1, 2. Σο σεισμός βακέρντιλο ότι κα αβέλας-πες αμαρέ ντιβεσέντε;

«ΑΝΤΡΕ χάνικ σαατίστε, ο μαγαζιά ντα ο πουρανέ κχερά αρχισάλε τι περέν». «Σαρέ ιζράνας κατά νταρ . . . Μπουτ τζενέ βακερντέ ότι ατσσικιαρντάς περίπου ντούι λεπτά. Μάνγκε ντικχίντιλο ότι ατσσικιαρντάς σελ μπρεσά». Ανταλά λάφια βακερντέ οντουλά σο ατσσιλέ τζουβντέ κατά σεισμός σο αβιλό-πες κο Νεπάλ κο 2015. Άμα κα τζουβντιόνας κάτι ασακό σο κα νταραβέλας-τουμέν αζόμ μπουτ, δύσκολα κα μπιστρένας-λες.

² Αμαρέ ντιβεσέντε όμως αβέλα-πες εκ σεισμός, σαρ τι βακεράας, σο να κουνιαβέλα σάντε εκ πόλη ή εκ τθεμ. Ο Ιεχωβά κουνιαβέλα μπουτ ζουρανές σαρέ ο τθεμά ι ντουνιάσκε, ντα κερέλα-λες ανταβά μπουτ μπρεσά ακανά. Ανταβά βακέρντιλο κατά προφήτης Αγγαίος σο γραφιντάς: «Ανταβά βακερέλα ο Ιεχωβά σο κερέλα κουμάντος ι στρατόν: “Ατζεχάνικ, κα κουνιαβάβ ζουρανές ατζέκ εκ φαρ ο ουρανός ντα ι πφουβ, ι ντεριάβ ντα ο βεσά”».​—Αγγ. 2:6.

3. Σο διαφορά τθερέλα εκ σεισμός οντουλέσταρ σο βακερέλα ο Αγγαίος;

³ Ανταβά σο βακερντάς ο Αγγαίος νανέ σαρ εκ σεισμός σο κερέλα σάντε ζιάνι. Οκιά μπάνταρ κερέλα λατσσιπέ-ντα. Ο ίδιος ο Ιεχωβά βακερέλα αμένγκε: «Κα κουνιαβάβ ζουρανές σαρέ ο τθεμά, ντα κα αβέν αντρέ ο πολύτιμα πράγματα σαρέ ι τθεμένγκε· ντα κα πφεράβ ανταβά κχερ με δόξα». (Αγγ. 2:7) Σο σικαβέλα ανταγιά προφητεία οντουλένγκε σο τζουβντιόνας κο μπρεσά κι Αγγαιόσκε; Ντα σο σικαβέλα αμένγκε αντιβές; Κα ντικχάς ο απαντήσεις ανταλέ ερωτησιέντε ντα κα σικλιάς σαρ μπορίνασα τι κεράς ο έργος σο κουνιαβέλα ζουρανές ο τθεμά αντιβές.

4. Σόσκε μπουτσσαντάς ο Ιεχωβά ι Αγγαιός πι λαόστε;

⁴ Ο Ιεχωβά μπουτσσαντάς ι Αγγαιός τι κερέλ εκ μπουτ σημαντική μπουτί. Ντικχέν σο αβιλό-πες πο τζανγκλέ. Κο  537 Π.Κ.Χ., εκ ομάδα Ιουδαιόνγκι σο ισινέ αιχμάλωτοι κι Βαβυλώνα βουρτισάλε κι Ιερουσαλήμ. Ο Αγγαίος μάλλον ισινέ λέντζαρ. Κάνα ερεσλέ κι Ιερουσαλήμ οντουλά πιστοί υπηρέτες ι Ιεχωβάσκε, χάνικ πο σοράν αρχισάλε τι κερέν ο κχερ, ή γιαβέρσοϊ ο ναός, ι Ιεχωβάσκο. (Έσδρ. 3:8, 10) Μπουτ σουγκό όμως αβιλό-πες κάτι μπουτ μπέτι. Χασαραντέ πουμαρί ζορ ντα τσσιναντέ ο μπουτιά κο νάος ιτιρί κατά τζενέ σο τζάνας λέντζαρ κόντρα. (Έσδρ. 4:4· Αγγ. 1:1, 2) Οτθάρ, κο 520 Π.Κ.Χ., ο Ιεχωβά βακερντάς κο Αγγαίος τι βοηθίνελ ι Ιουδαιόν τι αρακχέν πάλι πουμαρί ζορ ντα τι μπιτισκιαρέν ο ναός. *​—Έσδρ. 6:​14, 15.

