1. Σο βακερντάς ο Ιησούς κο σταρ ψαράδες, ντα σο κερντέ βον;

Ο ΜΑΘΗΤΕΣ Πέτρος, Ανδρέας, Ιάκωβος ντα Ιωάννης κερένας μπουτί σαρ ψαράδες. Σκεφτίνεν καζόμ σαστισάλε κάνα ασουντέ ι Ιησούς τι βακερέλ: «Ελάν μάντζαρ ντα με κα κεράβ-τουμέν ψαράδες τζενένγκε». * Σο κερντέ βον; Η Γραφή βακερέλα: «Μουκχλέ αμέσως πουμαρέ δίχτυα ντα γκιλέ παλά-λέστε». (Ματθ. 4:​18-22) Ανταγιά απόφαση κα αλλάνελας για πάντα λένγκε ζωές. Αντίς τι ασταρέν ματσσέν, κα “ασταρένας τζουβντέ τζενέν”. (Λουκ. 5:​10) Ο Ιησούς καλίνελα αντιβές-ντα τζενέν σο μανγκένα μπαγιά ι αλήθεια. (Ματθ. 28:​19, 20) Δεχτιντέν τουμέν ι πρόσκληση ι Ιησούσκι τι αβέν ψαράδες τζενένγκε;

2. Σόσκε πρέπει τι σκεφτίνας λατσσές πριν τι λας ι απόφαση τι αβάς ψαράδες τζενένγκε, ντα σο κα βοηθίνελ-αμέν τι κεράς-λες ανταβά;

² Μπορεί τι κερένα μελέτη ντα τι κερντέν αλλαγές τουμαρέ ζωγιάτε. Ακανά πρέπει τι αποφασίνεν άμα μανγκένα τι αβέν ευαγγελιζόμενοι. Άμα σακιντίνενα τι δεχτίνεν ι πρόσκληση ι Ιησούσκι, μα τσσουβέν τουμαρέ γκίστε. Μπορεί τι σακιντίνενα σόσκε τζανένα ότι ανταγιά απόφαση ισί μπουτ σημαντική. Ισί μπαγιά ότι η Γραφή βακερέλα ότι ο Πέτρος ντα οντουλά σο κερένας λέσαρ μπουτί μουκχλέ «αμέσως» πουμαρέ δίχτυα. Όμως, να λιντέ ανταγιά απόφαση χωρίς τι σκεφτίνεν-λα λατσσές. Γνωριντέας ι Ιησούς σιοβ μάσεκ πιο τζανγκλέ ντα αγαντέας ότι βοβ ισινέ ο Μεσσίας. (Ιωάν. 1:​35-42) Αντικάς, τουμέν-ντα μπορεί τι σικλιλέν μπουτ πράγματα ι Ιεχωβάσκε ντα ι  Ιησούσκε, ντα μανγκένα τι συνεχίνεν τι αβέν πιο πασέ κο Ιεχωβά. Όμως, πριν τι λεν ανταγιά απόφαση πρέπει τι σκεφτίνεν-λα μπουτ λατσσές. Σο βοηθιντάς ι Πετρός, ι Ανδρεάς ντα γιαβερέν τι λεν ανταγιά απόφαση;

3. Καλά πράγματα κα κερέν-αμέν τι μανγκάς ατζέ πιο μπουτ τι δεχτίνας ι πρόσκληση ι Ιησούσκι;

³ Ο πρώτοι μαθητές ι Ιησούσκε μανγκένας μπουτ πουμαρί μπουτί, τζανένας τι κερέν-λα λατσσές, ισινέ μπίνταρανε ντα κερένας-πες κουμάντος. Ανταλά πράγματα βοηθιντέ-λεν τι αβέν λατσσέ ψαράδες τζενένγκε. Ανταλέ μαθημάστε, κα ντικχάς σαρ κα τθεράς ανταλά χαρακτηριστικά για τι βακεράς πιο λατσσές ο λατσσέ αμπέρια ντα τι σικλιαράς πιο λατσσές ι τζενέν.

