1. Καλά σουκάρ πράγματα μανγκένα τι κερέν κατά πουρανέ μπρεσά ο υπηρέτες ι Ιεχωβάσκε;

 ΝΤΙΚΧΕΝΑ τουμέν πολύτιμη τουμαρί φιλία ι Ιεχωβάσαρ; Σίγουρα! Ντα να ντικχένα-λα σάντε τουμέν αντικάς. Κατά πουρανέ μπρεσά, μπουτ τζενέ νιωσάλε σαρ τουμέν. (Ψαλμ. 104:33, 34) Μπουτ τζενέ κερντέ θυσίες για τι υπηρετίνεν ι Ιεχωβάς. Ανταβά κερντέ ο ναζηραίοι-ντα κο πουρανό Ισραήλ. Κον ισινέ ανταλά τζενέ, ντα σο σικλιάσα λένγκε παραδειγμάσταρ;

2. (α) Κον ισινέ ο ναζηραίοι; (Αριθμοί 6:1, 2) (β) Σόσκε μερικοί Ισραηλίτες ντένας πουμαρό λάφι τι αβέν ναζηραίοι;

² Ο λάφι «ναζηραίος» αβέλα κατά εβραϊκός λάφι σο μανγκέλα τι βακερέλ ότι κάποιος ισί «ξεχωρισμέ» ή «αφιερωμέ». Ο ναζηραίοι ισινέ Ισραηλίτες σο πφαμπόνας ι Ντεβλέσκε πραγματένγκε ντα κερένας κάποιες θυσίες για τι υπηρετίνεν-λες εκχέ ξεχωριστέ τροπόσαρ. Ο Μωσαϊκός Νόμος μουκχέλας μουρσέν ντα τζουβλίν τι ντεν πουμαρό λάφι κο Ιεχωβά ντα τι τραμπίνεν τι τζουβντιόν σαρ ναζηραίοι για κάποιο βακίτι. a (Διαβάνεν Αριθμοί 6:1, 2) Κάνα εκ Ισραηλίτης ντέλας πο λάφι τι τζουβντιόλ σαρ ναζηραίος, έπρεπε τι ντελ καν μερικέ οδηγιέντε σο ο γιαβερά Ισραηλίτες να χρειαζίντιβελας τι ντεν καν. Σόσκε όμως τι τραμπίνελας εκ Ισραηλίτης τι ντελ πο λάφι τι αβέλ ναζηραίος; Μάλλον οντουβά σο τσσίντελας-λες ισινέ η μπαρί αγάπη ι Ιεχωβάσκε ντα η εκτίμηση σο τθερέλας για το μπουτ ευλογίες Λέσκε.​—Δευτ. 6:5· 16:17.

3. Σαρ μοιάζενα ο υπηρέτες ι Ντεβλέσκε αντιβές με το ναζηραίοι;

³ Κάνα τσσινάντιλο ο Μωσαϊκός Νόμος ντα λέσκε θεσιάτε αβιλό «ο νόμος ι Χριστόσκο», καέκ υπηρέτης ι Ντεβλέσκο ναστί κα αβέλας ναζηραίος. (Γαλ. 6:2· Ρωμ. 10:4) Αλλά σαρ ο ναζηραίοι,  αντικάς ο υπηρέτες ι Ιεχωβάσκε-ντα αντιβές μανγκένα μπουτ τι υπηρετίνεν-λες σαρέ πουμαρέ γκίσαρ, πουμαρέ ψυχιάσαρ, πουμαρέ γκοντιάσαρ ντα πουμαρέ ζοριάσαρ. (Μάρκ. 12:30) Ντάσα αμαρό λάφι αντράλ αμαρέ γκίσταρ τι κεράς-λες ανταβά κάνα αφιερώνασα αμαρί ζωή κο Ιεχωβά. Για τι τζουβντιάς αντικάς σαρ ντινάμ αμαρό λάφι, πρέπει τι κεράς ο θέλημας ι Ιεχωβάσκο ντα τι κεράς θυσίες για τι υπηρετίνας-λες. Καζόμ ντικχάσα σαρ ο ναζηραίοι τζουβντιόνας αντικάς σαρ ντινέας πουμαρό λάφι, σικλιάσα σαρ μπορίνασα αμέν-ντα τι τζουβντιάς αντικάς σαρ ντινάμ αμαρό λάφι. b (Ματθ. 16:24) Για τι ντικχάς μερικά παραδείγματα.

