Кала лэ манушэстэ ԥаримос, во аштярэл, кай о друӷо поможыя лэсти. Важ када дэсавэ мануша ԥэнэн, кай о Дэл лэнди най друӷо, важ кода кай лэстар нинай нисави помощь. Но па чачимастэ о Дэл бут со стердя важ амэндэ. И инке, йто о Дэл улэла вся амаро ԥаримос и биды. Со во стерэла англэ?

О Дэл улэла най кати о найлашимос, ай и кодэлэс, кастар во жал. Андэ Библия ԥэнэнпэ: «Всаворя люмаса правий о Найлашо» (1 Иоанна 5:19). «О Найлашо», када кодэва, пэр кастэ о Иисусо ԥэндя, кай во ла люмако правителё, када о Сатана (Иоанна 12:31). Вижал, кодэлэстар, кай пэ мануша тасавэл о Сатана, лэндэ кацави ԥари жызня. Но сар о Дэл вся парувэла?

Йто о Дэл Иегова через пэско шаво, о Иисусо, «умарэла лэ Сатанас» (Евреям 2:14; 1 Иоанна 3:8). Сар пистромэ андэ Библия, о Сатана ӷанэн, кай «лэстэ ашэлпэ набут время» (Откровение 12:12). Кадяжэ, о Дэл улэла па ԥув кодэлэн, ко терэл о найлашимос аврэнди (Псалом 37:9; Притчи 2:22).

Посли кода, сар амаро Создателё улэла па ԥув вся о найлашимос, во стерэла вся, со загиндосардя спэрва важ и ԥув и важ и мануша. Со амэн аштярэл?

Всаворэ ладина ек еқэса и нисо на авэла тэ даравэл. «Кодэлэнди, кастэ ковло ди, ашэлапэ и ԥув и вонэ авэна лошалэ кодэлэстар, кай всаворэ ладина ек еқэса» (Псалом 37:11).

Фартэ бут лашо хамос. «Пэ ԥув авэла бут марно. Упрэ пэ плая, лэс авэла ԥэрдо» (Псалом 72:16).

Лашэ цэра и бути, сави чалёл. «И мануша лэна тэ строин и цэра и тэ жувэн андэр лэндэ, авэна тэ барярэн и виноӷрадникоря и тэ хан о виноӷрадо. [...] ...И кодэла, кас мэ витидэм, авэна тэ лэн вся кода, со стердэ пэстирэ вастэнца» (Исаия 65:21, 22).

Камлоп ту тэ диқэс када пэстирэ яқэнца? Йто всаворэ мануша кадя и жувэна.

Адес кажно мануш пэрэандярэл ԥаримос лэ насвалимастар и ла смэртятар. Но кадя авэла най вся и время. Йто о Дэл стерэла кадя, кай через лэ Иисусостири смэрть «кажно, ко сыкавэл, кай патял андэр лэстэ, тэ на мэрэл, ай тэ жувэл вечно» (Иоанна 3:16). Со амэнди кадэлэстар авэла?

О насвалимос будэр на авэла. «Нико анда мануша, на ԥэнэна: „Мэ насвало“. Лэ народости, саво жувэл пэ кодэя ԥув, простияпэ лэско бэзэх» (Исаия 33:24).

И мануша на лэна тэ мэрэн. «Во улэла и смэрть пэ вечность, и о Владыка Ӷосподо Иегова виқосэла всаворэ ясва» (Исаия 25:8).

И мануша жувэна вечно. «О подарко лэ Дэвлэстар, када и вечно жызня, сави через о Иисус Христос амаро Ӷосподо» (Римлянам 6:23).

Кодэла, ко муля, упалэ лэна тэ жувэн пэ ԥув. «Ринапэ каринг и жызня кодэла, ко муля, праведни и нэправедни» (Деяния 24:15). Када авэла через и цэмин, сави о Дэл потиндя важ и мануша.

Сар о Дэл вся када стерэла?

О Дэл стерэла вся, со загиндосардясас важ и ԥув и важ и мануша, через о правительство, саво по нэбо. О Дэл стодя лэ Иисусос, кай во тэ авэл правителё (Псалом 110:1, 2). Пала кадэва правительство, или царство, о Иисусо сытярэлас пэстирэ учениконэн тэ мангэнпэ: «Амаро Дад по нэбо... Мэк авэл тиро царство» (Матфея 6:9, 10).

Лэ Дэвлэско царство лэла тэ правий па вся и ԥув и улэла о ԥаримос всаворэ манушэндар. Ни ек правительство, саво стодэ и мануша, на сыстояпэ кадэлэ царствоса! Важ када о Иисусо, кала служыяс пэ ԥув, на жалуияс о зор, кай тэ росԥэнэн «и лащи весть пала царство». Во ԥэндя пэстирэ учениконэнди, кай вонэ тэ терэн кадэя жэ дила (Матфея 4:23; 24:14).

Вся када о Иегова камэл тэ стерэл пэ ԥув, важ кода кай во фартэ любий лэ манушэн. Камлоп ту май бут тэ уӷанэс пала кацаво любящё Дэл и тэ ашэс май пашэ каринг лэстэ? Со тути дэла кода, кай ту ӷанэс лэ Дэвлэс? Давай подаса дума пала када андэ авэр статья.