Ande Latinoamérica beshen but millonuria manush. Uni anda gadala millonuria kidine le sar iek vitsa kai si len lengo zakono ai lengi shib makar beshen ande iek them. But anda amare phral beshen pasha godola vitsi te shai azhutin le manushen kotsar te prinzharen e Biblia. Le marturia le Jehovaske amboldas le suaturia ande aver shib ai das le manushen publikasionuria ande mai but de 130 shiba kai si ando Latinoamérica. a Amare phralenge mol but pengi vitsa, numa sar akana luvudin ka o Jehova si len uni bedi. Von pala so sikile ande Biblia akana chi mai alosaren prame kai sas sikade ai nai vorta. Sar usisardiam so das amendar te azhutis len?

 Ando Jalisco (México) e vitsa huichol beshel pel plaia, le phral kai beshenas kotse chi mai kamle te keren uni prame kai chi maladion la Bibliasa. b Godo nas drago uni manushenge anda kacha vitsa, von joliaile but ai o 4 anda o diciembre katar o 2017 linepe pala uni Marturia ai aver manush kai sas lentsa. Gunisarde len kotsar, parhade lenge khera, ai phende ke ka godola kai amboldena sas te mundaren len.

 Le Marturia kai beshen andel foruria pashe dine kal phral sa so trobunas len. Numa sar shai azhutina len te ambolden khere? Iek anda amare phral, kai bushelpe Agustin phenel: “Nai amen love te pokinas iek dukato ai chi zhanasas kai te rodas varekas te zhanel sar te azhutil amen”

 Sar amare phral nashtinas te luvudin ka o Jehova ande pacha, o Betel katar o Centroamérica ande fuga kerdias vareso te azhutil len. Pervo, mangle katar e Kris te dikhen mishto save sas le prame nasul kai kerde godola manush. Polme, o Comité de Coordinadores katar amare Phral kai Ningeren kal marturia le Jehovaske dikhlias mishto te kidenpe uni phral te keren buki. Kakala phral katar o Betel anda o México ai o Estados Unidos, kai si dukaturia ai zhanen pa godo, kidinisaile te azhutin kal phral huicholes. Nakhli tsirha e vriama ai sa kako areslo kai e Kris e mai bari katar o México.

 Iek grupo dukaturia anda but thema dias iek divano ai phendias ke gadia sar le manush trobunas te respetin lengi vitsa ai aver vitsi, vi von trobunas te respetin sa le vitsi ai e voia te alosaren katar le manush anda pengi vitsa.

 O gies 8 anda o Julio katar o 2020, e Kris e mai bari phendias ke sa so sas, nas vorta ai ke le marturia le Jehovaske kai gunisardesas, trobunas te ambolden khere ka pengi vitsa. O Agustin, mai phendias: “Sam defial veselime ai naisime pala so kerde le phral pala amende. Bi le phralengo chi zhanas so sas te avel amendar”.

 Vareso gadia sas amare phralentsa kai beshen ando Ecuador, ando foro San Juan, Ilumán. Kotse si but vitsi kai si len lengo zakono ai lengi shib. Ando 2014, amare phral kotsar lashardesas te vazden iek Rig te kidenpe. Numa iek rashai kerdias te zhan 100 manush te terdiaren e buki kai kerenas amare phral. Ai le manush anda godia vitsa phende kal marturia le Jehovaske te na mai kidenpe te luvudin le Devles kotse.

 Le phral katar o Betel anda o Ecuador ai anda o Estados Unidos, kai si dukaturia ai zhanen pa godo, kerde buki kidine te azhutin len. Von phende la Krisake so sas, ai e Kris thodias lenge partia ai phendias amare phralenge ke shai kidenpe ai shai vazden pengi Rig. Te mai arakhen so shai avel amare phralentsa mai angle, amare dukaturia mangle katar e Kris te respetilpe andel vitsi e voia te alol kai si les suako manush katar fersavo them.

 O gies 16 anda o Julio, katar o 2020, so sas areslo zhi kai e Kris e mai bari anda o Ecuador. Te azhutin amare phralen kai sas ande beda, gele phral kotsar kai sas dukaturia ai lentsa sas 4 kai zhanenas but pa kako. Pala e pandemia katar o COVID-19 manush anda but thema kidinisaile po videoconferencia. Kacha si e pervo data kai e Kris mekel ka iek grupo katar le marturia le Jehovaske te ningeren vareso gadia kai Kris. c Amare phral sikade savorhenge ke si vorta suako manush te respetil e voia te alol makar avela anda iek vitsa kai si la lako zakono.

 Amare phral azhukeren zhi akana te shindiol kris pa kako ai naisime le pala so kerde pala lende. O Cesar kai si phuro kai kidenpe le phral kai den duma Quichua, phenel: “Numa o Jehova mashkar peski organizacion shai kerel gadiki but prame pala tsirha zhene.”

 Sa le dukaturia kai azhutisarde amare phralen sas marturia le Jehovaske ai chi line love pala e buki kai kerde. Numa trobusardiaspe but vriama ai love te lasharen sa le prame ai te aresel kako zhi kai e Kris. Amare phral kerde buki mai but 380 chasuria te lenpe pala so sas ando México ai aver 240 chasuria te ambolden le suaturia katar le lila. Pala so sas ando Ecuador kerde buki but chasuria mai but de 35 dukaturia anda but thema. Katar liam love te azhutis ka amare phral? Pala so dine tumendar ando donate.dan124.com. Naisis tumenge kai den ilesa.