ΚΕΡΕΝ ΘΥΣΙΕΣ

4. Καγιά θυσία κερένας ο ναζηραίοι, σαρ σικαβένα ο εδάφια Αριθμοί 6:3, 4;

⁴ Διαβάνεν Αριθμοί 6:3, 4. Ο ναζηραίοι έπρεπε τι ατσσόν ντουρ κατά μολ ντα κάθε πραγμάσταρ σο νικιόλα κατά ρεζ, σαρ ισί ο ντρακχά ντα ο σταφίδες. Ο γιαβερά Ισραηλίτες κα απολαμβάνενας ανταλά πράγματα, ντα ανταβά να ισινέ κακός. Κι πραγματικότητα, η Γραφή βακερέλα ότι η «μολ σο κερέλα ι τζενέσκο γκι τι χαιρίνελ» ισί δώρος κατά Ντεβέλ. (Ψαλμ. 104:14, 15) Όμως, παρόλο σο ανταλά πράγματα κερένας ι ζωή εκχέ τζενέσκι πο σουκάρ, ο ναζηραίοι ισινέ πρόθυμοι τι ατσσόν ντουρ λένταρ. c

5. Καλά θυσίες τραμπιντέ τι κερέν ο Μαντιάν ντα η Μαρσέλα, ντα σόσκε;

⁵ Σαρ ο ναζηραίοι, αντικάς αμέν-ντα κεράσα θυσίες για τι κεράς πο μπουτ ι Ιεχωβάσκε. Σκεφτίνεν σο κερντάς ο Μαντιάν ντα η Μαρσέλα, σο ισί Μάρτυρες. Ανταβά αντρόγυνος τθερέλας εκ μπουτ λατσσί ζωή. Ο Μαντιάν τθερέλας λατσσί μπουτί, ντα οτθάρ τζουβντιόνας εκχέ σουκάρ κχερέστε. Όμως, μανγκένας τι κερέν πο μπουτ κι υπηρεσία κι Ιεχωβάσκι. Για τι πετυχίνεν ανταβά στόχος, αποφασιντέ τι κερέν κάποιες αλλαγές. «Αρχισάλαμ τι χαλαβάς πο χάνικ λοβέ», βακερένα βον. «Ακχαρντάμ-αμέν εκχέ πο χουρντέ κχερέστε ντα μπικιντάμ αμαρό αυτοκίνητος». Ο Μαντιάν ντα η Μαρσέλα να ισινέ υποχρεωμέ τι κερέν ανταλά θυσίες. Τραμπιντέ τι κερέν-λεν επειδή μανγκένας τι κερέν πο μπουτ κι υπηρεσία κι Ιεχωβάσκι. Νιωθίνενα πφερντέ ντα χαρούμενοι σο τραμπιντέ-λες ανταβά.

6. Σόσκε κερένα θυσίες ο Χριστιανοί αντιβές; (Ντικχέν ι φωτογραφία-ντα)

⁶ Ο Χριστιανοί αντιβές αρακχένα χαρά καζόμ κερένα θυσίες για τι τθερέν πο μπουτ σαάτι κι υπηρεσία κι Ιεχωβάσκι. (1 Κορ. 9:3-6) Ο Ιεχωβά να πιένελα-αμέν τι κεράς ανταλά θυσίες, ούτε ο πράγματα σο μουκχάσα παλάλ ισί  μπέτι πράγματα. Για παράδειγμας, μερικοί κερένα ασακέ θυσίες: Να κερένα ι μπουτί σο κα μπεϊντίνενας, να τθερένα πουμαρό κχερ, ή ατζέ-ντα να λένα πέσκε εκ ζώος. Μπουτ πφραλά ντα πφενιά αποφασιντέ τι ατσσόν εργένια για χάνικ βακίτι, ή μα τι κερέν σουγκό τσσαβέν. Γιαβερά τραμπιντέ τι υπηρετίνεν οτθέ σο η ανάγκη ισί πο μπαρί, παρόλο σο ανταβά μανγκέλα τι βακερέλ ότι τζουβντιόνα ντουρ πουμαρέ τζενένταρ ντα πουμαρέ αμαλένταρ. Μπουτ αμένταρ κεράσα ανταλά θυσίες αντράλ αμαρέ γκίσταρ επειδή μανγκάσα τι ντας κο Ιεχωβά ο πο λατσσό. Τι αβέν σίγουροι ότι ι Ιεχωβάσκε ισί μπουτ σημαντική κάθε θυσία σο τραμπίνενα τι κερέν για τι υπηρετίνεν-λες, είτε ισί μπαρί είτε χουρντί.​—Εβρ. 6:10.

