραλά σο τθερένα ι ευθύνη σικαβένα λένγκε αγάπη ντα κανονίνενα λένγκε τι κερέν έργος με επιστολές ή κατά τηλέφωνος. Ο Μπιλ, σο ισί 86 μπρεσένγκο ντα γραφίνελα επιστολές τζενένγκε σο μπεσένα ντουρ, βακερέλα: «Εκτιμίνασα ο προνόμιος σο τθεράσα τι γραφίνας επιστολές». Η Νάνσι, σο ισί σχεδόν 90 μπρεσένγκι, βακερέλα: «Μάνγκε, ανταλά επιστολές νανέ σάντε χαρτιά σο τσσουβάβα σε εκ φάκελος. Ισί έργος. Ο τζενέ πρέπει τι σικλιόν ι αλήθεια!» Η Έθελ, σο μπιάντιλι κο 1921, βακερέλα: «Τθεράβα ντουκχ κάθε ντιβές. Μερικά ντιβεσά δυσκολίντιβαβα ατζέ-ντα τι ιριαβάβ-μαν». Παρόλο σο ισί μπουτ δύσκολος, απολαμβάνελα  τι κερέλ έργος κατά τηλέφωνος ντα τθερέλα μερικές λατσσέ επανεπισκέψεις. Η Μπάρμπαρα, σο ισί 85 μπρεσένγκι, εξηγίνελα: «Να τθεράβα λατσσί υγεία, οτθάρ ισί μπουτ δύσκολος μάνγκε τι τζαβ τακτικά κο έργος. Αλλά μπορίναβα τι κεράβ λάφι κο τζενέ κατά τηλέφωνος. Ευχαριστίναβα-τουτ, Ιεχωβά!» Σε πιο χάνικ από εκ μπρες, εκ ομάδα πολύτιμε πφουρέ πφραλένγκι κερντέ 1.228 σαάτια κο έργος, γραφιντέ 6.265 επιστολές, κερντέ πιο μπουτ από 2.000 τηλεφωνήματα ντα ντινέ 6.315 έντυπα! Μπορίνασα τι αβάς σίγουροι ότι λένγκε προσπάθειες ντινέ μπουτ χαρά ι Ιεχωβάς!​—Παροιμίες 27:11.

10. Σαρ μπορίνασα τι βοηθίνας αμαρέ πφραλέν τι ωφελίντιβεν αζόμ πιο μπουτ αβέλα-πες κατά συναθροίσεις;

¹⁰ Τι σκεφτίνεν ι γιαβερέν κο συναθροίσεις. Κάνα σκεφτίνασα αμαρέ πφραλέν, βοηθίνασα-λεν τι ωφελίντιβεν αζόμ πιο μπουτ αβέλα-πες κατά συναθροίσεις. Σαρ; Εκ τρόπος ισί τι ερεσάς αμαρέ σαατίστε για μα τι ταρτίνας λένγκι προσοχή. Μπάζιμ, πράγματα σο να μπεκλεντίνασα κερένα-αμέν τι καθυστερίνας. Αν όμως αργίνασα μπουτ φαρ, πρέπει τι σκεφτίνας σαρ επηρεάνελα ανταβά αμαρέ πφραλέν ντα σο αλλαγές μπορίνασα τι κεράς για τι σικαβάς ότι πφαμπάσα λένγκε. Ντα μα μπιστρέν ότι οντουλά σο καλίνενα-αμέν κο συναθροίσεις ισί ο Ιεχωβά ντα λέσκο Τσσαβό. (Ματθαίος 18:​20) Πρέπει τι ερεσάς κο συναθροίσεις αμαρέ σαατίστε για τι σικαβάς λένγκε σεβασμός!

11. Σόσκε πρέπει ο πφραλά σο τθερένα μέρη κο συναθροίσεις τι ακολουθίνεν ι οδηγία σο ισί κο εδάφιος 1 Κορινθίους 14:40;

¹¹ Αν σκεφτίνασα αμαρέ πφραλέν, κα ακολουθίνας ακαγιά οδηγία ι Γραφιάκι: «Σαρέ ο πράγματα τι αβέν-πες με το σωστός τρόπος ντα σειράσαρ». (1 Κορινθίους 14:​40) Ο πφραλά σο τθερένα μέρη κο συναθροίσεις ακολουθίνενα ανταγιά οδηγία κάνα τελειώνενα πουμαρέ σαατίστε. Αντικάς, σκεφτίνενα όχι σάντε ι πφραλές σο κα κερέλ ο γιαβέρ μέρος αλλά σαρέ ι πφραλέν. Σκεφτίνεν σαρ μπορεί τι επηρεάντιβεν ο γιαβερά άμα  η συνάθροιση κα αργίνελ τι τελειώνελ. Ισί πφραλά σο μπεσένα ντουρ ντα χρειαζίντιβενα μπουτ χρόνος για τι βουρτίνεν κχερέ. Γιαβερά πρέπει τι ερεσαβέν ο λεωφορείος ή ο τρένος. Ντα γιαβερά τθερένα ρομές ή ρομνιά σο νανέ κι αλήθεια ντα μπεκλεντίνενα τι βουρτίνεν κχερέ εκ συγκεκριμέ σαάτι.

