1. Pa sosko rudyimo avla vorba?

BUT milliovura manusha pinzharen le Rajesko Rudyimo. O Jezush kadalesa sityardas peske sityarden, sar te rudyinen. So si ande kado rudyimo? Thaj sostar si baro amenge, ande amare dyesa?

2. Phen trin bare butya, anda soste o Jezush sityardas amen te rudyinas?

² O Jezush kado phendas: „Tume kade rudyinen: »Amaro Dad, kon san ando cheri, te suntosardyol tyiro anav. Te avel tyiro krajipo. Te kerdyol so tu kames, sar ando cheri, kade vi pe phuv. . .«” (Ginav: Mate 6:9–13!) Sostar sityardas o Jezush, te rudyinas anda kadal trin butya? (Dikh: Informaciovo 20, Le Rajesko Rudyimo.)

3. So trubul te zhanas pa le Devlesko krajipo?

³ Kodo aba zhanas, ke le Devlesko anav Jehova si. Pa kodo aba sas vorba, ke so kamel le manushenca thaj la phuvasa. De pe soste gindisardas o Jezush, kana kado phendas: „Te avel tyiro krajipo”? Akanak dikhas, so si le Devlesko krajipo, so kerela, thaj sar suntosarela le Devlesko anav.

4. So si le Devlesko krajipo, thaj kon si lesko kraj?

⁴ O Jehova kerdas jekh cheresko krajipo, so e Biblia le Devleske krajipeske akharel. O Jehova le Jezushes vazdas avri krajeske, kon „Krajengo Kraj, thaj le  Rajengo Raj” si (1Timoteus 6:15). O Jezush majbut lasho zhanel te kerel, sar sako manushengo raj, thaj majbaroj sar le manushenge raja.

5. Kathar thaj pe soste rajilape le Devlesko krajipe?

⁵ Pala soste o Jezush opre ushtyilas, pala 40 dyes palpale gelas ando cheri. O Jehova pala kodo krajeske shutas les (Aposhtola 2:33). Le Devlesko krajipo andar o cheri rajilape pe intrego phuv (Sikadyimaski 11:15). Anda kado phenel e Biblia, ke cheresko krajipe (2Timoteus 4:18).

6–7. Sostar si majlasho kraj o Jezush, sar le manusha?

⁶ E Biblia kodo phenel, ke o Jezush majlasho kraj si, sar sako manushengo kraj, ke „feri voj si kon chi merel” (1Timoteus 6:16). Jokhar sako raj merel, de o Jezush chi merela. Chi avla agor kodole lashimaske, so ande amende kerla.

⁷ La Bibliaki profecija opre sikavel, ke o Jezush chacho thaj lashe jilesko kraj avla: „Le Jehovasko duxo ashel pe leste, le godyaveripesko thaj le uzhe dikhlimasko duxo, la vorbako thaj la zorako duxo, le zhanimasko thaj le Jehovasko bara patyivako duxo. Rakhela peski voja ande kodo, ke zurales patyivil le Jehovas. Na kade shinel krisi, so dikhel, thaj chi na kade lasharel, pe soste shunel. Chachikanes shinela krisi le chorrenge” (Izaiash 11:2–4). Kamesas vi tu kasavo kraj t’avel tut?

8. Kathar zhanas, ke o Jezush na korkoro rajilape?

⁸ O Del avri vazdas vi unyi manushen, ke le Jezushesa te rajinpe ando cheri. O Pal aposhtol kado phendas le Timoteuseske: „avri te inkrasa majdur,  raja avasa lesa, sar kraja” (2Timoteus 2:12). Sodezhene rajina sar kraja le Jezushesa?

9. Sodezhene rajinape le Jezushesa? O Del kana vazdas len avri?

⁹ Ando 7. kotor vorbisardam pa kodo, ke o Janosh aposhtol ando suno dikhlas, ke o Jezush le 144 000 krajenca rajilpe ando cheri. Kon si von? O Janosh phenel, ke „pe lengo chikat si iskirime lesko anav, thaj leske Dadesko anav”. Thaj pashe shol: „Pala bakro zhan [pala Jezush], karing feri zhal. Len andar le manusha kinde, sar angluno frukto, le Devleske thaj le bakreske”. (Ginav: Sikadyimaski 14:1, 4!) Le 144 000 zhene anda kasave patyivale kristianura tordyon, kas o Del vazdas avri pe kodo, kraja t’aven le Jezushesa pe phuv. Kana meren, pe cheresko trajo ushtyona opre (Sikadyimaski 5:10). O Jehova kathar le aposhtolengi vrami vazdel avri patyivale kristianon, t’aven mashkar kadal manusha.

