Ни акэ, амэ уӷанглям, ко када о Дэл. Амэ полям кай лэс ақарэн Иегова и кай лэско ӷлавно качество, када любовь. Кадяжэ амэ уӷанглям со во ужэ стердя важ и мануша и со во инке стерэла. И Библия инке бут со росԥэнэн важ о Дэл. Но вижал кацаво вопросо: «Саво манди лашимос кодэлэстар, кай мэ када ӷанав?»

О Иегова дэл алав, кай «сар ту лэса тэ родэс лэс, во домэкэла, кай ту тэ виарақэс лэс» (1 Летопись 28:9). Кати погиндосар, кала ту и май дур лэса тэ уӷанэс пала лэстэ, тоди тутэ авэла «лащи дружба лэ Иеговаса» (Псалом 25:14). Саво лашимос авэла кадэлэстар?

Чачуни бах. О Иегова, када бахтало Дэл (1 Тимофею 1:11). Кала амэ терас вся, кай тэ дружысарас лэ Иеговаса, тоди амэ ашас май бахталэ. Када поможый амэнди тэ парувас амаро гиндо, ай кадяжэ кода, со амэндэ по ди, и тэ авэл май лашо зор (Псалом 33:12). Тутэ вижала тэ ашавэс и найлашэ привычки и ту присытёса тэ терэс драго. Кадяжэ тутэ вижала тэ ладис аврэнца. Кала тутэ када вся авэла, ту ԥэнэса, сар о псалмопевцо, саво пистросардя: «Важ мандэ тэ пашував каринг о Дэл, када лашимос» (Псалом 73:28).

Диқэл пала кажно. О Иегова ԥэндя пэстирэ служытелёнэнди: «Подԥэнава тути и лава тэ диқав пала тутэ» (Псалом 32:8). Када сыкавэл, кай о Иегова шол сама кажнонэсти, ко служый лэсти, и полэл, со трэбуй важ кажно мануш (Псалом 139:1, 2). Кала ту уӷанэса лэ Иеговас май драго, ту полэса, кай во чачуно друӷо, саво можэт вся и время тэ поможый тути.

Англэ авэла бут лашимос. О Иегова дэл амэнди най кати кода, со анэн каринг и бахтали жызня ужэ адес, но кадяжэ и англэ дэла бут лашимос (Исаия 48:17, 18). Андэ Библия ԥэнэнпэ: «Кай тэ авэл вечно жызня, трэбуй тэ уӷанэн пала тутэ, еқэ чачунэ Дэвлэстэ, и пала Иисус Христос, савэс ту бишалдян» (Иоанна 17:3). Андэ кадэя ԥари время о лашимос, саво авэла англэ и саво амэнди дя о Дэл, поможый амэнди тэ ритярдювас састэс андэ вера (Евреям 6:19).

Исин и авэр, васо трэбуй тэ на парашэс тэ уӷанэс пала Дэл и тэ ашэс май лашо друӷо лэса. Кай тэ уӷанэс май бут пала када, подэ дума варикаса анда лэ Иеговастирэ свидетеля или зажа пэ амаро сайто, jw.org.