1, 2. (α) Σο βακερένα μερικοί όταν ασουνένα ότι ο Ντεβέλ τθερέλα εκ οργάνωση; (β) Σο κα ντικχάς ανταλέ μαθημάστε;

ΜΕΡΙΚΑ τζενέ βακερένα: «Να τθερέσα ανάγκη εκ οργάνωση για τι οδηγίνελ-τουτ. Χρειαζίντιβεσα σάντε εκ λατσσί σχέση ι Ντεβλέσαρ». Ισί μπαγιά ανταβά; Σο σικαβένα ο αποδείξεις σο τθεράσα;

² Ανταλέ μαθημάστε, κα ντικχάς ότι ο Ιεχωβά κερέλα ο πράγματα με εκ οργανωμέ τρόπος ντα ότι οργανώνελα πι λαός. Κα ντικχάς επίσης σο πρέπει τι κεράς όταν η οργάνωση ι Ιεχωβάσκι ντέλα-αμέν οδηγίες. (1 Κορινθίους 14:​33, 40) Κο πρώτος αιώνας, ο λαός ι Ιεχωβάσκο ακολουθίνελας ο οδηγίες σο ισινέ κι Αγία Γραφή ντα μπορισάλο τι βακερέλ ο λατσσέ αμπέρια μπουτέ τθεμέντε. Σαρ αβέλας-πες αζομάν, αμέν-ντα αντιβές μουκχάσα ι Γραφή τι οδηγίνελ-αμέν. Ντα ντάσα καν κο οδηγίες σο ντέλα-αμέν η οργάνωση ι Ντεβλέσκι. Ο αποτέλεσμας ισί ότι μπορίνασα τι βακεράς ο λατσσέ αμπέρια σαρί κι πφουβ. Επίσης, βοηθίνασα αμαρί εκκλησία τι ατσσόλ πάκι, ενωμέ ντα τι τθερέλ ειρήνη.

3. Σαρ ισινέν σίγουροι ότι ο Ιεχωβά ισί ο Ντεβέλ σο μανγκέλα ι οργάνωση;

³ Όταν ντικχάσα ο πράγματα σο κερντάς ο Ιεχωβά, ισί  ξεκάθαρος ότι ισί ο Ντεβέλ σο μανγκέλα ι οργάνωση. «Ο Ιεχωβά με σοφία τσσουντάς θεμέλια κι πφουβ. Κερντάς ο ουρανός γκοντιάσαρ». (Παροιμίες 3:​19) Μπουτ πράγματα οντουλένταρ σο κερντάς ο Ιεχωβά να τζανάσα-λεν. Κι πραγματικότητα, «σάντε χάνικ πράγματα ασουντάμ λέσκε». (Ιώβ 26:​14) Όμως, παρόλο σο τζανάσα χάνικ πράγματα για το σύμπαν, ισί ξεκάθαρος ότι ισί μπουτ λατσσές οργανωμέ. (Ψαλμός 8:3, 4) Εκατομμύρια τσεργανιά ντένα ντονταλάι αντρέ κο διάστημας με εκ σειράς. Ντα σκεφτίνεν σαρ ο πλανήτες κο ηλιακός σύστημας ντένα ντονταλάι κατά κχαμ. Σαρέ ανταλά ισί σε εκ σειράς επειδή ο Ιεχωβά οργανωντάς σαρ κα ντεν ντονταλάι ο πλανήτες ντα ο τσεργανιά. Όταν σκεφτίνασα σαρ ο Ιεχωβά «λατσσαρντάς γκοντιάσαρ ο ουρανός» ντα ι πφουβ, μανγκάσα τι ντας-λες δόξα, λατρεία ντα τι αβάς πιστοί λέστε.​—Ψαλμός 136:1, 5-9.

