1–2. Kaj shaj avas adyes lashe thaneste?

GINDIN andre, ke ande nasul vrama pe vulica phires. O cheri tunyariko kerdyol, bashol thaj fimlal. Jekhvar feri lel te shindyol o brishind. Rodes jekh than, kaj shaj cirdes tut. Che mishtoj, kana rakhes jekh than, ke kothe chi kindyos!

² Kade si vi ande amare dyesa. E luma feri majnasul avla, thaj shajke pe kodo gindistu, kaj shaj aves lashe thaneste. Ande Asharimata kado iskiril: „Kado phenav le Jehovaske: »Tu san muro garadimo thaj zuralo zido, muro Del, ande kaste patyav«” (Asharimata 91:2). Ova, o Jehova sama lel pe amende ande kadi phari luma, thaj zhutil, shukares te dikhas anglal.

3. So trubul te keras, ke o Jehova sama te lel pe amende?

³ Sar lel pe amende sama o Jehova? Zhutil, te shaj phiravas amaro pharimo, thaj majbaroj, sar sakono, kon kamel te azbal amen. Inke vi atunchi, kana nasulimo perel amenca, shaj patyas ande kodo, ke o Jehova na butara palpale potyinel amenge. E Biblia pe kodo ingrel amen, ke te ashas ande le Devlesko kamipe (Judash 21). Pashal trubul te ashas karing o Jehova, te zhutil amenge ande phare vrami. Sar shaj ashas pashal karing leste?

4–5. Sar sikavel o Jehova, ke kamel amen?

⁴ Te shaj ashas pasha Jehova, trubul te zhanas, ke  sar kamel amen. Gindinas perdal, sosko but kerdas anda amende! Jekh shukar phuv das amen, so pherdo si shukara luludyenca, kashtenca, zelenimatonca, thaj allatonca. Lasho xamasko shaj xas, thaj uzho paji shaj pas. Andar e Biblia shaj pinzhardam lesko anav, thaj ke sosko lasho si voj. Majfeder pale anda kodo shaj dikhas, ke kamel amen, ke bishaldas peske majkuche Shaves, le Jezushes pe phuv, pesko trajo te del ande amende (Janosh 3:16). Anda kado shaj avel amen na butara shukar trajo.

⁵ O Jehova opre tordyardas vi o Messiashicko krajipe, so ando cheri si. Kado na butara nacharela sako nasulimo. O krajipo nyevi phuv kerela, kaj sakono lungo, thaj shukar trajo shaj trajila (Asharimata 37:29). O Jehova vi kodolesa sikavel pesko kamipe karing amende, ke sityarel, sar shaj avel amaro trajo o majlasho. Vi pe kodo mangel amen, te rudyinas karing leste. Voj pale mindig shunel amare rudyimata. So o Jehova kerel, anda kodo dichol, ke savorazhenen zurales kamel.

6. Sar shaj des palpale le Jehovasko kamipe?

⁶ Sar shaj sikaves avri, ke najisares le Jehovasko kamipe? Kade, ke ande sakofelo so kerdas, najisis leske. Ande amari luma butzhene chi najisaren. Kade sas vi ande le Jezusheske dyesa. Jekhvar o Jezush sastyardas 10 zhungale nasvalen, de feri jekh najisardas leske (Lukach 17:12–17). Ame kasave kamas t’avas sar kodo mursh, kon najisardas le Jezusheske. Mindig te najisaras le Jehovaske!

7. Sar trubul te kamas le Jehovas?

⁷ Trubul, vi avri te sikavas amaro kamipe karing o Jehova. O Jezush kodo phendas peske sityardenge, ke  intrego jilesa, intrego duxosa, thaj intrego godyasa trubul te kamen le Jehovas. (Ginav: Mate 22:37!) So si kado?

8–9. Ande soste dichola, ke kamas le Jehovas?

⁸ Naj dosta feri te phenas, ke kamas le Jehovas. Kana amare intrego jilesa, duxosa, thaj godyasa kamas les, atunchi kadaleske trubul te dichol ande kodo, so keras (Mate 7:16–20). E Biblia uzhes kodo sityarel, ke te kamas le Devles, mukhasame leska vorbake. Pharoj kado te keras? Na, ke „leske vorbi pale naj phare amenge”. (Ginav: 1Janosh 5:3!)

