Дила 5:1-42
5 Ек мануш, савэс ақарэнас Ана́ния, вместе пэстиря хулаяса ла Сапфираса тожэ жыля и битиндя и мал.
2 Во андя лэ апосталонэнди най всаворэ ловэ, савэ вонэ линэ, ай кода, со ашэляпэ, во доԥэнделя ла хулаяса тэ гаравэл.
3 Но о Пётро ԥэндя лэсти: «Ана́ния, сар ту домэклян, кай о Сатана тэ шол тути о гиндо тэ хохавэс лэ свынтонэ зорэсти и тэ угаравэс дэсавэ ловэ, савэ тумэ линэ важ и мал?
4 Хэба кадэя мал сас най тири? И кала ту ла битиндян, хэба не моӷ ту тэ потратис кадэла ловэ сар камэс? Состэ ту загиндосардян кацави дила? Ту хохадян най лэ манушэнди, ай лэ Дэвлэсти».
5 Кала о Ана́ния ашундя кадэла алава, во пэля пэ ԥув и муля. Всаворэн, ко када уӷангля, шутя андэ дар.
6 Тоди поджылэ и тэрнэ мануша, замотысардэ и тила андэ кирпа, виандярдэ и притидэ́.
7 Варикай через три часа авеля лэстири хулаи, но вой на ӷанэнас, со тердяпэ.
8 О Пётро пушля латар: «Ԥэн манди, тумэ битиндэ и мал важ кацави-то цэмин?» Вой ԥэндя: «Да, важ кацави».
9 Тоди о Пётро ԥэндя лати: «Тумэ со, сԥэнделэ тэ заставин лэ Иеговас* тэ сыкавэл пэско зор? Ашунэс, сар зажан кодэла, ко притидя тирэ хулас? Вонэ и тут виандярэна».
10 Вой сразу жэ пэля паша лэстирэ пэрнэ и муля. Кала и тэрнэ мануша зажылэ и додиқлэ, кай вой муля, вонэ виандярдэ ла и притидэ́ паша лако хулай.
11 Тоди лэ учениконэн и всаворэн, ко када ашундя, шутя андэ дар.
12 И апосталоря терэнас машкар о миро бут удивительно дила и чудеса. Всаворэ вонэ стидэнаспэ вместе андэ лэ Саламоностири веранда*.
13 Авэр даранас тэ авэн вместе лэнца, но о миро драго дэлас дума пала лэндэ.
14 Кодэлэн, ко патяя андо Баро Хулай и ашэля ученико, ашэлас май бут и май бут, сар лэ муршэн, кадя и лэ жувлян.
15 О миро виандярэлас лэ насвалэн пэ ӷлавни вулицы и столас лэн пэ носилки и пэ паринда, важ кода кай надеияспэ, кай хоть лэ Петростири тень, кала во прожал мимо, тэ пэрэл пэр лэндэ.
16 Кадяжэ андо Иерусалимо авэлас бут миро анда пашутнэ фороря. Вонэ анэнас лэ насвалэн и кодэлэн, кас мучинас и найвужэ, и всаворэ исцэлинаспэ.
17 О ӷлавно рашай и лэстирэ мануша анда садукеёря* завидуинас лэ апосталонэнди
18 и важ када астардэ лэн и шутэ андо форицко баруно.
19 Но и рят лэ Иеговаско анӷело ԥэрнадя и вудара андо баруно, виандярдя лэн и ԥэндя:
20 «Жан андэ қандири и на́ парашэн тэ ԥэнэн лэ мирости пала жызня, сави авэла англэ».
21 Вонэ стердэ кадя, сар ԥэндя лэнди о анӷело, и рано тэсара авелэ андэ қандири и линэ котэ тэ сытярэн.
Кала о ӷлавно рашай и лэстирэ мануша стидэ́пэ вместе, вонэ стидэ́ о Ӷлавно иудейско сындо* и лэ Израилёстирэ барэдэрэн и бишалдэ лэ сторожонэн андо баруно пала апосталоря.
22 Но кала и сторожоря авелэ андо баруно, вонэ додиқлэ, кай лэ апосталонэн котэ нинай, и кала рисайлэ, ԥэндэ:
23 «Кала амэ авелям, о баруно сас драго заԥандадо и паша вудара тердёнас и сторожоря. Но, кала амэ ԥэрнадям и вудара, амэ никас котэ на виарақлям».
