Σοράν κατά 1920, μο ντατ ντα μι ντάι σικλιλέ ι αλήθεια. Ανταβά αβιλό-πες πριν τι παντρίνεν. Με μπιάντιλομ κο 1939. Κάνα ισινόμας χουρντό, κι Αγγλία, τζάβας κο συναθροίσεις γιεκ μι νταντέσαρ ντα μι νταγιάσαρ ντα μπεϊντίναβας μπουτ ι Σχολή Θεοκρατικής Διακονίας. Μέχρι αντιβές ντάβα-μαν γκοντί μι πρώτη ομιλία. Για τι κεράβ-λα, νικλιντόμ σε εκ κιβώτιος. Ισινόμας σιοβ μπρεσένγκο ντα τθεράβας μπουτ άγχος σο κεράβας ομιλία ανγκλάλ μπαρέ πφραλέντε.

Μο ντατ γραφιντάς εκ απλή παρουσίαση εκχέ καρτάτε για τι νταβ-λα κο έργος. Ισινόμας οχτώ μπρεσένγκο ι πρώτη φαρ σο γκιλόμ εκχέ πορτάτε κορκορό. Καζόμ μπουτ χαιρισάλομ κάνα ο τζενό διαβαντάς μι κάρτα ντα λιντάς αμέσως ο βιβλίος «Έστω ο Θεός Αληθής»! Τθαβντισάλομ τι βακεράβ-λες μι νταντέσκε, σο ισινέ χάνικ πιο τελέ οντουλέ ντρομέστε. Ο έργος ντα ο συναθροίσεις ανένας μάνγκε χαρά ντα βοηθιντέ-μαν τι μανγκάβ τι υπηρετίναβ ι Ιεχωβάς ολοχρόνια.

Η αλήθεια ι Γραφιάκι αρχισάλι τι ερεσέλ ατζέ πιο μπουτ μι γκίστε κάνα μο ντατ βακερντάς τι ανέν μάνγκε-ντα κάθε φαρ ι Σκοπιά. Κάνα διαβάναβας ο κάθε περιοδικός σο αβέλας με το ταχυδρομείος, πουτάρντιβελας μο γκι. Ντινόμ πιο μπουτ μπέσα κο Ιεχωβά ντα ανταβά τσσιντιντάς-μαν τι αφιερώναβ μι ζωή λέστε.

Κο 1950, σαρ φαμιλί γκιλάμ κι Συνέλευση «Αύξηση της Θεοκρατίας» σο αβιλί-πες κι Νέα Υόρκη. Πέμπτη 3 Αυγούστου, ο θέμας ι ντιβεσέσκο ισινέ «Ημέρα των Ιεραποστόλων». Οντουβά ντιβές, ο πφραλ Κάρεϊ Μπάρμπερ, σο πιο σοράν υπηρετιντάς κο Κυβερνών Σώμας, κερντάς ι ομιλία ι μπολντιμάσκι. Κο τέλος πι ομιλιάκο, κάνα κερντάς ο ντούι ερωτήσεις οντουλένγκε σο μανγκένας τι μπολντιόν, ιστίντιλομ ντα βακερντόμ: «Βα!» Ισινόμας 11 μπρεσένγκο αλλά αγαβάβας ότι οντουβά σο κερντόμ ισινέ μπουτ σημαντικός. Όμως, νταράβας  τι τσσουβάβ-μαν κο πανί σόσκε να τζανάβας ατζέ τι κεράβ μπάνιος. Μο κακ αβιλό μάντζαρ μέχρι κι πισίνα ντα βακερντάς μάνγκε ότι σαρέ κα τζαν λατσσές. Ντα ανταβά αβιλό-πες! Σαρέ αβιλέ αζόμ σουγκό, σο μο πιντρέ ούτε σο ισταντέ τελέ κι πισίνα. Ο εκ πφραλ ντινάς-μαν κο γιαβέρ. Ο εκ μπολντάς-μαν ντα ο γιαβέρ νικαντάς-μαν κατά πισίνα. Από αζομάν ο Ιεχωβά να τσσιναντάς τι κερέλ μο ντρομά ίσια.