4. Σόσκε ο επιστήμονες να μπορίνενα τι ντεν απαντήσεις σε μπουτ σημαντικές ερωτήσεις;

⁴ Ο επιστήμονες χρησιμοποιηντέ μπουτ πράγματα σο σικλιλέ για το σύμπαν ντα ι πφουβιάκε για τι κερέν αμαρί ζωή πιο λατσσί. Αλλά να μπορίνενα τι ντεν απαντήσεις σε μπουτ σημαντικές ερωτήσεις. Για παράδειγμας, ο αστρονόμοι να μπορίνενα τι βακερέν αμένγκε ακριβώς σαρ αρχισάλο ο σύμπαν ή σόσκε ο τζενέ, ο ζώα ντα ο φυτά ισί κι πφουβ. Επίσης, ο πιο μπουτ τζενέ ναστί εξηγίνενα σόσκε σαρέ μανγκένα τι τζουβντιόν για πάντα. (Εκκλησιαστής 3:​11) Εκ λόγος σο να τθερένα ο τζενέ ο απαντήσεις ανταλέ ερωτησιέντε ισί ότι ο επιστήμονες ντα γιαβερά τζενέ πακιάνα κι εξέλιξη ντα βακερένα ότι ο Ντεβέλ να υπαρχίντιβελα. Αλλά ο Ντεβέλ ντέλα-αμέν ο απαντήσεις πι Βιβλιόστε, κι Αγία Γραφή.

5. Σαρ βασίντιβενα ο τζενέ κο νόμοι σο τθερέλα η φύση;

⁵ Ο Ιεχωβά κερντάς ο μπουτ νόμοι σο τθερέλα η φύση. Ανταλά νόμοι να αλλάνενα. Ο ηλεκτρολόγοι, ο υδραυλικοί, ο μηχανικοί, ο πιλότοι, ο χειρουργοί ντα γιαβερά τζενέ βασίντιβενα κο νόμοι σο τθερέλα η φύση για τι κερέν πουμαρί μπουτί. Για παράδειγμας, σαρέ ο τζενέ τθερένα ι καρδιά κο ίδιος σημείος, αντικάς ο χειρουργοί τζανένα κατέ κα αρακχέν-λα όταν πρέπει τι κερέν εκ εγχείρηση. Ντα σαρέ τζανάσα ότι, άμα εκ τζενό κα χουτέλ εκχέ βουτσσέ κχερέσταρ, κα περέλ τελέ ντα μπορεί τι μερέλ. Ντάσα καν κο νόμοι σο τθερέλα η φύση, σαρ ισί η βαρύτητα, επειδή να μανγκάσα τι χασαράς αμαρί ζωή.

6. Σαρ τζανάσα ότι ο Ιεχωβά μανγκέλα τι ντεν-λες λατρεία ο τζενέ με εκ οργανωμέ τρόπος;

⁶ Ο Ιεχωβά οργανωντάς ο σύμπαν με εκ τρόπος σο κερέλα-αμέν τι σαστίνας. Σίγουρα, μανγκέλα πι λαόσταρ τι ντελ-λες λατρεία με εκ οργανωμέ τρόπος. Μάλιστα, ο Ιεχωβά ντινάς ι Γραφή για τι σικλιαρέλ-αμέν σαρ τι ντας-λες λατρεία. Σάντε όταν ακολουθίνασα ο οδηγίες σο ντέλα-αμέν αντράλ κατά Γραφή ντα κατά οργάνωση σο τθερέλα κα μπορίνας τι τζουβντιάς εκ χαρούμενη ντα λατσσί ζωή.

7. Σο μπορίνασα τι σικλιάς κατά τρόπος σο ισί γραμμέ η Γραφή;

