1. Σο βακερντάς ο Πέτρος ι Χριστιανόνγκε τι κερέν, ντα σόσκε μπέκιμ τι ντικχίντιβελα ότι ναστί ντάσα καν λέσκε λαφίντε;

ΕΙΤΕ μπεκλεντίνασα τι τζουβντιάς για πάντα κο ουρανός είτε κι πφουβ, κα βοηθίντιβας άμα κα ντικχάς σο βακερντάς ο απόστολος Πέτρος ι χρισμέ Χριστιανόνγκε κο πρώτος αιώνας. Ο Πέτρος βακερντάς: «Σαρ ισί ο Άγιος σο καλιντάς-τουμέν, τι αβέν τουμέν-ντα άγιοι σαρέ κο πράγματα σο κερένα, επειδή ισί γραμμέ: “Πρέπει τι αβέν άγιοι, επειδή με ισινόμ άγιος”». (1 Πέτρ. 1:​15, 16) Ανταλέ λαφίνταρ, σικλιάσα ότι μπορίνασα τι μοιάζας κο Ιεχωβά, σο ισί ο πο λατσσό παράδειγμας αγιότητας. Μπορίνασα ντα πρέπει τι αβάς άγιοι οντουλέντε σο κεράσα. Ανταβά μπέκιμ τι ντικχίντιβελα ότι ναστί αβέλα-πες επειδή ισινάμ ατελείς. Ο Πέτρος-ντα κερντάας λάθη. Όμως, λέσκο παράδειγμας σικαβέλα ότι μπορίνασα τι “αβάς άγιοι”.

2. Καλά ερωτήσεις κα ντικχάς ανταλέ μαθημάστε;

² Ανταλέ μαθημάστε, κα ντικχάς ακαλά ερωτήσεις: Σο μανγκέλα τι βακερέλ τι αβάς άγιοι; Σο σικλιαρέλα-αμέν η Αγία Γραφή για την αγιότητα ι Ιεχωβάσκι; Σαρ μπορίνασα τι αβάς άγιοι οντουλέντε σο κεράσα; Ντα σο σχέση τθερέλα αμαρί αγιότητα με τη φιλία σο τθεράσα ι Ιεχωβάσαρ;

3. Σαρ αμντίνενα μπουτ τζενέ ότι πρέπει τι αβέλ εκ άγιος τζενό, αλλά κατάρ κα σικλιάς σαρ πρέπει τι αβέλ μπαγιά;

³ Κάνα ο τζενέ σκεφτίνενα εκχέ άγιε τζενές, τθερένα πουμαρέ γκοντιάτε εκχέ τζενές σο να ασάλα ιτς, σο ιρίλα παπαζίνγκε σέα ντα σο ντικχίντιβελα μπουτ σοβαρός. Αλλά νανέ αντικάς ο άγιοι τζενέ. Ο Ιεχωβά, σο ισί άγιος, βακέρντιβελα ότι ισί “ο ευτυχισμέ Ντεβέλ”. (1 Τιμ. 1:​11) Οντουλά σο ντένα-λες λατρεία βακέρντιβενα «ευτυχισμέ». (Ψαλμ. 144:​15) Ο Ιησούς βακερντάς ότι να τθερένας ι Ντεβλέσκι ευλογία οντουλά σο ιρίνας διαφορετικά σέα ντα κερένας λατσσέ πράγματα ανγκλάλ  κο γιαβερά για τι σικαβέν-πες. (Ματθ. 6:1· Μάρκ. 12:​38) Ο αληθινοί Χριστιανοί τζανένα σο μανγκέλα τι βακερέλ τι αβέν άγιοι οντουλένταρ σο βακερέλα η Γραφή ι Ιεχωβάσκε. Τζανάσα ότι ο Ντεβέλ μανγκέλα-αμέν ντα ότι ποτές να κα βακερέλας αμένγκε τι κεράς κάτι σο ναστί κεράσα-λες. Οτθάρ, κάνα ο Ιεχωβά βακερέλα αμένγκε: «Πρέπει τι αβέν άγιοι», ισινάμ σίγουροι ότι ανταβά μπορίνελα τι αβέλ-πες. Αλλά για τι αβάς άγιοι οντουλέντε σο κεράσα, πρέπει πρώτα τι αγαβάς σο μανγκέλα τι βακερέλ τι αβάς άγιοι.