12. Σόσκε αξίνενα ο πρεσβύτεροι αμαρό σεβασμός ντα αμαρί αγάπη; (Ντικχ ο πλαίσιος « Τι Εκτιμίνεν Οντουλέν σο Κερένα Κουμάντος»)

¹² Ο πρεσβύτεροι κερένα μπαρέ προσπάθειες κι κχανγκιρί ντα κο έργος, οτθάρ αξίνενα αμαρό σεβασμός ντα αμαρί αγάπη. (Διαβάνεν 1 Θεσσαλονικείς 5:​12, 13) Σίγουρα, εκτιμίνενα μπουτ σαρέ οντουλά σο κερένα τουμένγκε. Κα σικαβέν-λες ανταβά άμα ισινέν έτοιμοι τι ντεν-λεν καν ντα τι υποστηρίνεν-λεν, σόσκε «βον πφαμπόνα τουμένγκε σαρ τζενέ σο κα ντεν λογαριασμός».​—Εβραίους 13:7, 17.

13. Σο σικλιάσα κατά τρόπος σο συμπεριφερίντιβελας ο Ιησούς κο τζενέ;

¹³ Εκχέ προφητειάτε σο κερέλα λάφι ι Ιησούσκε, ο Ησαΐας βακερντάς: «Να κα καταστραφίνελ ο πφανγκό καλάμι ούτε κα σβήνελ ο φιτίλι σο πφαμπόλα μπουτ χάνικ». (Ησαΐας 42:3) Η αγάπη σο τθερέλας ο Ιησούς ι τζενένγκε κερντάς-λες τι τζιτζίνελ λένγκε. Αγαβέλας ο αισθήματα οντουλένγκε σο χασαρντέας πουμαρό κουράγιος ντα ισινέ μπίζουρανε σαρ «πφανγκό καλάμι» ή σαρ «φιτίλι σο πφαμπόλα μπουτ χάνικ», ντα σικαβέλας λένγκε λατσσιπέ ντα υπομονή. Ατζέ-ντα ο χουρντέ μανγκένας τι αβέν ι Ιησούσαρ. (Μάρκος 10:​14) Αμέν να μπορίνασα τι αγαβάς ή τι σικλιαράς ι τζενέν σαρ ο Ιησούς! Αλλά μπορίνασα τι σκεφτίνας οντουλέν σο ισί αμαρέ τομεάστε. Ντα κεράσα-λες ανταβά άμα προσοχίνασα σαρ κεράσα λέντζαρ λάφι, κάνα κεράσα λάφι ντα καζόμ μπεσάσα λέντε.

14. Σόσκε πρέπει τι προσοχίνας σαρ κεράσα λάφι κο τζενέ;

¹⁴ Σαρ πρέπει τι κεράς λάφι κο τζενέ; Αντιβές, εκατομμύρια τζενέ ισί «ντινέ ντα τρουγιμέ» κατά γκεραλέ ντα σκληρά τζενέ σο κερένα κουμάντος ο εμπόριος, ι πολιτική ντα ι θρησκεία. (Ματθαίος 9:​36) Οτθάρ, μπουτ τζενέ να ντένα μπέσα καεκχέστε ντα να τθερένα ελπίδα. Άκ’ σόσκε αμαρέ λάφια ντα αμαρί φωνή πρέπει τι σικαβέν λένγκε ότι σικαβάσα λατσσιπέ ντα πφαμπάσα λένγκε! Μπουτ τζενέ μανγκένα τι ασουνέν-αμέν όχι σάντε επειδή χρησιμοποιήνασα λατσσές ι Γραφή αλλά επειδή πφαμπάσα μπαγιά λένγκε ντα σεβάνασα-λεν.

