1. Σαρ μπορίνενα τι ντικχέν ο πιστά τζενέ ι Ιεχωβάς;

ΑΝΤΡΕ κι φαμιλί κι Ιεχωβάσκι σο ισί πφερντί τζενέντζαρ σο ντένα-λες λατρεία ισί ο Ιησούς, «σο κερντιλό πρώτος σαριλένταρ», ντα μπουτ άγγελοι. (Κολ. 1:​15· Ψαλμ. 103:​20) Κάνα ο Ιησούς ισινέ κι πφουβ, σικαντάς ότι ο πιστά τζενέ μπορίνενα τι ντικχέν ι Ιεχωβάς σαρ πουμαρό Ντατ. Κάνα κερντάς λάφι πι μαθητέντζαρ, βακερντάς ότι “λέσκο Ντατ ισί λένγκο-ντα Ντατ”. (Ιωάν. 20:​17) Ντα κάνα ντάσα αμαρό λάφι τι τζουβντιάς ι Ιεχωβάσκε ντα μπολντιάσα, αβάσα αντρέ εκχέ φαμιλιάτε πφραλέντζαρ ντα πφενίντζαρ σο μανγκένα-αμέν μπουτ.​—Μάρκ. 10:​29, 30.

2. Σο κα ντικχάς ανταλέ μαθημάστε;

² Μερικοί δυσκολίντιβενα τι ντικχέν ι Ιεχωβάς σαρ εκ λατσσό Ντατ σο μανγκέλα-λεν. Γιαβερά μπέκιμ να τζανένα σαρ τι σικαβέν ότι μανγκένα πουμαρέ πφραλέν ντα πφενίν. Ανταλέ μαθημάστε, κα σικλιάς σαρ βοηθίνελα-αμέν ο Ιησούς τι ντικχάς ι Ιεχωβάς σαρ εκ Ντατ σο μανγκέλα-αμέν ντα σο μπορίνασα τι αβάς πασέ λέστε. Ντα κα ντικχάς σαρ μπορίνασα τι μανγκάς αμαρέ πφραλέν ντα πφενίν σαρ ο Ιεχωβά.

3. Σαρ ανέλα-αμέν πο πασέ κο Ιεχωβά η προσευχή σο σικλιαρντάς ο Ιησούς τι κεράς;

³ Ο Ιεχωβά ισί εκ Ντατ σο μανγκέλα-αμέν μπουτ. Ο Ιησούς μανγκέλα τι ντικχάς ι Ιεχωβάς σαρ ντικχέλας-λες βοβ, δηλαδή σαρ εκ λατσσό Ντατ σο μανγκέλα-αμέν μπουτ ντα σο μπορίνασα τι κεράς λέσαρ λάφι κάνα-ντα τι μανγκάσα, όχι σαρ εκ γκεραλό αρχηγός σο βακερέλα αμένγκε σάντε σο τι κεράς. Τζανάσα-λες ανταβά οντουλένταρ σο σικλιαρντάς ο Ιησούς πι μαθητέν τι βακερέν πουμαρέ προσευχιάτε. Αρχισάλο ανταγιά προσευχή ακαλέ λαφίσαρ: «Ντάντε». (Ματθ. 6:9) Ο Ιησούς κα μπορίνελας τι βακερέλ αμένγκε τι ντας βίκος ι Ιεχωβάς “Μπαρέα” ή “Ζουρανέα”​—τίτλοι σο ταιριάνενα ι Ιεχωβάσκε ντα βακέρντιβενα κι Αγία Γραφή. (Ψαλμ. 91:1· Δευτ. 10:​17) Ο Ιησούς  όμως βακερντάς αμένγκε τι ντας βίκος ι Ιεχωβάς «Ντάντε».