4. Σο μανγκένα τι βακερέν ο λάφια «άγιος» ντα «αγιότητα»;

⁴ Σο μανγκέλα τι βακερέλ τι αβάς άγιοι; Κι Αγία Γραφή, ο λάφια «άγιος» ντα «αγιότητα» βακέρντιβενα πο μπουτ οντουλέσκε σο ισί πάκι κι Ντεβλέσκε γιακχά ντα κατά ψεύτικες θρησκείες. Ανταλά λάφια μανγκένα τι βακερέν επίσης ότι εκ τζενό υπηρετίνελα ι Ντεβλές εκχέ ξεχωριστέ τροπόσαρ. Γιαβερέ λαφίντζαρ, κα αβάς άγιοι άμα ισινάμ πάκι κι Ιεχωβάσκε γιακχά, άμα ντάσα-λες λατρεία αντικάς σαρ μανγκέλα ντα άμα ισινάμ λατσσέ αμαλά λέσαρ. Σαστίνασα σο ο Ιεχωβά μανγκέλα τι αβέλ αμαρό αμάλ παρόλο σο ισινάμ ατελείς ντα βοβ ισί άγιος.

5. Σο σικλιάσα ι Ιεχωβάσκε κατά πιστοί άγγελοι;

⁵ Ο Ιεχωβά ισί πάκι σαρέ κο πράγματα. Σικλιάσα-λες ανταβά οντουλένταρ σο βακερντέ ο Σεραφείμ, δηλαδή άγγελοι σο ισί πασέ κο θρόνος κι Ιεχωβάσκο. Μερικοί λένταρ βακερντέ: «Άγιος, άγιος, άγιος ισί ο Ιεχωβά σο κερέλα κουμάντος ι στρατόν». (Ησ. 6:3) Αλλά για τι αβέν λατσσέ αμαλά πουμαρέ Ντεβλέσαρ, ο άγγελοι πρέπει τι αβέν βον-ντα άγιοι, ντα ισί. Σάντε σο σικαβέλα-πες εκ άγγελος ι Ιεχωβάσκο τθερέλα ι ζορ τι κερέλ εκ τθαν ατθέ κι πφουβ άγιος. Ανταβά αβιλό-πες κάνα ο Μωυσής ισινέ πασέ κο θάμνος σο πφαμπόλας.​—Έξοδ. 3:​2-5· Ιησ. Ναυή 5:15.

6, 7. (α) Σαρ σικαντάς ο Μωυσής ότι ο Ντεβέλ ισί άγιος σαρ βακερένα ο εδάφια Έξοδος 15:1, 11; (β) Σο ανέλας κι γκοντί κι Ισραηλιτένγκι ότι ο Ντεβέλ ισί άγιος; (Ντικχέν ι φωτογραφία κι ανγκλαϊνί σελίδα)

⁶ Αφού νακχλέ αντράλ κατά Ερυθρά Θάλασσα, ο Μωυσής βακερντάς κο Ισραηλίτες ότι λένγκο Ντεβέλ, ο Ιεχωβά, ισί άγιος. (Διαβάνεν Έξοδος 15:1, 11) Ο Αιγύπτιοι σο ντένας λατρεία ψεύτικε ντεβλέντε σίγουρα να ισινέ άγιοι. Ο Χαναανίτες-ντα σο ντένας λατρεία βον-ντα ψεύτικε ντεβλέντε να ισινέ άγιοι. Κάνα ντένας λατρεία, θυσιάνενας πουμαρέ τσσαβέν ντα κερένας μπίλατζανε πράγματα. (Λευιτ. 18:3, 4, 21-24· Δευτ. 18:9, 10) Αλλά ο Ιεχωβά ισί διαφορετικός οντουλέ ψεύτικε ντεβλένταρ. Βοβ ποτές να κα βακερέλας πι υπηρετόνγκε τι κερέν ασακέ μπέτι πράγματα. Ισί ντιπ άγιος. Για τι τθερένας-λες πουμαρέ γκοντιάτε ο Ισραηλίτες ανταβά, ο αρχιερέας τθερέλας εκ χρυσή πλάκα κο τουρμπάνι σο ιρίλας πι σορέστε. Οπράλ κι πλάκα ισινέ γραμμέ ο λάφια: «Ο Ιεχωβά ισί ο Άγιος».​—Έξοδ. 28:​36-38.

