И родителя сыкавэн лашо примеро, кала жувэн кадя, сар сытярэн. Если тиро шаво ашунэл, сар ту па телефоно ԥэнэс варикасти: «Мэ занасвайлэм», ай екжэно просто камэс тэ отцыёс, тоди кала во вибарёла, во кадяжэ лэла тэ хохавэл.

«И бэяцэ май бут шон сама пэ кода, со тумэ терэн. И кала тумэ ԥэнэн „тер кадя, сар мэ ԥэндэм“, вонэ када на ашунэн. Вонэ, сар ӷубка, стидэн андэр пэстэ вся, со тумэ терэн и со тумэ ԥэнэн. Если тумарэ алава росжанапэ ла диласа, вонэ пэ када шона сама» (Дэвидо).

БИБЛЕЙСКО ПРИНЦЫПО. «Тоди васо ту, кала сытярэс аврэн, на сытярэс и корко пэс? Росԥэнэс: „ на чорэн“, ай екжэно чорэс» (Римлянам 2:21).

Кала о дад и дэй екжэнэ терэн кадя, сар сытярэн, тоди вонэ май драго всаворэндар моӷут тэ поможын лэ бэятонэнди тэ жан па лашо дром. Важ кода кай и бэяцэ май бут диқэн най пэ варикастэ, ай пэ родителя.

«Ту можэш сто раз тэ ԥэнэс ек алав, ай о бэято, здэлпэ, кадя тут и на ашунэл. Но если ту кати еқвар на стерэса кода, сар ԥэнэс, во сразу жэ када додиқэла! И бэяцэ диқэн вся, дажэ если амэ гиндосарас, кай вонэ ни пэр со на шон сама» (Николь).

БИБЛЕЙСКО ПРИНЦЫПО. «И мудрость па нэбо... [кала кай о мануш мудрость лэ Дэвлэстар, во] на притерэлпэ» (Иакова 3:17).

Погиндосар пала кода, сар ту пэс андярэс. Савэ видеоря ту диқэс? Сар ту андярэс пэс лэ хуласа, ла хулаяса или лэ бэятонэнца? Ко тирэ друӷоря? Заботиспэ ту пала авэр чи най? Камлоп ту, кай тиро бэято тэ авэл кацаво жэ, сар ту?

«Амэ лэ хуласа на ԥэнас лэ бэятонэнди тэ терэн кода, со амэ екжэнэ на терас» (Кристин).

Манг прощения. И бэяцэ полэн, кай о дад и дэй тожэ дэкала терэн варисо най кадя. Важ када, кала ту мангэс прощения кай и хулаи или кай о хулай, или кай и бэяцэ, кадэлэса ту сытярэс лэ бэятонэн тэ стон патив пэ авэр мануша и тэ на хохавэн.

«Амарэ бэяцэ трэбуй тэ ашунэн, сар амэ мангас прощения и прижанас, кай варисо тердям най кадя. Через када, вонэ сытёна тэ ԥэнэн, андэр со вонэ сас дошалэ» (Робино).