4. Σαρ τζανάσα ότι ο Ιεχωβά μανγκέλα τι αβάς πασέ λέστε;

⁴ Μήπως δυσκολίντιβενα τι ντικχέν ι Ιεχωβάς σαρ εκ λατσσό Ντατ σο μανγκέλα-τουμέν; Μερικοί αμένταρ δυσκολίντιβενα. Άμα μπαριλάμ εκχέ νταντέσαρ σο να ισινέ λατσσό αμέντζαρ, μπέκιμ μα τι αβέλ αμένγκε εύκολος τι αγαβάς σαρ ισί τι τθεράς εκχέ νταντές σο μανγκέλα-αμέν. Αλλά λάσα μπαρί ζορ σο τζανάσα ότι ο Ιεχωβά αγαβέλα μπουτ λατσσές σαρ νιωθίνασα ντα σόσκε νιωθίνασα αντικάς! Μανγκέλα τι αβέλ πασέ αμέντε. Άκ’ σόσκε βακερέλα αμένγκε λέσκο Λάφι: «Τζαν πασέ κο Ντεβέλ, ντα βοβ κα αβέλ πασέ τουμέντε». (Ιακ. 4:8) Ο Ιεχωβά μανγκέλα-αμέν ντα βακερέλα αμένγκε ότι κα αβέλ ο πο λατσσό Ντατ σο κα μπορίναας ποτές τι τθεράς.

5. Σαρ μπορίνελα τι βοηθίνελ-αμέν ο Ιησούς τι αβάς πο πασέ κο Ιεχωβά σαρ βακερέλα ο εδάφιος Λουκάς 10:22;

⁵ Ο Ιησούς μπορίνελα τι βοηθίνελ-αμέν τι αβάς πο πασέ κο Ιεχωβά. Τζανέλα ι Ιεχωβάς μπουτ λατσσές ντα μοιάζελα ντιπ λέστε. Άκ’ σόσκε βακερντάς: «Οντουβά σο τθερέλα ντικχλό μαν τθερέλα ντικχλό ι Νταντές-ντα». (Ιωάν. 14:9) Σαρ μπαρό πφραλ, ο Ιησούς σικλιαρέλα-αμέν σαρ τι σεβάνας ντα τι ντας καν αμαρέ Νταντέστε, σο πρέπει τι κεράς για μα τι πφανγκάς Λέσκο γκι ντα σο τι κεράς για τι τθεράς Λέσκι ευλογία. Αλλά ο Ιησούς πο μπουτ βοηθίνελα-αμέν τι αγαβάς ότι ο Ιεχωβά ισί μπουτ λατσσό ντα μανγκέλα-αμέν μπουτ. (Διαβάνεν Λουκάς 10:​22) Για τι ντικχάς χάνικ παραδείγματα.

6. Βακερέν παραδείγματα σο σικαβένα σαρ ασουνέλας ο Ιεχωβά ι Ιησούς.

⁶ Ο Ιεχωβά ασουνέλα πι τσσαβέν κάνα κερένα λέσαρ λάφι. Ανέν τουμαρέ γκοντιάτε σαρ ασουνέλας πι πρώτε Τσσαβές. Ο Ιεχωβά σίγουρα ασουντάς ο μπουτ προσευχές σο κερντάς λέσκο Τσσαβό κάνα ισινέ κι πφουβ. (Λουκ. 5:​16) Ασουντάς ι Ιησούς τι προσευχίντιβελ κάνα τθερέλας τι λελ σημαντικές αποφάσεις, σαρ για παράδειγμας κάνα τραμπιντάς πι 12 αποστολόν. (Λουκ. 6:​12, 13) Ασουντάς επίσης ι Ιησούς τι προσευχίντιβελ κάνα ισινέ μπουτ στεναχωριμέ. Χάνικ πριν τι ασταρέν-λες, προσευχισάλο αντράλ πι γκίσταρ πι Νταντέστε οντουλένγκε σο κα αβένας-πες ατζεχάνικ. Ο Ιεχωβά, να ασουντάς  σάντε ι προσευχή ι Ιησούσκι, μπουτσσαντάς εκχέ αγγελός-ντα τι ντελ ζορ πι αγαπημέ Τσσαβές.​—Λουκ. 22:​41-44.

