Μπορίνενα τι Σκεφτίνεν ο Πράγματα Λατσσέ Τροπόσαρ

ΣΑΡ ντικχένα ο πράγματα άμα να τζάνα λατσσές τουμένγκε; Μπουτ επιστήμονες πακιάνα ακανά ότι η απάντηση ανταλέ ερωτημάστε σικαβέλα τουμένγκε άμα σκεφτίνενα ο πράγματα λατσσέ τροπόσαρ ή μπέτι τροπόσαρ. Σαρέ νακχαβάσα σαβέ τι μανγκές δυσκολίες αμαρέ ζωγιάτε—μπάζιμ ο εκ πο μπουτ κατά γιαβέρ. Όμως, σόσκε μερικοί ντικχιόνα ότι αρακχένα πάλι πουμαρό νεαυτός ντα ισί έτοιμοι τι προσπαθίνεν, ενώ γιαβερά ντικχιόνα ότι μουκχένα-πες παρόλο σο ο δυσκολίες σο νακχλέ ισί πο χουρντέ;

Σκεφτίνεν για παράδειγμας ότι ρόντενα μπουτιάκε. Τζάνα τι ντεν εκ συνέντευξη ντα να δεχτίνενα-τουμέν κι μπουτί. Σαρ νιωθίνενα σοράν ανταλέσταρ; Ίσως τσσουβένα τουμαρέ γκίστε, ντικχένα-λες εκ μπαρό πρόβλημας ντα βακερένα αντρά-τουμένταρ: «Καέκ να κα λελ κι μπουτί εκχέ τζενές σαρ μάντε. Ποτές να κα αρακχάβ μπουτί». Ή, ατζέ χειρότερα, μπορεί τι μουκχέν οντουβά συγκεκριμέ πρόβλημας τι επηρεάνελ σο-ντα κα μανγκένας τι κερέν τουμαρέ ζωγιάτε, ντα τι σκεφτίνεν: «Να μπορίναβα τι κεράβ τίποτα. Να ισινόμ χρήσιμος καεκχέσκε». Ο ντούι-ντα περιπτώσεις σικαβένα ότι να σκεφτίνενα ο πράγματα λατσσέ τροπόσαρ.

Νικίνεν ο Μπέτι Τρόπος Σκέψης

Σαρ μπορίνενα τι νικίνεν ο μπέτι τρόπος σκέψης; Εκ σημαντικός πρώτος βήμας ισί τι σικλιόν τι αγαβέν καλά ισί ο μπέτι σκέψεις. Ο γιαβέρ βήμας ισί τι κερέν σο νακχέλα τουμαρέ βαστένταρ για τι νικαβέν-λεν. Τι ρόντεν λογικές απαντήσεις. Για παράδειγμας, ισί αλήθεια ότι να δεχτιντέ-τουμέν επειδή καέκ να μανγκλάς-τουμέν κι μπουτί; Ή μήπως ο αφεντικός ρόντελας εκχέ τζενέσκε σο τθερέλας γιαβερά ικανότητες;

Άμα κα ντας-αμέν γκοντί σαρ ισί ο πράγματα μπαγιά, σοράν κα αγαβάς άμα ανησυχίνασα πο μπουτ οντουλέσταρ σο ισί φυσιολογικός. Μήπως επειδή εκ φαρ να δεχτιντέ-τουμέν μανγκέλα τι βακερέλ ότι να μπορίνενα τι κερέν τίποτα ή μήπως υπαρχίντιβενα γιαβερά-ντα πράγματα τουμαρέ ζωγιάτε σο σικαβένα ότι τθερένα επιτυχία—για παράδειγμας, ο πνευματικοί στόχοι, ο σχέσεις τουμαρέ φαμιλιάσαρ ή τουμαρέ αμαλέντζαρ. Σικλιόν τι νασκιαρέν ο μπέτι τρόπος σκέψης σο να κερέλα τουμένγκε λατσσιπέ. Σαρ τζανένα ότι να κα αρακχέν ποτές μπουτί; Ισί γιαβερά-ντα πράγματα σο μπορίνενα τι κερέν για τι νασκιαρέν ο μπέτι σκέψεις.