⁷ Η Γραφή ισί μπαγιά εκ ξεχωριστός δώρος κατά Ντεβέλ. Μερικά μορφωμέ τζενέ βακερένα ότι η Γραφή τθερέλα απλώς μερικά Ιουδαϊκά ντα Χριστιανικά βιβλία σο γκιντιντέ-λεν εκχέ βιβλιόστε ο τζενέ. Αλλά ο Ντεβέλ ισί οντουβά σο αποφασιντάς κον κα γραφίνελας ο βιβλία, κάνα κα γραφίνενας-λεν ντα σο κα γραφίνενας. Οτθάρ, σαρέ ο βιβλία ι Γραφιάκε  βοηθίνενα-αμέν τι αγαβάς οντουβά σο βακερέλα αμένγκε ο Ντεβέλ. Κατά Γένεση μέχρι κι Αποκάλυψη, η Γραφή σικαβέλα ότι κα αβέλας εκ «προσάγγονος» σο κα κερέλας πάλι ι πφουβ παράδεισος. Ντα σικλιλάμ ότι ανταβά «προσάγγονος» ισί ο Ιησούς Χριστός ντα ότι λέσκι Βασιλεία κα σικαβέλ ότι ο Ιεχωβά τθερέλα ο δικαίωμας τι κυβερνίνελ-λεν σαριλέν.​—Διαβάνεν Γένεση 3:​15· Ματθαίος 6:​10· Αποκάλυψη 11:15.

8. Σαρ ισινέ λατσσές οργανωμέ ο Ισραηλίτες;

⁸ Ο Ισραηλίτες ακολουθιντέ ο Νόμος σο ντινάς-λεν ο Ντεβέλ ντα ισινέ μπουτ λατσσές οργανωμέ. Για παράδειγμας, υπαρχίντιβενας “τζουβλιά σο υπηρετίνενας οργανωμέ ανγκλάλ κι σκηνή της συνάντησης”. (Έξοδος 38:8) Ο Ισραηλίτες επίσης τθερένας οδηγίες για τι γκερέν πουμαρό στρατόπεδος ντα ι σκηνή της μαρτυρίας με εκ οργανωμέ τρόπος. Πιο σοράν, ο Βασιλιάς Δαβίδ οργανωντάς τους Λευίτες ντα τους ιερείς για τι κερέν συγκεκριμέ μπουτιά κο ναός. (1 Χρονικών 23:​1-6· 24:​1-3) Όταν ο Ισραηλίτες ντένας καν ι Ιεχωβάς, ευλογίνελας-λεν. Ισινέ οργανωμέ ντα τθερένας ειρήνη ντα ενότητα.​—Δευτερονόμιο 11:​26, 27· 28:​1-14.

9. Σαρ αγαβάσα ότι ο εκκλησίες κο πρώτος αιώνας ισινέ οργανωμέ;

⁹ Ο εκκλησίες κο πρώτος αιώνας-ντα ισινέ οργανωμέ. Υπαρχίντιβελας εκ κυβερνών σώμας, δηλαδή εκ ομάδα τζενένγκι σο ντέλας οδηγίες κο εκκλησίες. Κι αρχή, οντιά ομάδα τθερέλας σάντε αποστόλους. Σοράν, τθερέλας γιαβερέ πρεσβυτερόν-ντα. (Πράξεις 6:​1-6· 15:6) Ο Ιεχωβά οδηγίνελας ι τζενέν σο ισινέ κο κυβερνών σώμας ντα γιαβερέ τζενέν σο τθερένας στενή συνεργασία λέντζαρ τι γραφίνεν κο εκκλησίες επιστολές σο τθερένας αντρέ συμβουλές ντα οδηγίες. (1 Τιμόθεο 3:​1-13· Τίτο 1:​5-9) Σαρ βοηθίντιβενας ο εκκλησίες κάνα ακολουθίνενας ο οδηγίες σο ντέλας ο κυβερνών σώμας;

10. Σο αβιλό κάνα ο εκκλησίες κο πρώτος αιώνας ακολουθίνενας ο οδηγίες σο ντέλας ο κυβερνών σώμας; (Ντικχ ι φωτογραφία σο ισί κι αρχή.)