Κάνα τελειωσάλομ ο σχολείος, μανγκάβας τι κεράβ σκαπανικός, αλλά μο καθηγητές βακερένας μάνγκε τι τζαβ κο πανεπιστήμιος. Ασουντόμ-λεν ντα γκιλόμ. Όμως, μπουτ σουγκό αγαντόμ ότι να μπορίναβας εμ τι ατσσάβ σταθερός κι αλήθεια εμ τι τθεράβ μι γκοντί κο μαθήματα. Οντουλέσκε, αποφασιντόμ τι τσσιναβάβ ο πανεπιστήμιος. Κερντόμ προσευχή κο Ιεχωβά ανταλέσκε, γραφιντόμ εκ γράμμας ντα βακερντόμ με σεβασμός ότι κα νασάβας, ντα νασλόμ κο τέλος κι πρώτε μπρεσέσκο. Ντινόμ σαρί μι μπέσα κο Ιεχωβά ντα αρχισάλομ αμέσως σκαπανικός.

Αρχισάλομ ο σκαπανικός κο Ιούλιος 1957 κι πόλη Γουέλινμπορο. Μανγκλόμ κατά πφραλά σο ισινέ κο Μπέθελ κο Λονδίνος τι βακερέν μάνγκε καλέ πφραλέσαρ σο ισινέ μπρεσά σκαπανέας κα μπορίναβας τι κεράβ έργος. Ο πφραλ Μπερτ Βέισι σικλιαρντάς-μαν μπουτ πράγματα. Κερέλας ο έργος αντράλ πι γκίσταρ ντα βοηθιντάς-μαν τι τσσουβάβ εκ λατσσό πρόγραμμας για τι κεράβ μο έργος. Κι κχανγκιρί ισινέ σιοβ πφουρέ πφενιά, ο πφραλ Βέισι ντα με. Η προετοιμασία σο κεράβας σαρέ ι συναθροισιένγκε ντα ο μέρη σο κεράβας βοηθίνενας-μαν τι νταβ πιο μπουτ μπέσα κο Ιεχωβά, ντα με το απαντήσεις σο ντάβας μπορίναβας τι κεράβ λάφι οντουλένγκε σο πακιάβα.

Αφού μπεσλόμ για χάνικ κι φυλακή επειδή να μανγκλόμ τι τζαβ κο στρατός, γνωριντόμ ι Μπαρμπαρά, σο ισινέ ειδική σκαπάνισσα. Παντρισάλαμ κο 1959, ντα ισινάμας έτοιμοι τι τζας κάι-ντα τι μπουτσσαβένας-αμέν. Κι αρχή, μπουτσσαντέ-αμέν κο Λάνκασερ, κι βορειοδυτική Αγγλία. Σοράν, κο Ιανουάριος 1961, καλιντέ-μαν τι τζαβ κο Μπέθελ κο Λονδίνος για τι νακχάβ ι Σχολή Διακονίας της Βασιλείας, σο αζομάν ατσσικιαρέλας εκ μάσεκ. Κάνα τελειωσάλομ ι σχολή, μπουτσσαντέ-μαν τι τζαβ τθαν τθανέστε σαρ επίσκοπος. Ανταβά ισινέ κάτι σο να μπεκλεντίναβας! Εκ πφραλ σο ισινέ επίσκοπος περιοχής μπουτ μπρεσά σικλιαρντάς-μαν για ντούι εβδομάδες κο Μπέρμιγχαμ, ντα μουκχλέ ι Μπαρμπαρά τι αβέλ μάντζαρ. Σοράν, νασλάμ για τι τζας αμαρέ διορισμόστε σο ισινέ κο Λάνκασερ ντα κο Τσέσερ.

Κο Αύγουστος 1962, καζόμ κεράας διακοπές, λιντάμ εκ γράμμας κατά γραφείος τμήματος. Αντρέ ισινέ αιτήσεις για τη Σχολή Γαλαάδ! Αφού κερντάμ προσευχή ανταλέσκε, κερντάμ ο αιτήσεις ντα μπουτσσαντάμ-λεν σουγκό κο γραφείος τμήματος αντικάς σαρ βακερντέας αμένγκε. Παντς μάσεκ πιο σοράν, ερεσλάμ κο Μπρούκλιν κι Νέα Υόρκη για τι νακχάς ι τάξη 38 κι Σχολή Γαλαάδ, σο κα ατσσικιαρέλας ντες μάσεκ.

