Le pervo borsh anda murho traio simas pasha Leipzig, kai si ande so sas mai anglal e República Democrática anda Niamtso, kai nas dur anda e Polonia ai anda so si akana e República Checa. Kana sas man 6 borsh geliamtar te beshas ando Brasil pala e buki katar murho dat, ai polme ando Ecuador.

Kana sas man 14 borsh, murhe dada trade man te beshau palpale ando Niamtso ai te estudiu ande iek escuela. Atunchi simas dur lendar ai trobuvas te kerau sa korkorho. Keravas so plachalas man ai chi lavas opre te avela ke nas drago le kolavrenge le prame kai keravas.

Murhe dada ambolde ando Niamtso kana sas man 17 borsh. Gelem te traiu lentsa numa sar me alosaravas so te kerau, kerdilo defial pharo mange te pakiau lengo mui. Ai pala godia kana sas man 18 borsh gelemtar kheral.

Astardem te rodau pala soste te traiu. Rodem but riga ai organizacionuria, numa dem po gor ke trobuvas te prinzharau kacha shukar lumia mai anglal te rimol la o manush.

Kindem mange iek moto, gelemtar anda Niamtso ai astardem te zhau zhi ka o África. Numa, trobusardem te amboldau pale ande Europa sostar e moto chi zhalas vorta. Polme te lasharau la, gelem ando Portugal. Gindisailem ke sas te avel mai mishto te mekau e moto ai te zhau po pampuri.

Thodem man uni manushentsa kai lasharenas le prame te nakhen inkial o pai anda o Atlántico. Mashkar lende sas e Laurie, kai mai angle sas te avel murhi rhomni. Geliam zhi kal isli katar o Caribe ai beshliam ando Puerto Rico tsirha vriama, polme amboldiam ande Europa. E Laurie ai me kamasas te arakhas iek pampuri tsinorho ai te lasharas les te shai beshas ande leste. Polme te rodas trin shon, trobusardiam te mekas godo, sostar akharde man te kerdiuvau zhandari anda Niamtso.

Simas 15 shon ande Marina, ai ande godia vriama ansurisailiam. Kamasas pale o traio kai sas amen de mai anglal. Kindiamas iek pampuri tsinorho mai anglal te akharen man te avau zhandari, ai lasharasas les te avel vorta te shai trais ande leste te mai prinzharas e lumia. Numa mai anglal te getosaras o pampuri ai polme te ankliau anda e Marina, le marturia le Jehovaske dine duma amentsa ai astardiam te sikiuas pa e Biblia.

Gindisailem ke chi trobuvas te parhuvau but prame anda murho traio: gata simas ansurime la zhuvliasa kai traivas ai meklemas le tsigeri (Efisiana 5:5). Ai vi, gindivas ke te prinzharau e lumia te dikhau le prame kai o Del kerdias sas vareso lasho te kerau murhe traiosa.

Numa o chachimos sas ke trobuvas te parhuvau uni prame pa so gindivas ai aliaravas. Simas barikano ai keravas so plachalas man, ai sas mange drago te kerau barimata le pramentsa kai kerdemas ai vi anda so zhanavas. E prama mai bari anda murho traio simas me.

Iek gies chitosardem o Baro Divano pe plaiin (Mate, kapitulo 5 zhi kai o 7). Sas mange iek bari prama so phendias o Jesus pa sar te avas veselime. Iek ejemplo si, ke phendias ke e veselia si godolenge kai si bokhale ai trushale (Mate 5:6). Numa pushavas man sar iek manush kai si bokhalo ai trushalo shai avel veselime. Kana mai sikiuavas pa e Biblia davas po gor ke sa le manush trobul len katar o Del numa mai anglal trobun te den po gor godo. Si sar phendias o Jesus: “Veselime godola kai zhanen ande pengo ilo ke trobul len katar o Del” (Mateo 5:3, La Biblia. Traducción del Nuevo Mundo).

E Laurie ai me astardiam te sikiuas pa e Biblia ando Niamtso, numa la vriamasa mukisailiam ande Francia ai polme ando Italia. Ande sa godola thema sas Marturia. Vareso kai plachalas man sas ke kamenaspe ai ke sas kidine. Dikhlem ke sas iek bari familia phralengi anda sa e lumia (Iovano 13:34, 35). La vriamasa boldiliam.

Makar gata simas marturo le Jehovasko, trobusardem te parhuvau sar simas. E Laurie ai me alosardiam te zhas po pampuri pe maria katar o África, ai polme te nakhas inkial o pai anda o Atlántico te zhas ka o Estados Unidos. Korkorho murha rhomniasa mashkar o baro pai, dem po gor sode de tsinorhe sam angla amaro Del kai kerdias sa. Ankolime ando pai sas man but vriama, nas but so te keras, pala godia chitosardem but e Biblia. So chitosardem pa o Jesus kerdias te dau man gogi. Makar nas bezej ande leste ai sas les lashe prame, chi kamelas te kerdiol bari diela ai te den duma pa leste. E prama mai bari ande lesko traio nas vo, sas lesko Dat.

Kana dem man gogi ando ejemplo katar o Jesus, dem po gor ke nashtivas te dau tsirha vriama ka e Amperetsia le Devleski, godo trobulas te avel e prama mai bari ande murho traio (Mate 6:33). Kana aresliam ando Estados Unidos, alosardiam te trais kotse ai te thas sa amendar te luvudis ka o Del.

Mai anglal, kana numa gindivas ande mande, chi zhanavas mishto so sas te avel kana alosaravas vareso. Akana arakhlem jaraimos chacho (Isaías 48:17, 18). Ai vi, arakhlem pala soste te traiu: te luvudiu ka o Del ai te azhutiu le manushen te prinzharen les.

E Laurie ai me zhanas ke so phenel e Biblia azhutisardias te avel amen iek tsera mai shukar. Ai vi, o Jehova suntsosardias amen iekha shasa kai vi prinzharel les ai kamel les.

Amaro traio nas sar iek pampuri kai zhal po pai kai chi buntuilpe. Numa o Jehova chi meklias amen, pala godo kamas te rhevdis ai te pakias amen chachimasa ande leste (Proverbios 3:5, 6).