7. Σαρ πρέπει τι νιωθίνας σο τζανάσα ότι ο Ιεχωβά ασουνέλα αμαρέ προσευχές;

⁷ Αντιβές, ο Ιεχωβά ασουνέλα αμαρέ-ντα προσευχές ντα απαντίνελα αμένγκε αζομάν σο πρέπει ντα καζόμ πο λατσσές αβέλα-πες. (Ψαλμ. 116:1, 2) Ντικχέν σαρ αγαντάς-λες ανταβά εκ πφεν κι Ινδία. Τθερέλας μπαρό άγχος ντα προσευχίντιβελας αντράλ πι γκίσταρ κο Ιεχωβά ανταλέσκε. Βόι βακερέλα: «Ο JW Broadcasting^® Μάιος 2019, σο βακερέλας σο τι κεράς κάνα ισινάμ αγχωμέ ντα τσσουβάσα αμαρέ γκίστε, ισινέ ντιπ οντουβά σο τθεράβας ανάγκη. Ισινέ απάντηση μι προσευχιέντε».

8. Σαρ σικαβέλας ο Ιεχωβά ότι μανγκέλας ι Ιησούς;

⁸ Ο Ιεχωβά μανγκέλα-αμέν ντα πφαμπόλα αμένγκε σαρ μανγκέλας ι Ιησούς ντα πφαμπόλας λέσκε καζόμ τζουβντιόλας ατθέ κι πφουβ. (Ιωάν. 5:​20) Βοηθίνελας ι Ιησούς τι ατσσικιαρέλ ζουρανί πι πίστη, ντέλας-λες ζορ κάνα τσσουβέλας πι γκίστε ντα ντέλας-λες ο πράγματα σο τθερέλας ανάγκη. Ντα να σακιντισάλο τι βακερέλ πι Τσσαβέσκε ότι μανγκέλας-λες ντα ότι ισινέ ευχαριστιμέ λέσαρ. (Ματθ. 3:​16, 17) Ο Ιησούς τζανέλας ότι λέσκο Ντατ σο μανγκέλας-λες μπουτ πάντα κα αβέλας λέσαρ ντα κα βοηθίνελας-λες, οτθάρ ποτές να νιωθίνελας κορκορό.​—Ιωάν. 8:16.

9. Σαρ τζανάσα ότι ο Ιεχωβά μανγκέλα-αμέν;

⁹ Σαρ ο Ιησούς, αντικάς αμέν-ντα ντικχλάμ μπουτ φαρ αμαρέ ζωγιάτε ότι ο Ιεχωβά μανγκέλα-αμέν. Σκεφτίνεν: Ο Ιεχωβά μουκχλάς-αμέν τι αβάς λέσκε αμαλά ντα ντινάς-αμέν μπουτέ πφραλέν ντα πφενίν σο μανγκένα-αμέν, κερένα-αμέν τι αβάς χαρούμενοι ντα ντένα-αμέν ζορ κάνα τσσουβάσα αμαρέ γκίστε. (Ιωάν. 6:​44) Επίσης, ο Ιεχωβά να τσσιναβέλα τι ντελ-αμέν αμαρό πνευματικός χαμπέ. Ντα βοηθίνελα-αμέν τι τθεράς ο πράγματα σο τθεράσα ανάγκη για τι τζουβντιάς. (Ματθ. 6:​31, 32) Κάνα ανάσα αμαρέ γκοντιάτε καζόμ μπουτ μανγκέλα-αμέν ο Ιεχωβά, αμέν-ντα μανγκάσα-λες πο μπουτ.

