ΝΙΩΣΑΛΕΝ ποτές ότι πρέπει τι νακχαβέν τουμαρέ προβλήματα κορκορέ; Ο ντιβεσά σο τζουβντιάσα ισί «δύσκολα ντα επικίνδυνα» ντα μπορίνενα τι κερέν-αμέν τι νιωθίνας μπίζουρανε ντα κορκορέ. (2 Τιμ. 3:1) Όμως να χρειαζίντιβελα τι νακχαβάς ο δυσκολίες ι ζωγιάκε κορκορέ. Η Αγία Γραφή σικαβέλα καζόμ μπαρί αξία τθερένα ο αληθινά αμαλά “ντιβεσέντε σο αβέλα στεναχώρια”.​—Παρ. 17:17.

Ο απόστολος Παύλος κερέλας ταξίδια γιεκ μερικέ πφραλέντζαρ ντα βον βοηθίνενας-λες μπουτέ τροπόντζαρ. Κο ταξίδια ανταλά, ο Παύλος δημιουργιντάς λατσσί φιλία λέντζαρ. (Κολ. 4:7-11) Κάνα ο Παύλος ισινέ φυλακισμέ κι Ρώμη, λέσκε αμαλά κερένας πράγματα σο να μπορίνελας τι κερέλ βοβ. Για παράδειγμας, ο Επαφρόδιτος αντάς κο Παύλος πράγματα σο τθερέλας ανάγκη ντα μπουτσσαντέας-λεν λέσκε ο πφραλά ντα ο πφενιά κατά Φίλιπποι. (Φιλιπ. 4:18) Ο Τυχικός γκερντάς ο επιστολές ι Παυλόσκε μερικέ κχανγκιρίντε. (Κολ. 4:7) Επειδή τθερέλας ι βοήθεια πι αμαλένγκι, ο Παύλος κερέλας πο έργος ατζέ-ντα κάνα ισινέ πφαντό εκχέ κχερέστε ή κορκορό κι φυλακή. Τουμέν, σαρ μπορίνενα τι αβέν λατσσέ αμαλά αντιβές;

Υπαρχίντιβενα αντιβές-ντα παραδείγματα τζενένγκε σο σικαβένα καζόμ σημαντικός ισί τι αβέλ κάποιος αληθινός αμάλ. Η Ελίζαμπετ, εκ τακτική σκαπάνισσα κι Ισπανία, εξηγιντάς σαρ εκ πφεν βοηθιντάς-λα κάνα νακχέλας δυσκολίες. Κάνα η ντάι της Ελίζαμπετ σικλιλί ότι τθερέλας καρκίνος ντα ισινέ μεριμάσκε, οντιά πφεν μπουτσσαβέλας κι Ελίζαμπετ μπουτ μηνύματα σο ντένας-λα ζορ ντα βασίντιβενας σε εδάφια ι Γραφιάκε. «Οντουλά μηνύματα», βακερέλα η Ελίζαμπετ, «ντένας-μαν ζορ για τι νταβ-λεν πέρα κάθε ντιβές χωρίς τι νιωθίναβ κορκορί».​—Παρ. 18:24.

Μπορίνασα τι κεράς αμαρέ φιλίες αμαρέ πφραλέντζαρ πο ζουρανέ κάνα βοηθίνασα-λεν τι τζαν κο συναθροίσεις ή κο έργος. Για παράδειγμας, κα μπορίναας τι λας αμαρέ αυτοκινητόσαρ εκχέ πφουρέ πφραλές ή πφενιά κι συνάθροιση ή κο έργος; Άμα κα βοηθίνας-λεν ασακέ τροπόντζαρ κα ντας-λεν ζορ ντα κα λας αμέν-ντα ζορ. (Ρωμ. 1:12) Όμως, κάποιοι Χριστιανοί να μπορίνενα τι νικιόν πουμαρέ κχερένταρ. Σαρ μπορίνασα τι αβάς πραγματικά αμαλά λένγκε;

Κάποια πφραλά ντα πφενιά να μπορίνενα τι αβέν κι Αίθουσα Βασιλείας για τι ντικχέν ο συναθροίσεις, για παράδειγμας επειδή τθερένα εκ σοβαρός νασφαλιπέ. Σκεφτίνεν ο παράδειγμας του Ντέιβιντ σο αρακχλέ λέσκε λέμφωμας. Πο μπουτ από σιοβ μασεκά κερέλας χημειοθεραπείες. Καζόμ κερέλας ανταλά χημειοθεραπείες, ο Ντέιβιντ ντα λέσκι ρομνί, η Λίντια ντικχένας ι συνάθροιση κχεράλ.

Σαρ στηριντέ-λεν λένγκε αμαλά κι κχανγκιρί; Σοράν από κάθε συνάθροιση, κάποιοι λένταρ σο ισινέ κι Αίθουσα Βασιλείας προσπαθίνενας τι κερέν λάφι κο Ντέιβιντ ντα κι Λίντια αντράλ κατά Zoom. Επίσης  κάνα ο Ντέιβιντ ντα η Λίντια ντένας απάντηση, πο σοράν ο πφραλά μπουτσσαβένας λένγκε μηνύματα σο ντένας-λεν ζορ. Σαρ κερντάς-λεν ανταβά τι νιωθίνεν; Ο Ντέιβιντ ντα η Λίντια να νιωθίνενας αζόμ κορκορέ.

