Иоано 17:1-26
17 Посли кадэла алава о Исусо диқля по небо и ԥэндя: «Дадэ, поджыля и время. Мэк тиро шаво ашэл ашунгло*, кай через о шаво ту тэ ашэс ашунгло.
2 Мэк о шаво ашэл ашунгло, важ кода кай ту ужэ дян лэсти право тэ хулаий пэ всаворэ мануша, кай во тэ подарий и вечно жызня всаворэнди, кас ту отдян лэсти.
3 Ко камэл тэ жувэл вечно, трэбуй тэ уӷанэн* пала тутэ — пала ек чачуно Дэл и тэ уӷанэн пала Исусо Христос, савэс ту бишалдян.
4 Через мандэ ту ашэлян инке май ашунгло* пэ ԥув, кала мэ достердэм и дила, сави ту манди дян.
5 И акана, Дадэ, стер кадя, кай мэ тэ ашав ашунгло: домэк ман тэ авав паша тутэ и дэ манди кодэва ашунгло алав, саво мандэ сас, кала мэ сымас паша тутэ инке жы каринг кода, сар появисайля о миро.
6 Мэ дэм тэ ӷанэн тиро алав* лэ манушэнди, савэн ту лян анда кадэя люма и дян манди. Вонэ прижанас тути, и ту дян лэн манди, и вонэ приритярдён тирэ алавэнди.
7 Акана вонэ ӷанэн: вся, со ту дян манди, — тутар,
8 важ кода кай мэ пэрэдэм лэнди и алава, савэ ту манди ԥэндян, и вонэ приашунделэ каринг лэндэ. Вонэ патяе, кай мэ авелэм тутар и кай ту бишалдян ман.
9 Мэ мангав пала лэндэ. Мангав най пала вся и люма, ай пала кодэла, кас ту манди дян, важ кода кай вонэ прижан тути,
10 и вся, со прижал манди, — прижал тути, и со прижал тути — прижал манди, и мэ ашэлэм ашунгло машкар лэндэ.
11 Вонэ находинпэ андэ люма, ай мэ ужэ най, важ кода кай мэ жав каринг тутэ. Фэрисар лэн, Свынто Дад, важ тиро алав, саво ту манди дян, кай вонэ тэ авэн ек пала ек, сар и амэ ек пала ек.
12 Кала мэ сымас лэнца, мэ фэрисаравас лэн важ тиро алав, саво ту манди дян. Мэ диқавас пала лэндэ, и нико андар лэндэ на хынделя — кати ек пропащё мануш*, кай тэ ашэл кадя, сар пистромэ андэ Свынти Лила.
13 Но акана мэ жав каринг тутэ и ԥэнав вся када, пока мэ инке андэ люма, кай вонэ па чачимастэ тэ лошавэн кадя жэ, сар лошавав мэ.
14 Мэ росԥэндэм* лэнди о алав* тутар, и о миро* завэрыцысардя лэн, важ кода кай вонэ на прижан кадэла люмати, сар и мэ на прижав кадэла люмати*.
15 Мэ на мангав тут тэ залэс лэн анда люма, но мангав тэ фэрис лэн лэ Бэнгэстар*.
16 Вонэ на прижан кадэла люмати, сар и мэ на прижав кадэла люмати*.
17 Мэк вонэ ашэн свынти* через о чачимос. О алав тутар — када чачимос.
18 Сар ту бишалдян ман андэ люма, кадя и мэ бишалдэм лэн андэ люма.
19 Мэ ашавпэ свынто важ лэндэ, кай и вонэ тэ ашэн свынти через о чачимос.
20 Мэ мангав най кати важ лэндэ, но и важ кодэла, ко патяла андэр мандэ, кала ашунэна, со вонэ росԥэнэн.
21 Сар тутэ, Дадэ, ек гиндо манца и мандэ ек гиндо туса, кадя мэк всаворэ вонэ авэн ек пала ек и мэк лэндэ авэл ек гиндо амэнца. Тоди вся и люма сможэт тэ патял, кай ту бишалдян ман.
22 Акана через мандэ лэндар марэл кодэя бах, сави марэл тутар, кай вонэ тэ авэн ек пала ек, сар и амэ.
23 Мандэ ек гиндо лэнца и тутэ ек гиндо манца, кай и лэндэ вся и время па чачимастэ тэ авэл ек гиндо. Тоди андэ люма ашундёла, кай ту бишалдян ман и любис лэн кадя жэ, сар любис ман.
24 Дадэ, мэ камав, кай кодэла, кас ту манди дян, тэ авэн манца котэ, кай мэ. Кадяжэ камав, кай вонэ тэ диқэн, сави бах марэл мандар через тутэ, важ кода кай ту любисас ман, сар инке на сас создано о миро.
25 Справедливо Дад, андэ люма ту на ашундёс, ай мэ ӷанав тут, и вонэ ӷанэн, кай ту бишалдян ман.
26 Мэ росԥэндэм лэнди пала тиро алав и инке май бут лава тэ росԥэнав пала лэстэ, кай вонэ тэ любин аврэн кадя жэ, сар ту любис ман, и кай мандэ тэ авэл ек гиндо лэнца».
Сноски
^ Или «стер кадя, кай тиро шаво тэ ашэл ашунгло».
^ Или «тэ на парашэл тэ уӷанэн».
^ Или «мэ стердэм, кай ту тэ ашундёс».
^ Или «через мандэ ля тэ ашундёл тиро алав».
^ Или «лэ мэримаско шаво».
^ Или «пэрэдэм».
^ Или «о чачимос».
^ Или «и люма».
^ Или «вонэ най кадэла люматирэ мануша, сар и мэ най кадэла люмако».
^ Ворта «лэ найлашэстар».
^ Или «вонэ най кадэла люматирэ мануша, сар и мэ най кадэла люмако».
^ Или «отделисар лэн важ пэстэ».