⁹ Te mukhasame le Jehovaske, vojake thaj pachake avasa (Izaiash 48:17, 18). De so shaj zhutil, ke pashal te ashas karing leste? Dikhas!

10. Sostar trubul vi pala kado te sityos po Jehova?

¹⁰ Sar kerdyilan le Jehovasko amal? Kade, ke sar sityilan e Biblia, majfeder pinzhardan les. Kado amalipe kasavoj, sar e jag, so kames te phabol. Sar la jaga trubul kasht, te na mudardyol, kade vi pala kado trubul te sityos po Jehova, zuralo te ashel mashkar tumende o amalipe (Godyaver Vorbi 2:1–5).

11. Sar resen tut la Bibliake sityaripe?

¹¹ Kana sityos e Biblia, vi pe kasavende sityosa, so resena tyo jilo. Dikh, sar hatyarde le Jezusheske duj sityarde, kana la Bibliake profeciji sityardas lenge o Jezush. Kado phende: „Thaj chi phabolas amaro jilo, kana vorbilas amenge po drom, kana uzhes hatyaravadas amenca o Iskirimo?” (Lukach 24:32).

12–13. a) So shaj kerdyol amare kamipesa karing o Del? b) So shaj keras, te na kovjol amaro amalipe le Devlesa?

 ¹² Shajke, vi tu vojako kerdyilan, kana hatyardan e Biblia. Vi le Jezusheske sityardengo jilo reslas, so hatyarde andar o Iskirimo. Kade shaj pinzhardan, thaj kamlan le Jehovas. Chi kames, ke tyo kamipo avri te shudrol (Mate 24:12).

¹³ Kana aba le Devlesko amal san, trubul te keres butyi pe kodo, te na kovjol tumaro amalipe. Vi pala kado trubul te sityos pe leste, thaj po Jezush. Thaj trubul te gindistu pe kodo so sityilan, thaj pe kodo, sar zhanesas kodola andre te shos ande tyo trajo (Janosh 17:3). Sar ginaves thaj sityos e Biblia, gindintu pe kadala: „So shaj sityuvav ande kado kotor pa Jehova Del? Sostar ingrel man kado pe kodo, ke mure intrego jilesa, thaj mure intrego duxosa te kamav les?” (1Timoteus 4:15).

14. Sar zhutil o rudyimo, zuralo te ashel amaro amalipe le Jehovasa?

 ¹⁴ Kodolestar ashel zuralo tye amalesa o kamipo, kana butivar vorbin. Kana sako dyes rudyinas kaj o Jehova, chi shudrola avri amaro kamipe. (Ginav: 1Tessalonika 5:17!) Bari patyiv si ke shaj rudyinas. Mindig ando amaro jilo trubul te vorbinas leste (Asharimata 62:8). Naj lasho, kana feri kade phenas amaro rudyimo, pa soste palpale seronas. Mishto te gindinas perdal amare vorbi. Vi pala kado te sityuvasa e Biblia, thaj anda jilo te rudyinasa kaj o Jehova, zuralo ashel amaro amalipe lesa.

15–16. So gindis pe kodo, kana ingras e lashi vorba?

¹⁵ Te kamas pashal te ashas kaj o Jehova, atunchi trubul te vorbinas kaverenge pe amaro patyamo. Kadi bari patyiv si kathar o Jehova (Lukach 1:74). O Jezush sako chache kristianos das kadi butyi. Savorazhenenge trubul te ingras le Devleske krajipeski lashi vorba. Aba keres kado? (Mate 24:14; 28:19, 20).

¹⁶ Le Pal aposhtoleske kadi butyi zurales kuch sas, kinchoske inkrelas les (2Korintus 4:7). E majangluni butyi, so shaj keres, ke vorbis kaverenge po Jehova, thaj so kamel te kerel. Kade shaj slugis les, voj pale losshal, kana kado keres (Heberenge 6:10). Kana ingres e lashi vorba, kodo vi tuke lashoj, thaj vi kodolenge, kon shunen tut. Kade vi tu, thaj vi von majpashal shaj zhan karing o Jehova, thaj lungo trajo shaj trajin. (Ginav: 1Korintus 15:58!) Naj kaver butyi, so kattyi lossh shaj delas!