Κι Σχολή Γαλαάδ σικλιλάμ μπουτ πράγματα, όχι σάντε ι Ντεβλέσκε Λαφίσκε ντα λέσκε οργανωσιάκε, αλλά εμ ι πφραλένγκε ντα ι πφενίνγκε  σαρό κο ντουνιάς. Επειδή να ισινάμας ούτε 25 μπρεσένγκε, σικλιλάμ μπουτ πράγματα κατά γιαβερά μαθητές σο ισινέ κι τάξη. Ισινέ προνόμιος μάνγκε τι κεράβ κάθε ντιβές μπουτί ι πφραλέσαρ Φρεντ Ρασκ, σο ισινέ εκ κατά πφραλά σο σικλιαρένας-αμέν. Εκ σημαντικός πράγμας σο σικλιαρντάς-αμέν ισινέ ότι πρέπει πάντα τι ντας λατσσέ συμβουλές, δηλαδή τι ντας συμβουλές σάντε αντράλ κατά Γραφή. Κο μαθήματα, κερένας αμένγκε ομιλίες πφραλά σο ισινέ μπουτ μπρεσά κι αλήθεια σαρ ο Νάθαν Νορ, ο Φρέντερικ Φρανς ντα ο Καρλ Κλάιν. Η ομιλία σο κερντάς ο Αλεξάντερ Μακμίλαν βοηθιντάς-αμέν τι αγαβάς σαρ οδηγίνελας ο Ιεχωβά πι λαός κο δύσκολα μπρεσά σο νακχλέ ο πφραλά κατά 1914 μέχρι κι αρχή κο 1919. Καζόμ μπουτ πράγματα σικλιλάμ ανταλέ ταπεινέ πφραλέσταρ!

Χάνικ πριν τι τελειώνας ι σχολή, ο πφραλ Νορ βακερντάς αμένγκε ότι κα μπουτσσαβένας-αμέν κο Μπουρούντι, κι Αφρική. Γκιλάμ τθαβντιμάσαρ κι βιβλιοθήκη κο Μπέθελ για τι ντικχάς κο Βιβλίο Έτους καζόμ πφραλά ισινέ αζομάν κο Μπουρούντι. Σαστισάλαμ σο να αρακχλάμ πουθενά καζόμ πφραλά ισινέ οντουλέ τθεμέστε! Κα τζάας εκχέ τθανέστε σο ο έργος ατζέ να αβιλόας-πες. Ντα κα τζάας κι Αφρική, σο τζανάας λάκε μπουτ χάνικ πράγματα. Ναστί βακεράβα τουμένγκε καζόμ αγχωμέ ισινάμας! Αλλά η προσευχή σο κερντάμ αντράλ αμαρέ γκίσταρ βοηθιντάς-αμέν τι ηρεμίνας.

Αμαρέ νεβέ διορισμόστε, σαρέ ισινέ μπουτ διαφορετικά​—ο καιρός, η κουλτούρα ντα η τσσιπ. Έπρεπε τι σικλιάς γαλλικά. Ντα έπρεπε τι αρακχάς κατέ κα μπεσάς. Ντούι ντιβεσά αφού ερεσλάμ, ο Χάρι Άρνοτ, σο ισινέ γιεκ αμέντζαρ κι Γαλαάδ, αβιλό τι ντικχέλ-αμέν καζόμ βουρτίνελας κο διορισμός σο τθερέλας κι Ζάμπια. Βοηθιντάς-αμέν τι αρακχάς εκ κχερ, σο αβιλό αμαρό πρώτος ιεραποστολικός κχερ. Μπουτ σουγκό όμως, ο κράτος αρχισάλο τι τζαλ αμέντζαρ κόντρα σόσκε να τζανέλας τίποτα ι Ιεχωβάσκε Μαρτυρένγκε. Οτθέ σο αρχίναας τι απολαμβάνας αμαρό διορισμός, ο κράτος βακερντάς αμένγκε ότι ναστί κα μπεσάας οτθέ άμα να κα νικαβάας άδεια μπουτιάκε. Δυστυχώς, έπρεπε τι νασάς ντα τι σικλιάς τι μπεσάς εκχέ γιαβερέ τθεμέστε, κι Ουγκάντα.