Τσσουβέν Στόχους ντα Σκεφτίνεν Λατσσές ο Πράγματα

Κο τελευταία μπρεσά ο επιστήμονες προσπαθιντέ τι εξηγίνεν σο ισί η ελπίδα. Βακερένα ότι ο τζενό σο τθερέλα ελπίδα ισί οντουβά σο πακιάλα ότι κα πετυχίνελ πο στόχους. Σαρ κα ντικχάς κο γιαβέρ θέμας, η ελπίδα τθερέλα τι κερέλ πο μπουτ πραγματέντζαρ, αλλά ανταβά σο βακερένα ο επιστήμονες μπορίνελα τι βοηθίνελ μπουτέ τροπόντζαρ. Άμα κα ντας προσοχή ανταλέστε σο βακερένα ι ελπιδάκε, κα μπορίνας τι τσσουβάς στόχους ντα τι σκεφτίνας λατσσές ο πράγματα.

Για τι πακιάς ότι μπορίνασα τι πετυχίνας αμαρέ στόχους σο τθεράσα τσσουντό, πρέπει τι ντας-αμέν γκοντί σο στόχους πετυχιντάμ μέχρι ακανά. Άμα αμντίνενα ότι να ντένα-τουμέν γκοντί κάποιους στόχους σο πετυχιντέν, μπέκιμ πρέπει τι σκεφτίνεν σοβαρά σο στόχους τσσουβένα. Πρώτον, τθερένα στόχους; Ο μπουτ μπουτιά σο κεράσα κάθε ντιβές, ισί εύκολος μα τι μουκχέν αμένγκε χρόνος τι σκεφτίνας σο μανγκάσα πραγματικά αμαρέ ζωγιάταρ, σο τθερέλα πο μπαρί σημασία αμένγκε. Ανταγιά συμβουλή σο βακερέλα ότι πρέπει τι τσσουβάς ο σημαντικά πράγματα πρώτα αμαρέ ζωγιάτε σικαντάς-λα η Αγία Γραφή μπουτ μπρεσά πο ανγκλέ κάνα βακερντάς: «Τι αβέν σίγουροι ότι αγαβένα καλά ισί ο πο σημαντικά πράγματα».​—Φιλιππησίους 1:10.

Κάνα αποφασιντάμ καλά πράγματα πρέπει τι τσσουβάς πρώτα αμαρέ ζωγιάτε, σοράν ισί πο εύκολος τι τσσουβάς στόχους, κι υπηρεσία σο ντάσα κο Ντεβέλ, αντρέ κι φαμιλί ντα κο γιαβερά πράγματα σο κεράσα αμαρέ ζωγιάτε. Όμως, ισί σημαντικός μα τι τσσουβάς μπουτ στόχους κι αρχή, ντα τι τσσουβάς στόχους σο τζανάσα ότι μπορίνασα τι πετυχίνας-λεν εύκολα. Άμα εκ στόχος ισί μπουτ δύσκολος τι πετυχίνας-λες, μπέκιμ τι χασαράς αμαρί ζορ ή ατζέ τι μουκχάς-αμέν. Ανταλέσκε, ισί πο λατσσό αντίς τι τσσουβάς μπαρέ στόχους σο μανγκένα μπουτ βακίτι τι πετυχίνας-λεν, τι τσσουβάς χουρντέ στόχους σο μπορίνασα τι κεράς-λεν πο σουγκό.

«Άμα μανγκέσα τούι, σαρέ αβένα-πες». Αντικάς βακερέλα εκ πουρανό λάφι, ντα ντικχιόλα ότι ισί χάνικ μπαγιά. Κάνα τθεράσα αμαρέ γκοντιάτε ο στόχους σο τσσουντάμ, χρειαζίντιβελα τι μανγκάς αντράλ αμαρέ γκίσταρ τι πετυχίνας-λεν ντα τι αβάς αποφασισμέ τι μαράς-αμέν ανταλέσκε. Μπορίνασα τι αβάς πο αποφασισμέ κάνα σκεφτίνασα καζόμ αξία τθερένα αμαρέ στόχοι ντα καμπόρ λατσσέ αποτελέσματα κα τθεράς άμα κα πετυχίνας-λεν. Ισί μπαγιά ότι κα αβέν εμπόδια, αλλά πρέπει τι ντικχάς-λεν σαρ δυσκολίες σο νακχένα ντα όχι σαρ προβλήματα σο πφαντέ αμαρέ βαστά.

