Дила 11:1-30
11 И апосталоря и ԥрала андэ Иуде́я ашундэ, кай и мануша анда авэр народоря патяе андо алав лэ Дэвлэстар.
2 Кала о Пётро авеля андо Иерусалимо, и мануша, савэ сас пала кода, кай трэбуй тэ опшындён, линэ лэс тэ мустрин*:
3 «Ту зажылян андо цэр кай и найопшындэ и бэшлян лэнца пала ек мисяйля».
4 Тоди о Пётро росԥэндя лэнди вся, сар сас:
5 «Мэ сымас андэ Ёпия, и, кала мангаваспэ, манди сыкаделя варисо кацаво, со шоласпэ пэ бари скатэрка анда лёно, сави ритярэнас штарэ краёнэндар и змэкэнас пэ ԥув, и вой терделя ворта англа мандэ.
6 Мэ додиқлэм котэ штарэ пэрнэндирэ жывотнонэн, лэ зверёнэн, кодэлэн, ко ползыий па ԥув, и лэ чириклян.
7 Кадяжэ мэ ашундэм, сар о ӷолосо ԥэндя манди: „Ущи, Пётро, зашын любонэ жывотнонэс и ха!“
8 Но мэ ԥэндэм: „Най, мэ никала на хавас нисо маӷримэ или мэлало“.
9 О ӷолосо па небо до дуйто ԥэндя: „Будэр на ԥэн маӷримэ пэ кода, со о Дэл стердя вужо“.
10 Када сас ԥэндо и до трито разо, и тоди и скатэрка вазгляпэ палпалэ по небо.
11 Андэ кодэя жэ время каринг о цэр, кай амэ самас, поджылэ трин мануша, савэн бишалдэ каринг мандэ анда Кеса́рия.
12 Через о свынто зор манди сас ԥэндо, кай мэ би алавэско тэ жав лэнца. Манца кадяжэ жылэ кадэла шов ԥрала, и амэ зажылям андэ кодэлэ манушэско цэр.
13 Во росԥэндя амэнди, кай пэстэ цэрэ во диқля лэ анӷелос, саво ԥэндя лэсти: „Бишал манушэн андэ Ёпия и ақар каринг пэстэ лэ Симанос, пэ саво ԥэнэн Пётро.
14 Во ԥэнэна тути, сар ту и всаворэ, ко жувэл андэ тиро цэр, можэте тэ спасынпэ“.
15 Ай кала мэ лэм тэ дав дума, лэнди сас дино о свынто зор, сар май данглал во сас дино амэнди.
16 И манди авеля по гиндо, сар о Баро Хулай ԥэнэнас: „О Иоа́но болэлас лэ паеса, ай тумэ авэна болдэ лэ свынтонэ зорэса“.
17 Если о Дэл дя лэнди кацаво жэ свынто зор, сар и амэнди, — кодэлэнди, ко патяя андо Баро Хулай андо Исусо Христос, — тоди ко мэ кацаво, кай тэ жав против о Дэл?»
18 Кала вонэ виашундэ лэ Петрос, вонэ улинэпэ* и линэ драго тэ дэн дума пала Дэл: «Вижал, и лэ манушэнди анда авэр народоря о Дэл домэкля тэ каинпэ и тэ жувэн».
19 Посли кода сар умардэ лэ Стефанос, линэ тэ ӷонин и аврэ учениконэн, и кодэла, ко занашля анда форо, дожылэ жы каринг и Финики́я, Ки́про и Антио́хия и росԥэнэнас и лащи новость кати лэ евреёнэнди.
20 Но дэсавэ андар лэндэ, ко сас анда Ки́про и анда Кире́на, авелэ андэ Антио́хия и линэ тэ росԥэнэн и лащи новость пала Баро Хулай Исусо лэ манушэнди, савэ дэнас дума пэ греческо шыб.
21 О Иегова* сас лэнца, и бут мануша патяе и ашэлэ лэ Барэ Хуластирэ ученикоря.
22 Пала када уӷангля о ӷурто андо Иерусалимо, и тоди андэ Антио́хия бишалдэ лэ Варнавас.
23 Кала во авеля и додиқля, сар о Дэл блаӷословисардя лэ учениконэн, во фартэ залошайля. Во подритярэлас лэн и ԥэнэнас лэнди тэ на парашэн всаворэ́ одеса тэ терэн лэ Барэ Хуластири дила.
24 О Варна́ва сас лашо мануш, фартэ верущё, и лэстэ сас о свынто зор. И андо Баро Хулай патяе бут мануша.
25 Посли када о Варна́ва жыля андо Та́рсо, кай тэ виарақэл лэ Савлос,
26 и, кала виарақля, андя лэс андэ Антио́хия. Цыло бэрш вонэ сас андо ӷурто и сытярэнас бутэн. Котэ, андэ Антио́хия, лэ Дэвлэсти сас уӷодно, кай пэ ученикоря пэрво разо тэ ԥэнэн христиа́норя.
27 Андэ кодэя время андэ Антио́хия авелэ лэ Дэвлэстирэ особи мануша анда Иерусалимо.
28 Ек анда кадэла особи мануша, савэс ақарэнас Ага́во, через о свынто зор ԥэндя, кай ӥто па вся ԥув авэла баро боқалимос. Кадя и тердяпэ, кала правияс о Кла́вдиё.
29 Тоди и ученикоря закамлэ тэ поможын лэ ԥралэнди андэ Иуде́я, ко соса моӷ.
30 Вонэ кадя и стердэ, кала бишалдэ вся лэ барэдэрэ ԥралэнди через о Варна́ва и через о Са́вло.
