Η Αγία Γραφή βακερέλα ότι ο Μαδιανίτες αντέ ι Ιωσηφίς κι Αίγυπτος ντα ότι σοράν λέσκο ντατ ο Ιακώβ ντα λέσκι φαμιλί γκιλέ κατά Χαναάν κι Αίγυπτος. Γκιλέ κι Γεσέν, εκ τθαν κι Αίγυπτος, οτθέ σο τσσορντιόνα ο πανιά κατά λεν Νείλος. (Γέν. 47:1, 6) Ο Ισραηλίτες «αβγατίντιβενας ντα αβένας πιο ζουρανέ». Οτθάρ, ο Αιγύπτιοι αρχισάλε τι νταρέν λένταρ ντα κερντέ-λεν ζορίσαρ δούλοι.​—Έξοδ. 1:​7-14.

Μερικά ντουσμάνια ι Γραφιάκε βακερένα ότι ανταγιά ιστορία ισί εκ μασάλι. Όμως, υπαρχίντιβενα πράγματα σο σικαβένα ότι κάποιοι Σημίτες * τζουβντιλέ κι πουρανί Αίγυπτος σαρ δούλοι.

Για παράδειγμας, ο αρχαιολόγοι αρακχλέ πουρανέ οικισμοί κι βόρεια Αίγυπτος. Ο Δρ Τζον Μπίμσον βακερέλα ότι υπαρχίντιβενα πράγματα σο σικαβένα ότι ισινέ 20 ή πιο μπουτ σημιτικοί οικισμοί κι βόρεια Αίγυπτος. Επίσης, ο αιγυπτιολόγος Τζέιμς Κ. Χόφμαϊερ βακερέλα: «Κατά 1800 μέχρι κο 1540 π.Χ. περίπου, η Αίγυπτος ισινέ εκ μπουτ σουκάρ τθαν ι τζενένγκε σο μανγκένας τι νασέν κατά δυτική Ασία ντα κερένας λάφι σημιτικά τσσιμπά». Βοβ βακερέλα: «Ανταλά μπρεσά ισί ίδια ι μπρεσέντζαρ σο τζουβντιόλας ο Αβραάμ, ο Ισαάκ ντα ο Ιακώβ οτθάρ ισί ίδια ι μπρεσέντζαρ ντα ι πραγματέντζαρ σο βακερέλα η Γένεση».

Υπαρχίντιβενα στοιχεία κατά νότια Αίγυπτος-ντα. Εκ πάπυρος σο γραφίντιλο κο Μέσο Βασίλειος (περ. 2000–περ. 1600 Π.Κ.Χ.) τθερέλα ναβά δουλόνγκε σο κερένας μπουτί εκχέ κχερέστε κι νότια Αίγυπτος. Πιο μπουτ από 40 ναβά ανταλένταρ ισί σημιτικά. Οντουλά δούλοι, ή υπηρέτες, κερένας χαμπέ, υφάσματα ντα γιαβερά μπουτιά. Ο Χόφμαϊερ βακερέλα: «Αφού πιο μπουτ από σαράντα Σημίτες κερένας μπουτί σάντε εκχέ κχερέστε κι Θηβαΐδα [νότια Αίγυπτος], ο Σημίτες κο γιαβερά τθανά κι Αίγυπτος, ντα πιο μπουτ κο τθανά σο τσσορντιόνα ο πανιά κατά λεν [Νείλος], πρέπει τι αβένας μπουτ».

Ο αρχαιολόγος Ντέιβιντ Ρολ γραφίνελα ότι μερικά κατά ναβά σο τθερένας οντουλά δούλοι ισί σαρ τι «νικίστιλε αντράλ κατά σελίδες ι Άγιε Γραφιάκε». Για παράδειγμας, ο κομμάτια κατά πάπυρος τθερένα ναβά σο μοιάζενα κο ναβά Ισσάχαρ, Ασήρ ντα Σιφρά. (Έξοδ. 1:3, 4, 15) «Ανταβά σικαβέλα ότι ο Ισραηλίτες τζουβντιλέ μπαγιά κι Αίγυπτος σαρ δούλοι», βακερέλα ο Ντέιβιντ Ρολ.

Ο Δρ Μπίμσον βακερέλα: «Μπουτ πράγματα κατά ιστορία σικαβένα ότι ο Ισραηλίτες ισινέ δούλοι κι Αίγυπτος ντα ότι νικίστιλε οτθάρ, σαρ βακερέλα η Γραφή».