Ανησυχίναας σόσκε κα τζάας κι Ουγκάντα χωρίς βίζα, αλλά ντινάμ μπέσα κο Ιεχωβά. Εκ πφραλ κατά Καναδάς, σο υπηρετίνελας κι Ουγκάντα, εξηγιντάς αμαρί κατάσταση εκχέ τζενέσκε σο ισινέ υπεύθυνος οντουλένγκε σο  ισινέ γιαβερέ τθεμένταρ. Οντουτθέ, βακερντέ αμένγκε τι μπεσάς χάνικ μάσεκ μέχρι τι νικαβάς άδεια για τι μπεσάς οτθέ. Οντουλέσταρ αγαντάμ ότι ο Ιεχωβά βοηθίνελας-αμέν.

Ο πράγματα κι Ουγκάντα ισινέ μπουτ διαφορετικά κατά Μπουρούντι. Ο έργος αβέλας-πες παρόλο σο ισινέ σάντε 28 Μάρτυρες σαρό κο τθεμ. Οτθέ σο κεράας έργος αρακχάας μπουτέ τζενέν σο κερένας λάφι αγγλικά. Μπουτ σουγκό όμως αγαντάμ ότι, για τι βοηθίνας οντουλέν σο μανγκένας τι σικλιόν πιο μπουτ πράγματα ι Ιεχωβάσκε, έπρεπε τι σικλιάς τουλάχιστον εκ κατά μπουτ τσσιμπά σο κερντιόνας λάφι οτθέ. Αρχισάλαμ τι κεράς έργος κι Καμπάλα, σο μπουτ τζενέ κερένας λάφι ι τσσιπ λουγκάντα, οντουλέσκε αποφασιντάμ τι σικλιάς οντιά τσσιπ. Λιντάς-αμέν μπερεκέτι μπρεσά τι σικλιάς τι κεράς λάφι λατσσές οντιά τσσιπ, αλλά αντικάς κεράας πιο λατσσές αμαρό έργος! Αρχισάλαμ τι αγαβάς σο μανγκένας τι σικλιόν πιο μπουτ ο τζενέ σο κεράας-λεν μελέτη. Ντα βον, πουτρένας αμένγκε πουμαρό γκι ντα βακερένας σαρ νιωθίνενας οντουλένγκε σο σικλιόνας.

Η χαρά σο νιωθίναας κάνα αρακχάας ταπεινέ τζενέν σο ασουνένας ι αλήθεια μπαριλί κάνα ντινέ-αμέν εκ γιαβέρ προνόμιος σο να μπεκλεντίναας-λες. Βακερντέ μάνγκε τι τζαβ τθαν τθανέστε σαρ επίσκοπος γιεκ μι ρομνιάσαρ σαρό κο τθεμ. Ο γραφείος τμήματος κι Κένυα βακερντάς αμένγκε τι αρχίνας εκ ταξίδι για τι αρακχάς καλέ τθανέντε ισινέ ανάγκη τι μπουτσσάντιβεν ειδικοί σκαπανείς. Μπουτ φαρ, φιλοξενίνενας-αμέν τζενέ σο να ντικχλέας ποτές Μαρτυρέν ι Ιεχωβάσκε. Ισινέ λατσσέ αμέντζαρ ντα ατζέ-ντα καλίνενας-αμέν τι χας λέντζαρ.

Αλλά γκιλάμ γιαβερέ-ντα τθανέντε. Κατά Καμπάλα κερντόμ ταξίδι ντούι ντιβές τρενόσαρ μέχρι σο ερεσλόμ κο λιμάνι κι Μομπάσα κι Κένυα ντα οτθάρ γκιλόμ εκχέ καραβίσαρ κο Σεϋχέλλες, σο ισί νησιά κο Ινδικός Ωκεανός. Σοράν, κατά 1965 μέχρι κο 1972, η Μπάρμπαρα αβέλας μάντζαρ κάνα τζάβας κο Σεϋχέλλες. Κι αρχή τζουβντιόνας οτθέ σάντε ντούι ευαγγελιζόμενοι, όμως σοράν αβιλό οτθέ εκ όμιλος σο τελικά αβιλό κχανγκιρί. Επίσης, μπουτσσαντέ-μαν τι ντικχάβ ι πφραλέν κι Ερυθραία, κι Αιθιοπία ντα κο Σουδάν.

