Матфеё 12:1-50
-
О Исусо — Хулай пэ субота (1—8)
-
О Исусо исцэлий лэ манушэс, савэстэ шуко вас (9—14)
-
Помошнико, саво уӷодно лэ Дэвлэсти (15—21)
-
О Исусо видаравэл лэ найвужэн лэ свынтонэ зорэса (22—30)
-
Бэзэх, саво на простийпэ (31, 32)
-
«И витка ӷатярэн па кода, со пэр латэ барёл» (33—37)
-
Лэ Ёнастири чуда (38—42)
-
Кала о найвужо рийпэ (43—45)
-
Лэ Исусостири дэй и ԥрала (46—50)
12 Еқвар в суботу о Исусо жалас па лэ марнэстирэ маля. Лэстирэ ученикоря пробоқайлэ и линэ тэ сшынэн и пшэница и тэ хан.
2 Кала и фарисеёря додиқлэ када, вонэ ԥэндэ лэсти: «Дик! Тирэ ученикоря терэн кода, со нащи тэ терэн в суботу».
3 Во ԥэндя лэнди: «Хэба тумэ на адиносардэ, со стердя о Давидо, кала во и лэстирэ мануша пробоқайлэ?
4 Во зажыля андэ лэ Дэвлэско цэр, и вонэ халэ о свынто марно*, саво нащи сас тэ хан ни лэсти, ни лэстирэ манушэнди, ай кати лэ рашанди.
5 И хэба тумэ на адиносардэ андо законо, кай в суботу и рашая андэ қандири ԥагэн о законо, и пэр лэндэ на пэрэл нисави дош?
6 Но ԥэнав тумэнди: катэ кодэва, ко май баро, чем и қандири.
7 Но, тэ полиноп тумэ, со када „Мэ камав, кай тумэ тэ авэн одялэ, ай най тэ анэн и жэртвы“, тоди на сындосардоп лэ найдошалэн.
8 Важ кода кай лэ манушэско Шаво — Хулай пэ субота».
9 Во ужыля котар и авеля андэ синагога.
10 Котэ сас ек мануш шукэ вастэса*. Лэ Исусостар пушлэ: «Можно тэ исцэлис в суботу?» Ай пушлэ пала када, кай тэ авэл, важ со тэ дошалярэн лэс.
11 Во ԥэндя: «Тэ авелоп тумэндэ ек бакро и в суботу во тэ пэлиноп андэ яма, хэба тумэ на вилиноп лэс котар?
12 Пэскати жэ о мануш май куч лэ бакрэстар! Важ када тэ терэн лашымос в суботу — када правильно».
13 Тоди во ԥэндя кодэлэ манушэсти: «Процырдэ о вас». Кодэва мануш процырдя, и о вас ашэля кацаво жэ зорало, сар и авэр.
14 Ай и фарисеёря вижылэ и сԥэнделэ тэ умарэн лэ Исусос.
15 Кала о Исусо уӷангля пала када, во ужыля котар. Бут миро жыля пала лэстэ, и во всаворэн исцэлисардя,
16 но строӷо запретисардя лэнди тэ росԥэнэн пала лэстэ.
17 Кадя ашэля, сар ԥэндя лэ Дэвлэско особо мануш о Иса́я:
18 «Када мэрно помошнико*, савэс мэ витидэм важ особо дила, кодэва, кас мэ любисарав и ко уӷодно манди! Мэ дава лэсти мэрно зор, и во поможыя лэ мирости тэ полэл, со па чачимастэ справедливо.
19 Во на лэла тэ спорийпэ и тэ цыпий, и нико на ашунэла лэско ӷолосо пэ ӷлавни вулицы.
20 Во на ԥагэла и сани чар, сави почти вишутеля, и на мударэла и ягоры, сави еле ԥабол*, пока на домардёла, кай тэ авэл справедливо.
21 И пэр лэстэ* лэна тэ надеинпэ и народоря».
22 Еқвар каринг о Исусо андэ́ лэ манушэс, саво сас коро и муто и андэ саво сас и найвужэ. О Исусо исцэлисардя лэс, и во задя дума и ля тэ диқэл.
23 Всаворэ мануша фартэ удивисайлэ и линэ тэ ԥэнэн: «Можэт, во и исин лэ Давидоско Шаво?»
24 Кала и фарисеёря ашундэ када, вонэ ԥэндэ: «Во видаравэл лэ найвужэн нисар па аврятэ, сар кати лэ Сатанастирэ* зорэса, саво лэ найвужэнго правителё».
25 О Исусо ӷанэнас, пала со вонэ гиндон, и важ када ԥэндя лэнди: «Любо страна*, андэ сави и мануша вороӷуин ек еқэса, авэла розмарди, нисаво форо или цэр, андэ саво и мануша вороӷуин ек еқэса, на уприя.
26 Точно кадя жэ если о Сатана видаравэл лэ Сатанас, тоди во вороӷуий корко пэса. Сар жэ тоди уприя лэско царство?
27 И если мэ видаравав лэ найвужэн лэ Сатанастирэ* зорэса, тоди кастирэ зорэса лэн видаравэн тумарэ ученикоря? Акэ вонэ и авэна тумарэ сындомаря.