5. Σαρ πρέπει τι βοηθιντέ ο λάφια ι Αγγαιόσκε ι Ιουδαιόν μα τι τσσουβέν πουμαρέ γκίστε;

⁵ Ο λάφια ι Αγγαιόσκε μπαριαρντέ ι πίστη ι Ιουδαιόνγκι κο Ιεχωβά. Ο προφήτης βακερντάς μπίνταρανες κο Ιουδαίοι σο χασαρντέ πουμαρί ζορ: «“Τι αβέν ζουρανέ, σαρέ τουμέν, ο λαός ι τθεμέσκο”, βακερέλα ο Ιεχωβά, “ντα τι κερέν μπουτί. Σόσκε με ισινόμ τουμέντζαρ”, βακερέλα ο Ιεχωβά σο κερέλα κουμάντος ι στρατόν». (Αγγ. 2:4) Ο λάφι «ο Ιεχωβά σο κερέλα κουμάντος ι στρατόν» πρέπει τι βοηθιντάς ι Ιουδαιόν μα τι τσσουβέν πουμαρέ γκίστε. Ο Ιεχωβά κερέλα κουμάντος εκ μπουτ μπαρό στρατός αγγελόνγκο, οτθάρ ο Ιουδαίοι έπρεπε τι ντεν μπέσα λέστε άμα μανγκένας τι τζαν λατσσές ο πράγματα λένγκε.

6. Σο κα αβέλας-πες ι ζουρανέ κουνιαϊμάσαρ σο βακερντάς ο Αγγαίος;

⁶ Ο Ιεχωβά μπουτσσαντάς ι Αγγαιός τι βακερέλ κο Ιουδαίοι ότι κα κουνιαβέλας σαρέ ο τθεμά. Ανταλά λάφια σο ισινέ κατά Ιεχωβά ντινέ ζορ ι Ιουδαιόν σο χασαρντέας πουμαρί ζορ ντα σο τσσιναντέας τι κερέν ο ναός. Ανταβά σικαντάς ότι ο Ιεχωβά κα κουνιαβέλας ζουρανές ι Περσία, σο κερέλας κουμάντος σαρέ ι ντουνιάς αζομάν. Σο κα αβέλας-πες οντουλέ ζουρανέ κουνιαϊμάσαρ; Πρώτον, ο λαός ι Ντεβλέσκο κα μπιτισκιαρέλας ο ναός. Σοράν, ατζέ-ντα οντουλά σο να ισινέ Ιουδαίοι κα ντένας λατρεία ι Ιεχωβάς οντουλέ ναόστε σο λατσσάρντιλο πάλι. Καζόμ ζορ πρέπει τι ντινέ οντουλά λάφια κο λαός κι Ντεβλέσκο!​—Ζαχ. 8:9.

7. Καβά έργος σο κουνιαβέλα ζουρανές ι ντουνιάς βοηθίνασα τι αβέλ-πες αντιβές; Εξηγίνεν.

