Римо 6:1-23
6 Сыкавэл када, кай амэ можэм и май дур тэ терас бэзэх, кай о Дэл инке май фартэ тэ здиқэл пар мэндэ па пэско баро ковло ди?
2 Най! Амэ мулям важ о бэзэх — хэба амэ можэм тэ андярас бэзэхэстири жызня?
3 Хэба тумэ на ӷанэн, кай всаворэ амэ, ко болделям андо Христос Исусо, болделям андэ лэстири смэрть?
4 Амэн притидэ́ лэса, кала амэ болделям андэ лэстири смэрть. И сар о Дад жундярдя лэ Христос пэстирэ зорэса, кадя и амэ акана андярас и нэви жызня.
5 Амэ ашэлям лэса сар ек, кала мулям кадя жэ, сар во муля. Кадя амэ ашаса лэса сар ек, кала жундюваса кадя жэ, сар во жунделя. Если амэ мулям кадя жэ, сар во муля, тоди и жундюваса кадя жэ, сар во жунделя, и андэ када амэ ашаса лэса сар ек.
6 Амэ ӷанас, кай амаро пурано характеро муля лэса по столбо. Кадя амари бэзэхэстири тила парашэля тэ хулаий пар мэндэ и амэ будэр на трэбуй тэ авас лэ бэзэхэстирэ раборя.
7 Важ кода кай кодэлэс, ко муля, будэр на дошалярэса андо бэзэх*.
8 Амэ мулям лэ Христоса, и амэ патяс, кай и жуваса лэса.
9 Амэ ӷанас, кай о Христос, саво жунделя, будэр никала на мэрэла. И смэрть будэр най хулай пэр лэстэ.
10 Во кати еқвар муля, кай тэ улэл о бэзэх. Акана во жувэл, кай тэ андярэл лэ Дэвлэстири время.
11 Кадя и тумэ гиндон, кай тумэ мулинэ важ бэзэхэстири дила, но жувэн, кай тэ андярэн лэ Дэвлэстири время сар лэ Христостирэ лэ Исусостирэ ученикоря.
12 Важ када на́ домэкэн, кай о бэзэх тэ хулаий пэр тумэндэ, и на́ терэн кода, каринг со тумэн цырдэл тумари тила, сави стернёла.
13 На́ домэкэн, кай тумари тила тэ авэл андэ вас кай о бэзэх сар инструменто важ о найлашымос. Но отдэн пэс лэ Дэвлэсти сар кодэла, ко сас муло, но жунделя, и домэкэн, кай тумари тила тэ авэл лэстэ андэ вас сар инструменто важ о лашымос.
14 Нащи, кай о бэзэх тэ хулаий пэр тумэндэ, важ кода кай тумэнди на трэбуй тэ ритярэн о законо, но акана о Дэл здиқэл пэр тумэндэ па пэско баро ковло ди.
15 Если амэнди на трэбуй тэ ритярас о законо и о Дэл здиқэл пар мэндэ па пэско баро ковло ди, сыкавэл када, кай амэ акана ласа тэ терас бэзэх? Най!
16 Хэба тумэ на ӷанэн, кай если тумэ вся и время варикас кандэн, тоди тумэ ашэн лэстирэ раборя? Вижал, если тумэ лэ бэзэхэстирэ раборя, тумэ мэрэна. Но если тумэ лэ Дэвлэстирэ раборя и кандэн лэс, тоди тумэ вся лэна тэ терэн правильно.
17 Амэ блаӷодарни лэ Дэвлэсти, кай тумэ, хоть и сас варикала лэ бэзэхэстирэ раборя, акана всаворэ одеса кандэн лэ Дэвлэс и терэн кадя, сар во сытярдя тумэн.
18 Кала тумэ парашэлэ тэ авэн лэ бэзэхэстирэ раборя, тумэ ашэлэ лэ Дэвлэстирэ раборя и линэ тэ терэн кода, со правильно.
19 Мэ дав дума просто и камав, кай тумэ вся тэ полэн, важ кода кай тумэ бэзэхэстирэ мануша. Тумэ, сар раборя, домэклэ, кай тумари тила тэ цырдэлпэ каринг и мэлали и найлащи дила и тэ терэл о вэрытимос. Ай акана домэкэн, кай тумари тила тэ цырдэлпэ каринг и правильно дила и тэ терэл кода, со свынто.
20 Важ кода кай кала тумэ сас лэ бэзэхэстирэ раборя, тумэнди на трэбуй сас тэ терэн правильно.
21 Со вижыля тумаря дилатар андэ кодэя время? Кода, важ со тумэнди щас лажаво. Кадэя дила анэн каринг и смэрть.
22 Но акана, кала тумэ парашэлэ тэ авэн лэ бэзэхэстирэ раборя, терэн свынто дила сар лэ Дэвлэстирэ раборя. Када анэн каринг и вечно жызня.
23 Важ кода кай о бэзэх потинэл смэртяса, ай о подарко лэ Дэвлэстар — када и вечно жызня через о Христос Исусо, амаро Баро Хулай.
Сноски
^ Или «кодэлэсти, ко муля, простийпэ лэско бэзэх».