⁷ Ο λάφια σο τθερέλας οπράλ οντιά πλάκα κα σικαβέλας μπουτ λατσσές σαριλένγκε ότι ο Ιεχωβά ισί μπαγιά άγιος. Σο κα αβέλας-πες όμως άμα εκ Ισραηλίτης ναστί ντικχέλας ι πλάκα επειδή ναστί τζάλας πασέ κο αρχιερέας; Μήπως κα χασαρέλας ανταλά σημαντικά λάφια; Νάα! Σαρέ ο Ισραηλίτες ασουνένας-λεν κάνα διαβάντιβελας ο Νόμος ανγκλάλ κο μουρσά, κο τζουβλιά ντα κο χουρντέ. (Δευτ. 31:​9-12) Άμα κα αβένας τουμέν-ντα οτθέ, κα ασουνένας ακαλά λάφια: «Με ισινόμ ο Ιεχωβά τουμαρό Ντεβέλ . . . ντα πρέπει τι αβέν άγιοι, σόσκε με ισινόμ άγιος». «Πρέπει τι αβέν άγιοι μάνγκε, σόσκε με ο Ιεχωβά ισινόμ άγιος».​—Λευιτ. 11:​44, 45· 20:7, 26.

8. Σο σικλιάσα κατά εδάφια Λευιτικό 19:2 ντα 1 Πέτρου 1:​14-16;

⁸ Ακανά κα ντικχάς ο εδάφιος Λευιτικό 19:2, σο βακερντάς ο Ιεχωβά τι διαβάντιβελ σαρέ ι Ισραηλιτένγκε. Ο Ιεχωβά βακερντάς  κο Μωυσής: «Βάκερ σαρέ ι Ισραηλιτένγκε: “Πρέπει τι αβέν άγιοι, επειδή με, ο Ιεχωβά τουμαρό Ντεβέλ, ισινόμ άγιος”». Ο Πέτρος μπέκιμ τι τθερέλας πι γκοντιάτε ανταβά εδάφιος κάνα βακερντάς κο Χριστιανοί τι «αβέν άγιοι». (Διαβάνεν 1 Πέτρου 1:​14-16) Αντιβές, αμέν να ισινάμ τελάλ κατά Μωσαϊκός Νόμος. Όμως, οντουβά σο γραφιντάς ο Πέτρος σικαβέλα οντουβά σο σικλιάσα κατά εδάφιος Λευιτικό 19:2, δηλαδή ότι ο Ιεχωβά ισί άγιος ντα ότι οντουλά σο μανγκένα-λες πρέπει τι μαρέν-πες τι αβέν άγιοι. Ανταβά πρέπει τι κεράς-λες είτε μπεκλεντίνασα τι τζουβντιάς κο ουρανός είτε κο παράδεισος κι πφουβ.​—1 Πέτρ. 1:4· 2 Πέτρ. 3:13.

9. Σαρ κα βοηθίντιβας κατά Λευιτικό κεφάλαιος 19;

⁹ Επειδή μανγκάσα τι κεράς ο γκι αμαρέ άγιε Ντεβλέσκο, μανγκάσα τι σικλιάς σαρ μπορίνασα τι αβάς άγιοι. Ο Ιεχωβά ντέλα-αμέν συμβουλές, οτθάρ τζανάσα σαρ τι κεράς-λες ανταβά. Μπορίνασα τι αρακχάς ανταλά συμβουλές κο Λευιτικό κεφάλαιος 19. Ο Μάρκους Κάλις, σο σπουδαντάς εβραϊκά, γραφιντάς ότι ανταβά μπέκιμ τι ισί ο πο σημαντικός κεφάλαιος ι Λευιτικόσκο ή ατζέ-ντα σαρέ ι πρώτε παντς βιβλιόνγκο σο τθερέλα η Γραφή. Τθερέν τουμαρέ γκοντιάτε ότι ο Λευιτικό κεφάλαιος 19 αρχίνελα ακαλέ λαφίντζαρ: «Πρέπει τι αβέν άγιοι». Ακανά κα βακεράς χάνικ εδάφια ανταλέ κεφαλαιόσταρ σο σικλιαρένα-αμέν σαρ τι αβάς άγιοι κάθε ντιβές αμαρέ ζωγιάτε.

