О Иегова создал ери и дя лэ родителёнэнди обязаность тэ заботинпэ пала пэстирэ бэяцэ (Колоссянам 3:20). Родителя, тумэ трэбуй тэ сытярэн лэ бэятос тэ полюбий лэ Иеговас и тэ ашэл лашо мануш (2 Тимофею 1:5; 3:15). Кадяжэ тумэ трэбуй тэ полэн, со андо ди кай тумаро бэято. Инке фартэ важно тэ сыкавэн лэсти лашо примеро. Тумэнди авэла май вушэро тэ сытярэн лэ бэятос тэ полюбий лэ Иеговас, если тумэндэ екжэнэндэ андо ди авэла любовь каринг о Иегова (Псалом 40:8).

СО ԤЭНЭНПЭ АНДЭ БИБЛИЯ. «Кажно мануш трэбуй май ӥто тэ ашунэл, чем тэ дэл дума» (Иакова 1:19). Важно, кай и бэяцэ тэ полэн: вонэ моӷут тэ дэн дума тумэнца пэ любо тема. Мэк вонэ ӷанэн, кай тумэ всегда можэте лэн тэ виашунэн, кала лэнди трэбуй тэ подэн дума. Андярэн пэс по доброму, кай лэ бэятости тэ авэл май вушэро тэ виԥэнэн пэско гиндо (Иакова 3:18). Если о бэято ӷанэн, кай тумэ на лэна тэ цыпин пэр лэстэ и тэ сындон лэс, во на дарала тумэнди вся тэ росԥэнэн. Авэн терпеливи тумарэ бэятоса и всегда ԥэнэн лэсти, кай любин лэс (Матфея 3:17; 1 Коринфянам 8:1).

СОВЕТОРЯ

• Виашунэн лэ бэятос, кала во камэл тэ подэл дума

• Всегда витидэн время тэ подэн дума лэ бэятоса, ай най кати тоди, кала лэстэ проблемы

СО ԤЭНЭНПЭ АНДЭ БИБЛИЯ. «Кодэлэстэ, ко старыийпэ тэ росполэл и дила, вся вижала» (Притчи 16:20). Дэкала па лэ бэятостири дума най сразу можно тэ полэн, со лэстэ андо ди. И подросткоря часто преувеличивают и ԥэнэн кода, со на камлэ тэ ԥэнэн. «Тэ дэс атвето, кала на виашундян — най годявэрнэс и най пативалэс» (Притчи 18:13). Важ када на грабинпэ тэ холявэн (Притчи 19:11).

СОВЕТОРЯ

• Старыинпэ никала тэ на пэрэмарэн лэ бэятос и авэн спокойни

• На бистрэн, со тумэндэ сас по ди и со важ тумэндэ сас важно, кала тумэ сас бэяцэ

СО ԤЭНЭНПЭ АНДЭ БИБЛИЯ. «Ашун, мэрно шаво, сости сытярэл тут тиро дад и прилэ кода, сости сытярэл тут тири дэй» (Притчи 1:8). О Иегова дя право тэ сытярэн лэ бэятонэн и лэ дадэсти, и ла дати. Тумэ трэбуй тэ барярэн лэ бэятос, кай во тэ стол патив и тэ кандэл тумэн (Эфесянам 6:1—3). Если кай и родителя най ек мнения, о бэято ӥто полэла када (1 Коринфянам 1:10). Кала во диқэл, кай тумэ на сжанпэ андо гиндо, лэсти авэла май ԥарэс тэ кандэл тумэн.

СОВЕТОРЯ

• Доԥэндён, сар тумэ лэна тэ сытярэн лэ бэятос

• Если тумэндэ разно гиндо пала кода, сар тэ сытярэн тумарэ бэятос, старыинпэ тэ полэн ек еқэс

СО ԤЭНЭНПЭ АНДЭ БИБЛИЯ. «Сытяр лэ шаворэс тэ жал па дром, па саво трэбуй» (Притчи 22:6). Лащи воспитания на лэлпэ корко пэстар. Тумэ трэбуй май англал тэ погиндон, сар лэна тэ сытярэн лэ бэятос (Псалом 127:4; Притчи 29:17). Но тэ сытярэн — када най тэ цыпин и тэ марэн лэс (Притчи 28:7). Объяснин лэ бэятости, васо дэсо нащи тэ терэл. Сытярэн лэс тэ полюбий и Библия и тэ жувэл па латирэ советоря (Псалом 1:2). Када поможыя лэсти май драго тэ полэл, со лашо, ай со най (Евреям 5:14).

СОВЕТОРЯ

• Мэк тумаро бэято полэл, кай о Дэл чаче исин и кай лэсти можно тэ патял

• Поможын лэ бэятости тэ ӷанэн, савэ опасности исин андо интэрнэто, и тэ фэрийпэ лэндар. Объяснин лэсти, сар во тэ защитийпэ лэ манушэндар, савэ терэн билажавардимос лэ бэятонэнца