4. Σο τσσίντελας ι Πετρός τι ασταρέλ ματσσέν;

⁴ Ι Πετρόσκε, ο ψάρεμας να ισινέ σάντε εκ μπουτί σο κερέλας για τι ανέλ ο μαντρό πι φαμιλιάτε. Σίγουρα μανγκέλας μπουτ ανταγιά μπουτί. (Ιωάν. 21:3, 9-15) Επίσης, σικλιλό τι μανγκέλ ο ψάρεμας ι τζενένγκο-ντα. Με τη βοήθεια ι Ιεχωβάσκι, ο Πέτρος αβιλό μπουτ λατσσό ανταλέ εργόστε.​—Πράξ. 2:​14, 41.

5. Σόσκε νταρέλας ο Πέτρος σαρ βακερένα ο εδάφια Λουκάς 5:​8-11, ντα σο κα βοηθίνελ-αμέν τι νασκιαράς ασακέ αισθήματα;

⁵ Ο πιο σημαντικός λόγος σο κεράσα έργος ισί ότι μανγκάσα ι Ιεχωβάς. Αμαρί αγάπη ι Ιεχωβάσκε μπορεί τι βοηθίνελ-αμέν τι νακχαβάς σο-ντα κερέλα-αμέν τι πακιάς ότι ναστί κεράσα λατσσές ανταβά έργος. Κάνα ο Ιησούς καλιντάς ι Πετρός τι αβέλ ψαράς τζενένγκο, βακερντάς λέσκε: «Μα ντάρα». (Διαβάνεν Λουκάς 5:​8-11) Ο Πέτρος να νταρέλας κατά πράγματα σο μπορεί τι αβένας-πες άμα κα αβέλας μαθητής. Σαστισάλο κάνα ντικχλάς καζόμ μπουτ ματσσέν βοηθιντάς-λεν ο Ιησούς τι ασταρέν. Τζανέλας ότι ο Ιησούς κερντάας θαύμας  ντα πακιάλας ότι να αξίνελας τι κερέλ έργος ι Ιησούσαρ. Τουμέν-ντα, κάνα σκεφτίνενα σο μανγκέλα τι βακερέλ τι αβέν μαθητές ι Χριστόσκε, μπορεί τι πακιάνα ότι να αξίνενα-λες ανταβά. Άμα νιωθίνενα αντικάς, κερέν πιο ζουρανί τουμαρί αγάπη ι Ιεχωβάσκε, ι Ιησούσκε ντα ι τζενένγκε, ντα ανταβά κα τσσίντελ-τουμέν τι δεχτίνεν ι πρόσκληση ι Ιησούσκι τι αβέν ψαράδες τζενένγκε.​—Ματθ. 22:​37, 39· Ιωάν. 14:15.

6. Καλά γιαβερά πράγματα τσσίντενα-αμέν τι κεράς έργος;

⁶ Σκεφτίνεν καλά γιαβερά πράγματα τσσίντενα-αμέν τι κεράς έργος. Μανγκάσα τι κεράς ι εντολή ι Ιησούσκι: «Τζαν ντα κερέν μαθητέν». (Ματθ. 28:​19, 20) Επίσης, κεράσα έργος επειδή ο τζενέ ισί «ντινέ ντα τρουγιμέ» ντα τθερένα μπαρί ανάγκη τι σικλιόν ι αλήθεια ι Βασιλειάκε. (Ματθ. 9:​36) Ο Ιεχωβά μανγκέλα σαβέ τι μανγκές τζενέ τι σικλιόν ντιπ ι αλήθεια ντα τι σώντιβεν.​—1 Τιμ. 2:4.

7. Καζόμ σημαντικός ισί ο έργος σαρ σικαβένα ο εδάφια Ρωμαίους 10:​13-15;

⁷ Κάνα σκεφτίνασα ότι αμαρό έργος μπορίνελα τι σώνελ τζενέν, μανγκάσα τι κεράς έργος. Εκ ψαράς μπικινέλα ή χάλα ο ματσσέ σο ασταρέλα. Αλλά αμέν “ασταράσα” τζενέν, δηλαδή κεράσα μαθητέν, για τι σώνας λένγκι ζωή.​—Διαβάνεν Ρωμαίους 10:​13-15· 1 Τιμ. 4:16.