10, 11. Σο βακερέλα ο εδάφιος Λευιτικό 19:3 ότι πρέπει τι κεράς, ντα σόσκε ισί σημαντικός ανταβά;

¹⁰ Κάνα ο Ιεχωβά βακερντάς ότι ο Ισραηλίτες έπρεπε τι αβέν άγιοι, βακερντάς ακαβά-ντα: «Ο κάθε εκ τουμένταρ πρέπει τι σεβάνελ πι νταγιά ντα πι νταντές . . . Με ισινόμ ο Ιεχωβά τουμαρό Ντεβέλ».​—Λευιτ. 19:2, 3.

¹¹ Ντικχίντιβελα μπουτ λατσσές ότι ισί σημαντικός τι ντας καν κι εντολή κι Ντεβλέσκι τι σεβάνας αμαρέ νταντές ντα αμαρέ νταγιά. Ντεν-τουμέν γκοντί σο βακερντάς ο Ιησούς κάνα εκ μουρς πουτσλάς-λες: «Καλά λατσσέ πράγματα πρέπει τι κεράβ για τι τζουβντιάβ για πάντα;» Αντρέ οντουλέντε σο βακερντάς λέσκε ο Ιησούς τι κερέλ ισινέ τι σεβάνελ πι νταντές ντα πι νταγιά. (Ματθ. 19:​16-19) Ο Ιησούς βακερντάς ατζέ-ντα ότι ισινέ λάθος ο Φαρισαίοι ντα ο γραμματείς σο κερένας σο νακχέλας λένγκε βαστένταρ για μα τι αρακχαβέν πουμαρέ νταντές ντα πουμαρέ νταγιά. Ανταλέσαρ σο κερένας, τσσουβένας κι  νάκρη «ο λάφι ι Ντεβλέσκο». (Ματθ. 15:6) “Κο λάφι κι Ντεβλέσκο” ισινέ η πέμπτη κατά Ντες Εντολές, αλλά οντουλά-ντα σο διαβάνασα κο Λευιτικό 19:3. (Έξοδ. 20:​12) Ντεν-τουμέν γκοντί πάλι ότι η εντολή σο αρακχάσα κο Λευιτικό 19:3, τι σεβάνας αμαρέ νταντές ντα αμαρέ νταγιά, βακέρντιβελα σοράν κατά λάφια: «Πρέπει τι αβέν άγιοι, επειδή με, ο Ιεχωβά τουμαρό Ντεβέλ, ισινόμ άγιος».

12. Σαρ μπορίνασα τι ντας καν κι εντολή σο ισί κο εδάφιος Λευιτικό 19:3;

¹² Κάνα ανάσα αμαρέ γκοντιάτε ι εντολή σο ντινάς-αμέν ο Ιεχωβά τι σεβάνας αμαρέ νταντές ντα αμαρέ νταγιά, κα μπορίναας τι πουτσάς-αμέν: “Σεβάναβα μι νταντές ντα μι νταγιά;” Άμα πακιάνα ότι έπρεπε τι κερένας πο μπουτ πράγματα ανγκλέ, μπορίνενα τι τραμπίνεν τι κερέν-λες ανταβά ακανά. Ο πράγματα σο κερντέν ανγκλέ ναστί αλλάνενα-λεν, αλλά μπορίνενα τι κερέν σο νακχέλα τουμαρέ βαστένταρ ακανά για τι νακχέν πο μπουτ σαάτι τουμαρέ νταντέσαρ ντα τουμαρέ νταγιάσαρ ντα για τι βοηθίνεν-λεν πο μπουτ. Μπέκιμ τι μπορίνενα τι κερέν πο μπουτ παρέα λέντζαρ. Ή μπέκιμ τι μπορίνενα τι κερέν πο μπουτ για τι βοηθίνεν-λεν κο ψώνια ή τι ατσσόν πασέ κο Ιεχωβά ντα μα τι τσσιναβέν τι υπηρετίνεν-λες. Ή κα μπορίνενας τι ντεν-λεν πο μπουτ ζορ ντα τι κοβλιαρέν λένγκι ντουκχ πο μπουτ. Άμα κερένα-λες ανταβά, ντένα καν κι εντολή σο ισί κο εδάφιος Λευιτικό 19:3.

