2 Тимафеё 3:1-17
3 Ту трэбуй тэ ӷанэс, кай андэ послидни деса авэла фартэ ԥари время.
2 И мануша лэна тэ любин кати корко пэс, лэна тэ здран пала ловэ, лэна тэ путён, лэна тэ завдэнпэ, лэна тэ дэн дума найпативалэс. Вонэ на лэна тэ кандэн лэ родителёнэн, на лэна тэ блаӷодарин аврэн, на лэна тэ приритярдён пэстирэ алавэсти,
3 на лэна тэ любин аврэн, на лэна тэ зжанпэ аврэнца андэ дума, на лэна тэ ритярэн пэс андэ вас, на лэна тэ цырдэнпэ каринг о лашымос. Вонэ лэна тэ розындярэн и хохавни дума пала авэр, лэна жэстоко тэ обжанпэ аврэнца,
4 лэна тэ придэн аврэн, лэна тэ тердён пэ пэско, лэна тэ абурон, лэна тэ цырдэнпэ пала кода, со камэл лэнго ди, ай най со камэл о Дэл.
5 Вонэ лэна тэ притерэнпэ, кай стон бари патив по Дэл, но па лэндири дила дицола совсем авэр*. Кацавэ манушэндар ритярдюв май дур.
6 Дэсавэ андар лэндэ хытрияса проӷулен андэ цэра и опхохавэн лэ жувлян, савэндэ балвал андо шэро и савэ терэн бут бэзэх. Вонэ терэн кода, каринг со цырдэлпэ лэнго ди,
7 и вся и время сытён, но нисар не моӷут точно тэ полэн о чачимос.
8 Сар против о Маисеё жанас о Я́ниё и о Я́мвриё, кадя против о чачимос жан и кадэла мануша. Лэндири годи пэрэбандярди, и вонэ найуӷодни лэ Дэвлэсти, важ кода кай вонэ на жувэн па кода, андэр со патян.
9 Но вонэ будэр нисо на домардёна, важ кода кай лэнго дилимос дицола всаворэнди, сар када сас кодэлэ дуенца.
10 Ай ту приритярдёсас всаворэсти, сости мэ сытяравас, андярэсас кацави жэ жызня, сар и мэ, домардёсас кода жэ, со и мэ, и лэсас мандар примеро, сар тэ патяс, тэ тэрпис, тэ любис и тэ ашэспэ састо андэ ԥари время.
11 Ту ӷанэс, сар ман ӷонинас и мучинас андэ Антио́хия, андо Ико́ниё и андэ Ли́стра. Кала ман котэ ӷонинас, мэ састэс пэрэандярдэм кадэя ԥари время, и всаворэстар кадэлэстар о Баро Хулай фэрисардя ман.
12 Чаче, о миро лэла тэ ӷоний всаворэн, ко андярэл лэ Христостири лэ Исусостири время и ко камэл баря пативаса тэ терэл лэ Дэвлэстири дила.
13 Ай и найлашэ и хохавнэ мануша лэна тэ андярэн пэс со май вэрыто и май вэрыто, кай обдилярэн аврэн и подэнпэ лэ хохаимасти.
14 Но ту на́ параш тэ приритярдёс кодэлэсти, сости тут сытярдэ и андэр со тути поможысардэ тэ патяс. Важ кода кай ту ӷанэс, ко тут сытярдя,
15 и жы анда ԥарнэ ӷанэс и Свынти Лила*, савэ моӷут тэ поможын тути тэ ашэс годявэрно. Кадя ту спасысапэ через кода, кай патяс андо Христос Исусо.
16 Всаворэ Свынти Лила сас пистромэ через лэ Дэвлэско зор и анэн лашымос: када поможый тэ сытярэн аврэн, тэ лажаварэн, кай авэр тэ парудён, тэ лашарэн аврэнди о гиндо и тэ сыкавэн о правильно дром.
17 Тоди лэ Дэвлэско мануш лэла тэ ӷанэн, сар тэ терэл любо лащи дила, и авэла ӷотово каринг када.