Κι Ουγκάντα, ο πράγματα αλλαξάλε μπουτ κάνα ο στρατός αρχισάλο τι κερέλ κουμάντος. Κο μπρεσά σοράν ανταλέσταρ, αγαντόμ καζόμ λατσσό ισί τι ντας καν κι εντολή: «Ντεν οντουλά σο ισί ι Καισαράσκε κο Καίσαρας». (Μάρκ. 12:​17) Εκ ντιβές, βακερντέ σαρέ οντουλένγκε σο ισινέ γιαβερέ τθεμένταρ ντα μπεσένας οτθέ τι τζαν ντα τι ντεν πουμαρέ στοιχεία κο αστυνομικός τμήμας σο ισινέ πασέ λέντε. Κερντάμ-λες ανταβά αμέσως. Χάνικ ντιβεσά πιο σοράν, καζόμ με ντα εκ γιαβέρ ιεραπόστολος τζάας ι αυτοκινητόσαρ εκχέ τθανέστε κι Καμπάλα, ο ασκέρια αβιλέ πασέ αμέντε. Νταρασάλαμ μπουτ! Κατηγοριντέ-αμέν ότι ισινάμας κατάσκοποι ντα γκερντέ-αμέν κο αστυνομικός τμήμας σο οτθέ βακερντάμ ότι ισινάμας ειρηνικοί ιεραπόστολοι. Καζόμ-ντα τι βακεράας λένγκε ότι αμέν ντινάμας αμαρέ στοιχεία κι αστυνομία, να ασουνένας-αμέν. Ασκέρια σο τθερένας όπλα γκερντέ-αμέν κο αστυνομικός τμήμας σο ισινέ πασέ κο ιεραποστολικός κχερ. Νασλό οπρ’ αμένταρ εκ μπαρό πφαριπέ κάνα ο αξιωματικός σο τζανέλας ότι ντινάμας αμαρέ στοιχεία πιο τζανγκλέ, αγαντάς-αμέν ντα βακερντάς τι μουκχέν-αμέν τι νασάς!

Οντουβά βακίτι, τθεράας μπουτ μπαρί αγωνία κάνα ο στρατιώτες σταματίνενας-αμέν κο ντρομ, ντα πιο μπουτ κάνα οντουλά στρατιώτες ισινέ ματέ. Κάθε φαρ όμως, κεράας  προσευχή ντα νιωθίναας ήρεμοι αντρ’ αμέντε κάνα μουκχένας-αμέν τι συνεχίνας αμαρό ντρομ. Δυστυχώς, κο 1973 βακερντέ σαρέ ι ιεραποστολόνγκε σο ισινέ γιαβερέ τθεμένταρ τι νασέν κατά Ουγκάντα.

Μπουτσσαντέ-αμέν πάλι γιαβερτθέ, ανταγιά φαρ κι Ακτή Ελεφαντοστού σο ισί κι Δυτική Αφρική. Έπρεπε τι κεράας πάλι αλλαγές: τι σικλιάς εκ κουλτούρα σο να τζανάας ιτς, τι κεράς λάφι πάλι γαλλικά ντα τι σικλιάς τι τζουβντιάς ιεραποστολόντζαρ σο ισινέ γιαβερέ τθεμένταρ! Όμως, ντικχλάμ ατζέκ εκ φαρ ότι ο Ιεχωβά οδηγίνελας-αμέν καζόμ ντικχάας ταπεινέ ντα λατσσέ τζενέν τι ασουνέν ο λατσσέ αμπέρια ντα τι αλλάνεν σουγκό πουμαρί ζωή. Ντικχλάμ γιεκ ότι επειδή ντάας μπέσα κο Ιεχωβά βοβ κερέλας αμαρέ ντρομά ίσια.

Αζομάν, οτθέ σο να μπεκλεντίναας-λες, σικλιλάμ ότι η Μπάρμπαρα τθερέλας καρκίνος. Παρόλο σο γκιλάμ μπουτ φαρ κι Ευρώπη για τι κερέλ θεραπείες, κο 1983 αγαντάμ ότι έπρεπε τι μουκχάς αμαρό διορισμός κι Αφρική. Ο ντούι-ντα στεναχωρισάλαμ μπουτ!

