Галатия 4:1-31
4 Пока о бэято, савэсти вся трэбуй тэ дорэсэлпэ, инке цынёнё, во кацаво жэ, сар о рабо, хоть вся када и лэско.
2 Исин мануша, савэ диқэн пала лэстэ и пала лэско цэр, жы кай кодэва дес, саво стодя о дад.
3 Точно кадя жэ и амэ, кала самас бэяцэ, самас раборя, кала жувасас па кадэла люмако гиндо.
4 Но кала поджыля и время, сави стодя о Дэл, во бишалдя пэстирэ Шавэс, саво арақаделя ла жувлятар и сас тала законо.
5 Кала о Шаво авеля, во витиндя и освободисардя кодэлэн, ко сас тала законо, кай тэ ашас лэстирэ шавэ.
6 И важ кода кай тумэ шавэ, о Дэл стодя андэ амаро ди о свынто зор, саво исин андэ лэско Шаво и саво взвийпэ: «А́ва, Дадэ!»
7 Кочай тумэ ужэ най раборя, ай шавэ. Ай если тумэ шавэ, тоди о Дэл стердя кадя, кай тумэнди вся тэ дорэсэлпэ.
8 Но авря ригатар, кала тумэ на ӷанэнас лэ Дэвлэс, тумэ сас раборя кодэлэндирэ, ко па чачимастэ най дэвла́.
9 Ай акана, кала тумэ уӷанглэ лэ Дэвлэс, или май точно тэ ԥэнэс, кала о Дэл уӷангля тумэн, состэ тумэ упалэ ринпэ каринг кадэла люмако чоровано и евутно гиндо и инке еқвар камэн тэ ашэн кадэлэсти раборя?
10 Тумэ гиндон, кай исин особи деса, шона, срокоря и бэрша и сэрэн* лэн.
11 Мэ пристодэм бут зор, кай тэ поможысарав тумэнди, но дарав, кай тэ на ашэл вся када евья.
12 Ясвэнца мангав тумэн, ԥрала, ашэн кацавэ, сар мэ, важ кода кай и мэ варикала сымас кацаво жэ, сар тумэ. Тумэ на стердэ манди нисо вэрыто.
13 Тумэ ӷанэн, кай через мэрно насвалимос мандэ получисайля пэрво разо тэ росԥэнав тумэнди и лащи новость.
14 И хоть тумэнди сас ԥарэс через кадэва насвалимос, тумэ на заӷиткосардэ ман и на гряцайлэ мандар, но шутэ сама ман сар лэ Дэвлэстирэ анӷелос, сар лэ Христос лэ Исусос.
15 Кай жэ кодэя лош, сави сас тумэндэ? Патяв, тэ авелоп тумэндэ кацави возможность, тумэ отдиноп манди пэстирэ яқа.
16 И чаче тумэ линэ тэ вороӷуин ман важ кода, кай мэ ԥэнав тумэнди чачимос?
17 Кадэла мануша старыинпэ тэ пэрэцырдэн тумэн пэ пэстири риг, но камэн када най па лащи время. Вонэ камэн тэ дурярэн тумэн мандар, кай тумэ тэ кандэн лэн.
18 Мэрнэ сомнакунэ бэяцэ, драго, кала тумэн шон сама па лащи время — и терэн када вся и время, и кала мэ тумэнца, и кала ман нинай паша тумэндэ.
19 Важ тумэндэ мэ упалэ мучисавав, сар и жувли, кала анэн бэятос, пока тумэ на ашэна кацавэ, сар о Христос.
20 Камлоп мэ щас тэ авав тумэндэ и па аврятэ тэ дав дума тумэнца, важ кода кай мэ нащи полав, со тумэнца терэлпэ.
21 Ԥэнэн манди, тумэ, кодэла, ко камэл тэ ритярэл о законо, хэба тумэ на ашунэн, со ԥэнэнпэ андо законо?
22 Например, пистромэ, кай лэ Авраамостэ сас дуй шавэ: ек ла манушнятар, сави сас рабыня, ай авэр ла хулаятар, сави сас свободно манушни.
23 Ла рабыняко шаво арақаделя сар всаворэ бэяцэ, ай ла хулаяко шаво — па обещания.
24 Вся када можно тэ полас и па аврятэ. Кадэла манушня сыкавэн дуй доӷовороря. Ек доӷоворо сас дино по плай Сина́ё, и латирэ бэяцэ, кала арақадён, ашэн раборя. Кадэва доӷоворо — и Ага́рь.
25 И Ага́рь сыкавэл о плай Сина́ё, саво андэ Ара́вия, и када адесутно Иерусалимо, важ кода кай во пэстирэ бэятонэнца андо рабство.
26 Ай о упруно Иерусалимо свободно, и када — амари дэй.
27 Андэ Свынти Лила пистромэ: «Лошав, бездетно, кастэ не моӷут тэ авэн бэяцэ. Фартэ радосав, манушни, сави на арақадя бэятос, важ кода кай ла манушнятэ, савя ашадэ, май бут бэяцэ, чем манушнятэ, сави миростэ».
28 И тумэ, ԥрала, — бэяцэ, савэ арақаделэ па обещания, кадя жэ сар о Иса́ко.
29 И сар андэ кодэя время о бэято, саво арақаделя сар всаворэ бэяцэ, ля тэ ӷоний кодэлэс, ко арақаделя лэ Дэвлэстирэ зорэса, кадя терэлпэ и акана.
30 Но со ԥэнэнпэ андэ Свынти Лила? «Видарав кадэла рабыня и латирэ шавэс, важ кода кай ла рабынятирэ шавэсти никала на дорэсэлапэ и блаӷословения, сави дорэсэлпэ ла хулаятирэ шавэсти».
31 Ни акэ, ԥрала, амэ най ла рабынятирэ бэяцэ, ай ла хулаятирэ.
Сноски
^ Или «ритярэн».