24 Кала ла қандиряко барэдэр и барэ рашая ашундэ лэндирэ алава, вонэ нисо нащи полэнас и на ӷанэнас, со тэ терэн.
25 Андэ кодэя время авеля ек мануш и ԥэндя лэнди: «И мануша, савэн тумэ бэшардэ, тердён андэ қандири и сытярэн лэ народос».
26 Тоди о барэдэр и сторожоря жылэ и андэ́ лэ апосталонэн, но вонэ на стердэ када нахально, важ кода кай пережывали, кай о народо помарэла лэн барэнца.
27 Лэ апосталонэн андэ́ и стодэ англа Ӷлавно иудейско сындо*. О ӷлавно рашай ля тэ допушэл лэн
28 и ԥэндя: «Амэ строӷо приԥэндям тумэнди тэ на сытярэн кадэлэ манушэстирэ алавэстар! И со, тумэ па вся о Иерусалимо сытярэн кадэлэсти и камэн амэн тэ дошалярэн андэ кадэлэ манушэстири смэрть».
29 Пэ када о Пётро и авэр апосталоря ԥэндэ: «Амэ трэбуй тэ кандас* лэ Дэвлэс, ай най лэ манушэн.
30 Амарэ ԥурэнго Дэл жундярдя лэ Исусос, савэс тумэ умардэ, кала казнисардэ по столбо*.
31 О Дэл вазгля лэс, кала стодя справа пэстар. Во дя лэсти зор тэ дэл и жызня и тэ спасый, кай о Израилё тэ каийпэ и кай тэ простийпэ лэско бэзэх.
32 И када доԥэнас амэ и о свынто зор, саво о Дэл дя кодэлэнди, ко лэс кандэл*».
33 Кала вонэ ашундэ када, лэн фартэ ля и холи, и вонэ закамлэ лэн тэ умарэн.
34 Но тоди ущеля ек фарисеё, савэс ақарэнас Гамали́ло. Во сас законико, пэ саво столас патив вся о народо, и во приԥэндя найпэдолӷонэстэ тэ виандярэн лэ апосталонэн.
35 Посли када во ԥэндя: «Израильтяноря, драго погиндон англа кода, сар варисо тэ терэн кадэлэ манушэнца.
36 Найдэлмут появисайля ек мануш, савэс ақарэнас Фе́вда. Во ԥэнэнас пэр пэстэ, кай во ашунгло, и варикай 400 мануша линэ тэ ԥирэн лэса. Но лэс умардэ, и всаворэ лэстирэ ученикоря порознашлэпэ и хасарделэ.
37 Посли лэстэ, кала жалас перепись, появисайля о Ю́да анда Галиле́я и зацырдя дэсавэн пала пэстэ. Но во тожэ хынделя, и всаворэ лэстирэ ученикоря порознашлэпэ.
38 И акэ ԥэнав тумэнди: ашавэн кадэлэ манушэн, на́ ӷулен лэндэ. Важ кода кай если кадэва гиндо или дила лэ манушэндар, тоди када на уприя,
39 ай если лэ Дэвлэстар, тумэндэ на вижала када тэ тердярэн. А то можэт тэ авэл кадя, кай тумэ жан против о Дэл».
40 Всаворэ приашунделэ каринг лэстирэ алава. Кала ақардэ лэ апосталонэн, вонэ мардэ* лэн, приԥэндэ лэнди будэр тэ на дэн дума лэ Исусостирэ алавэстар и одмэклэ.
41 Кала и апосталоря ужылэтар анда сындо*, вонэ радуинаспэ, важ кода кай лэнди випэля кацави бах, кай лэн лажавардэ важ лэ Исусоско алав.
42 И кажно дес андэ қандири и па цэра вонэ на парашэнас тэ сытярэн и тэ росԥэнэн и лащи новость пала кода, кай о Исусо — када Христос.
Сноски
^ Када сас лунго веранда барэ столбонэнца.
^ Или «анда лэ садукеёнэндири секта».
^ Ворта «о Синедрёно».
^ Ворта «Синедрёно».
^ Или «тэ кандас сар правителёс».
^ Ворта «амбладэ пэ витка».
^ Или «кандэл сар правителёс».
^ Или «зашындэ лозынкэнца».
^ Ворта «Синедрёно».
