Le Abrahameske shavora kerdyile le Devlesko nipo, thaj lenge das peski krisi. Le niposke o Izrael anav das, thaj von sas leske chache manusha, kon sama len pe leski vorba (Salmongi [Zsoltárok] 147:19, 20). Kodo kamlas lenca o Del, ke sakone niposke pe lengo aldashi te aven. Dikh: Genezarimaski (1Mózes) 22:18.

O Del anda kodo akhardas avri le bibolden, te shaj aven lesko nipo. So dulmut lenca pelas, kodo sikavel, sar zhutil le manushen, kana andre inkren le Devleski krisi (Dujto Krisaki [5Mózes] 4:6). So le bibolde kerde, anda kodo le manusha but shaj sityile pe o chacho Del. Dikh: Izajasheski 43:10, 12.

Sar zhalas e vrama, le bibolde aba na kodo kerde so kamel o Del, kade ande lengo than le kerestenyen shutas (Matevesko 21:43; 23:37, 38). Angla kodo le bibolde sas le Jehovaske manusha, akanak aba le chache kerestenya si le. Dikh: Aposhtolenge (Cselekedetek) 15:14, 17.

O Jezush pe kodo sityardas peske manushen, ke sar jekh nipo te predikalinen sakoneske, pe intrego luma (Matevesko 10:7, 11; 24:14; 28:19, 20). Kadi butyi ande amare dyesa, pe la lumako agor si o majbaro. O Jehova mukhel kodo, ke but milliova ande sako nemzeto, te shaj aven karing o chachipe (Viziovongi [Jelenések] 7:9, 10). Le chache kerestenya anda kodo ke nipo si, zhanen te zhuranen, thaj te zhutin jekhavres. Kana kethane aven, pe intrego luma jekh sityon andar e Biblia. Dikh: Biboldenge (Héberek) 10:24, 25.

Ando 1870 bersha, kon sityonas e Biblia, dulmutane chachipe pinzharde opre anda late. Zhanenas ke o Jezush, anda kodo kerdas o dyulekezeto, te predikalin. Ando 1931 bersh, opre line le Jehovaske Chache Manusha anav, thaj pe intrego luma vorbinde pal o krajipo. Dikh: Aposhtolenge 1:8; 2:1, 4; 5:42.

Ando angluno shel bersh bute thanende sas kerestenya. Mishto phirde ke sas len tradimaske manusha aversar vezetotestuleto, kon le Jezushes pinzharde penge shereske (Aposhtolenge 16:4, 5). Le Jehovaske Chache Manusha vi adyes zuralyven anda kodo, ke godyavera pastoraj lenge tradimaske manusha. Le tradimaske manusha len sama pe fiokhivatalura, kaj majbut sar 700 shiba bolden. Pe udyankattyi shiba den avri publikaciovura, so zhutin te hatyaren e Biblia. Le tradimaske manusha andar e Biblia zuraren, thaj drom sikaven le maj but sar 100 000 dyulekezetoske. Ande dyulekezetura le pastorengi butyi kasave mursha keren, kon avri si zumade, kadala si le phure. Kamipesa grizhinen pal le Devleske bakre. Dikh: 1Peteresko 5:2, 3.

Le Jehovaske Chache Manusha, sar jekh nipo, perdal den le manushenge le Bibliaki vorba, thaj sityaren le manushen. Kher kherestar phiren vi von, sar le aposhtola (Aposhtolenge 20:20). Kon kamen te pinzharen o chachipe, kodolenge sityaren e Biblia. Numa pe jekh drom zhan, ke von jekh chalado si, ke jekh si lengo Dad, thaj von phral si (2Tessalonicko 1:3). Kodolestar si von vojako chalado pe phuv, ke lossh keren le Devleske, thaj zhutin le manushen. Dikh: Salmongi 33:12; Aposhtolenge 20:35.