10. Σο σικλιάσα κατά τρόπος σο μανγκέλα ο Ιεχωβά αμαρέ πφραλέν ντα πφενίν;

¹⁰ Ο Ιεχωβά μανγκέλα αμαρέ πφραλέν ντα πφενίν. Αλλά νανέ πάντα εύκολος αμένγκε τι μανγκάς-λεν ντα τι σικαβάς λένγκε ότι μανγκάσα-λεν. Μπάζιμα ισί δύσκολος σόσκε να τθεράσα σαρέ ι ίδια κουλτούρα ντα ο κάθε εκ αμένταρ μπαριλό γιαβέρσοϊ. Επίσης, σαρέ κεράσα λάθη σο νευριάνενα ι γιαβερέν ντα πφανγκένα λένγκο γκι. Αλλά σαρέ μπορίνασα τι κεράς σο νακχέλα αμαρέ βαστένταρ για τι μπαριαράς ι αγάπη σο τθεράσα αμαρέ πφραλένγκε ντα πφενίνγκε. Σαρ; Κάνα μανγκάσα αμαρέ πφραλέν ντα πφενίν σαρ μανγκέλα-λεν αμαρό Ντατ. (Εφεσ. 5:1, 2· 1 Ιωάν. 4:​19) Για τι ντικχάς σο σικλιάσα κατά Ιεχωβά.

11. Σαρ πφαμπόλας ο Ιησούς-ντα ι γιαβερένγκε σαρ ο Ιεχωβά;

¹¹ Ο Ιεχωβά «πφαμπόλα αμένγκε μπουτ». (Λουκ. 1:​78) Ο τζενό σο πφαμπόλα ι γιαβερένγκε τσσουβέλα πι γκίστε κάνα ντικχέλα ι γιαβερέν τι ταλαιπωρίντιβεν. Ρόντελα τι αρακχέλ σαρ τι βοηθίνελ-λεν ντα τι λοκχιαρέλ λένγκο γκι. Οντουλέντζαρ σο βακερέλας ντα κερέλας ι τζενένγκε, ο Ιησούς σικαβέλας καζόμ μπουτ πφαμπόλας λένγκε ο Ιεχωβά. (Ιωάν. 5:​19) Εκ φαρ σο ντικχλάς ι τζενέν, «τζιτζισάλο λένγκε, επειδή ισινέ ντινέ ντα τρουγιμέ σαρ μπρακέ σο να τθερένα τσομπανής». (Ματθ. 9:​36) Ο Ιησούς μανγκέλας ι τζενέν, αλλά να ατσσιλό οτθέ. Κερντάς κάτι για τι βοηθίνελ-λεν. Βοβ κερέλας λατσσές ι νασφαλέν ντα λοκχιαρέλας ο γκι οντουλένγκο “σο μαρένας-πες ντα τθερένας πφαρέ φορτία οπρά-πουμέντε”.​—Ματθ. 11:​28-30· 14:14.

12. Βακερέν εκ παράδειγμας σο σικαβέλα σαρ μπορίνασα τι πφαμπάς αμαρέ πφραλένγκε ντα πφενίνγκε.

¹² Για τι πφαμπάς αμαρέ πφραλένγκε ντα πφενίνγκε, πρέπει τι ανάς αμαρέ γκοντιάτε ο δυσκολίες σο τθερένα. Για παράδειγμας, εκ  πφεν μπέκιμ τι αβέλ μπουτ νασφαλί. Βόι ποτές να βακερέλα οντουλένγκε σο νακχέλα, αλλά μάλλον κα εκτιμίνελας μπουτ άμα εκ τζενό κα βοηθίνελας-λα. Μπορίνελα τι ανέλ πι φαμιλιάκε οντουλά σο τθερέλα ανάγκη; Μήπως κα βοηθίναας-λα άμα κα κεράας λάκε εκ χαμπέ ή ο μπουτιά ι κχερέσκε; Ή εκ πφραλ μπέκιμ τι χασαρντάς πι μπουτί. Μήπως κα μπορίναας τι κεράς λέσκε δώρος χάνικα λοβέ, μπέκιμ χωρίς τι βακεράς ότι ισί αμένταρ, για τι βοηθίνας-λες τι ντελ-λεν πέρα μέχρι τι αρακχέλ εκ γιαβέρ μπουτί;

