2 Фесалоники 3:1-18
3 И акэ, ԥрала, мангэнпэ пала амэндэ, кай о алав лэ Иеговастар* ӥто тэ розжалпэ и тэ ашундёл, сар во ашундёл машкар тумэндэ.
2 Кадяжэ мангэнпэ, кай амэ тэ фэрисавас лэ найлашэ манушэндар, савэ моӷут тэ стерэн амэнди вэрыто, важ кода кай най всаворэ патян.
3 Но о Баро Хулай састо пэстирэ алавэсти, и во подритярэла тумэн и фэрия лэ Бэнгэстар.
4 Ай амэ, сар лэ Барэ Хуластирэ ученикоря, патяс, кай тумэ терэн и лэна тэ терэн кода, со амэ тумэнди ԥэнас.
5 Мэк о Баро Хулай бандярэл тумаро ди, кай тумэ тэ любин лэ Дэвлэс и тэ ашэнпэ састэ пэ лэ Христоско дром.
6 Ԥрала, амарэ Барэ Хуластирэ лэ Исусостирэ лэ Христостирэ алавэстар ԥэнас тумэнди: дурён кажнонэ ԥралэстар, саво андярэл пэс найпрепи и на терэл па порядко, пала саво амэ росԥэндям тумэнди.
7 Тумэ екжэнэ ӷанэн, андэр со тумэ трэбуй тэ лэн амэндар примеро, важ кода кай амэ на андярдям пэс тумэндэ найпрепи
8 и никастэ на халям о марно евья. Наоборот, амэ пристасас бут зор, кала терасас бути о дес и рят, кай ни важ кастэ тэ на авас покута.
9 И най важ кода, кай амэндэ нинай право тэ аштярас тумэндар помощь, ай важ кода, кай амэ камлям тэ подас тумэнди примеро.
10 Кала амэ инке самас тумэндэ, амэ приԥэндям: «Ко на камэл тэ терэл, мэк во и на́ хал».
11 Но амэ ашунас, кай дэсавэ андар тумэндэ андярэн пэс найпрепи, на терэн бути и ӷулен най андэ пэстири дила.
12 Лэ Барэ Хуластирэ лэ Исусостирэ лэ Христостирэ алавэстар амэ ԥэнас кацавэ манушэнди и мангас лэн тэ жувэн тихо и тэ затерэн по котор марно пэстирэ вастэнца.
13 Ай тумэ, ԥрала, терэн лашымос и на́ здэнпэ.
14 Если варико на приашундёла каринг кода, со амэ приԥэнас андэ кадэва письмо, на́ злэн и яқа па кацаво мануш и на́ дэн дума лэса, кай лэсти тэ ашэл лажаво.
15 Но на́ диқэн пэр лэстэ, сар по вороӷо, ай на́ парашэн тэ дэн лэсти годи сар ԥралэсти.
16 Мэк о Баро Хулай, савэстар и мирно жызня, дэл тумэнди вся и время и андэ вся тэ жувэн мирно. Тэ авэл всаворэнца тумэнца о Баро Хулай.
17 Када мэ, о Павло, ԥэнав тумэнди «дорови» и пистросарав пала када пэстирэ вастэса. Мэ терав када андэ кажно письмо. Кадя тумэ лэна тэ ӷанэн, кай во мандар.
18 Мэк амаро Баро Хулай о Исусо Христос здиқэл пэр тумэндэ па пэско баро ковло ди.