10. Sostar si kamipo kathar o Jehova, ke o Jezush thaj le 144 000 avna kraja pe manusha?

¹⁰ O Jehova anda kodo kamelas, ke vi manusha te rajinpe le Jezushesa, ke zurales kamel amen. O Jezush lasho raj avla, ke hatyarel amen. Zhanel, soskoj manusheske t’avel thaj zhanel soskij e briga. O Pal kodo phendas ke o Jezush zhanel jekh te hatyarel amare pharipenca, thaj „ande sakofelo zumado sas, sar ame” (Heberenge 4:15; 5:8). Vi le 144 000 zhanen, soskoj manusheske t’aven, ke vi von doshale thaj nasvale sas. Anda kado zhanas kodo, ke o Jezush thaj le 144 000 na numa kodo zhanen so hatyaras, vi kodo, pe soske pharipe trubul perdal te zhas.

11. Sostar sityardas o Jezush peske sityarden, te rudyinen anda kodo, te kerdyol so o Del kamel ando cheri?

¹¹ O Jezush pa kodo sityardas peske sityarden, te rudyinen anda kodo, te kerdyol so o Del kamel ando cheri. Sostar? Sar ando 3. kotor dikhlam, o Beng le Jehovaske gelas. O Jehova pala kado pe jekh vrama mukhlas leske thaj leske demonenge, te ashon ando cheri. Ando cheri na sakono kerdas kodo, so o Del kamelas. Ando 10. kotor inke avla vorba pa o Beng thaj pa demonura.

12. Pe soske butya iskiril o Sikadyimaski 12:10?

¹² E Biblia phenel, na pa buteste pala kodo, ke o Jezush le Devleske krajpesko kraj kerdyilas, tele mardas le Benges. (Ginav: Sikadyimaski 12:7–10!) O 10. versho tele iskiril duj bare butya, so pelas: O Jezush Kristush raj kerdyilas, sar le Devleske krajipesko kraj, thaj le Benges tele shude andar o cheri pe phuv. Dikhasa, ke kadal butya aba pelepe.

13. So pelas ando cheri, kana le Benges tele shude kothar?

¹³ E Biblia tele iskiril, sar losshanas le patyivale andyala pala soste le Benges, thaj leske demonon tele shude andar o cheri. Kado shaj ginavas: „lossha, tu cheri, thaj tume, kon kothe beshen” (Sikadyimaski 12:12). Akanak pacha si ando cheri thaj jekh hatyaren, ke sakono kodo kerel, so o Del kamel.

14. So kerdyilas pe phuv, ke tele shudine le Benges andar o cheri pe phuv?

¹⁴ De kathe pe phuv kaver trajo si. Zhungale butya peren le manushenca, „ke tele avilas. . . o Beng,  bara xojasa, ke zhanel, ke cerra vrama si les” (Sikadyimaski 12:12). O Beng zurales xojakoj. Tele shudine les andar o cheri, thaj zhanel, ke na butara mudarena les. Sakofelo kerel anda kodo, ke pe intrego phuv pharimo, dukh, thaj briga te kerel.

15. So kamel o Del la phuvasa?

¹⁵ So o Del kamelas la phuvasa, kodo chi boldadyilas. Vi akanak kodo kamel, ke bidoshale manusha te trajin pe jekh shukar phuv (Asharimata 37:29). Sar kerela kado le Devlesko krajipo?

16–17. So sikavel o Daniel 2:44 po Devlesko krajipo?

¹⁶ Ando Daniel 2:44 si jekh profecija, so kado phenel: „Ande kodolenge krajenge dyesa le cheresko Del opre tordyarel jekh krajipe, so soha chi pustilape. Kado krajipe chi zhal perdal pe kaver nipo. Kethane phagrel, thaj khosel kodole krajipen, thaj feri kado krajipe ashel mindig”. So sikavel kadi profecija pa le Devlesko krajipo?

¹⁷ Anglunes kodo, ke le Devlesko krajipo „ande kodolenge krajenge dyesa” putrel pesko rajipo. Kado kodo sikavel, ke avna rajimata pe phuv, kana opre tordyol le Devlesko krajipo. Po dujto zhanasa, ke le Devlesko krajipo mindig ashela, thaj chi avla tele parudo pe jekh kaver rajimo. Po trito kodo si ande le Danieleski profecija, ke mashkar le Devlesko krajipo, thaj mashkar kadala lumake rajimata, baro maripe avla. Le Devlesko krajipo opre tordyola andar o maripe, thaj korkores rajila pe phuv. Kade le manusha ando majlasho rajipo trajina.