28 Если жэ мэ видаравав лэ найвужэн лэ Дэвлэстирэ зорэса, вижал, лэ Дэвлэско Царство авеля, ай тумэ када на полинэ.
29 Сможэт варико тэ опчорэл лэ зоралэ манушэско цэр, если спэрва на сԥандэла лэс? Кати тоди лэстэ вижала тэ опчорэл лэско цэр.
30 Ко най манца, во против мандэ, и ко на стидэл манца, во росшол*.
31 Важ када ԥэнав тумэнди: любо бэзэх и найпативали дума простияпэ лэ манушэнди, но и найпативали дума пала лэ Дэвлэско зор на простияпэ.
32 Кодэва, ко ԥэнэна варисо против лэ манушэско Шаво, авэла простисардо, но кодэва, ко лэла тэ дэл дума против о свынто зор, никала* на авэла простисардо.
33 Если тумари витка лащи, тоди пэр латэ вибарён лашэ фрукты, ай если терни, тоди пэр латэ вибарён тернэ фрукты. Важ кода кай и витка ӷатярэн па кода, со пэр латэ барёл.
34 Лэ сапэндирэ* бэяцэ, сар тумэ можэте тэ ԥэнэн варисо лашо, если тумэ вэрыти*? Вижал, со кай о мануш андо ди, пала кода во и дэл дума.
35 О лашо мануш гаравэл андэ пэско ди лашымос, и лэстар жал о лашымос, ай о вэрыто мануш гаравэл андэ пэско ди вэрытимос, и лэстар жал о вэрытимос.
36 Ԥэнав тумэнди, кай андо Дес важ о сындо о Дэл спушэла лэ манушэндар важ кажно алав, саво вонэ ԥэндэ евья.
37 Важ кода кай важ тирэ алава тут прижанэна найдошалэса и важ тирэ алава тут сындона».
38 Тоди дэсавэ законикоря и фарисеёря ԥэндэ лэсти: «Учителё, амэ камас, кай ту тэ сыкавэс амэнди варисави чуда».
39 Во ԥэндя лэнди: «Кадэла времяко миро, саво найлашо и найкандино лэ Дэвлэсти, вся и время мангэл чуда, но во на диқэла нисави чуда, ай кати кода, со тердяпэ лэ Дэвлэстирэ особонэ манушэса лэ Ёнаса.
40 Сар о Ёна сас кай о баро мащё андо ело трин дес*, кадя и лэ манушэско Шаво авэла андэ ԥув трин дес*.
41 Кала авэла время важ о сындо, вместе кадэла времятирэ мироса жундёна и ниневитя́норя и сындона лэс, важ кода кай вонэ каисайлэ, кала ашундэ кода, со росԥэнэнас о Ёна. Но катэ кодэва, ко май баро, чем о Ёна.
42 Кала авэла время важ о сындо, вместе кадэла времятирэ мироса жундёла и южно царица и сындоя лэс, важ кода кай вой дурал авеля, кай тэ ашунэл лэ Саламоностири годявэрни дума. Но катэ кодэва, ко май баро, чем о Саламо́но.
43 Кала о найвужо вижал анда мануш, во жал па пустыни и родэл пэсти ҭан, но нисо на арақэл.
44 Тоди во ԥэнэн: „Рисавава андо цэр, катар ужылэмтар“ — и, кала авэл, диқэл, кай андо цэр вишуладо, вурядо и шушо.
45 Тоди во жал арақэл инке семь найвужэн, савэ май вэрыти лэстар. Вонэ зажан андэ кодэва цэр и ашэнпэ котэ тэ жувэн. И лэ манушэсти ашэл инке май вэрыто, чем сас спэрва. Кадя жэ авэла и кадэлэ найлашэ мироса».
46 Кала о Исусо инке дэлас дума лэ народоса, авеля лэстири дэй и лэстирэ ԥрала. Вонэ тердёнас аврял и камэнас лэса тэ подэн дума.
47 Ек мануш ԥэндя лэсти: «Котэ аврял тердёл тири дэй и тирэ ԥрала. Вонэ камэн тэ подэн дума туса».
48 Тоди во пушля кодэлэ манушэстар: «Ко мэрни дэй и ко мэрнэ ԥрала?»
49 И, кала сыкадя лэ вастэса пэ пэстирэ ученикоря, во ԥэндя: «Акэ мэрни дэй и мэрнэ ԥрала!
50 Ко терэл кода, со уӷодно мэрнэ небеснонэ Дадэсти, кодэва манди и ԥрал, и ԥэй, и дэй».
Сноски
^ Или «о марно андэ жэртва».
^ Или «савэстэ сас парализовано вас».
^ Или «слуӷо».
^ Или «о фитилё, саво клыийпэ».
^ Ворта «пэ лэско алав».
^ Ворта «лэ Вельзевулостирэ».
^ Или «царство, андэ саво».
^ Ворта «лэ Вельзевулостирэ».
^ Или «ко на стидэл манца лэ манушэн, во видаравэл лэн».
^ Или «ни акана, ни англэ».
^ Ворта «лэ ӷадюконэндирэ».
^ Или «тумэндэ неӷожо ди».
^ Или «трин деса и трин рятя».
^ Или «трин дес и трин рятя».