8, 9. Σο πρέπει τι τζανέλ εκ ψαράς, ντα σόσκε;

⁸ Κο μπρεσά κι Ιησούσκε, εκ Ισραηλίτης ψαράς έπρεπε τι τζανέλ καλέ ματσσέν αβέλας-πες τι ασταρέλ. (Λευιτ. 11:​9-12) Έπρεπε επίσης τι τζανέλ κάι μπορίνελας τι αρακχέλ-λεν. Ο πιο μπουτ φαρ ο ματσσέ ισί πανίντε σο μπεϊντίνενα ντα οτθέ σο ισί μπερεκέτι χαμπέ. Τθερέλα σημασία κάνα τζάλα εκ τζενό τι ασταρέλ ματσσέν; Για τι αγαβάς καβά ισί ο πιο λατσσό σαάτι τι ασταράς ματσσέν, ντικχέν σο βακερντάς εκ πφραλ σο μπεσέλα εκχέ νησίστε κο Ειρηνικός κάνα καλιντάς εκχέ πφραλές σο ισί ιεραπόστολος για τι τζαν τι ασταρέν ματσσέν. Ο ιεραπόστολος βακερντάς: «Κα βακεράς-λεν γιαβίν εννιά το πρωί». Ο πφραλ βακερντάς λέσκε: «Να αγαντάν. Τζάσα κάνα ισί ο σωστός σαάτι για τι ασταράς ματσσέν, όχι κάνα ισί ο πιο λατσσό σαάτι αμένγκε».

⁹ Αντικάς ο μαθητές-ντα ι Ιησούσκε, τζάνας οτθέ σο ισινέ ο τζενέ ντα κο σαάτι σο ισινέ πιο σίγουρος ότι κα αβένας οτθέ. Για παράδειγμας, κερένας έργος κο ναός ντα κο συναγωγές, κχερ κχερέστε ντα κι αγορά. (Πράξ. 5:​42· 17:​17· 18:4) Αμέν-ντα πρέπει τι τζανάς σο ισί σικλέ τι κερέν ο τζενέ αμαρέ τθανέστε. Χρειαζίντιβελα τι αβάς έτοιμοι τι αλλάνας αμαρό πρόγραμμας για τι τζας τι βακεράς ο λατσσέ αμπέρια κο τθαν ντα κο σαάτι σο ισί πιο σίγουρος ότι κα αρακχάς-λεν.​—1 Κορ. 9:​19-23.

10. Καλά εργαλεία ντέλα-αμέν η οργάνωση ι Ιεχωβάσκι;

¹⁰ Εκ ψαράς πρέπει τι τθερέλ ο σωστά εργαλεία ντα τι τζανέλ σαρ τι χρησιμοποιήνελ-λεν. Αντικάς αμέν-ντα, πρέπει τι τθεράς ο σωστά εργαλεία αμαρέ εργόσκε ντα τι τζανάς σαρ τι χρησιμοποιήνας-λεν. Ο Ιησούς βακερντάς πι μαθητένγκε σαρ τι κερέν ο έργος. Βακερντάς λένγκε σο τι τθερέν πουμέντζαρ, κάι τι κερέν έργος ντα σο τι βακερέν. (Ματθ. 10:​5-7· Λουκ. 10:​1-11) Αντιβές, η οργάνωση ι Ιεχωβάσκι ντέλα-αμέν ο Εργαλεία για τι Σικλιαράς σο βοηθίνενα-αμέν μπουτ. * Ντα σικλιαρέλα-αμέν σαρ τι χρησιμοποιήνας-λεν. Ανταβά σικλιαριπέ βοηθίνελα-αμέν τι αβάς πιο σίγουροι κάνα βακεράσα ο λατσσέ αμπέρια ντα τι σικλιαράς ατζέ πιο λατσσές.​—2 Τιμ. 2:15.

11. Σόσκε πρέπει ο ψαράδες τζενένγκε τι αβέν μπίνταρανε;

¹¹ Ο ψαράδες πρέπει τι αβέν μπίνταρανε. Μπάζιμα τθερένα δυσκολίες κι ντεριάβ. Μπουτ φαρ κερένα μπουτί ιράτ ντα οτθέ σο να μπεκλεντίνενα αβένα φουρτούνες. Αλλά ο ψαράδες τζενένγκε-ντα πρέπει τι αβέν μπίνταρανε. Κάνα αρχίνασα τι κεράς έργος ντα τι βακεράς ι γιαβερένγκε ότι ισινάμ Μάρτυρες ι Ιεχωβάσκε, μπορεί τι νακχάσα «φουρτούνες». Για παράδειγμας, αμαρί φαμιλί μπορεί τι τζάλα αμέντζαρ κόντρα, αμαρέ αμαλά μπορεί τι πρασάνα-αμέν ντα μερικά τζενέ μπορεί μα τι μανγκένα τι ασουνέν-αμέν. Αλλά ανταβά να κερέλα-αμέν τι σαστίνας. Ο Ιησούς βακερντάς οντουλένγκε σο τζάνας παλά-λέστε ότι κα μπουτσσαβέλας-λεν τζενέντε σο κα τζάνας λέντζαρ κόντρα.​—Ματθ. 10:16.