13. (α) Καγιά γιαβέρ συμβουλή αρακχάσα κο εδάφιος Λευιτικό 19:​3; (β) Σαρ μπορίνασα αμέν αντιβές τι κεράς οντουβά σο κερέλας ο Ιησούς, σαρ ισί γραμμέ κο εδάφια Λουκάς 4:​16-18;

¹³ Κατά Λευιτικό 19:3 σικλιάσα σαρ τι αβάς άγιοι εκχέ γιαβερέ-ντα τροπόσαρ. Βακερέλα για το Σάββατος. Ο Χριστιανοί νανέ τελάλ κατά Νόμος, οτθάρ να χρειαζίντιβελα τι κεράς ο Σάββατος. Όμως, σικλιάσα μπουτ πράγματα κατά τρόπος σο κερένας ο Ισραηλίτες ο Σάββατος ντα κατά λατσσιπέ σο τθερένας κάνα κερένας-λες. Ο Σάββατος ισινέ βακίτι τι ξεκουράντιβεν κατά μπουτί ντα τι ντεν λατρεία κο Ντεβέλ. * Άκ’ σόσκε ο Ιησούς τζάλας οντουβά ντιβές κι συναγωγή πι τθεμέστε ντα διαβάνελας κατά Λάφι ι Ντεβλέσκο. (Έξοδ. 31:​12-15· διαβάνεν Λουκάς 4:​16-18) Η εντολή ι Ντεβλέσκι “τι κεράς λέσκε σάββατα”, σο ισί γραμμέ κο εδάφιος Λευιτικό 19:3, πρέπει τι τσσίντελ-αμέν τι ντας αμαρέ σαατίσαρ κάθε ντιβές για τι ντας λατρεία ι Ντεβλές. Μήπως πακιάνα ότι πρέπει τι κερέν πο μπουτ πράγματα για τι ντεν καν ανταλέ εντολιάτε; Άμα κάθε ντιβές κερένα ο πο λατσσό για τι ντεν λατρεία ι Ιεχωβάς, κα αβέν μπουτ λατσσέ αμαλά λέσαρ σο ανταβά ισί μπουτ σημαντικός για τι αβέν άγιοι.

14. Καγιά σημαντική αλήθεια βακέρντιβελα κο Λευιτικό κεφάλαιος 19;

¹⁴ Ο Λευιτικό κεφάλαιος 19 βακερέλα παλάλ γιαβερέστε εκ σημαντική αλήθεια σο βοηθίνελα-αμέν τι ατσσάς άγιοι. Ο εδάφιος 4 μπιτίνελα ακαλέ λαφίντζαρ: «Με ισινόμ ο Ιεχωβά τουμαρό Ντεβέλ». Ανταλά ντα γιαβερά ασακέ λάφια βακέρντιβενα 16 φαρ ανταλέ κεφαλαιόστε. Ανταβά ανέλα αμαρέ γκοντιάτε ι πρώτη εντολή: «Με ισινόμ ο Ιεχωβά το Ντεβέλ . . . Δεν πρέπει τι τθερές γιαβερέ ντεβλέν εκτός μάνταρ». (Έξοδ. 20:2, 3) Κάθε Χριστιανός σο μανγκέλα τι αβέλ άγιος πρέπει τι αβέλ σίγουρος ότι τίποτα ντα καέκ νανέ πο σημαντικός κατά φιλία σο τθερέλα ι Ντεβλέσαρ. Ντα επειδή ισινάμ Μάρτυρες ι Ιεχωβάσκε, μανγκάσα σαρέ αμαρέ γκίσαρ τι νασάς ντουρ πραγματένταρ σο κα μαγαρίνενας λέσκο άγιος ναβ.​—Λευιτ. 19:​12· Ησ. 57:15.

15. Σο πρέπει τι τσσίντεν-αμέν τι κεράς ο εδάφια σο βακερένα ι θυσιένγκε κο Λευιτικό κεφάλαιος 19;

¹⁵ Για τι σικαβέν ο Ισραηλίτες ότι ο Ιεχωβά  ισινέ λένγκο Ντεβέλ, έπρεπε τι ντεν καν λέσκε νομόντε. Ο εδάφιος Λευιτικό 18:4 βακερέλα: «Πρέπει τι κερέν μο αποφάσεις ντα τι ντεν καν μι νομόντε ντα τι πφιρέν αντικάς σαρ βακερένα. Με ισινόμ ο Ιεχωβά τουμαρό Ντεβέλ». Ο κεφάλαιος 19 τθερέλα μερικέ ανταλέ “νομόνταρ” σο ντιντιλέ κο Ισραήλ. Για παράδειγμας, ο εδάφια 5-8, 21, 22 βακερένα για το θυσίες ι ζωόνγκε. Ο Ισραηλίτες έπρεπε τι κερέν ανταλά θυσίες εκχέ τροπόσαρ σο να κα “μαγαρίνελας καέκ πράγμας ι Ιεχωβάσκο”. Ο διάβασμας ανταλέ εδαφιόνγκο πρέπει τι τσσίντελ-αμέν τι μανγκάς τι κεράς ο γκι ι Ιεχωβάσκο ντα τι ντας-λες θυσίες αντικάς σαρ μανγκέλα βοβ για τι δοξάνας-λες, σαρ βακερέλα αμένγκε ο εδάφιος Εβραίους 13:15.