13, 14. Σαρ μπορίνασα τι ντας αμαρέ βαστένταρ σαρ ο Ιεχωβά;

¹³ Ο Ιεχωβά ντέλα πι βαστένταρ. (Ματθ. 5:​45) Δεν πρέπει τι μπεκλεντίνας τι μανγκέν αμένταρ ο πφραλά ντα ο πφενιά βοήθεια για τι σικαβάς ότι πφαμπάσα λένγκε. Σαρ ο Ιεχωβά, μπορίνασα τι βοηθίνας-λεν πριν τι μανγκέν-λες αμένταρ. Βοβ κερέλα τι νικιόλ κάθε ντιβές ο κχαμ αμένγκε χωρίς τι μανγκάς-λες λέσταρ! Ντα ο κχαμ κερέλα λατσσιπέ σαριλένγκε, όχι σάντε οντουλένγκε σο σικαβένα εκτίμηση. Νανέ μπαγιά ότι, κάνα ο Ιεχωβά ντέλα-αμέν οντουλά σο τθεράσα ανάγκη, σικαβέλα καζόμ μπουτ μανγκέλα-αμέν; Καζόμ μπουτ μανγκάσα ι Ιεχωβάς σο ισί αζόμ λατσσό ντα ντέλα πι βαστένταρ!

¹⁴ Αμαρέ πφραλά ντα πφενιά μοιάζενα κο Ιεχωβά ντα ντένα πουμαρέ βαστένταρ κο γιαβερά. Για παράδειγμας, κο 2013, ο μπαρό τυφώνας Χαϊγιάν κερντάς μπαρέ καταστροφές κο Φιλιππίνες. Μπουτ πφραλά ντα πφενιά χασαρντέ πουμαρό κχερ ντα σαρέ πουμαρέ πράγματα. Αλλά ο πφραλά ντα ο πφενιά σαρό κατά ντουνιάς κερντέ κάτι σουγκό για τι βοηθίνεν-λεν. Μπουτ πφραλά ντινέ λοβέ ή βοηθιντέ τι κερντιόν ή τι λατσσάρντιβεν πασέ 750 κχερά αντρέ εκχέ μπρεσέστε! Κο νασφαλιπέ κι Κορωνοϊόσκο, ο Μάρτυρες κερντέ σο νακχέλας λένγκε βαστένταρ για τι βοηθίνεν πουμαρέ πφραλέν ντα πφενίν. Κάνα κεράσα κάτι σουγκό για τι βοηθίνας αμαρέ πφραλέν ντα πφενίν, σικαβάσα ότι μανγκάσα-λεν.

15, 16. Σο βακερέλα ο εδάφιος Λουκάς 6:​36 ότι πρέπει τι κεράς για τι μοιάζας αμαρέ Νταντέστε κο Ιεχωβά;

¹⁵ Ο Ιεχωβά τζιτζίνελα αμένγκε ντα συγχωρίνελα-αμέν. (Διαβάνεν Λουκάς 6:​36) Κάθε ντιβές, αμαρό Ντατ, ο Ιεχωβά, συγχωρίνελα ι κάθε εκχές αμένταρ. (Ψαλμ. 103:​10-14) Οντουλά σο τζάνας παλάλ κο Ιησούς ισινέ ατελείς, όμως τζιτζίνελας λένγκε ντα  συγχωρίνελας-λεν. Μανγκλάς ατζέ-ντα τι ντελ πι ζωή για τι συγχωρίντιβεν αμαρέ αμαρτίες. (1 Ιωάν. 2:1, 2) Να αβάσα πο πασέ κο Ιεχωβά ντα κο Ιησούς σο τζανάσα ότι τζιτζίνενα αμένγκε ντα συγχωρίνενα-αμέν;