⁷ Σο σικαβέλα η προφητεία ι Αγγαιόσκι αμένγκε αντιβές; Ο Ιεχωβά κουνιαβέλα ακανά-ντα ζουρανές σαρέ ο τθεμά, ντα ανταγιά φαρ βοηθίνασα αμέν-ντα τι αβέλ-πες ανταβά έργος. Ανέν τουμαρέ γκοντιάτε ακαβά: Κο 1914, ο Ιεχωβά κερντάς ι Ιησού Χριστός τι αβέλ Βασιλιάς λέσκε Βασιλειάτε κο ουρανός. (Ψαλμ. 2:6) Ο τζενέ σο κερένας κουμάντος κι πφουβ να μπεϊντιντέ ιτς ο αμπέρι ότι ανταγιά Βασιλεία αρχισάλι τι κερέλ κουμάντος. Ανταβά σικαβέλας ότι «ο βακίτια ι τθεμένγκε» μπιτισάλεας. Γιαβερέ λαφίντζαρ, ο βακίτι σο ο Ιεχωβά να τσσουντάας καεκχέ τζενές τι κερέλ κουμάντος μπιτισάλοας. (Λουκ. 21:​24) Ανταλέσκε, πο μπουτ κατά 1919, ο λαός ι Ιεχωβάσκο βακερέλα σαριλένγκε ότι σάντε η Βασιλεία ι Ντεβλέσκι ντέλα ελπίδα κο τζενέ. «Ανταλά λατσσέ αμπέρια ι Βασιλειάκε» κουνιαβένα ζουρανές σαρέ ι ντουνιάς.​—Ματθ. 24:14.

8. Σο κερένα ο πο μπουτ τζενέ ι τθεμένγκε κάνα ασουνένα ανταλά αμπέρια σαρ βακερένα ο εδάφια Ψαλμός 2:​1-3;

⁸ Σο κερένα ο τζενέ σο ασουνένα ανταλά αμπέρια; Ο πο μπουτ να μπεϊντίνενα-λεν. (Διαβάνεν Ψαλμός 2:​1-3) Ο τθεμά ισί χολιαμέ. Να μανγκένα Οντουλές σο τραμπιντάς ο Ιεχωβά τι κερέλ κουμάντος. Οντουλά σο βακεράσα ι Βασιλειάκε νανέ «λατσσέ αμπέρια» λένγκε. Μερικές κυβερνήσεις να μουκχένα τι αβέλ-πες ο έργος. Παρόλο σο  μπουτ αρχηγοί ανταλέ τθεμένγκε βακερένα ότι υπηρετίνενα ι Ντεβλές, να μανγκένα τι τσσιναβέν τι κερέν κουμάντος βον. Οτθάρ, σαρ ο τζενέ σο κερένας κουμάντος κο ντιβεσά κι Ιησούσκε, αντικάς βον-ντα τζάνα κόντρα Οντουλέστε σο τραμπιντάς ο Ιεχωβά κάνα τσσουβένα-λεν λέσκε πιστέ μαθητέντζαρ.​—Πράξ. 4:​25-28.

9. Σαρ προσπαθίνελα ο Ιεχωβά τι βοηθίνελ ι τθεμέν σο να μανγκένα τι ασουνέν ι Βασιλειάκε;

⁹ Σαρ προσπαθίνελα ο Ιεχωβά τι βοηθίνελ ι τθεμέν σο να μανγκένα τι ασουνέν ι Βασιλειάκε; Ο εδάφια Ψαλμός 2:​10-12 βακερένα: «Οτθάρ, ακανά βασιλιάδες, αγαβέν λατσσές ο πράγματα· διορθώντιβεν, τουμέν σο κρίνενα κι πφουβ. Υπηρετίνεν ι Ιεχωβάς νταριάσαρ ντα χαιρίνεν ιζραϊμάσαρ. Ντεν τιμή κο τσσαβό, για μα τι προσβαλίντιβελ ο Ντεβέλ ντα για μα τι χασάρντιβεν κατά ντρομ, επειδή Βοβ χολιάνελα εύκολα. Ευτυχισμέ ισί σαρέ οντουλά σο γκεραβένα-πες Λέστε». Ο Ιεχωβά ντέλα λατσσιμάσαρ ανταλέ τζενέντε σο τζάνα κόντρα εκ ευκαιρία. Μπορίνενα ατζέκ ατζέκ τι αλλάνεν ντα τι μανγκέν ι Ιεχωβάσκι Βασιλεία. Αλλά να ατσσιλό μπουτ σαάτι. Τζουβντιάσα κο «τελευταία ντιβεσά» ανταλέ ντουνιάσκε. (2 Τιμ. 3:1· Ησ. 61:2) Ισί μπουτ σημαντικός ανταλέ τελευταίε ντιβεσέντε τι σικλιόν ο τζενέ ι αλήθεια ντα τι τραμπίνεν τι υπηρετίνεν ι Ιεχωβάς.