¹⁰ Διαβάνεν Πράξεις 16:4, 5. Κο πρώτος αιώνας, μερικά πφραλά τζάνας κο εκκλησίες για τι βακερέν λένγκε «ο νόμοι σο αποφασιντέας ο απόστολοι ντα ο πρεσβύτεροι σο ισινέ κι Ιερουσαλήμ», δηλαδή ο κυβερνών σώμας. Ο εκκλησίες ακολουθίνενας ανταλά οδηγίες ντα «συνεχίνενας τι αβέν πιο σταθερές κι πίστη ντα τι αβγατίντιβεν κάθε ντιβές». Σο μπορίνασα τι σικλιάς οντουλέ εκκλησιένταρ για τι κεράς-λες αμαρέ εκκλησιάτε αντιβές;

11. Σο πρέπει τι κερέν ο πρεσβύτεροι ντα ο διακονικοί υπηρέτες κάνα λένα οδηγίες κατά Ντεβλέσκι οργάνωση;

¹¹ Ο πφραλά σο ισί κο Επιτροπές Τμήματος ή κο Επιτροπές Χώρας, ο επίσκοποι περιοχής ντα ο πρεσβύτεροι πρέπει τι ακολουθίνεν ο οδηγίες σο λένα κατά Ντεβλέσκι οργάνωση. Κι πραγματικότητα, ο Βιβλίος του Ιεχωβά βακερέλα αμένγκε τι ντας καν οντουλέν σο τθερένα ι ευθύνη. (Δευτερονόμιο 30:​16· Εβραίους 13:7, 17) Ο πφραλά σο ισί πιστοί κο Ιεχωβά να μανγκένα τι τζαν κόντρα κι οργάνωση ντα να κερένα παράπονα για το οδηγίες σο λένα. Να μανγκάσα τι αβάς σαρ ο Διοτρεφής, σο να τθερέλας σεβασμός ι πφραλένγκε σο τθερένας ι ευθύνη κι εκκλησία. (Διαβάνεν 3 Ιωάννη 9, 10) Όταν ακολουθίνασα ο οδηγίες σο ντένα-αμέν, βοηθίνασα τι τθερέλ ι εκκλησία ειρήνη ντα ενότητα. Οτθάρ, μπορίνασα τι πουτσάς αμαρό νεαυτός: “Βοηθίναβα ι πφραλέν ντα  ι πφενίν τι αβέν πιστοί κο Ιεχωβά; Ακολουθίναβα αμέσως ο οδηγίες σο ντέλα-μαν η οργάνωση ι Ντεβλέσκι;”

12. Σαρ διορίντιβενα ο πρεσβύτεροι ντα ο διακονικοί υπηρέτες;

¹² Κο τελευταία μπρεσά, ο Κυβερνών Σώμας αλλαντάς ο τρόπος σο διορίντιβενα ο πρεσβύτεροι ντα ο διακονικοί υπηρέτες κι εκκλησία. Ο θέμας «Ερωτήσεις από Αναγνώστες» κι Σκοπιά 15 Νοεμβρίου 2014 εξηγιντάς ότι, κο πρώτος αιώνας, ο κυβερνών σώμας ντινάς ι εξουσία κο επίσκοποι σο τζάνας κο εκκλησίες τι διορίνεν πρεσβυτερόν ντα διακονικούς υπηρέτες. Οτθάρ, κατά Σεπτέμβριος 2014, ο επίσκοποι περιοχής ντένα ανταλά διορισμοί. Όταν ο πρεσβύτεροι εκχέ εκκλησιάκε βακερένα κο επίσκοπος περιοχής ότι εκ πφραλ μπορίνελα τι αβέλ πρεσβύτερος ή διακονικός υπηρέτης, ο επίσκοπος περιοχής προσπαθίνελα τι γνωρίνελ πιο λατσσές λες ντα λέσκι φαμιλί. Για παράδειγμας, μπορεί τι τζαλ λέσαρ κο έργος. (1 Τιμόθεο 3:4, 5) Σοράν, ο επίσκοπος περιοχής ντα ο πρεσβύτεροι γκιντίντιβενα ντα διαβάνενα με προσοχή ο εδάφια σο σικαβένα ο ιδιότητες σο πρέπει τι τθερέλ εκ πρεσβύτερος ή εκ διακονικός υπηρέτης.​—1 Τιμόθεο 3:​1-10, 12, 13· 1 Πέτρου 5:​1-3.

