Матфеё 20:1-34
20 О небесно Царство шолпэ по хулай, саво вижыля рано тэсара, кай тэ наймий лэ бутярнэн андэ пэско виноӷрадно садо.
2 Кала во доԥэнделя лэнца, кай потинэла ек дина́риё* андо дес, во бишалдя лэн андо виноӷрадно садо.
3 Тэсара в девять часов* во упалэ вижыля и додиқля аврэ манушэн, савэ тердёнас по базаро би бутяко.
4 Во ԥэндя лэнди: „Жан и тумэ андэ мэрно виноӷрадно садо, и мэ потинава тумэнди, со прижал“.
5 И вонэ жылэ. Десэ в 12 часов и в три часа* о хулай упалэ вижыля и стердя кадя жэ.
6 И инке еқвар во вижыля вечером в пять часов* и додиқля аврэ бутярнэн. О хулай пушля лэндар: „Со тумэ тердён катэ вся о дес би бутяко?“
7 Вонэ ԥэндэ: „Амэн нико на наймисардя“. Во ԥэндя лэнди: „Жан и тумэ андэ мэрно виноӷрадно садо“.
8 Вечером о хулай по виноӷрадно садо ԥэндя пэстирэ помошникости: „Ақар лэ бутярнэн и потин лэнди. Залэ тэ потинэс кодэлэндар, ко авеля послиднё, и кадя потин жы каринг и пэрви“.
9 Кала авелэ и мануша, савэ линэ тэ терэн бути вечером в пять часов, кажнонэсти андар лэндэ динэ по ек дина́риё.
10 Важ када и пэрви погиндосардэ, кай лэнди потинэна май бут, но и лэнди динэ по ек дина́риё.
11 Кала вонэ линэ пэстирэ ловэ, вонэ линэ тэ холявэн
12 и тэ ԥэнэн лэ хуласти: „Кадэла послидни тердэ бути кати ек часо, ай ту потиндян лэнди скати жэ, скати и амэнди, хоть амэ вся о дес тердям ԥари бути пэ кацави спэка!“
13 Но во ԥэндя еқэсти андар лэндэ: „Хамэлэс, мэ на обжавпэ туса несправедливо. Ту доԥэнделян манца важ ек дина́риё, хэба най кадя?
14 Лэ кода, со прижал тути, и жа. Ай кодэлэнди, ко авеля послиднё, мэ камав тэ дав скати жэ, скати и тути.
15 Хэба мандэ нинай право тэ терав мэрнэ ловэнца кода, со камав? Или ту холявэс* важ кода, кай мэ ӷотово тэ дав анда ди*?“
16 Кадя и послидни ашэна пэрви, ай и пэрви ашэна послидни».
17 Па дром андо Иерусалимо о Исусо одындярдя 12 учениконэн андэ риг и ԥэндя лэнди:
18 «Амэ жас андо Иерусалимо, и котэ лэ манушэстирэ Шавэс отдэна андэ вас лэ барэ рашанди и лэ закониконэнди. Вонэ виандярэна лэсти смэртно приӷоворо
19 и отдэна лэ манушэнди анда авэр народоря, кай вонэ тэ асанпэ лэстар, тэ марэн лэс чукняса и тэ казнин по столбо. Но по трито дес во жундёла».
20 Посли када каринг о Исусо поджыля лэ Зеведеёстирэ шавэндири дэй вместе лэ шавэнца и бэшля англа лэстэ пэ чанга, кай варисо лэстар тэ мангэл.
21 Во пушля латар: «Со ту камэс?» Вой ԥэндя: «Солаха, кай лэдуй мэрнэ шавэ бэшэна андэ тиро Царство: ек справа тутар, ай авэр слева».
22 О Исусо ԥэндя: «Тумэ на ӷанэн, со мангэн. Можэте тумэ тэ пэн анда стакано, анда саво мэ лава тэ пав?» Вонэ ԥэндэ лэсти: «Да, можэм».
23 Во ԥэндя лэнди: «Чаче, тумэ лэна тэ пэн анда мэрно стакано, но най мэ витидав, ко бэшэла справа мандар и ко слева. Кадэла ҭана прижан кодэлэнди, важ кастэ лэн отделисардя мэрно Дад».
24 Кала авэр дэш ученикоря ашундэ када, вонэ холяйлэ пэ кодэла дуй ԥрала.
25 Но о Исусо подақардя лэн всаворэн каринг пэстэ и ԥэндя: «Тумэ ӷанэн, кай лэ народонэндирэ правителя хулаин пэ мануша и барэ мануша правин пэр лэндэ,
26 ай машкар тумэндэ кадя на трэбуй тэ авэл. Но кодэва, ко камэл тэ авэл машкар тумэндэ баро*, трэбуй тэ авэл тумэнди слуӷо,
27 и кодэва, ко камэл тэ авэл машкар тумэндэ пэрво, трэбуй тэ авэл тумэнди рабо.
28 И лэ манушэско Шаво авеля най важ кода, кай важ лэстэ тэ терэн и дила, ай важ кода, кай во тэ терэл и дила важ авэр и тэ отдэл пэстири жызня сар цэмин пала бут мануша и тэ витинэн лэн».
29 Кала вонэ вижанас анда Ерихо́но, пала лэстэ жалас фартэ бут миро.
30 Ай паша дром бэшэнас дуй корэ мануша. Кала вонэ ашундэ, кай мимо прожал о Исусо, вонэ линэ тэ цыпин: «Баро Хулай, лэ Давидоско Шаво, здик пар мэндэ!»
31 И мануша приԥэнэнас лэнди тэ ашэн мулком, но вонэ цыпинас инке май фартэ: «Баро Хулай, лэ Давидоско Шаво, здик пар мэндэ!»
32 О Исусо притерделя, подақардя лэн и пушля: «Со мэ тэ стерав важ тумэндэ?»
33 Вонэ ԥэндэ лэсти: «Баро Хулай, стер кадя, кай амэ тэ диқас».
34 Лэ Исусости ашэля лэн жалко, и во ляпэ каринг лэндирэ яқа, и тоди и корэ сразу жэ линэ тэ диқэн и жылэ пала лэстэ.
Сноски
^ Ворта «варикай в три часа (сар вижыля о қам)».
^ Ворта «варикай в шэсть часов и в девять часов (сар вижыля о қам)».
^ Ворта «варикай в 11 часов (сар вижыля о қам)».
^ Или «завидуис». Ворта «тири як вэрыто».
^ Ворта «мэрни як лащи».
^ Или «ашунгло».