10. Καβά λατσσιπέ ντικχάσα κο εδάφια Αγγαίος 2:​7-9 ότι κα κερέλας ο έργος σο κουνιαβέλα ζουρανές ο τθεμά;

¹⁰ Μερικέ τζενένγκε κα κερέλας λατσσιπέ ανταβά έργος σο βακερντάς ο Αγγαίος ότι κα κουνιαβέλας σαρί ι πφουβ. Ο Αγγαίος βακερέλα αμένγκε ότι, ιτιρί ανταλέσταρ, «κα αβέν αντρέ ο πολύτιμα πράγματα [ο τζενέ σο λένγκο γκι μανγκέλα τι σικλιόν ι Ιεχωβάσκε] σαρέ ι τθεμένγκε» για τι ντεν λατρεία ι Ιεχωβάς. * (Διαβάνεν Αγγαίος 2:​7-9) Ο Ησαΐας ντα ο Μιχαίας βακερντέας βον-ντα σαρ κα αβέλας-πες ανταβά «κο τελευταία ντιβεσά».​—Ησ. 2:​2-4· Μιχ. 4:1, 2.

11. Σο κερντάς εκ πφραλ κάνα ασουντάς ο αμπέρια ι Βασιλειάκε;

 ¹¹ Ντικχέν σο λατσσιπέ αντάς ο έργος σο κουνιαβέλα ζουρανές ι πφουβ εκχέ πφραλέστε, κο Κεν, σο υπηρετίνελα κο παγκόσμια κεντρικά γραφεία. Ο Κεν ντέλα-πες μπουτ λατσσές γκοντί σαρ ασουντάς ο λατσσέ αμπέρια ι Βασιλειάκε πριν από 40 περίπου μπρεσά. Βοβ βακερέλα: «Κάνα ασουντόμας πρώτη φαρ ι αλήθεια κατά Λάφι ι Ντεβλέσκο, ισινόμας πφερντό εκτίμηση σο σικλιλόμ ότι τζουβντιάσα κο τελευταία ντιβεσά ανταλέ ντουνιάσκε. Αγαντόμ ότι, για τι λαβ ι ευλογία ι Ντεβλέσκι ντα τι τζουβντιάβ για πάντα, έπρεπε τι τσσιναβάβ τι αβάβ αντρέ ανταλέ αμπέσατε ντουνιάστε ντα τι αβάβ πασέ κο Ιεχωβά σαρέ μι γκίσαρ. Προσευχισάλομ κο Ιεχωβά ντα κερντόμ-λες ανταβά. Μουκχλόμ παλά-μάντε ι ντουνιάς ντα τραμπιντόμ τι τθεράβ ο αρακχαϊπέ ι Ντεβλέσκε Βασιλειάκο σο ναστί κουνιάντιβελα».

12. Σαρ πφερντιλό δόξα ο πνευματικός ναός ι Ιεχωβάσκο ανταλέ τελευταίε ντιβεσέντε;

¹² Αγαντίντιβελα ότι ο Ιεχωβά ευλογίνελα πι λαός. Ανταλέ τελευταίε ντιβεσέντε, μπουτ τζενέ αρχισάλε τι υπηρετίνεν-λες. Κο 1914, ισινάμας σάντε χάνικ χιλιάδες. Ακανά πο μπουτ από οχτώ εκατομμύρια τζενέ ντένα λατρεία ι Ντεβλές, ντα εκατομμύρια γιαβερά κερένα αμέντζαρ ι Ανάμνηση κάθε μπρες. Οτθάρ, ο πνευματικός ναός ατθέ κι πφουβ, δηλαδή οντουβά σο κανονιντάς ο Ιεχωβά ι τζενένγκε για τι μπορίνεν τι ντεν-λες πάκι λατρεία, ισί πφερντό ι “πολύτιμε πραγματέντζαρ σαρέ ι τθεμένγκε”. Ο ναβ ι Ιεχωβάσκο δοξάντιβελα κατά αλλαγές-ντα σο κερένα ανταλά τζενέ κάνα ιρίνα ο νεβό χαρακτήρας.​—Εφεσ. 4:​22-24.