13. Σαρ μπορίνασα τι σικαβάς ότι ντάσα καν κο οδηγίες σο ντένα-αμέν ο πρεσβύτεροι;

¹³ Ο πρεσβύτεροι ντένα-αμέν οδηγίες κατά Γραφή επειδή μανγκένα τι αρακχαβέν ντα τι φροντίνεν ι εκκλησία. Αμέν πρέπει τι τθεράς εκ λατσσί συνεργασία λέντζαρ επειδή ο οδηγίες σο ντένα ισί αμαρέ λατσσιμάσκε. (1 Τιμόθεο 6:3) Κο πρώτος αιώνας, μερικά πφραλά “να ντένας καν”. Να τζάνας ποτές μπουτιάκε αλλά ανακατούντιβενας κι γιαβερένγκε πράγματα. Ο πρεσβύτεροι προσπαθιντέ τι διορθώνεν-λεν, αλλά βον να μανγκένας τι αλλάνεν. Ο Παύλος, για τι σικαβέλ κι εκκλησία σο έπρεπε τι κερέλ εκχέ πφραλέσαρ σο κερντάς κάτι ασακό, βακερντάς: «Σημειώνεν-λες ντα τσσιναβέν τι κερέν παρέα λέσαρ». Παρόλο σο έπρεπε τι τσσιναβέν τι κερέν παρέα λέσαρ, δεν έπρεπε τι ντικχέν-λες σαρ ντουσμάνι. (2 Θεσσαλονικείς 3:​11-15) Αντιβές-ντα, ο πρεσβύτεροι προσπαθίνενα τι βοηθίνεν ι κάθε πφραλές σο να ντέλα καν κο κανόνες κι Ντεβλέσκε, για παράδειγμας, εκχέ πφραλές σο νικιόλα ραντεβού με κάποια σο νανέ Μάρτυρας του Ιεχωβά. (1 Κορινθίους 7:​39) Άμα οντουβά πφραλ να μανγκέλα τι αλλάνελ συμπεριφορά, ο πρεσβύτεροι μπορεί τι αποφασίνεν τι κερέν εκ ομιλία για τι εξηγίνεν σαρ ανταγιά συμπεριφορά κα μπορίνελας τι κερέλ ι γιαβερέν τι κατηγορίνεν ι εκκλησία. Άμα ο πρεσβύτεροι κα κερέν εκ ομιλία ασακί τουμαρέ εκκλησιάτε, σο κα κερέν; Άμα κα τζανένας κον ισί, κα τσσιναβένας τι κερέν παρέα λέσαρ; Άμα κα κερέν-λες ανταβά, μπορεί τι βοηθίνεν-λες τι αγαβέλ ότι λέσκι συμπεριφορά κερέλα λέσκε κακός ντα στεναχωρίνελα ι Ιεχωβάς, ντα αντικάς μπορεί τι διορθώντιβελ. ^[1]​—Ντικχ ι σημείωση.

14. Σαρ μπορίνασα τι βοηθίνας τι ατσσόλ πάκι η εκκλησία;