ΤΙ ΜΑΝΓΚΕΝ ΤΙ ΑΒΕΝ ΔΙΑΦΟΡΕΤΙΚΟΙ

7. Καγιά δυσκολία μπορεί τι τθερέλας εκ ναζηραίος καζόμ προσπαθίνελας τι ατσσικιαρέλ ο λάφι σο ντινάας; (Αριθμοί 6:5) (Ντικχέν ι φωτογραφία-ντα)

⁷ Διαβάνεν Αριθμοί 6:5. Ο ναζηραίοι ντένας πουμαρό λάφι μα τι τσσινέν πουμαρέ μπαλά. Ανταβά ισινέ εκ τρόπος τι σικαβέν ότι ισινέ ντιπ αφοσιωμέ κο Ιεχωβά. Άμα εκ Ισραηλίτης ισινέ ναζηραίος μπουτ βακίτι, ο γιαβερά κα αγαβένας ότι λέσκε μπαλά μπαριλέας. Άμα ο γιαβερά ντονταλάι λέσταρ σεβάνενας-λες ντα ενθαρρύνενας-λες τι ατσσικιαρέλ πο λάφι, κα αβέλας πο εύκολος λέσκε τι αβέλ διαφορετικός. Δυστυχώς όμως, μπάζιμα ο τζενέ κο μπρεσά κι Ισραηλιτένγκε να σεβάνενας ντα να υποστηρίνενας ι τζενέν σο ισινέ ναζηραίοι. Κο μπρεσά σο τζουβντιόλας ο προφήτης Αμώς, ο αποστάτες Ισραηλίτες «ντένας κο ναζηραίοι τι πιν μολ», μάλλον για τι κερέν-λεν μα τι ατσσικιαρέν ο λάφι σο ντινέ τι νασέν κατά μολ. (Αμώς 2:12) Μερικές φορές, εκ ναζηραίος χρειαζίντιβελας μπαρό θάρρος για τι ατσσικιαρέλ ο λάφι σο ντινάς ντα τι αβέλ διαφορετικός κατά γιαβερά.

8. Σο ντέλα-τουμέν ζορ κατά εμπειρία του Μπένγιαμιν;

⁸ Ι Ιεχωβάσκε βοηθειάσαρ, μπορίνασα αμέν-ντα τι σικαβάς θάρρος για τι αβάς διαφορετικοί, ατζέ-ντα άμα ισινάμ λατζανέ. Ντικχέν ο παράδειγμας του Μπένγιαμιν, εκχέ Μαρτυράσκο κι Νορβηγία σο ισί ντες μπρεσένγκο. Λέσκο σχολείος κερντάς εκ γιορτή για τι βοηθίνελ ι τζενέν κι Ουκρανία, σο οτθέ αβέλα-πες τζένγκι. Μανγκλέ κατά τσσαβέ τι γκιλιαβέν εκ γκιλί ντα τι ιρίν σέα σο τθερένας ο χρώματα σο ισί κι σημαία της Ουκρανίας. Για μα τι λελ μέρος κι γιορτή, ο Μπένγιαμιν ατσσιλό χάνικ ντουρ οτθάρ σο αβέλας-πες η γιορτή. Όμως, εκ δασκάλα ντικχλάς-λες ντα ντινάς βίκος ζουρανές: «Άντε, έλα! Σαρέ τούκε μπεκλεντίνασα!» Ο Μπένγιαμιν γκιλό με θάρρος κι δασκάλα ντα βακερντάς: «Με ισινόμ ουδέτερος ντα να συμμετεχίναβα κο γιορτές σο τθερένα τι κερέν με την πολιτική. Ντα μπουτ Μάρτυρες ι Ιεχωβάσκε ισί κι φυλακή σόσκε να μανγκένα τι τζαν κο τζένγκι». Η δασκάλα δεχτιντάς ανταγιά απάντηση ντα μουκχλάς-λες μα τι συμμετεχίνελ κι γιορτή. Λέσκε συμμαθητές όμως αρχισάλε τι πουτσέν-λες σόσκε να γιορτάνελας. Ο Μπένγιαμιν νιωσάλο αζόμ μπέτι  σο ισινέ έτοιμος τι ροβέλ. Όμως, βακερντάς πάλι με θάρρος σαρί κι τάξη οντουλά σο βακερντάας κι δασκάλα. Σοράν, ο Μπένγιαμιν βακερντάς πι νταντέσκε ντα πι νταγιάκε ότι νιωσάλο ότι ο Ιεχωβά βοηθιντάς-λες τι κερέλ λάφι οντουλένγκε σο πακιάλα.