17. Sostar trubul sigo te ingras e lashi vorba?

 ¹⁷ Sigo trubul te ingras e lashi vorba. Trubul te phenas e vorba, thaj te na zhukaras (2Timoteus 4:2). Le manushenge trubul te shunen pe Devlesko krajipo! Kado phenel e Biblia: „Le Jehovasko baro dyes pashal si. Pashal si, thaj sigo aveltar.” O agor „chi asholatar” (Sofoniash 1:14; Habakuk 2:3). Ova, o Jehova na butara nacharela le Bengeski nasul luma. Angla soste kado perelape, duma trubul te den le manushenge, vi von te shaj slugin le Jehovas.

18. Sostar trubul, le chache kristianonca kethane te patyivinas le Jehovas?

¹⁸ O Jehova kodo kamel, kethane te patyivinas les, le chache kristianonca. Kado phenel e Biblia: „te las sama pe jekhavreste, ke po kamipe, thaj po lashipe te inkras jekhavres, te na mukhas opre, te avas kethane, sar siklej varisave, te tromasaras jekhavres, inke majfeder atunchi, sar dikhen, ke kodo dyes aba sigo kathe si” (Heberenge 10:24, 25). Sakofelo trubul te keras, te na mukhas avri chi jekh programo. Kothe zhanas te zuraras jekhavres.

19. So shaj zhutil te kamas amare kristianicka phralen?

¹⁹ Kana zhas pe programura, lashe amalen rakhes, kon zhutin tuke te patyivis le Jehovas. Kothe vi kaver phralen shaj rakhes, kon kade sar tu, pe kodo keren butyi, le Jehovas te patyivin. Thaj sar tu, chi von naj bidoshake. Kade te si, atunchi ando jilo jertin lenge. (Ginav: Kolosse 3:13!) Mindig kodo dikh, so si lasho ande tye kristianicka phrala, kade chi avla pharo te kames len, thaj pashal te zhas kaj o Jehova.

20–21. So si o chacho trajo?

²⁰ O Jehova peske sako amaleske o majlasho trajo kamel. E Biblia kodo sityarel, ke na butara zurales kaver avla amaro trajo, sar akanak.

²¹ Chi merasa, na feri 70-80 bersh trajinasa. Ande jekh shukar nyevi luma shaj trajinasa, sastes, vojasa, pachasa. Pe kado phenel e Biblia, ke chacho trajo. O Jehova kasavo shinavel amenge, de pasha kado, trubul te zuraras amaro patyamo ando chacho trajo (1Timoteus 6:12, 19).

22. a) Sar shaj zuraras amaro patyamo ando chacho trajo? b) Sostar nashtig phirel amenge o chacho trajo?

²² Sar shaj zuraras amaro patyamo ando chacho trajo? But lasho trubul te keras (1Timoteus 6:18). Kado kodo sikavel, ke andre trubul te shuvas ando amaro trajo, so sityilam andar e Biblia. De na anda amari zor si, te den amen o chacho trajo. O lungo trajo chi phirel amen. Kado zurales kuch si kathar o Jehova, de jive das les peske patyivale slugenge. Ande kado sikadyol lesko dragimo, so chi phirel amen (Roma 5:15). Amaro cheresko Dad, zurales kamel te del variso lasho peske patyivale slugenge.

23. Sostar trubul akanak mishto te gindistu?

²³ Push tutar: „Kade patyivinav le Devles, sar voj kamel?” Opre te pinzhares, ke trubul te boldes pe varisoste, sigo ker les! Te shuvasa amaro pharimo po Jehova, thaj mukhasame leske, shaj garadyuvas leste.” Voj sama lela pe peske patyivale slugi, ande le Bengeske lumake palune dyesa. Sar shinadas,  grizhila pe kodo, lungo trajo te trajinas pe nyevi phuv. Ova, akanak mishto te gindisatu, chacho trajo avla tut!