Η Μπάρμπαρα νασφάλιλι πιο μπουτ κάνα υπηρετίναας κο Μπέθελ κο Λονδίνος ντα τελικά μουλί. Η φαμιλί Μπέθελ βοηθιντάς-μαν μπουτ. Ντα πιο μπουτ εκ αντρόγυνος βοηθιντάς-μαν τι κοβλιαράβ μι ντουκχ ντα τι συνεχίναβ τι νταβ μπέσα κο Ιεχωβά. Πιο σοράν, γνωριντόμ εκχέ πφενιά σο βακερένας λάκε Αν. Βόι αβέλας τι κερέλ μπουτί κο Μπέθελ μερικά ντιβεσά ντα υπηρετιντάας σαρ ειδική σκαπάνισσα. Η αγάπη σο τθερέλας ι Ιεχωβάσκε σικαβέλας ότι ισινέ πνευματική τζενί. Παντρισάλαμ κο 1989, ντα από αζομάν υπηρετίνασα κο Μπέθελ κο Λονδίνος.

Κατά 1995 μέχρι κο 2018, τθεράβας ο προνόμιος τι υπηρετίναβ σαρ εκπρόσωπος κατά παγκόσμια κεντρικά γραφεία (ή γιαβέρτουλους, σαρ επίσκοπος ζώνης, σαρ βακεράας ανγκλέ) ντα γκιλόμ περίπου 60 τθεμέντε. Κο κάθε τθεμ σο τζάβας, ντικχάβας σαρ ευλογίνελα ο Ιεχωβά πι υπηρετόν σαρ-ντα τι αβέν ο πράγματα οτθέ σο μπεσένα.

Κο 2017, αντρέ κο τθανά σο τθεράβας τι τζαβ ισινέ η Αφρική. Αβιλό μο γκι σο σικαντόμ κι Αν ο Μπουρούντι. Ο ντούι-ντα σαστισάλαμ κάνα ντικχλάμ καζόμ τζενέ σικλιλέας ι αλήθεια οτθέ! Εκχέ ντρομέστε σο κεράβας έργος κχερ κχερέστε κο 1964, ακανά ισί εκ μπουτ σουκάρ Μπέθελ ντα ακανά σαρό κο τθεμ ισί πιο μπουτ από 15.500 πφραλά.

Χαιρισάλομ μπουτ κάνα βακερντέ μάνγκε καλέ τθεμέντε κα τζάβας για τι κεράβ επισκέψεις κο 2018. Εκ οντουλέ τθεμένταρ ισινέ η Ακτή Ελεφαντοστού. Κάνα ερεσλάμ κο Αμπιτζάν, κι πρωτεύουσα, νιωθίναβας σαρ τι βουρτίναβας μι κχερέστε. Καζόμ ντικχάβας ο τηλεφωνικός κατάλογος κο Μπέθελ, ντικχλόμ ότι κο δωμάτιος σο ισινέ πασέ αμαρέ δωματιόστε μπεσέλας εκ πφραλ σο λέσκο ναβ αβέλας μάνγκε γνωστός, ο πφραλ Σόσου. Ντινόμ-μαν γκοντί ότι υπηρετίνελας σαρ επίσκοπος πόλης κάνα ισινόμας κο Αμπιτζάν. Αλλά κερντόμας λάθος. Να ισινέ ο Σόσου σο τζανάβας​—ισινέ λέσκο τσσαβό.

Ο Ιεχωβά ατσσικιαρντάς πο λάφι. Αντράλ κατά μπαρέ δυσκολίες, αγαντόμ ότι, κάνα ντάσα μπέσα κο Ιεχωβά, βοβ μπαγιά κερέλα ίσια αμαρέ ντρομά. Ακανά, μπεσάσα σαρ σαρ τι πφιράς εκχέ ντρομέστε σο να τελειώνελα, εκχέ ντρομέστε σο κα λελ-πες ατζέ πιο μπουτ κο νεβό ντουνιάς.​—Παρ. 4:18.