Μπορίνασα τι τσσουβάς στόχος τι κεράς έργος εκχέ πφραλέσαρ ή πφενιάσαρ σο να μπορίνελα τι νικιόλ πι κχερέσταρ. Μπορίνασα τι κεράς χουρντέ αλλαγές κο πρόγραμμας αμαρό για τι καταφερίνας-λες ανταβά. Ανταλέ τροπόσαρ μπορίνασα τι σικαβάς λένγκε ότι να μπιστράσα-λεν. (Παρ. 3:27) Κα μπορίναας τι κανονίνας τι γραφίνας επιστολές ή τι ντας μαρτυρία κατά τηλέφωνος γιεκ λέντζαρ. Οντουλά σο ναστί νικιόνα κατά κχερ ίσως τι μπορίνεν τι τσσουβέν-πες κο ξεκίνημας αντράλ κατά Zoom. Ο Ντέιβιντ ντα η Λίντια εκτιμίνενας-λες μπουτ ανταβά. Ο Ντέιβιντ βακερέλα: «Σάντε σο ισινάμας γιεκ αμαρέ ομιλόσαρ ντα κεράας εκ χουρντί συζήτηση ντα εκ προσευχή, ντέλας-αμέν μπουτ ζορ». Κάποιες φαρ μπορίνασα τι πουτσάς ι πφραλές ή ι πφενιά, σο να μπορίνελα τι νικιόλ κατά κχερ, άμα κα μανγκέλας τι τζας λέσκε ή λάκε κχερέστε ι τζενέσαρ σο κεράσα-λες μελέτη για τι κεράς-λα γιεκ.

Κάνα συνεργαζίντιβασα αμαρέ πφραλέντζαρ ντα αμαρέ πφενίντζαρ σο ναστί νικιόνα κατά κχερ, ντικχάσα από πασάλ λένγκε σουκάρ ιδιότητες ντα ανταβά ανέλα-αμέν ατζέ πο πασέ λέντζαρ. Για παράδειγμας, κάνα συνεργαζίντιβασα λέντζαρ κο έργος ντα ντικχάσα-λεν τι χρησιμοποιήνεν με σουκάρ τρόπος ο Λάφι ι Ντεβλέσκο για τι ερεσέν κο γκιά κι τζενένγκε, εκτιμίνασα-λεν ατζέ πο μπουτ. Μπορίνενα τι κερέν νεβέ φιλόν κάνα βοηθίνενα τουμαρέ πφραλέν ντα πφενιέν τι τζαν κο έργος ντα κι συνάθροιση.​—2 Κορ. 6:13.

Ο Παύλος λιντάς ζορ κάνα λέσκο αμάλ ο Τίτος ισινέ γιεκ λέσαρ. (2 Κορ. 7:5-7) Ανταγιά ιστορία βοηθίνελα-αμέν τι αγαβάς ότι μπορίνασα τι ντας ζορ οντουλέντε σο τθερένα-λες ανάγκη, όχι απλά αμαρέ γκουλντέ λαφίντζαρ, αλλά κάνα ισινάμ πασέ λέντε ντα κάνα κεράσα σο νακχέλα αμαρέ βαστέσταρ για τι βοηθίνας-λεν.​—1 Ιωάν. 3:18.

Ο πφραλά ντα ο πφενιά κι Ρωσία ισί μπουτ λατσσό παράδειγμας ανταλέστε επειδή στηρίνενα ο εκ ι γιαβερές. Σκεφτίνεν ι εμπειρία του Σεργκέι ντα λέσκε ρομνιάκι, της Τατιάνας. Ο ασκέρια ροντιντέ λένγκο κχερ ντα σοράν λιντέ-λεν γιεκ πουμέντζαρ για τι κερέν-λεν ερωτήσεις. Την Τατιάνα μουκχλέ-λα τι νασέλ πρώτη ντα βουρτισάλι πι κχερέστε. Ο Σεργκέι βακερέλα: «Κάνα [η Τατιάνα] ερεσλί κο κχερ, εκ μπίνταρανι πφεν ισινέ αβριάλ κατά πόρτα. Αβιλέ γιαβερά-ντα πφραλά ντα βοηθιντέ-αμέν τι γκίντας αμαρό κχερ».

Ο Σεργκέι βακερέλα: «Μπεϊντίναβας πάντα ο λάφια σο ισί κο εδάφιος Παροιμίες 17:17, σο βακερέλα: “Ο πραγματικός αμάλ σικαβέλα πάντα αγάπη ντα ισί πφραλ σο μπιάντιλο ι ντιβεσένγκε σο αβέλα στεναχώρια”. Κάνα τθεράβας διωγμός χρειαζίντιβαβας μπουτ ι βοήθεια μι αμαλένγκι. Ανταλέσταρ σικλιλόμ καζόμ μπαγιά ισί ο λάφια κο Παροιμίες 17:17. Ο Ιεχωβά ντινάς-μαν αμαλέν σο ατσσόνα πασέ μάντε χωρίς τι νταρέν». a

Καζόμ τζάλα, ο πράγματα αβένα πο δύσκολα ντα χρειαζίντιβασα αμαλέν σο μπορίνασα τι στηρίντιβας λέντε. Κα χρειαζίντιβας-λεν ατζέ πο μπουτ κάνα κα αβέλ η μπαρί στεναχώρια. Οτθάρ μακάρι τι κεράς σο νακχέλα αμαρέ βαστέσταρ για τι αβάς πραγματικά αμαλά ακανά!​—1 Πέτρ. 4:7, 8.