12. Σο κα βοηθίνελ-αμέν τι αβάς μπίνταρανε σαρ βακερένα ο εδάφια Ιησούς του Ναυή 1:​7-9;

¹² Σαρ κα αβέν μπίνταρανε; Πρώτα, πρέπει τι πακιάν ότι ο Ιησούς ατζέκ ατζέκ οδηγίνελα κατά ουρανός ανταβά έργος. (Ιωάν. 16:​33· Αποκ. 14:​14-16) Σοράν, κερέν πιο ζουρανί τουμαρί πίστη κο λάφι σο ντινάς ο Ιεχωβά ότι κα αρακχαβέλ-τουμέν. (Ματθ. 6:​32-34) Καζόμ πιο ζουρανί αβέλα τουμαρί πίστη, αζόμ πιο μπίνταρανε κα αβέν. Ο Πέτρος ντα οντουλά σο κερένας λέσαρ μπουτί σικαντέ μπαρί πίστη κάνα μουκχλέ πουμαρί μπουτί για τι τζαν παλάλ κο Ιησούς. Αντικάς τουμέν-ντα, σικαντέν μπαρί πίστη κάνα βακερντέν τουμαρέ αμαλένγκε ντα τουμαρέ φαμιλιάκε ότι αρχισάλεν τι κερέν μελέτη ι  Ιεχωβάσκε Μαρτυρέντζαρ ντα τι τζαν κο συναθροίσεις! Σίγουρα, τουμέν-ντα κερντέν αλλαγές κο τρόπος σο συμπεριφερίντιβενα ντα τζουβντιόνα για τι αβέλ τουμαρί ζωή αντικάς σαρ μανγκέλα ο Ιεχωβά. Για τι κερέν-λες ανταβά, έπρεπε τι τθερέν πίστη ντα τι αβέν μπίνταρανε. Καζόμ αβένα ατζέ πιο μπίνταρανε, μπορίνενα τι αβέν σίγουροι ότι “ο Ιεχωβά τουμαρό Ντεβέλ ισί τουμέντζαρ κάι-ντα τι τζαν”.​—Διαβάνεν Ιησούς του Ναυή 1:​7-9.

13. Σαρ κα βοηθίνεν-τουμέν ο σκέψεις σο κερένα ι Ιεχωβάσκε ντα η προσευχή τι αβέν μπίνταρανε;

¹³ Σο γιαβέρ μπορίνενα τι κερέν για τι αβέν μπίνταρανε; Κερέν προσευχή. (Πράξ. 4:​29, 31) Ο Ιεχωβά κα απαντίνελ τουμαρέ προσευχιέντε ντα να κα μουκχέλ-τουμέν ποτές. Ισί πάντα πασέ τουμέντε για τι βοηθίνελ-τουμέν. Επίσης, μπορίνενα τι σκεφτίνεν σαρ σωντάς ο Ιεχωβά γιαβερέν κο πουρανέ μπρεσά. Ντα ανέν τουμαρέ γκοντιάτε σαρ βοηθιντάς τουμέν κάνα τθερένας προβλήματα ντα σαρ ντινάς-τουμέν ζορ για τι κερέν αλλαγές τουμαρέ ζωγιάτε. Σίγουρα, Οντουβά σο βοηθιντάς πι λαός τι νακχέλ αντράλ κατά Ερυθρά Θάλασσα, μπορίνελα τι βοηθίνελ τουμέν-ντα τι αβέν μαθητές ι Χριστόσκε. (Έξοδ. 14:​13) Τι τθερέν πίστη κο Ιεχωβά σαρ ο ψαλμωδός σο βακερντάς: «Ο Ιεχωβά ισί πασέ μάντε· να κα νταράβ. Σο μπορίνενα τι κερέν-μαν ο τζενέ;»​—Ψαλμ. 118:6.