16. Σο μπέκιμ τι ανέλα αμαρέ γκοντιάτε η διαφορά σο τθερένα οντουλά σο υπηρετίνενα ι Ντεβλές οντουλένταρ σο να υπηρετίνενα-λες;

¹⁶ Για τι αβάς άγιοι, πρέπει τι μανγκάς τι αβάς διαφορετικοί. Ανταβά μπέκιμ τι αβέλ δύσκολος. Μπάζιμα συμμαθητές, τζενέ σο κεράσα λέντζαρ μπουτί, αμαρέ τζενέ σο νανέ κι αλήθεια ντα γιαβερά μπέκιμ τι βακερένα αμένγκε τι κεράς πράγματα σο να κα μουκχένας-αμέν τι ντας λατρεία ι Ιεχωβάς αντικάς σαρ μανγκέλα. Κάνα ανταλά τζενέ κερένα-λες ανταβά, τθεράσα τι λας εκ σημαντική απόφαση. Σαρ κα τραμπίνας οντουβά σο ισί σωστός; Ντικχέν εκ σημαντική αρχή σο ισί κο Λευιτικό 19:​19, σο βακερέλα: «Δεν πρέπει τι ιρίς σέα σο ισί κερντέ ντουέ διαφορετικέ τθαβέντζαρ». Ανταβά νόμος βοηθίνελας ι Ισραηλιτέν τι αβέν διαφορετικοί κατά γιαβερά τθεμά. Αμέν αντιβές νανέ λάθος τι ιριάς σέα σο ισί κερντέ ντουέ διαφορετικέ τθαβέντζαρ, φιρειπείν τι τθερέν εμ βαμβακερός εμ μάλλινος τθαβ. Να μανγκάσα όμως τι μοιάζας τζενέντε σο οντουλά σο πακιάνα ντα ισί σικλέ τι κερέν τζάνα κόντρα οντουλέντζαρ σο σικλιαρέλα η Γραφή, ατζέ-ντα άμα ισί αμαρέ συμμαθητές, κεράσα λέντζαρ μπουτί ή ισί αμαρέ τζενέ. Σίγουρα, μανγκάσα αμαρέ τζενέν ντα σικαβάσα αγάπη γιαβερέ τζενένγκε. Αλλά οντουλά σο τραμπίνασα τι κεράς αμαρέ ζωγιάτε σικαβένα ότι κα ντας καν κο Ιεχωβά, ατζέ-ντα άμα ανταβά κερέλα-αμέν τι αβάς διαφορετικοί κατά γιαβερά τζενέ. Ανταβά ισί μπουτ σημαντικός σόσκε, άμα μανγκάσα τι αβάς άγιοι, πρέπει τι αβάς ξεχωρισμέ ι Ντεβλέσκε.​—2 Κορ. 6:​14-16· 1 Πέτρ. 4:3, 4.

17, 18. Καβά σημαντικός πράγμας σικλιάσα κατά εδάφια Λευιτικό 19:​23-25;

