Матфеё 4:1-25
4 Потом лэ Дэвлэско зор андярдя лэ Исусос андэ пустыня, и котэ о Бэнг ля тэ подмарэл лэс каринг о бэзэх.
2 О Исусо на халас и на пэлас* 40 деса и 40 рятя и посли када поля, кай фартэ пробоқайля.
3 Тоди о Бэнг, кай тэ подмарэл лэс каринг о бэзэх, поджыля каринг лэстэ и ԥэндя: «Если ту лэ Дэвлэско шаво, ԥэн, кай кадэла бара тэ ашэн марно».
4 Но о Исусо ԥэндя лэсти: «Пистромэ: „Важ и жызня лэ манушэсти трэбуй най кати о марно, но и вся, со ԥэнэн о Иегова*“».
5 Тоди о Бэнг андя лэ Исусос андо Иерусалимо*, стодя лэс по само вучо ҭан андэ қандири
6 и ԥэндя лэсти: «Если ту лэ Дэвлэско шаво, схук тэлэ, важ кода кай пистромэ: „Во ԥэнэна пэстирэ анӷелонэнди“ и „вонэ андярэна тут пэ вас, кай ту тэ на дэспэдап*“».
7 О Исусо ԥэндя лэсти: «Кадяжэ пистромэ: „На́ заставин тумарэ Дэвлэс лэ Иеговас* тэ сыкавэл пэско зор*“».
8 Посли када о Бэнг андя лэ Исусос пэ фартэ вучо плай, сыкадя лэсти всаворэ царстворя пэ ԥув, лэнго зор и лэнго барвалимос
9 и ԥэндя: «Вся када мэ дава тути, если ту пэрэса пэ чанга и тэлёса манди».
10 Но о Исусо ԥэндя: «Вижа мандар, Сатана! Важ кода кай пистромэ: „Полэн тумарэ Дэвлэс лэ Иеговас* и терэн кати лэстири свынто дила*“».
11 Тоди о Бэнг ужылятар, ай каринг о Исусо авелэ и анӷелоря, кай тэ заботинпэ пала лэстэ*.
12 Кала о Исусо ашундя, кай лэ Иоанос шутэ андо баруно, во ужыля андэ Галиле́я.
13 Потом во ужыля анда Назаре́то и ля тэ жувэл андо форо Капернау́мо, саво тердёл паша моря пэ лэ Завулоноско краё и лэ Нефалимоско краё.
14 Кадя ашэля, сар ԥэндя лэ Дэвлэско особо мануш о Иса́я:
15 «Лэ Завулоноско краё и лэ Нефалимоско краё, саво андярэл каринг и моря, пэ авэр риг лэ Ярданостар, аврэ народонэндири Галиле́я!
16 О миро, саво жувэл андэ тэмнота, додиқля о ашунгло свето, и лэ манушэнди пэ ԥув, савя и смэрть ушаравэл сар тень, ля тэ светий о свето».
17 Кодэла времятар о Исусо ля тэ росԥэнэн пала лэ Дэвлэско Царство и тэ ԥэнэн: «Каинпэ, важ кода кай о небесно Царство пашэ!»
18 Кала о Исусо прожалас паша Галилейско моря, во додиқля дуе манушэн*: лэ Симанос, пэ саво ԥэнэн Пётро, и лэстирэ ԥралэс лэ Андриёс. Вонэ зашонас андэ моря и сетки, важ кода кай сас рыбакоря.
19 И во ԥэндя лэнди: «Ԥирэн пала мандэ, и мэ сытярава тумэн тэ астарэн лэ манушэн*».
20 Вонэ сразу жэ ашадэ и сетки и жылэ пала лэстэ.
21 Во прожыля май англэ и додиқля инке дуе манушэн*: лэ Иаковос, лэ Зеведеёстирэ шавэс, и лэстирэ ԥралэс лэ Иоанос, савэ вместе пэстирэ дадэса лэ Зеведеёса терэнас андэ лодка и сетки. О Исусо ақардя и лэн.
22 Вонэ сразу ашадэ лэ дадэс и лодка и жылэ пала лэстэ.
23 О Исусо ԥирэлас па вся Галиле́я, во сытярэлас андэ синагоги*, росԥэнэнас и лащи новость пала Царство и исцэлияс лэ манушэн разнонэ насвалимастар.
24 И дума пала лэстэ розжыляпэ па вся и Си́рия. Каринг лэстэ анэнас всаворэн, кастэ сас разно насвалимос и ко фартэ мучияспэ, ай кадяжэ кодэлэн, андэр кастэ сас и найвужэ, кастэ сас ипилепсия и ко сас парализовано, и во исцэлияс лэн.
25 Важ када пала лэстэ ԥирэнас розбут мануша анда Галиле́я, Десятигра́дия, Иерусалимо, Иуде́я и анда фороря, савэ пала лэн Ярда́но.
Сноски
^ Или «ритярэлас о посто».
^ Ворта «свынто форо».
^ Или «тэ на дэспэдап андо бар лэ пэрнэса».
^ Или «не проверяйте тумарэ Дэвлэс лэ Иеговас».
^ Или «ритярэн кати лэско законо».
^ Или «тэ поможын лэсти».
^ Ворта «ԥралэн».
^ Катэ и дума жал пала кода, кай тэ поможын лэ манушэнди тэ андярэн лэ Христостири время.
^ Ворта «ԥралэн».