14. Σο σικλιόνα κατά Μάσαε ντα κατά Τόμογιο;

¹⁴ Κάτι γιαβέρ σο κα βοηθίνελ-τουμέν τι αβέν μπίνταρανε ισί τι σικλιόν σαρ ο Ιεχωβά βοηθιντάς γιαβερέν σο ισί λατζανέ αλλά σικλιλέ τι αβέν μπίνταρανε. Ντικχέν σο αβιλό-πες εκχέ πφενιάκε, κι Μάσαε. Ισινέ λατζανί ντα νιωθίνελας ότι ναστί κα νικιόλας ποτές κο έργος. Σάντε σο σκεφτίνελας ότι έπρεπε τι κερέλ λάφι τζενέντζαρ σο να τζανέλας, νιωθίνελας σαρ τι τθερέλας ανγκλά-πέστε εκ βουτσσό ντουβάρι σο ποτές ναστί κα νικλίλας-λες. Οτθάρ, η Μάσαε κερντάς σο νακχέλας λάκε βαστένταρ για τι μπαριαρέλ πι αγάπη ι Ντεβλέσκε ντα ι τζενένγκε. Σκεφτιντάς καζόμ σημαντικός ισί μα τι χασαράς σαάτι ανταλέ ντιβεσέντε ντα κερντάς προσευχή τι μανγκέλ τι κερέλ έργος. Νασκιαρντάς ι νταρ σο τθερέλας ντα κερντάς τακτικός σκαπανικός-ντα. Ο Ιεχωβά μπορίνελα τι βοηθίνελ ι νεβέ ευαγγελιζομενόν-ντα τι “τθερέν θάρρος”. Ντικχέν ο παράδειγμας εκχέ γιαβερέ πφενιάκο, σο βακερένα λάκε Τόμογιο. Κάνα αρχισάλι τι κερέλ έργος κχερ κχερέστε, η πρώτη τζενί σο αρακχλάς ντινάς βίκος: «Να μανγκάβα τι τθεράβ καέκ σχέση ι Ιεχωβάσκε Μαρτυρέντζαρ!» ντα πφαντάς φοράσαρ ι πόρτα. Η Τόμογιο βακερντάς μπίνταρανες ι πφενιάκε σο ισινέ λάσαρ κο έργος: «Ασουντάν; Χωρίς τι κεράβ λάφι, αγαντάς ότι ισινόμ Μάρτυρας ι Ιεχωβάσκι. Ισινόμ μπουτ χαρούμενη!» Ακανά η Τόμογιο ισί τακτική σκαπάνισσα.

15. Σόσκε εκ λατσσό ψαράς πρέπει τι κερέλ-πες κουμάντος, ντα σόσκε ανταβά ισί μπουτ σημαντικός ι Χριστιανόνγκε;

¹⁵ Ο λατσσέ ψαράδες κερένα-πες κουμάντος για τι ντεν-λεν πέρα ι μπουτιέντζαρ σο πρέπει τι κερέν. Για παράδειγμας, πρέπει τι κερέν-πες κουμάντος για τι ιστίν νωρίς, για μα τι νασέν ντα τι μουκχέν κο μασκάρ πουμαρί μπουτί ντα για τι συνεχίνεν παρόλο σο μπορεί τι αβέν φουρτούνες. Αμέν-ντα πρέπει τι κεράς-αμέν κουμάντος για τι νταϊντίνας κο έργος σο κεράσα ντα για μα τι μουκχάς-λες κο μασκάρ.​—Ματθ. 10:22.

16. Σαρ κα σικλιάς τι κεράς-αμέν κουμάντος;

¹⁶ Να κεράσα-αμέν κουμάντος αμαρέ μπιανιμάσταρ. Ο πιο μπουτ φαρ ρόντασα τι αρακχάς ο πιο εύκολος τρόπος για τι κεράς αμαρέ μπουτιά. Όμως ο πράγματα σο ισί πιο σημαντικά, νανέ εύκολα. Οτθάρ, πρέπει τι σικλιάς τι κεράς-αμέν κουμάντος. Μανγκάσα βοήθεια για τι σικλιάς τι κεράς ο  πράγματα σο ισί αμένγκε δύσκολα. Ο Ιεχωβά ντέλα-αμέν ανταγιά βοήθεια αντράλ πι άγιε πνευμάσταρ.​—Γαλ. 5:​22, 23.