9. Καλέ τροπόσαρ μπορίνασα τι κεράς ι Ιεχωβάσκο γκι τι χαιρίνελ;

⁹ Επειδή τραμπίνασα τι ντας καν κο θέλημας κι Ιεχωβάσκο, ισινάμ διαφορετικοί κατά τζενέ ντονταλάι αμένταρ. Χρειαζίντιβελα θάρρος για τι βακεράς ότι ισινάμ Μάρτυρες ι Ιεχωβάσκε αμαρέ μπουτιάτε ή κο σχολείος. Ντα καζόμ ο τρόπος σο σκεφτίνελα ανταβά ντουνιάς ντα οντουλά σο κερέλα αβένα ατζέ χειρότερα, μάλλον κα αβέλ ατζέ πο δύσκολος τι τζουβντιάς αντικάς σαρ βακερέλα η Γραφή ντα τι βακεράς ο λατσσέ αμπέρια κο γιαβερά. (2 Τιμ. 1:8· 3:13) Αλλά πάντα τι ντεν-τουμέν γκοντί ότι “κεράσα ο γκι [ι Ιεχωβάσκο] τι χαιρίνελ” κάνα τθεράσα ο θάρρος τι αβάς διαφορετικοί οντουλένταρ σο να υπηρετίνενα-λες.​—Παρ. 27:11· Μαλ. 3:18.

ΤΙ ΑΤΣΣΙΚΙΑΡΕΝ Ι ΙΕΧΩΒΑΣ ΚΙ ΠΡΩΤΗ ΘΕΣΗ ΤΟΥΜΑΡΕ ΖΩΓΙΑΤΕ

10. Σαρ κα μπορίνελας η εντολή σο ισί κο εδάφια Αριθμοί 6:6, 7 τι αβέλ δοκιμασία οντουλένγκε σο ισινέ ναζηραίοι;

¹⁰ Διαβάνεν Αριθμοί 6:6, 7. Ο ναζηραίοι δεν έπρεπε τι τζαν πασέ καεκχέ τζενέστε σο ισινέ μουλό. Μπέκιμ ανταγιά μα τι ντικχίντιβελ τουμένγκε μπαρί θυσία. Κο πουρανέ μπρεσά όμως, ανταγιά εντολή κα αβέλας μπαγιά δύσκολη εκχέ τζενέσκε σο ισινέ ναζηραίος άμα κα μερέλας εκ τζενό λέσκο. Αντρέ κο έθιμα σο κερένας αζομάν ι μουλένγκε ισινέ τι αβέλ εκ τζενό πασέ κο σώμας κι μουλέσκο. (Ιωάν. 19:39, 40· Πράξ. 9:36-40) Όμως, εκ ναζηραίος ναστί κερέλας ανταλά έθιμα. Ατζέ-ντα κάνα λένγκι φαμιλί νακχέλας μπαρί στεναχώρια επειδή μουλό εκ αγαπημέ τζενό λένγκο, ο ναζηραίοι σικαβένας μπαρί πίστη ντα ατσσικιαρένας ο λάφι σο ντινέ. Ο Ιεχωβά σίγουρα ντέλας οντουλέ αφοσιωμέ τζενέντε ι ζορ τι νταϊντίνεν ασακέ δυσκολίες.