¹⁶ Μπαριαράσα ι αγάπη σο τθεράσα αμαρέ πφραλένγκε ντα πφενίνγκε κάνα “συγχωρίνασα-λεν αντράλ αμαρέ γκίσταρ”. (Εφεσ. 4:​32) Όμως, μπάζιμα μπέκιμ τι αβέλ μπουτ δύσκολος τι συγχωρίνας ι γιαβερέν, οτθάρ πρέπει τι μαράς-αμέν για τι κεράς-λες ανταβά. Εκ πφεν, νιωσάλι ότι ο μάθημας ι Σκοπιάκο σο τθερέλας ο θέμας «Να Συγχωρείτε ο Ένας τον Άλλον Ανεπιφύλακτα» βοηθιντάς-λα τι κερέλ ντιπ ανταβά. * Βόι βακερέλα: «Ανταβά μάθημας βοηθιντάς-μαν τι αγαβάβ σαρ κερέλα μάνγκε λατσσιπέ τι συγχωρίναβ ι γιαβερέν. Εξηγίνελας ότι, κάνα συγχωρίνασα ι γιαβερέν, ανταβά να μανγκέλα τι βακερέλ ότι μπεϊντίνασα ο λάθος σο κερντέ ή ότι να πφανγκλέ αμαρό γκι. Αλλά κάνα συγχωρίνασα-λεν, να ατσσάσα χολιαμέ λέντζαρ ντα αντικάς ισινάμ ήρεμοι». Κάνα συγχωρίνασα αντράλ αμαρέ γκίσταρ αμαρέ πφραλέν ντα πφενίν, σικαβάσα ότι μανγκάσα-λεν ντα ότι μοιάζασα αμαρέ Νταντέστε, κο Ιεχωβά.

17. Σαρ μπορίνασα τι δοξάνας αμαρέ Νταντές ι Ιεχωβάς σαρ βακερέλα ο εδάφιος Ματθαίος 5:16;

¹⁷ Ισί μπαρό προνόμιος τι αβάς αντρέ εκχέ φαμιλιάτε πφραλέντζαρ ντα πφενίντζαρ σαρό κατά ντουνιάς σο μανγκένα-αμέν μπουτ. Μανγκάσα τι ντεν λατρεία ι Ντεβλές γιεκ αμέντζαρ καζόμ αβέλα-πες πο μπουτ τζενέ. Οτθάρ, δεν πρέπει ποτές τι κεράς κάτι σο κα μπορίνελας τι κερέλ ι τζενέν τι σκεφτίνεν μπέτι ι Ιεχωβάσκε ή λέσκε λαόσκε. Πάντα μαράσα-αμέν τι κεράς λατσσέ πράγματα σο κα κερέν ι τζενέν τι μανγκέν τι σικλιόν ο λατσσέ αμπέρια.​—Διαβάνεν Ματθαίος 5:16.

18. Σο μπορίνελα τι βοηθίνελ-αμέν τι κεράς έργος μπίνταρανες;

¹⁸ Μπάζιμα, μερικά τζενέ μπέκιμ τι κερένα-αμέν τι λατζάντιβας ή ατζέ-ντα τι τζαν αμέντζαρ κόντρα σόσκε ντάσα καν αμαρέ Νταντέστε, κο Ιεχωβά. Σο αβέλα-πες άμα νταράσα κάνα κεράσα λάφι κο γιαβερά οντουλένγκε σο πακιάσα; Μπορίνασα τι αβάς σίγουροι ότι ο Ιεχωβά ντα λέσκο Τσσαβό κα βοηθίνεν-αμέν.  Ο Ιησούς βακερντάς πι μαθητένγκε μα τι τσσουβέν πουμαρέ γκίστε σαρ κα κερέν λάφι ντα σο κα βακερέν. Σόσκε; Βακερντάς λένγκε: «Οντουβά σο κα βακερέν κα ντιντιόλ-τουμέν οντουβά σαάτι· σόσκε οντουλά σο κερένα λάφι να ισινέν τουμέν, αλλά ισί ο πνεύμας τουμαρέ Νταντέσκο σο κερέλα λάφι αντράλ τουμένταρ».​—Ματθ. 10:​19, 20.

