2 Каринфо 9:1-15
9 Ай если тэ дас дума пала помощь лэ свынтонэнди, то мэ на диқав, кай манди трэбуй тэ пистросарав тумэнди пала када.
2 Мэ ӷанав, кай тумэ камэн тэ дэн помощь, и абуросарав кадэлэса англа македонцоря. Мэ ԥэнав лэнди, кай и ԥрала анда Аха́я ужэ бэрш палпалэ сас ӷотови тэ поможын, и тумари хватка ля лэ одестар бутэн андар лэндэ.
3 Но мэ бишалав каринг тумэндэ лэ ԥралэн, и тоди на вижала, кай амэ евья драго ԥэнасас пала тумари лащи дила, и тумэ па чачимастэ авэна ӷотови, сар мэ и ԥэнавас пала тумэндэ.
4 А то, если и ԥрала анда Македо́ния авэна манца и диқэна, кай тумэ не ӷотови, амэнди авэла лажаво, кай амэ патясас тумэнди, и инке май лажаво авэла тумэнди.
5 Важ када мэ и погиндосардэм, кай трэбуй тэ ԥэнав лэ ԥралэнди май англал тэ авэн каринг тумэндэ. Вонэ диқэна, кай вся, соса тумэ анда ди поделисайлэ, тэ авэл ӷотово, сар тумэ и динэ алав. И тоди дицола, кай тумэ делинпэ кадэлэса анда ди, ай най кай амэ вимардям када.
6 На́ бистрэн: ко сеий чорымаса, во стидэла набут, ай ко сеий анда вся ди, во стидэла бут.
7 Мэк кажно терэл кадя, сар екжэно камэл, ай най через оди или кай варико заставий, важ кода кай о Дэл любий кодэлэс, ко лошало тэ дэл.
8 Тай инке, о Дэл можэт инке май фартэ тэ здиқэл пэр тумэндэ па пэско баро ковло ди, и тоди тумэнди вся лэла тэ хутилэл и тумэ сможэте вся и время тэ терэн любо лащи дила.
9 (Сар пистромэ: «Во роздэл и на причорэл о вас; делийпэ лэ чорорэнца. Лэстири правильно дила вечно».
10 Ай о Дэл, саво анда ди дэл и семена кодэлэсти, ко сеий, и о марно лэ мирости, дэла и тумэнди семена, кай тумэ тэ сеин, и дэла фартэ бут. И во стерэла, кай тумари правильно дила тэ анэн инке май бут лашымос.)
11 О Дэл анда ди блаӷословий тумэн, кай тумэ вся и время тэ делинпэ анда ди аврэнца. И через кадэя дила, сави терэлпэ амарэ зорэса, авэр блаӷодарин лэ Дэвлэс.
12 Важ кода кай кадэя помощь трэбуй тэ дас най кати важ кода, кай лэ свынтонэндэ тэ авэл вся, со трэбуй, но и кай бут мануша тэ блаӷодарин лэ Дэвлэс.
13 Вонэ андярэн лашо алав по Дэл, важ кода кай кацави помощь доԥэнэн, кай тумэ приашундён каринг и лащи новость пала Христос, сави тумэ всаворэнди росԥэнэн. Кадяжэ вонэ ԥэнэна лашо алав пэр лэстэ, кай тумэ анда ди делинпэ лэнца и аврэнца.
14 Вонэ лэна всаворэ́ одеса тэ мангэнпэ пала тумэндэ и тэ любин тумэн, важ кода кай о Дэл здиқэл пэр тумэндэ па пэско баро ковло ди, и када нисоса на сыстояпэ.
15 Блаӷодарисарас лэ Дэвлэс важ и вся, со во стердя, пала со дажэ на росԥэнэса алавэнца!