11. Σο πρέπει τι αβέλ αποφασισμέ τι κερέλ εκ Χριστιανός κάνα λέλα αποφάσεις σο τθερένα τι κερέν ι φαμιλιάσαρ; (Ντικχέν ι φωτογραφία-ντα)

¹¹ Σαρ Χριστιανοί, λάσα σοβαρά ο λάφι σο ντινάμ κο Ιεχωβά τι τζουβντιάς λέσκε. Ανταβά επηρεάνελα αμαρέ αποφάσεις ντα οντουλά σο κεράσα αντρέ κι φαμιλί. Κεράσα ο πο λατσσό για τι φροντίνας ο ανάγκες αμαρέ φαμιλιάκε, αλλά ποτές να τσσουβάσα οντουλά σο μανγκέλα αμαρί φαμιλί πο οπρέ οντουλένταρ σο μανγκέλα αμένταρ ο Ιεχωβά. (Ματθ. 10:35-37· 1 Τιμ. 5:8) Μπάζιμα, ανταβά μανγκέλα τι βακερέλ ότι κα χρειαζίντιβελ τι λας αποφάσεις σο αμαρέ τζενέ να κα μπεϊντίνεν, αλλά αντικάς κεράσα ι Ιεχωβάσκο γκι τι χαιρίνελ.

12. Κάνα ο Αλεξάντρου τθερέλας εκ μπαρί δυσκολία πι φαμιλιάτε, σο κερντάς ντα σο να κερντάς;

 ¹² Σκεφτίνεν για παράδειγμας τον Αλεξάντρου ντα λέσκε ρομνιά, ι Ντορινά. Αφού κερντέ μελέτη εκ μπρες γιεκ, η Ντορίνα αποφασιντάς τι τσσιναβέλ ντα βακερντάς κο Αλεξάντρου τι τσσιναβέλ βοβ-ντα. Όμως, βοβ βακερντάς λάκε λατσσέ ντα κοβλέ τροπόσαρ ότι να κα τσσιναβέλας. Η Ντορίνα στεναχωρισάλι μπουτ ντα προσπαθιντάς τι κερέλ-λες τι τσσιναβέλ ι μελέτη ζορίσαρ. Ο Αλεξάντρου βακερέλα ότι μαρέλας-πες τι αγαβέλ σόσκε λέσκι ρομνί κερέλας-λες ανταβά, αλλά να ισινέ λέσκε εύκολος. Μπάζιμα κάνα η Ντορίνα κερέλας λέσκε μπέτι λάφια, βοβ νιωθίνελας ότι μανγκέλας τι τσσιναβέλ πι μελέτη. Όμως, συνεχίνελας τι τσσουβέλ ι Ιεχωβάς πρώτος πι ζωγιάτε, αλλά σικαβέλας μπαρό σεβασμός πι ρομνιάτε-ντα. Τελικά, ο μπουτ λατσσό παράδειγμας λέσκο τσσιντιντάς-λα τι αρχίνελ πάλι πι μελέτη ντα πο σοράν μπολντιλί.​—Ντικχέν ο βίντεος Αλεξάντρου ντα Ντορίνα Βακάρ: «Ο Μανγκιπέ Κερέλα Υπομονή ντα Σικαβέλα Λατσσιπέ» κι σειρά «Η Αλήθεια Αλλάνελα Ντιπ ο Ζωές» κο ιστότοπος jw.org.

13. Σαρ μπορίνασα τι σικαβάς αγάπη ι Ιεχωβάσκε ντα αμαρέ φαμιλιάκε;

¹³ Ο Ιεχωβά κερντάς ι φαμιλί ντα μανγκέλα τι τθεράς ευτυχισμέ φαμιλί. (Εφεσ. 3:14, 15) Για τι αβάς μπαγιά ευτυχισμέ, χρειαζίντιβελα τι κεράς οντουβά σο μανγκέλα αμένταρ ο Ιεχωβά τι κεράς. Τι αβέν σίγουροι ότι ο Ιεχωβά εκτιμίνελα ο θυσίες σο κερένα για τι υπηρετίνεν-λες καζόμ φροντίνενα ι τζενέν τουμαρέ φαμιλιάτε ντα σικαβένα λένγκε αγάπη ντα σεβασμός.​—Ρωμ. 12:10.

