Иоано 3:1-36
3 Машкар фарисеёря сас мануш, савэс ақарэнас Никади́мо, во сас ек анда иудейски барэдэра.
2 Еқвар и рят во авеля каринг о Исусо и ԥэндя лэсти: «Учителё*, амэ ӷанас, кай ту учителё, савэс бишалдя о Дэл. Нико не можэт тэ терэл чудеса*, савэ терэс ту, если лэса нинай лэ Дэвлэс».
3 Пэ када о Исусо ԥэндя лэсти: «Патя манди: кодэва, ко на арақадёла упалэ*, не сможэт тэ диқэл лэ Дэвлэско Царство».
4 О Никади́мо пушля лэстар: «Сар о мануш можэт тэ арақадёл, если во ԥуро? Хэба во можэт упалэ тэ попэрэл андо ело кай пэстири дэй и тэ авэл пэ люма?»
5 О Исусо ԥэндя: «Патя: кодэва, ко на болдёла андо паи и касти на авэла дино о свынто зор*, не сможэт тэ попэрэл андэ лэ Дэвлэско Царство.
6 Ла тилатар арақадёл лэ манушэско бэято, ай лэ свынтонэ зорэстар арақадёл лэ Дэвлэско бэято.
7 Мэ ԥэндэм: „Тумэ трэбуй тэ арақадён упалэ“, но ту на́ удивисав кадэлэсти.
8 И балвал ԥурдэл, каринг камэл. Ту ашунэс латар шумо, но на ӷанэс, катар вой ԥурдэл и каринг. Кадя и кодэлэнца, ко арақаделя лэ свынтонэ зорэстар».
9 О Никади́мо пушля лэ Исусостар: «Сар када можэт тэ авэл?»
10 Во ԥэндя: «Ту учителё андо Израилё и на ӷанэс када?
11 Патя манди: амэ дас дума пала кода, со ӷанас, и потвердисарас кода, со диқлям. Ай тумэ на приашундён каринг амарэ алава.
12 Если тумэ на патян, кала мэ ԥэнав тумэнди пала кода, со пэ ԥув, тоди сар тумэ патяна, если ԥэнава пала кода, со по небо?
13 Нико анда мануша на сас* по небо — котэ сас кати лэ манушэско Шаво, саво зжыля па небо.
14 И сар о Маисеё вучес вазгля лэ сапэс андэ пустыня, кадя трэбуй тэ авэл вазгло и лэ манушэско Шаво,
15 кай кажно, ко патял андэр лэстэ, тэ жувэл вечно*.
16 О Дэл фартэ любий лэ мирос* и важ када отдя пэстирэ особенонэ Шавэс, кай кажно, ко патял андэр лэстэ*, тэ на хасарэл и жызня, ай тэ жувэл вечно.
17 О Дэл бишалдя андэ люма пэстирэ Шавэс най важ кода, кай тэ сындой и люма, но кай через лэстэ и люма тэ спасыйпэ.
18 Кодэва, ко патял андо Шаво, на авэла сындосардо. Ай кодэва, ко на патял, ужэ сындосардо, важ кода кай на патяя андэ лэ Дэвлэско особено шаво*.
19 И акэ васо пэр лэндэ трэбуй тэ авэл сындо: андэ люма авеля о свето, но и мануша полюбисардэ и тэмнота, ай най о свето, важ кода кай терэнас найлашымос.
20 Кодэва, ко терэл найлашымос, вэрыцый о свето и на жал каринг о свето, кай пала лэстири дила нико тэ на уӷанэн.
21 Ай кодэва, ко терэл правильно, жал каринг о свето, кай тэ дицол: лэстири дила зжалпэ кодэлэса, со уӷодно лэ Дэвлэсти».
22 Посли када о Исусо вместе пэстирэ учениконэнца ля тэ ԥирэл па иудейски фороря и гава. Во проандярдя котэ лэнца дэсави время и болдя лэ манушэн.
23 О Иоа́но тожэ болэлас лэ манушэн — андо Ено́но, найдур лэ Салимостар, важ кода кай котэ сас бут паи. О миро авэлас каринг лэстэ и болдёлас
24 (тоди лэс инке на шутэ андо баруно).
25 Лэ Иоаностирэ ученикоря заспорисайлэ еқэ иудеёса пала традицыя важ о вужымос.
26 И ученикоря авелэ каринг о Иоа́но и ԥэндэ лэсти: «Учителё*, кодэва, ко сас туса пала Ярда́но и пала кастэ ту росԥэнэсас, болэл лэ мирос, и всаворэ жан каринг лэстэ».
27 Тоди о Иоа́но ԥэндя лэнди: «Лэ манушэстэ исин кати кода, со сас дино лэсти па небо.
28 Тумэ екжэнэ можэте тэ потвердин, кай мэ ԥэндэм: „Мэ най Христос, ман бишалдэ май англал лэстар“.
29 И тэрни прижал лэ тэрнэсти. Ай о дружко фартэ радуийпэ, кала тердёл паша тэрно и ашунэл лэско ӷолосо. Кадя и мэрно ди фартэ лошавэл.
30 О Христос трэбуй тэ ашэл май баро, ай мэ — май цыкно».
31 Ко авэл упрал — май баро всаворэндар. Кодэва, ко ла ԥувьятар, ԥэнэн пала кода, со пэ ԥув, важ кода кай появисайля ла ԥувьятар. Ко авэл па небо — май баро всаворэндар.
32 Во потвердий* кода, со диқля и ашундя, но каринг лэстирэ алава нико на приашундёл.
33 Ай кодэва, ко приашундёл каринг лэстирэ алава, потвердий*, кай о Дэл чачуно.
34 Кодэва, кас бишалдя о Дэл, ԥэнэн алава лэ Дэвлэстар, важ кода кай о Дэл найчорымастирэ одеса дэл о свынто зор.
35 О Дад любий лэ Шавэс и отдя вся андэ лэстирэ вас.
36 Кодэлэсти, ко патял андо Шаво, дорэсэлапэ вечно жызня. Ай кодэва, ко на кандэл лэ Шавэс, на диқэла жызня. О Дэл лэла тэ холявэл пэр лэстэ.
Сноски
^ Ворта «рави́».
^ Или «удивительно дила».
^ Или, можэт, «упрал».
^ Ворта «на арақадёла лэ паестар и лэ свынтонэ зорэстар».
^ Ворта «на вазгляпэ».
^ Или «лэсти тэ дорэсэлпэ и вечно жызня».
^ Или «и люма».
^ Или «сыкавэл пэ дила, кай патял».
^ Ворта «андэ лэ Дэвлэстирэ особенонэ шавэско алав».
^ Ворта «рави́».
^ Или «сар свидетелё потвердий».
^ Ворта «стодя печать».