13. Καλά γιαβερά προφητείες κερντάς τι νικιόλ μπαγιά ανταβά μπαρό έργος σο αβέλα-πες; (Ντικχέν ι φωτογραφία κι ανγκλαϊνί σελίδα)

¹³ Σαρό ανταβά μπαρό έργος σο αβέλα-πες κερντάς τι νικιόν μπαγιά γιαβερά-ντα προφητείες, σαρ ανταγιά σο ισί κο Ησαΐας κεφάλαιος 60. Ο εδάφιος 22 ανταλέ κεφαλαιόσκο βακερέλα: «Ο χάνικ κα αβέν χίλιοι ντα ο χουρντό λαός κα αβέλ μπουτ μπαρό. Με, ο Ιεχωβά, κα κεράβ τι αβέλ-πες ανταβά πι σαατίστε». Επειδή μπουτ τζενέ αρχισάλε τι υπηρετίνεν ι Ιεχωβάς, αβέλα-πες κάτι μπουτ σουκάρ. Ανταλά «πολύτιμα πράγματα» τζανένα τι κερέν σαβέ τι μανγκές πράγματα ντα μανγκένα σαρέ πουμαρέ γκίσαρ τι βακερέν ο «λατσσέ αμπέρια ι Βασιλειάκε».  Αντικάς, σαρ βακερντάς ο Ησαΐας, ο λαός ι Ντεβλέσκο μπορίνελα τι τθερέλ «ο τθουτ ι τθεμένγκο». (Ησ. 60:5, 16) Επειδή τθεράσα ι πολύτιμη βοήθεια ανταλέ μουρσένγκι ντα τζουβλίνγκι, κεράσα έργος 240 τθεμέντε ντα νικιόνα εκδόσεις πο μπουτ από 1.000 τσσιμπέντε.

14. Καγιά απόφαση πρέπει τι λεν ο τζενέ ακανά;

¹⁴ Ανταλέ τελευταίε ντιβεσέντε, ο έργος σο κουνιαβέλα ζουρανές ο τθεμά κερέλα ι τζενέν τι λεν εκ απόφαση. Κα τσσίντεν κατά Βασιλεία ι Ντεβλέσκι ή κα ντεν μπέσα κο κυβερνήσεις ανταλέ ντουνιάσκε; Ανταγιά ισί εκ απόφαση σο κα λεν-λα σαρέ. Παρόλο σο ο υπηρέτες ι Ιεχωβάσκε ντένα καν κο νόμους σο τθερέλα λένγκο τθεμ, να ανακατούντιβενα ιτς κο πολιτικά πράγματα ανταλέ ντουνιάσκε. (Ρωμ. 13:​1-7) Τζανένα ότι σάντε η Βασιλεία κα νασκιαρέλ ο προβλήματα ι ντουνιάσκε. Η Βασιλεία να τθερέλα καέκ σχέση ανταλέ ντουνιάσαρ.​—Ιωάν. 18:​36, 37.

15. Σαρ σικαβέλα ο βιβλίος Αποκάλυψη ότι κα δοκιμάντιβελ η αφοσίωση ι Ντεβλέσκε λαόσκι;