19. Βακερέν εκ παράδειγμας εκχέ τζενέσκο σο κερντάς έργος μπίνταρανες.

¹⁹ Ανέν τουμαρέ γκοντιάτε σο αβιλό-πες κο Ρόμπερτ. Χάνικ σοράν αφού αρχισάλο μελέτη ντα ενώ να τζανέλας ατζέκ μπουτ πράγματα κατά Γραφή, βακερντέ λέσκε τι τζαλ κο δικαστήριος κι Νότια Αφρική για τι βακερέλ ι δικαστίσκε σόσκε να μανγκέλας τι τζαλ κο στρατός. Ισινέ μπίνταρανο ντα βακερντάς κο δικαστήριος ότι μανγκέλας τι ατσσόλ ουδέτερος σόσκε μανγκέλας πι Χριστιανέ πφραλέν. Εκτιμίνελας σο ισινέ αντρέ κι φαμιλί κι Ιεχωβάσκι! «Κον ισί το πφραλά;» πουτσλάς-λες ο δικαστής. Ο Ρόμπερτ να μπεκλεντίνελας τι πουτσέλ-λες κάτι ασακό, αλλά αμέσως αβιλό λέσκε γκοντιάτε ο εδάφιος ι ντιβεσέσκο, σο ισινέ ο Ματθαίος 12:​50: «Κον κερέλα οντουβά σο μανγκέλα μο Ντατ σο ισί κο ουρανός, βοβ ισί μο πφραλ ντα μι πφεν ντα μι ντάι». Παρόλο σο ο Ρόμπερτ να κερέλας μπουτ βακίτι μελέτη, ο πνεύμας ι Ιεχωβάσκο βοηθιντάς-λες τι απαντίνελ εμ ανταλέ ερωτησιάτε αλλά εμ μπουτέ γιαβερέ ερωτησιέντε σο να μπεκλεντίνελας. Ο Ιεχωβά πρέπει τι καμαρώνελας τον Ρόμπερτ! Ντα καμαρώνελα αμέν-ντα κάνα μανγκάσα λέσκι βοήθεια για τι κεράς έργος μπίνταρανες κο δυσκολίες.

20. Σο πρέπει τι μανγκάς σαρέ αμαρέ γκίσαρ τι κεράς; (Ιωάννης 17:​11, 15)

²⁰ Ισινάμ πφερντέ εκτίμηση σο ισινάμ αντρέ εκχέ ασακέ φαμιλιάτε σο μανγκέλα-αμέν μπουτ. Τθεράσα ι πο λατσσέ Νταντές ντα μπουτέ αφοσιωμέ πφραλέν ντα πφενίν. Μα τι τσσιναβάς ποτές τι σικαβάς εκτίμηση ανταλέσκε. Ο Μπενγκ ντα λέσκε δαίμονες κερένα σο νακχέλα λένγκε βαστένταρ για τι κερέν-αμέν μα τι αβάς σίγουροι ότι αμαρό Ντατ μανγκέλα-αμέν ντα για τι χαλαβέν αμαρί ενότητα. Ο Ιησούς όμως κερντάς προσευχή αμένγκε ντα μανγκλάς πι Νταντέσταρ τι αρακχαβέλ-αμέν για τι ατσσόλ ενωμέ αμαρί φαμιλί. (Διαβάνεν Ιωάννης 17:​11, 15) Ο Ιεχωβά απαντίνελα οντουλέ προσευχιάτε. Σαρ ο Ιησούς, αντικάς αμέν-ντα τι αβάς σίγουροι ότι αμαρό Ντατ, ο Ιεχωβά, μανγκέλα-αμέν ντα κα βοηθίνελ-αμέν. Μανγκάσα σαρέ αμαρέ γκίσαρ τι μπαριαράς ατζέ πο μπουτ ι αγάπη σο τθεράσα ι Ιεχωβάσκε ντα αμαρέ πφραλένγκε.