¹⁷ Ο λάφι «με ισινόμ ο Ιεχωβά τουμαρό Ντεβέλ» κα ανέλας κι γκοντί κι Ισραηλιτένγκι ότι έπρεπε τι αβέλ λένγκι φιλία ι Ιεχωβάσαρ ο πο σημαντικός πράγμας λένγκε ζωγιάτε. Σαρ κα κερένας-λες ανταβά; Ο εδάφια Λευιτικό 19:​23-25 σικαβένα εκ τρόπος. (Διαβάνεν) Σκεφτίνεν σο κα μανγκέλας τι  βακερέλ ανταβά ι Ισραηλιτένγκε αφού κα τσσουβένας-πες κο Υποσχεμέ Τθεμ. Άμα εκ τζενό κα φυτίνελας δέντρα χαμάσκε, δεν έπρεπε τι χαλ κατά καρπός οντουλέ δεντρόνγκο για τριν μπρεσά. Κο τέταρτος μπρες, ο καρποί ντιντιόνας κο αγιαστήριος κι Ντεβλέσκο. Σάντε κο πέμπτος μπρες μπορίνελας ο τζενό σο φυτιντάς ο δέντρος τι χαλ κατά καρποί. Ανταβά νόμος κα βοηθίνελας ι Ισραηλιτέν τι αγαβέν ότι δεν έπρεπε τι τσσουβέν πουμαρέ ανάγκες πρώτα. Ο Ιεχωβά μανγκέλας λένταρ τι αβέν σίγουροι ότι βοβ κα ντέλας-λεν οντουλά σο τθερένας ανάγκη ντα τι τσσουβέν λέσκι λατρεία πρώτα πουμαρέ ζωγιάτε. Βοβ κα ντέλας-λεν μπερεκέτι χαμπέ. Επίσης, ο Ντεβέλ βακερέλας λένγκε τι κερέν αντράλ πουμαρέ γκίσταρ δώρα κο αγιαστήριος, κο τθαν σο ντένας-λες λατρεία.

¹⁸ Ο νόμος σο ισί γραμμέ κο εδάφια Λευιτικό 19:​23-25 ανέλα αμαρέ γκοντιάτε οντουλά σο βακερντάς ο Ιησούς κι Επί του Όρους Ομιλία. «Μα ανησυχίνεν . . . σο κα χαν ή σο κα πιν». Ο Ιησούς σοράν βακερντάς: «Τουμαρό Ντατ σο ισί κο ουρανός τζανέλα ότι χρειαζίντιβενα-λεν σαρέ ανταλά». Ο Ντεβέλ κα ντελ-αμέν οντουλά σο χρειαζίντιβασα, σαρ ντέλα-λεν ατζέ-ντα κο τσιρικλέ. (Ματθ. 6:​25, 26, 32) Ισινάμ σίγουροι ότι ο Ιεχωβά κα ντελ-αμέν οντουλά σο τθεράσα ανάγκη. Ντα ντάσα “δώρα για τι βοηθίνας” οντουλέν σο τθερένα-λες ανάγκη χωρίς τι ανάς-λεν σε δύσκολη θέση. Ντάσα επίσης αμαρέ λοβένταρ κι κχανγκιρί για τι βοηθίνας κο ανάγκες σο τθερέλα. Ο Ιεχωβά ντικχέλα κάνα ντάσα αμαρέ βαστένταρ ντα κα ευλογίνελ-αμέν. (Ματθ. 6:​2-4) Αντικάς, σικαβάσα ότι αγαβάσα οντουλά σο σικλιαρένα ο εδάφια Λευιτικό 19:​23-25.

19. Σαρ βοηθίντιλεν τουμέν ανταλέ εδαφιόνταρ σο ντικχλάμ κατά Λευιτικό;

¹⁹ Ντικχλάμ σάντε χάνικ εδάφια κατά Λευιτικό κεφάλαιος 19, ντα βοηθιντέ-αμέν τι αγαβάς σαρ τι μοιάζας αμαρέ άγιε Ντεβλέστε. Κάνα μοιάζασα λέστε, σικαβάσα ότι μαράσα-αμέν τι “αβάς άγιοι σαρέ κο πράγματα σο κεράσα”. (1 Πέτρ. 1:​15) Μπουτ τζενέ σο να υπηρετίνενα ι Ιεχωβάς ντικχένα πουμαρέ γιακχίντζαρ ο λατσσέ πράγματα σο κερέλα ο λαός ι Ντεβλέσκο. Ντα ανταβά κερντάς μπουτέν τι δοξάνεν ι Ιεχωβάς. (1 Πέτρ. 2:​12) Αλλά σικλιάσα μπουτ γιαβερά-ντα πράγματα κατά Λευιτικό κεφάλαιος 19. Ο γιαβέρ μάθημας κα σικαβέλ αμένγκε γιαβερά-ντα εδάφια ανταλέ κεφαλαιόσταρ ντα κα βοηθίνελ-αμέν τι αγαβάς σο γιαβέρ μπορίνασα τι κεράς για τι “αβάς άγιοι”, σαρ βακερντάς αμένγκε ο Πέτρος.