Дила 27:1-44
27 Кала прилинэ решэния, кай амэ отплывисарас андэ Ита́лия, лэ Павлос и инке дэсавэ барунарен пэрэдинэ лэ Юлиёсти, саво сас баро халавдо андэ лэ правителёско отрядо.
2 Амэ бэшлям по кораблё анда Адрами́то, саво трэбуй сас тэ плывий каринг и фороря андэ Азия*, и лаглям андо дром. Амэнца сас о Ариста́рхо, македо́нцо анда Фесало́ники.
3 Пэ авэр дес амэ авелям андо Сидо́но. О Ю́лиё драго обжаласпэ лэ Павлоса и мэкля лэс тэ жал каринг и друӷоря, кай вонэ тэ позаботинпэ пала лэстэ.
4 Кала амэ вилаглям котар, амэ проплывисардям найдур лэ Кипростирэ береӷостар, кай тэ фэрисавас ла балвалятар, сави ԥурдэлас пар мэндэ.
5 Потом амэ пролаглям па машкар моря мимо Килики́я и Памфи́лия и авелям андэ Ми́ры, сави андэ Ли́кия.
6 Котэ о баро халавдо виарақля кораблё анда Александри́я, саво жалас андэ Ита́лия, и стодя амэн пэр лэстэ.
7 Амэ полокорэс плывисарасас бут деса и еле долаглям каринг о Кни́до. И балвал на дэлас амэнди тэ ладас андэ кодэя риг, андэ сави сас трэбуй, важ када амэ плывисарасас найдур лэ Критостирэ береӷостар мимо Салмо́на, кай тэ фэрисавас ла балвалятар.
8 Амэ ритярдювасас май пашэ каринг о береӷо, и стодям бут зор, кай тэ доладас жы каринг о ҭан, пэ саво ԥэнэн Лащи стоянка, када паша форо Ласе́я.
9 Амэ хасардям бут время, и тэ плывисарас па моря акана сас опасно, дажэ о посто важ о Примирительно дес* прожыля. Важ када о Павло ԥэндя:
10 «Мэ диқав, кай када авэла фартэ опасно най кати важ о ӷрузо и важ о кораблё, но и важ амари жызня».
11 Но о баро халавдо приашунделя каринг о капитано, каско сас о кораблё, ай най каринг о Павло.
12 Кодэя стоянка важ и кораблёря на поджалас, кай котэ тэ винтярас о ӥвэн, важ када май бут мануша ԥэнэнас тэ плывисарас май дур, кай, если вижала, тэ винтярас о ӥвэн андо Фи́нико. Каринг кадэя стоянка важ и кораблёря, сави сас по Кри́то, можно сас тэ потплывисарас па северо-востоко и па юӷо-востоко.
13 Кала ля тэ ԥурдэл и южно балвалёры, вонэ гиндосардэ, кай смоӷут тэ доладэн жы каринг кодэя стоянка, вазглэ о якарё и плывисардэ паша Кри́то, найдур лэ береӷостар.
14 Но ӥто пар мэндэ дя бари балвал, пэ сави ԥэнэн евракило́но*.
15 О кораблё ля тэ ԥиравэл па паи, и тэ уритярэн лэс против балвал ужэ сас най па зор. Важ када амэ парашэлям варисо тэ терас, и амэн ля тэ андярэл и балвал.
16 Дажэ кала амэ плывисардям найдур лэ береӷостар паша найбаро острово Ка́вда, амэ еле спасысардям лэ кораблёстири лодка.
17 Ла вазглэ по кораблё, ай потом линэ тэ оԥандэн дурянца о кораблё, кай во тэ авэл састо. И морякоря даранас, кай тэ на бэшэн по чишай андо Си́рто, важ када вонэ змэклэ о парусо, и май дур амэн ля тэ андярэл и балвал.
18 Важ кода, кай и балвал фартэ шувидэлас амаро кораблё, пэ авэр дес и морякоря линэ тэ вишон андо паи о ӷрузо.
19 Ай по трито дес вонэ вишутэ и снасти па кораблё.
20 Бут деса на дицолас о қам и черӷая, и буря на улэласпэ, и здэласпэ, кай нинай нисави надия, кай амэ спасысаваса.