¹⁵ Ο βιβλίος Αποκάλυψη βακερέλα ότι η αφοσίωση ι Ντεβλέσκε λαόσκι κα δοκιμάντιβελας κο τελευταία ντιβεσά. Ανταγιά δοκιμασία κα συνεχίνελ τι ζορισκιαρέλ-αμέν μπουτ. Ο κυβερνήσεις ανταλέ ντουνιάσκε κα μανγκέν αμαρί λατρεία ντα κα τζαν κόντρα οντουλέντε σο να μανγκένα τι τσσίντεν λένταρ. (Αποκ. 13:​12, 15) Κα “αναγκάνεν σαριλέν​—εμ ι χουρντέν εμ ι μπαρέν, εμ ι χουλανέν εμ ι τσορορέν, εμ οντουλέν σο ισί ελεύθεροι εμ οντουλέν σο ισί δούλοι—​τι λεν ο σημάδι κο δεξίς βας ή πουμαρέ τσικατέστε”. (Αποκ. 13:​16) Κο πουρανέ μπρεσά, τσσουβένας κο δούλους εκ σημάδι σο σικαβέλας κάσκε ισινέ. Αντικάς, ο τζενέ αντιβές κα μανγκέν σαριλένταρ τι τθερέν εκ σημάδι πουμαρέ βαστέστε ή πουμαρέ τσικατέστε, σαρ τι βακεράας, για τι σικαβέν κατάρ τσσίντενα. Οντουλά σο τθερένα πουμαρέ γκοντιάτε ντα οντουλά σο κερένα κα σικαβέν ότι τσσίντενα κατά κυβερνήσεις ανταλέ ντουνιάσκε.

16. Σόσκε ισί μπουτ σημαντικός τι μπαριαράς αμαρί αφοσίωση κο Ιεχωβά ακανά;

¹⁶ Κα μανγκάς τι τθεράς ανταβά σημάδι ντα κα τσσίντας κατά κυβερνήσεις; Οντουλά σο να μανγκένα τι τθερέν ο σημάδι κα τθερέν δυσκολίες ντα κινδύνους. Ο βιβλίος Αποκάλυψη βακερέλα: “Καέκ γιαβέρ να μπορίνελα τι κινέλ ή τι μπικινέλ εκτός οντουλένταρ σο τθερένα ο σημάδι”. (Αποκ. 13:​17) Αλλά ο υπηρέτες ι Ντεβλέσκε τζανένα σο κα κερέλ ο Ντεβέλ οντουλέντε σο τθερένα ο σημάδι σο βακέρντιβελα κο εδάφια Αποκάλυψη 14:9, 10. Αντίς τι τθερέν οντουβά σημάδι, κα γραφίνεν, σαρ τι βακεράας, πουμαρέ βαστέστε: «Ισινόμ ι Ιεχωβάσκο». (Ησ. 44:5) Ακανά ισί ο βακίτι τι αβάς σίγουροι ότι αμαρί αφοσίωση κο Ιεχωβά ισί μπαρί. Άμα ισί μπαρί, ο Ιεχωβά κα χαιρίνελ μπουτ τι βακερέλ ότι ισινάμ λέσκε!

17. Σο πρέπει τι ντας-αμέν γκοντί για την υπομονή σο κερέλα ο Ιεχωβά;

¹⁷ Ο Ιεχωβά κερέλα μπαρί υπομονή ανταλέ τελευταίε ντιβεσέντε. Να μανγκέλα τι καταστραφίντιβελ καέκ τζενό. (2 Πέτρ. 3:9) Ντινάς σαριλέντε ι ευκαιρία τι μετανιώνεν ντα τι λεν ι σωστή απόφαση. Αλλά να κα κερέλ υπομονή για πάντα. Οντουλέντε σο χασαρένα ανταγιά ευκαιρία κα αβέλ-πες οντουβά σο αβιλό-πες κο Φαραώ κο ντιβεσά κι Μωυσίσκε. Ο Ιεχωβά βακερντάς κο Φαραώ: «Κα μπορίναβας τι βάνταβ μο βας για τι ανάβ τούκε ντα τι λαόσκε καταστροφή, ντα κα χασάρντιβεας κατά πφουβ. Άκ’ σόσκε ατσσικιαρντόμ-τουτ τζουβντό: για τι σικαβάβ τούκε μι ζορ ντα για τι κεράβ μο ναβ τι βακέρντιβελ σαρί κι πφουβ». (Έξοδ. 9:​15, 16) Κο τέλος, σαρέ ο τθεμά κα σικλιόν σίγουρα ότι σάντε ο Ιεχωβά ισί ο αληθινός  Ντεβέλ. (Ιεζ. 38:​23) Σαρ κα αβέλ-πες ανταβά;