17. Σο κερέλας ο Παύλος για τι κερέλ-πες κουμάντος σαρ βακερένα ο εδάφια 1 Κορινθίους 9:​25-27;

¹⁷ Ο απόστολος Παύλος τζανέλας σαρ τι κερέλ-πες κουμάντος. Όμως βακερντάς ότι για τι κερέλ ο σωστός, έπρεπε τι “νταπέλ” πο σώμας. (Διαβάνεν 1 Κορινθίους 9:​25-27) Βακερντάς γιαβερένγκε-ντα τι κερέν-πες κουμάντος ντα τι κερέν σαρέ ο πράγματα «με το σωστός τρόπος ντα σειράσαρ». (1 Κορ. 14:​40) Πρέπει τι κεράς-αμέν κουμάντος για τι συνεχίνας τι ντας λατρεία ι Ιεχωβάς, σαρ για παράδειγμας τι βακεράς ο λατσσέ αμπέρια ντα τι κεράς μαθητέν.​—Πράξ. 2:46.

18. Σο πρέπει τι κεράς άμα μανγκάσα κι Ιεχωβάσκε γιακχά τι κεράς λατσσές αμαρό έργος;

¹⁸ Εκ ψαράς βακερέλα ότι ισί λατσσό πι μπουτιάτε άμα ασταρέλα μπουτέ ματσσέν. Αμέν όμως ναστί βακεράσα ότι ισινάμ λατσσέ κο έργος σάντε επειδή βοηθίνασα μπουτέ τζενέν τι αβέν Μάρτυρες ι Ιεχωβάσκε. (Λουκ. 8:​11-15) Άμα να τσσιναβάσα τι κεράς έργος ντα τι σικλιαράς γιαβερέν, κι Ιεχωβάσκε γιακχά κεράσα λατσσές αμαρό έργος. Σόσκε; Επειδή ντάσα καν λέστε ντα λέσκε Τσσαβέστε.​—Μάρκ. 13:​10· Πράξ. 5:​28, 29.

19, 20. Καβά σημαντικός λόγος τθεράσα για τι κεράς έργος ακανά;

¹⁹ Μερικέ τθεμέντε, μουκχένα ι τζενέν τι ασταρέν ματσσέν σάντε χάνικ μάσεκ αντρέ κο μπρες. Οντουλέ τθεμέντε, εκ ψαράς μπορεί τι σκεφτίνελ ότι ισί σημαντικός τι ασταρέλ ματσσέν χάνικ πριν τι τσσιναβέν ο ψάρεμας. Σαρ ψαράδες τζενένγκε, αμέν τθεράσα ακαβά-ντα λόγος για τι κεράς έργος ακανά: Ο τέλος ανταλέ ντουνιάσκο ερεσέλα σουγκό! Ατσσιλό μπουτ χάνικ σαάτι για τι βακεράς ο λατσσέ αμπέρια ντα τι σώνας τζενέν. Μα χασαρέν σαάτι ντα μα μπεκλεντίνεν τι τζαν ντιπ λατσσές σαρέ ο πράγματα τουμαρέ ζωγιάτε για τι κερέν-λες ανταβά.​—Εκκλ. 11:4.

²⁰ Κερέν ακανά σο νακχέλα τουμαρέ βαστένταρ για τι μανγκέν ατζέ πιο μπουτ τι κερέν έργος, τι σικλιόν πιο μπουτ πράγματα ι Γραφιάκε, τι αβέν ατζέ πιο μπίνταρανε ντα τι κερέν-τουμέν κουμάντος. Κερέν έργος γιεκ ι οχτώ εκατομμύριε ντα πιο μπουτέ τζενέντζαρ σο βακερένα ο λατσσέ αμπέρια σαρί κι πφουβ ντα κα τθερέν ι χαρά ι Ιεχωβάσκι. (Νεεμ. 8:​10) Τι μανγκέν σαρέ τουμαρέ γκίσαρ τι κερέν καζόμ πιο μπουτ έργος αβέλα-πες μέχρι ο Ιεχωβά τι βακερέλ ότι ο έργος αβιλό-πες. Κο γιαβέρ μάθημας κα ντικχάς καλά τριν πράγματα κα κερέν-αμέν τι μανγκάς ατζέ πιο μπουτ μα τι τσσιναβάς τι βακεράς ο λατσσέ αμπέρια ι Βασιλειάκε.