ΤΣΣΙΝΤΕΝ Ι ΓΙΑΒΕΡΕΝ ΤΙ ΑΒΕΝ ΣΑΡ Ο ΝΑΖΗΡΑΙΟΙ

14. Καλέ τζενέντε δεν πρέπει τι μπιστράς τι ντας ζορ αμαρέ λαφίντζαρ;

¹⁴ Σαρέ οντουλά σο τραμπίνενα τι υπηρετίνεν ι Ιεχωβάς αντιβές χρειαζίντιβελα τι αβέν έτοιμοι τι κερέν θυσίες επειδή τσσίντελα-λεν η αγάπη. Μερικές φορές, ανταβά νανέ εύκολος. Σαρ μπορίνασα τι βοηθίνας ο εκ ι γιαβερές τι αβάς σαρ ο ναζηραίοι; Τι ντας ζορ αμαρέ λαφίντζαρ. (Ιώβ 16:5) Μήπως υπαρχίντιβενα κάποιοι τουμαρέ κχανγκιριάτε σο προσπαθίνενα τι τζουβντιόν πο απλά για τι κερέν πο μπουτ κι υπηρεσία κι Ιεχωβάσκι; Μήπως τζανένα τερνέν σο τθερένα ο θάρρος τι αβέν διαφορετικοί κατά γιαβερά κο σχολείος, παρόλο σο ανταβά ισί δύσκολος; Μήπως υπαρχίντιβενα τζενέ σο κερένα μελέτη ντα πφραλά σο κερένα αγώνας για τι ατσσόν πιστοί ιτιρί κατά κόντρα πουμαρέ φαμιλιάταρ; Τι αβέν αποφασισμέ τι κερέν ο πο λατσσό για τι ντεν ζορ ανταλέ τζενέντε ντα τι βακερέν λένγκε καζόμ καμαρώνενα-λεν επειδή τθερένα θάρρος ντα κερένα θυσίες ι Ιεχωβάσκε.​—Φιλήμ. 4, 5, 7.

15. Σαρ βοηθίνενα μερικοί οντουλέν σο ισί κι ολοχρόνια υπηρεσία;

 ¹⁵ Μερικές φορές, μπορίνασα τι ντας βοήθεια αμαρέ πφραλέντε σο ισί κι ολοχρόνια υπηρεσία. (Παρ. 19:17· Εβρ. 13:16) Ανταβά μανγκέλας τι κερέλ αντράλ πι γκίσταρ εκ πιστή πφουρί πφεν σο τζουβντιόλα κι Σρι Λάνκα. Επειδή αρχισάλι τι λελ πο μπουτ λοβέ πι συνταξιάταρ, μανγκλάς τι βοηθίνελ ντουέ τερνέ σκαπανισσέν, σο τθερένας προβλήματα ι λοβέντζαρ, τι συνεχίνεν πουμαρό έργος. Οτθάρ, αποφασιντάς τι ντελ-λεν κάθε μάσεκ κάποια λοβέ για τι ποκινέν ο τηλέφωνος. Σο σουκάρ ισί ανταβά σο κερέλα αμαρί πφεν!

16. Σο μπορίνασα τι σικλιάς κατά ναζηραίοι κο πουρανέ μπρεσά;

¹⁶ Σίγουρα μπορίνασα τι σικλιάς μπουτ πράγματα κατά μπουτ λατσσό παράδειγμας σο μουκχλέ ο ναζηραίοι κο πουρανέ μπρεσά! Όμως ο ναζηραίοι σικλιαρένα-αμέν κάτι αμαρέ Νταντέσκε σο ισί κο ουρανός, ι Ιεχωβάσκε. Βοβ τζανέλα ότι μανγκάσα αντράλ αμαρέ γκίσταρ τι κεράς-λες χαρούμενος ντα ότι ισινάμ έτοιμοι τι κεράς θυσίες για τι τζουβντιάς αντικάς σαρ ντινάμ αμαρό λάφι κο Ιεχωβά. Ντέλα-αμέν αξία σο μουκχέλα-αμέν τι τραμπίνας τι σικαβάς λέσκε αμαρί αγάπη. (Παρ. 23:15, 16· Μάρκ. 10:28-30· 1 Ιωάν. 4:19) Κάτι γιαβέρ σο σικλιάσα κατά ναζηραίοι ισί ότι ο Ιεχωβά ντικχέλα ο θυσίες σο κεράσα ντα ισί λέσκε πολύτιμες. Οτθάρ, τι αβάς αποφασισμέ τι συνεχίνας τι υπηρετίνας ι Ιεχωβάς καζόμ ντάσα-λες αντράλ αμαρέ γκίσταρ ο πο λατσσό σο τθεράσα.