¹⁴ Ο Λάφι ι Ντεβλέσκο βακερέλα αμένγκε σο πρέπει σαρέ τι κεράς για μα τι αβέν-πες μπέτι πράγματα αντρέ κι εκκλησία. Σκεφτίνεν σο αβιλό-πες κι Κόρινθος. Ο Παύλος μανγκέλας ι πφραλέν ντα ι πφενίν σο ισινέ οτθέ. Βοηθιντάας μπουτέ τζενέν λένταρ τι σικλιόν ι αλήθεια. (1 Κορινθίους 1:1, 2) Αλλά σκεφτίνεν σαρ νιωσάλο όταν λιντάς αμπέρι ότι κάποιος οτθάρ αντράλ κερέλας λουμνιπέ ντα ότι ο πφραλά μουκχένας-λες τι ατσσόλ αντρέ κι εκκλησία! Ο Παύλος βακερντάς κο πρεσβύτεροι τι «ντεν οντουλέ τζενές κο Μπενγκ». Έπρεπε τι πάλντεν οντουλέ πφραλές κατά εκκλησία, δηλαδή τι αβέλ αποκοπή. (1 Κορινθίους 5:1, 5-7, 12) Αντιβές, ο πρεσβύτεροι μπορεί τι αποφασίνεν ότι κάποιος πρέπει τι νασέλ κατά εκκλησία επειδή κερντάς εκ μπαρί αμαρτία χωρίς τι μετανιώνελ. Άμα κα αβέλ-πες κάτι ασακό, κα ακολουθίνας ο οδηγίες σο ντέλα η Γραφή για τη συμπεριφορά σο πρέπει τι τθεράς ι αποκομέ τζενέσαρ; Άμα κα κεράς-λες ανταβά, κα βοηθίνας τι ατσσόλ πάκι η εκκλησία. Ντα μπορεί τι βοηθίνας οντουλέ τζενές τι αγαβέλ ότι πρέπει τι μετανιώνελ ντα τι μανγκέλ κατά Ιεχωβά τι συγχωρίνελ-λες.

15. Σαρ μπορίνασα τι βοηθίνας τι τθερέλ ειρήνη η εκκλησία;

¹⁵ Κι Κόρινθος τθερένας ατζέκ εκ τανό πρόβλημας. Μερικά πφραλά γκερένας γιαβερέ πφραλέν κο δικαστήριος. Ο Παύλος πουτσλάς-λεν: «Σόσκε να μουκχένα τουμαρό νεαυτός τι αδικίντιβελ;» (1 Κορινθίους 6:​1-8) Αντιβές, μερικοί αντρέ κι εκκλησία κερντέ μπουτιά πουμαρέ πφραλέντζαρ αλλά χασαρντέ λοβέ ή νιωσάλε ότι λένγκε πφραλά χουχαντέ-λεν. Οτθάρ, γκερντέ-λεν κο δικαστήριος. Όμως ανταβά μπορεί τι κερέλ γιαβερέ τζενέν τι κατηγορίνεν ι Ιεχωβάς ντα λέσκε λαός. Ντα μπορεί τι ανέλ προβλήματα κι εκκλησία. Ο Βιβλίος ι Ντεβλέσκο βοηθίνελα-αμέν τι αγαβάς ότι πρέπει τι τθεράς ειρήνη αμαρέ πφραλέντζαρ, ατζέ-ντα άμα κα χρειαζίντιβελ τι χασαράς λοβέ. ^[2] (Ντικχ ι σημείωση.) Κι πραγματικότητα, ο Ιησούς σικλιαρντάς-αμέν σαρ τι λύνας σημαντικά προβλήματα ή σο τι κεράς όταν να αρακχάσα-λεν αμαρέ πφραλέντζαρ. (Διαβάνεν Ματθαίος 5:​23, 24· 18:​15-17) Όταν ντάσα καν κο οδηγίες σο ντινάς, βοηθίνασα τι τθερέλ η εκκλησία ειρήνη ντα τι αβέλ ενωμέ.

16. Σόσκε ο λαός ι Ντεβλέσκο ισί ενωμέ;

