Η ΓΙΟΜΑΡΑ ντα λάκε πφραλά, ο Μαρσέλο ντα ο Ιβέρ, τζουβντιόνα εκχέ χουρντέ γκαβέστε κι Γουατεμάλα. Η Γιομάρα αρχισάλι μελέτη ι Μαρτυρέντζαρ, ντα σοράν λάκε πφραλά-ντα αρχισάλε τι μπεσέν κι μελέτη. Αλλά υπαρχίντιβελας εκ πρόβλημας. Ισί ο τριν-ντα κορορέ ντα να τζανένας τι διαβάνεν ι Μπράιγ. Οτθάρ, ο πφραλ σο κερέλας-λεν μελέτη διαβάνελας λένγκε ο παράγραφοι ντα ο εδάφια ι μαθημάσκε.

Επίσης, ισινέ δύσκολος λένγκε τι τζαν κο συναθροίσεις. Κορκορέ, ναστί κερένας 40 λεπτά ντρομ για τι τζαν κι Αίθουσα Βασιλείας σο ισινέ πο πασέ λέντε. Αλλά ο πφραλά κι κχανγκιρί κανονιντέ τι γκερέν-λεν σαρέ κο συναθροίσεις. Ντα κάνα ανταλά τριν τζενέ αρχισάλε τι κερέν ομιλίες κι συνάθροιση, ο γιαβερά πφραλά βοηθίνενας-λεν τι ατσσικιαρέν ο λάφια πουμαρέ γκοντιάτε.

Κο Μάιος 2019, αρχισάλε τι αβέν-πες συναθροίσεις λένγκε γκαβέστε. Εκ αντρόγυνος σο ισινέ τακτικοί σκαπανείς γκιλέας τι μπεσέν λένγκε γκαβέστε. Βον τσσουντέ στόχος τι σικλιαρέν ι τρινέ πφραλέν τι διαβάνεν ντα τι γραφίνεν κι Μπράιγ, παρόλο σο να τζανένας-λα ούτε βον. Τζάνας σε εκ βιβλιοθήκη για τι σικλιόν ι Μπράιγ ντα σαρ κα μπορίνενας τι σικλιαρέν-λα κο γιαβερά.

Αντρέ χάνικ μασικέντε, ο τριν πφραλά διαβάνενας μπουτ λατσσές κι Μπράιγ, ντα ανταβά βοηθιντάς-λεν τι κερέν πο μπουτ πρόοδος. Ακανά η Γιομάρα, ο Μαρσέλο ντα ο Ιβέρ υπηρετίνενα σαρ τακτικοί σκαπανείς. Ο Μαρσέλο ισί διακονικός υπηρέτης. Σαρί ι εβδομάδα, ο τριν-ντα κερένα μπουτ πράγματα κι Ιεχωβάσκι υπηρεσία. Τθερένα αζόμ μπαρί χαρά καζόμ υπηρετίνενα ι Ιεχωβάς σο τσσίντενα ι γιαβερέν-ντα τι κερέν πο μπουτ ι Ιεχωβάσκε.

Ο τριν πφραλά ισί πφερντέ εκτίμηση για το λατσσιπέ σο σικαβέλα λένγκε η κχανγκιρί. «Από την αρχή σο γνωριντάμ-λεν, ο Μάρτυρες σικαβένα αμένγκε αληθινός μανγκιπέ», βακερέλα η Γιομάρα. «Τθεράσα μπουτ λατσσέ αμαλέν αμαρέ κχανγκιριάτε ντα ισινάμ εκχέ φαμιλιάτε σαρό κατά ντουνιάς σο μανγκένα ο εκ ι γιαβερές», βακερέλα ο Μαρσέλο. Η Γιομάρα ντα λάκε πφραλά μπεσένα σαρ σαρ τι αβέλ ο ντιβές σο κα ντικχέν ι πφουβ τι αβέλ παράδεισος.​—Ψαλμ. 37:​10, 11· Ησ. 35:5.