21 О миро дэлмут нисо на халя. Тоди о Павло ущеля и ԥэндя лэнди: «Если тумэ тэ приашунделоп каринг мэрно совето и тэ на улаглоп анда Кри́то, тоди на попэлиноп андэ кадэя бида и на авелоп кацаво убытко.
22 Акана мангав тумэн тэ на умэкэн и вас, важ кода кай нико на хындёла, тасола кати о кораблё.
23 Андэ кадэя рят о Дэл, савэсти мэ тэлював и савэстири дила терав, бишалдя каринг мандэ анӷелос.
24 Во терделя паша мандэ и ԥэндя: „На́ дар, Павло. Ту трэбуй тэ тердёс англа ӷлавно римско правителё, и важ тутэ о Дэл спасыя всаворэн, ко плывий туса“.
25 Важ када на умэкэн и вас! Мэ патяв лэ Дэвлэсти, и ӷанав, кай вся авэла кадя, сар манди сас ԥэндо.
26 Амаро кораблё бэшэла андо чишай паша варисаво острово».
27 Сас 14-то рят, ай амэн всаек ԥиравэлас па А́дрия*. Андэ епаш рят и морякоря полинэ, кай амэ ашас май пашэ каринг о береӷо.
28 Вонэ измерисардэ и ӷлыбина, и лэндэ вижыля варикай 36 метроря*. Ӷэт май интя вонэ инке еқвар измерисардэ и ӷлыбина, и лэндэ вижыля ужэ варикай 27 метроря*.
29 Вонэ даранас, кай о кораблё дэла пэ скалы, и важ када шутэ палал па кораблё штар якарёря и линэ фартэ тэ аштярэн, кала залэлапэ о дес.
30 И морякоря камлэ тэ занашэн па кораблё, вонэ линэ тэ змэкэн и лодка и терэнас муй, кай камэнас англал па кораблё тэ шон о якарё.
31 Тоди о Павло ԥэндя лэ барэ халавдэсти и аврэ халавдэнди: «Если кадэла мануша занашэна па кораблё, тумэ на спасынапэ».
32 И халавдэ сразу жэ отшындэ и дуря, и лодка пэля андэ моря.
33 Англа тэсара о Павло ля тэ заставий всаворэн тэ хан: «Акэ ужэ 14-то дес тумэ дараса аштярэн, со авэла, и нисо на хан.
34 Мангав тумэн, важ тумари жэ блаӷополучия, хан варисо. Ни кастэ андар тумэндэ дажэ ни ек бал на пэрэла па шэро».
35 Посли кадэла алава во ля о марно, поблаӷодарисардя англа всаворэ лэ Дэвлэс, росԥагля кадэва марно и ля тэ хал.
36 Тоди всаворэ оджунделэ и тожэ линэ тэ хан.
37 (Всево по кораблё сас 276 мануша.)
38 Всаворэ чалелэ и линэ тэ вишон андэ моря и пшэница, кай тэ ашэл май вушэро о кораблё.
39 Кала ашэля свитло, вонэ додиқлэ ԥув, но на ӷанэнас, со за када ԥув, ай кадяжэ додиқлэ о береӷо анда чишай и закамлэ тэ потплывин каринг лэстэ.
40 Вонэ отшындэ и якарёря и ашадэ лэн андэ моря, вонэ помэклэ и дуря, савэ ритярэнас и рулеви вёсла, вазглэ о англуно парусо и линэ о дром каринг о береӷо.
41 О кораблё дя по найбаро острово анда чишай и бэшля: о нак заӷанаделя андо чишай, ай о палуй линэ тэ розмарэн и волны.
42 Тоди и халавдэ закамлэ тэ умарэн лэ барунарен, кай нико тэ на занашэл.
43 Но о баро халавдо камля тэ спасый лэ Павлос и на дя лэнди када тэ стерэн. Во ԥэндя кодэлэнди, ко ӷанэнас тэ плавуий, пэрви тэ хукэн андо паи и тэ плывин каринг о береӷо,
44 ай аврэнди тэ плывин пала лэндэ пэ доски и пэ авэр, со ашэлапэ лэ кораблёстар. Кадя всаворэ блаӷополучно доплывисардэ жы каринг о береӷо.
Сноски
^ Или «осенё посто».
^ Када северо-восточно балвал.
^ Андэ А́дрия ужалас Адрятическо и Яническо моря, ай кадяжэ часть анда Средиземно моря, сави машкар Сицылия и Крито.
