Если надеисаваспэ, када подритярэл. Чаче када кадя?

ЛЭ ДЭНИЕЛОСТИ сас кати дэш бэрш, но ужэ цыло бэрш лэстэ сас кацаво насвалимос, сар рако. И врачоря и лэстирэ чаче умэклэ и вас. Но о бэято на здэласпэ. Во патялас, кай вибарёла, ашэла учоно и авэла кацаво дес, кай во виарақэла драб лэ ракостар. Но май фартэ о Дэниело патялас, кай авэла лэстэ ек врачо, саво личий именно кодэва рако, саво лэстэ. И акэ, авеля кадэва дес, но о врачо нэ моӷ тэ авэл, важ кода кай сас вэрыто поӷода. О Дэниело умэкля и вас. Лэсти ашэля всаек пэ вся, и через дэсавэ деса во муля.

Пала када росԥэндя учоно, саво изучал, сар кода, кала о мануш аштярэл о лашимос, дэл лэсти зор. Можэт тумэ ашундэ пала кода, сар о ԥуро мануш англа пэстири смэрть ритярдёлпэ и аштярэл, кай авэла лэско пашутно мануш или, кай во дожувэла каринг о важно дес. Ай, сар прожал кадэя время, во йто мэрэл. Васо кадя терэлпэ? Чаче о мануш можэт тэ лэл зор кодэлэстар, кай аштярэл о лашимос?

И врачоря гиндон, кай, кала о мануш патял, кай лэстэ авэла вся драго, и кода, кай во пэ вся диқэл лащя ригатар, кадэлэстар лэстэ авэла май лащи жызня и май лашо зор. Но кадя гиндон най всаворэ. Дэсавэ врачоря нэ соӷласни кадэлэса, и гиндон, кай када жал против наука. Вонэ гиндон, кай кала варисо дуқал, тэ гиндон пала лашимос, када на поможыя.

Када найудивительно, кай дэсавэ мануша гиндон кадя. Бут бэрша палпалэ о ӷреческо учоно Аристотелё ԥэндя, кай кала о мануш надеийпэ по лашимос, када ек бах кодэлэса, кай о мануш диқэл о суно. Прожыля время и авэр баро мануш анда американско страна Бенджамино Франклино подасаласпэ и ԥэндя: «Кала о мануш патял андо лашимос, кадэлэстар лэсти на авэла фэдэр».

Кала амэ надеисавас по лашимос, када драго чи най? Би кадэлэско на обжасапэ или амэнди на трэбуй тэ надеисавас по лашимос?