¹⁶ Ο Βιβλίος ι Ιεχωβάσκο βακερέλα αμένγκε: «Ντικχέν! Καζόμ λατσσό ντα καζόμ σουκάρ ισί τι αβέν ο πφραλά μαζί ντα ενωμέ!» (Ψαλμός 133:1) Όταν ντένας καν ι Ιεχωβάς, ο Ισραηλίτες ισινέ οργανωμέ ντα ενωμέ. Ο Ντεβέλ βακερντάας πι λαόσκε: «Γιεκ κα ανάβ-λεν, σαρ εκ ποίμνιος αντρέ κι μαντρίν». (Μιχαίας 2:​12) Ο Ιεχωβά επίσης βακερντάας ότι λέσκο λαός κα σικλιόλας ι αλήθεια κατά Γραφή ντα κα  υπηρετίνελας-λες ενωμέ. Βοβ βακερντάς: «Κα αλλάναβ ι τσσιπ ι τθεμένγκι ντα κα κεράβ-λα εκ πάκι τσσιπ, για τι χρησιμοποιήνεν σαρέ με σεβασμός ο ναβ ι Ιεχωβάσκο ντα τι υπηρετίνεν-λες σαρέ γιεκ». (Σοφονίας 3:9) Καζόμ μπουτ εκτιμίνασα ο προνόμιος σο τθεράσα τι ντας ενωμέ λατρεία ι Ιεχωβάς!

17. Σο πρέπει τι κερέν ο πρεσβύτεροι άμα κάποιος κα κερέλ εκ μπαρί αμαρτία;

¹⁷ Άμα κάποιος κα κερέλ εκ μπαρί αμαρτία, ο πρεσβύτεροι πρέπει τι διορθώνεν-λες αμέσως με αγάπη. Τζανένα ότι ο Ιεχωβά μανγκέλα λένταρ τι αρακχαβέν ι εκκλησία κατά μπέτι πράγματα ντα τι βοηθίνεν τι ατσσόλ πάκι ντα ενωμέ. (Παροιμίες 15:3) Ο Παύλος μανγκέλας αντράλ πι γκίσταρ πι πφραλέν κι Κόρινθος ντα διορθωντάς-λεν όταν τθερένας-λες ανάγκη, σαρ διαβάνασα κι πρώτη επιστολή σο μπουτσσαντάς λένγκε. Τζανάσα ότι ο πρεσβύτεροι οτθέ κερντέ αμέσως οντουβά σο βακερντάς λένγκε ο Παύλος επειδή κι δεύτερη επιστολή σο γραφιντάς λένγκε, μερικά μάσεκ πιο σοράν, ισαρντάς-λεν. Άμα εκ πφραλ «κερντάς εκ λάθος πριν τι αγαβέλ-λες», ο πρεσβύτεροι πρέπει τι διορθώνεν-λες λατσσιμάσαρ.​—Γαλάτες 6:1.

18. (α) Σαρ βοηθίντιλε ο εκκλησίες κο πρώτος αιώνας κατά οδηγίες σο ισί κο Λάφι κι Ντεβλέσκο; (β) Σο κα ντικχάς κο γιαβέρ μάθημας;

¹⁸ Ισί ξεκάθαρος ότι, κάνα ο Χριστιανοί κο πρώτος αιώνας ακολουθίνενας ο οδηγίες σο ισινέ κο Βιβλίος κι Ντεβλέσκο, λένγκε εκκλησίες ισινέ πάκι, ενωμέ ντα τθερένας ειρήνη. (1 Κορινθίους 1:​10· Εφεσίους 4:​11-13· 1 Πέτρου 3:8) Ο αποτέλεσμας ισινέ ότι οντουλά πφραλά ντα πφενιά μπορισάλε τι βακερέν ο λατσσέ αμπέρια «σαρί κι δημιουργία σο ισί τελάλ κατά ουρανός». (Κολοσσαείς 1:​23) Αντιβές-ντα, ο λαός ι Ιεχωβάσκο ισί ενωμέ ντα οργανωμέ, ντα βακερέλα ο λατσσέ αμπέρια σαρί κι πφουβ. Ο γιαβέρ μάθημας κα σικαβέλ αμένγκε ατζέ πιο μπουτ ότι οντουβά σο μανγκέλα μπαγιά ο λαός ι Ντεβλέσκο ισί τι ντελ δόξα κο Ιεχωβά ντα τι ακολουθίνελ ο οδηγίες σο ισί αντρέ λέσκε Βιβλιόστε, κι Γραφή.​—Ψαλμός 71:​15, 16.