Όμως, χρειαζίντιβελα επίσης τι σκεφτίνας σο πράγματα μπορίνασα τι κεράς για τι πετυχίνας αμαρέ στόχους. Ο συγγραφέας Κ. Ρ. Σνάιντερ, σο κερντάς μπαρί έρευνα για τι σικαβέλ καζόμ σημαντική ισί η ελπίδα, βακερντάς ότι ισί λατσσό τι σκεφτίνας μπουτ τρόπους για τι πετυχίνας εκ συγκεκριμέ στόχος. Αντικάς, κάνα εκ τρόπος να τθερέλα αποτέλεσμας, κα μπορίνας τι κεράς ο δεύτερος, ο τρίτος, εμ γιαβερά.

Ο Σνάιντερ βακερέλα αμένγκε επίσης τι σικλιάς κάνα πρέπει τι μουκχάς εκ στόχος ντα τι τζας κο γιαβέρ. Άμα πραγματικά ναστί πετυχίνασα εκ στόχος, οντουβά σο κα κεράς άμα ατσσιλάμ λέστε ισί τι χασαράς αμαρί ζορ. Κατά γιαβέρ μπάντα όμως, άμα τσσουντάμ εκ νεβό στόχος σο μπορίνασα τι πετυχίνας-λες, ανταβά κα κερέλ-αμέν τι τθεράς εκ νεβί ελπίδα.

Η Αγία Γραφή τθερέλα εκ λατσσό παράδειγμας ανταλέσκε. Εκ στόχος σο μανγκέλας-λες αζόμ μπουτ ο Δαβίδ ισινέ τι χτίνελ ο ναός πι Ντεβλέσκε, ι Ιεχωβάσκε. Αλλά ο Ντεβέλ βακερντάς κο Δαβίδ ότι ανταβά προνόμιος κα τθερέλας-λες ο τσσαβό λέσκο, ο Σολομών, ντα όχι βοβ. Αντίς τι στεναχωρίντιβελ ή τι επιμίνελ παρόλο σο αβιλέ ο πράγματα αντικάς σο να μανγκέλας, ο Δαβίδ τσσουντάς γιαβερά στόχους. Κερντάς σο νακχέλας λέσκε βαστένταρ για τι γκιντίντιβεν λοβέ ντα πράγματα σο κα χρειαζίντιβελας ο τσσαβό λέσκο για τι κερέλ ανταβά έργος.​—1 Βασιλέων 8:17-19· 1 Χρονικών 29:3-7

Ατζέ-ντα άμα μπορισάλαμ τι αβάς τζενέ σο σκεφτίνενα ο πράγματα λατσσέ τροπόσαρ ντα νικιντάμ ο μπέτι τρόπος σκέψης ντα τσσουβάσα στόχους, μπέκιμ πάλι μα τι τθεράς αληθινή ελπίδα. Σόσκε; Επειδή ανταλέ ντουνιάστε ο πο μπουτ φαρ χασαράσα αμαρί ελπίδα ιτιρί κατά πράγματα σο αβένα-πες ντα να μπορίνασα τι κεράς-λεν ντιπ κουμάντος. Κάνα σκεφτίνασα ο μπαρέ προβλήματα σο τθερέλα ο ντουνιάς—ο τσοροριπέ, ο τζένγκια, ο αδικίες, ο νασφαλίματα ντα ο μεριπέ—σαρ μπορίνασα τι ατσσικιαράς εκ λατσσό τρόπος σκέψης;

[Φωτογραφία]

Άμα να δεχτιντέ-τουμέν εκχέ μπουτιάτε σο μανγκένας, μήπως σκεφτίνενα ότι να κα αρακχέν ποτές μπουτί;

[Φωτογραφία]

Ο Βασιλιάς Δαβίδ ισινέ έτοιμος κάνα χρειαζίντιβελας τι αλλάνελ πο στόχους