18. (α) Καβά γιαβέρ ζουρανό κουνιαϊπέ βακέρντιβελα κο Αγγαίος 2:6, 20-22; (β) Σαρ τζανάσα ότι ο λάφια ι Αγγαιόσκε κα νικιόν μπαγιά πο σοράν;

¹⁸ Μπουτ μπρεσά σοράν κατά μεριπέ ι Αγγαιόσκο, ο απόστολος Παύλος σικαντάς ι Ντεβλέσκε πνευμάσαρ ότι ο λάφια σο ισί κο εδάφια Αγγαίος 2:6, 20-22 κα νικιόνας μπαγιά πο σοράν. (Διαβάνεν) Ο Παύλος γραφιντάς: «Ακανά ντινάς πο λάφι: “Κα κουνιαβάβ ζουρανές ατζέκ εκ φαρ, όχι σάντε ι πφουβ, αλλά ο ουρανός-ντα”. Ο λάφι “ατζέκ εκ φαρ” σικαβέλα ότι κα χασάρντιβεν ο πράγματα σο κουνιάντιβενα ζουρανές, πράγματα σο λατσσάρντιλε, για τι ατσσόν ο πράγματα σο να κουνιάντιβενα ζουρανές». (Εβρ. 12:​26, 27) Ανταβά ζουρανό κουνιαϊπέ ισί διαφορετικός οντουλέσταρ σο βακέρντιβελα κο εδάφιος Αγγαίος 2:7, ανταβά ζουρανό κουνιαϊπέ μανγκέλα τι βακερέλ ότι κα καταστραφίντιβεν για πάντα οντουλά σο, σαρ ο Φαραώ, να μανγκένα τι αγαβέν ότι ο Ιεχωβά τθερέλα ο δικαίωμας τι κερέλ κουμάντος.

19. Σο να κα κουνιάντιβελ, ντα σαρ τζανάσα-λες ανταβά;

¹⁹ Σο να κα κουνιάντιβελ, δηλαδή να κα καταστραφίντιβελ; Ο Παύλος πο σοράν βακερντάς: «Αφού κα λας εκ Βασιλεία σο ναστί κουνιάντιβελα, μα τι τσσιναβάς τι λας λατσσιπέ σο να αξίνασα-λες, σο αντράλ λέσταρ μπορίνασα τι υπηρετίνας ι Ντεβλές με νταρ κατά Ντεβέλ ντα σεβασμός». (Εβρ. 12:​28) Κάνα κα μπιτίνελ ανταβά τελευταίος μπαρό έργος σο κουνιαβέλα ζουρανές ο τθεμά, σάντε η Βασιλεία ι Ντεβλέσκι να κα κουνιάντιβελ. Κα ατσσόλ για πάντα πι θεσιάτε!​—Ψαλμ. 110:5, 6· Δαν. 2:44.

20. Σο πρέπει τι τραμπίνεν ο τζενέ, ντα σαρ μπορίνασα τι βοηθίνας-λεν;

²⁰ Να τθεράσα μπουτ βακίτι ανγκλ’ αμέντε! Ο τζενέ πρέπει τι τραμπίνεν: Κα συνεχίνεν τι τσσίντεν ανταλέ ντουνιάσταρ, σο γκερέλα κι καταστροφή, ή κα κερέν πουμαρέ ζωγιάτε οντουβά σο μανγκέλα ο Ντεβέλ, σο γκερέλα κι ζωή για πάντα; (Εβρ. 12:​25) Κάνα κεράσα έργος, βοηθίνασα ι τζενέν τι λεν ανταγιά σημαντική απόφαση. Τι βοηθίνας μπουτέ ατζέ πολύτιμε τζενέν τι αποφασίνεν τι τσσίντεν κατά Βασιλεία ι Ντεβλέσκι. Ντα τι τθεράς αμαρέ γκοντιάτε ο λάφια αμαρέ κυριόσκε ι Ιησούσκε: «Ανταλά λατσσέ αμπέρια ι Βασιλειάκε κα βακέρντιβεν σαρί κι πφουβ για τι ασουνέν-λεν σαρέ ο τθεμά, ντα αζομάν κα αβέλ ο τέλος».​—Ματθ. 24:14.