15. Σαρ μπορίνασα τι σκεφτίνας ι τζενέν αμαρέ τομεάστε;

¹⁵ Υπαρχίντιβενα μπουτ τρόποι για τι σκεφτίνας ι τζενέν αμαρέ τομεάστε. Πρέπει τι κεράς ερωτήσεις με τρόπος σο σικαβέλα λατσσιπέ ντα σεβασμός. Εκ σκαπανέας κερέλας έργος εκχέ τθανέστε σο μπουτ τζενέ ισινέ λατζανέ, οτθάρ να κερέλας ερωτήσεις σο κα κερέλας-λεν τι λατζάν άμα να τζανένας ι απάντηση. Για παράδειγμας, να πουτσέλας-λεν “Τζανένα ι Ντεβλέσκο ναβ;” ή “Τζανένα σο ισί η Βασιλεία ι Ντεβλέσκι;” Αλλά βακερέλας κάτι ασακό: «Σικλιλόμ κατά Αγία Γραφή ότι ο  Ντεβέλ τθερέλα ναβ. Τι σικαβάβ τουμένγκε καβά ισί;» Ανταβά τρόπος να ταιριάνελα παντού, σόσκε ο τζενέ ντα ο πολιτισμοί ισί διαφορετικοί. Όμως, πρέπει πάντα τι σικαβάς κο τζενέ αμαρέ τομεάστε λατσσιπέ ντα σεβασμός. Για τι κεράς-λες ανταβά πρέπει τι γνωρίνας-λεν λατσσές.

16, 17. Σαρ μπορίνασα τι σικαβάς λατσσιπέ κάνα αποφασίνασα (α) σο σαάτι κα τζας κο τζενέ; (β) καζόμ σαάτι κα κεράς λέντζαρ λάφι;

¹⁶ Κάνα πρέπει τι τζας κο τζενέ; Κάνα τζάσα κο έργος κχερ κχερέστε, ο τζενέ να μπεκλεντίνενα αμένγκε σόσκε να καλιντέ-αμέν. Οτθάρ, ισί μπουτ σημαντικός τι τζας λένγκε εκ σαάτι σο μπορεί τι αβέλ πιο εύκολος λένγκε τι συζητίνεν. (Ματθαίος 7:​12) Για παράδειγμας, μήπως ο τζενέ τουμαρέ τομεάστε σοβένα πιο μπουτ σαάτια κο σαββατοκύριακα; Αν βα, μπορίνενα πρώτα τι κερέν έργος κο ντρομ, τι συμμετεχίνεν κι δημόσια μαρτυρία ή τι κερέν επανεπισκέψεις τζενέντε σο τζανένα ότι κα μπορίνεν τι κερέν λάφι τουμέντζαρ.

¹⁷ Καζόμ πρέπει τι μπεσάς; Μπουτ τζενέ τθερένα μπερεκέτι πράγματα τι κερέν, οτθάρ ισί λατσσό αμαρέ επισκέψεις μα τι ατσσικιαρέν μπουτ σαάτι, ειδικά κι αρχή. Ισί πιο λατσσό τι τελειώνας αμαρί συζήτηση πιο σουγκό παρά τι μπεσάς μπουτ. (1 Κορινθίους 9:​20-23) Κάνα ο τζενέ ντικχένα ότι αγαβάσα καζόμ πράγματα τθερένα τι κερέν, μπορεί τι μανγκέν πιο μπουτ τι κερέν αμέντζαρ λάφι ι γιαβέρ φαρ σο κα τζας. Αν σικαβάσα ο ιδιότητες σο αβένα κατά Ντεβλέσκο πνεύμας, κα αβάς μπαγιά «συνεργάτες ι Ντεβλέσκε». Ο Ιεχωβά μπορεί ατζέ-ντα τι χρησιμοποιήνελ-αμέν για τι βοηθίνας εκχέ τζενές τι σικλιόλ ι αλήθεια!​—1 Κορινθίους 3:6, 7, 9.

18. Σο ευλογίες μπορίνασα τι μπεκλεντίνας κάνα σκεφτίνασα ι γιαβερέν;

¹⁸ Τι κεράς σο νακχέλα αμαρέ βαστέσταρ για τι σκεφτίνας αμαρί φαμιλί, αμαρέ πφραλέν ντα πφενίν ντα οντουλέν σο αρακχάσα κο έργος. Αντικάς, κα τθεράς μπουτ ευλογίες, εμ ακανά εμ κο μέλλον. Ο εδάφια Ψαλμός 41:1, 2 βακερένα: «Ευτυχισμέ ισί κον πφαμπόλα οντουλέσκε σο να ντένα-λες σημασία· ο Ιεχωβά κα σώνελ-λες κο ντιβές σο κα αβέν μπαρέ προβλήματα. Ο Ιεχωβά κα αρακχαβέλ-λες ντα κα ατσσικιαρέλ-λες τζουβντό. Βοβ κα βακέρντιβελ ευτυχισμέ κι πφουβ».