18. Sar akharen o paluno maripo, so mashkar le Devlesko krajipo, thaj mashkar la lumake rajimata avla?

 ¹⁸ Sar lela perdal le Devlesko krajipo pe phuv o rajipe? Angla paluno maripo, so Armageddoneske akharen, le demonura rigate ingren la phuvake intregi rajen, ke „kethane te kiden len, pe le majbare Devlesko bare dyesesko maripe”. Ova, le manushengo rajipo marelape le Devleske krajipesa, de le Devlesko krajipe opre tordyola (Sikadyimaski 16:14, 16; dikh: Informaciovo 10, Armageddono).

19–20. Sostar trubul amen le Devlesko krajipo?

¹⁹ Sostar trubul amen le Devlesko krajipo? Dikhas trin thana. Anglunes bezexale sam, anda kado nasvajvas thaj meras. E Biblia kodo phenel, ke kana le Devlesko krajipo rajila, chi merasa. O Janosh 3:16 kado iskiril: „o Del kade kamelas e luma, ke peske anglune Shaves das, ke sakono, kon ande leste patyal te na xasajvel, thaj mindig te trajil.”

²⁰ O dujto, ke anda kodo trubul amen le Devlesko krajipo, ke mashkar nasul manusha trubul te trajinas. Butzhene xoxaven, perdal maren kaveren, thaj zhungales trajinen. Ame chi zhanas so te keras lenca, de o Del zhanel. Kon chi mukhen opre le nasulimasa, mudarena len, kana avla o Armageddono. (Ginav: Asharimata 37:10!) O trito, ke anda kodo trubul amen le Devlesko krajipo, ke le manushenge rajimata nasulaj, xoxamnej, thaj lenge rajimas agor si. Naj len gindo pe kodo, te zhutin le manushenge te keren so o Del kamel. E Biblia kodo phenel, ke o „manush rajilpe pe manusheste pe pesko chorrimo” (Predikator 8:9).

21. Sar kerela o Del peske krajipesa, so voj kamel?

 ²¹ Pala Armageddono o Del peske krajipesa kerel pe phuv, so kamel. Rigate shol le Benges, thaj leske demonon (Sikadyimaski 20:1–3). Pala kodo khonyik chi avla nasvalo thaj chi merela. Najisaras le parujimaske, ke kade le chache manusha shaj traijnen ande nyevi luma (Sikadyimaski 22:1–3). O krajipo suntosarela le Devlesko anav. So sikavel kado? Kana le Devlesko krajipo rajila pe phuv, sako manush patyivila le Jehovasko anav. (Dikh: Informaciovo 21,  O parujimo.)

22. Kathar zhanas ke o Jezush na kana pe phuv sas, vaj na kana opre ushtyilas andar o merimo, kerdyilas kraj?

²² O Jezush pa kodo sityardas peske sityarden, kade te rudyinen: „Te avel tyiro krajipo”. Anda kado dichol, ke le Devlesko krajipo pala kado avela. Le Jehovaske majanglal opre trubundas te tordyarel kado krajipe, thaj le Jezushes te shol anglal. Atunchi kerdyilas kraj o Jezush, kana palpale gelas ando cheri? Na, trubundas te zhukarel. Pala soste o Jezush opre  ushtyilas, vi o Peter, thaj vi o Pal phende, ke e profecija, so ando Asharimata 110:1 si, po Jezush sikavel. Kathe o Jehova kado phenel: „Besh pe muri chachi rig, zhi kaj tye xojarden tela tyiro punro chi shuvav” (Aposhtola 2:32–35; Heberenge 10:12, 13). Sode trubundas te zhukarel o Jezush, krajeske te shol les o Jehova?

23. a) Kana kerdyilas o Jezush kraj ande le Devlesko krajipo? b) So dikhasa ando kaver kotor?

²³ But bershenca angla 1914, le chache kristianura hatyarde la Bibliaki profecija, ke kado jekh baro bersh avla. Zhi kathar 1914, so shaj dikhas ande luma, sikaven, ke chachimo sas len. O Jezush ande kado bersh kerdyilas kraj (Asharimata 110:2). Pala kado na butara tele shude le Benges pe phuv, thaj aba feri „cerra vrama si les” (Sikadyimaski 12:12). Ando kaver kotor, inke majfeder dikhas, ke ande kadi vrama trajinas. Vi pe kodo vorbinasa, ke pashal si kodi vrama, kana le Devlesko krajipo kerela pe phuv, so o Del kamel. (Dikh: Informaciovo 22, Sostar si baro bersh o 1914?)