ЧАСТЬ 3
Кала варико стердя ԥарэс по ди: если тумэндэ исин «васо тэ холявэн»
«И ԥэй анда мэрни собрания андярдя пэр мандэ хохавни дума, кай мэ чордэм латар ловэ. Кала и ԥрала и ԥэя уӷанглэ пала када, дэко заля мэрни риг, ай дэко — латири. Через дэсави время кадэя ԥэй поля, кай мэ най дошали и мангля мандар прощения. Но андо ди мэ чуствовала, кай никала нэ смоӷу ла тэ простисарав пала кодэя дук, сави вой манди андя» (Линда).
МОЖЭТ, и тутэ сас кацави дук по ди, сар кай и Линда, савяти прижыляпэ тэ пэрэандярэл кацаво через и ԥэй анда собрания? Дэсавэнди ашэл кадя ԥарэс, кай када лэл тэ мишыий лэнди тэ терэн дэвликуни дила. Сас туса кацаво?
Можэт варико «тэ одмарэл лэ Дэвлэс тэ любий амэн»?
Трэбуй тэ прижанас, кай най всегда вушэро тэ простисарас лэ ԥралэс или ла ԥья, через савэ амэнди сас ԥарэс по ди. Амэ жэ ӷанас, кай и христианоря трэбуй тэ любин ек еқэс, важ када кадя дуқанэс (Иоано 13:34, 35). Кала варико анда собрания туса найдраго обжыляпэ, на пэрэдэса алавэнца, сар када дэ ԥарэс. Ԥэнэса, мануш пэрэл андэ тирэ яқа (Псалом 55:12).
И чаче, дэкала амэндэ исин васо тэ холявас ек пэ еқэстэ (Калосы 3:13). И кала када терэлпэ, када можэт тэ авэл важ амэндэ сар испытания. Роздиқам трин библейски советоря, савэ амэнди поможына.
Амаро небесно Дад ӷанэн вся. О Иегова диқэл вся, со терэлпэ. Кадяжэ во диқэл любо, дажэ найбари нэсправедливость, через сави амэнди фартэ ԥарэс по ди (Евреёря 4:13). Кала амэнди ԥарэс, лэ Иеговасти тожэ ԥарэс по ди (Исайя 63:9). Во никала на домэкэл, кай через «о ԥаримос или и бида» во тэ парашэл тэ любий амэн. Дажэ если кадэва ԥаримос или бида андэ́ амэнди и ԥрала и ԥэя анда собрания (Римо 8:35, 38, 39). Кадяжэ и амэ на камас тэ домэкас, кай варисо или варико амэн тэ одмарэл лэ Дэвлэстар.
Тэ простис, када на сыкавэл, кай ту подритярэс о найлашымос. Кала амэ простисарас кодэлэс, ко обжыляпэ найдраго амэнца, када на сыкавэл, кай лэстири дош най кацави дэ бари и кай кода, со во стердя, — када нинай нисо. Ай кадяжэ амэ на ԥандавас и яқа пэ кодэва найлашымос, саво во стердя. Сэр: лэ Иеговасти никала на чалёл о бэзэх, но во простий лэс, если исин васо (Псалом 103:12, 13; Аввакум 1:13). О Иегова ԥэнэн амэнди тэ простисарас, важ кода кай во камэл, кай амэ тэ шаспэ пэр лэстэ, ай во «най вся и вечность лэла тэ холявэл» (Псалом 103:9; Матфеё 6:14).
Кала амэ простисарас, када анэн амэнди лашымос. Сар када? Прецтавь, кай ту ритярэс андэ палма бар. Ту ритярэс лэс вицырдэ вастэса. Тэ поритярэс найдолӷо время авэла вушэро. Ай со, если ту закамэса тэ поритярэс лэс май долӷо? Можэт, минута или часо? Скати ту кадя ритярэса? Если ту лэса долӷо лэс тэ ритярэс, о вас цыёла. О весо кадэлэ барэско на парудёла, но важ тутэ во лэла тэ ашэл май ԥаро. Кадяжэ и ла холяса. Дажэ если вой цынёни, со май долӷо амэ ритярас ла андо ди, со май ԥарэс амэнди ашэл. Важ када о Иегова и мангэл амэн тэ одмэкас и холи. Кала амэ парашас тэ холявас, амэнди екжэнэнди ашэл май вушэро (Притчи 11:17).
Кала амэ парашас тэ холявас, када анэн лашымос амэнди
«Мандэ сас по ди кацаво, ԥэнэса, манца дэл дума екжэно о Иегова»
Со поможысардя ла Линдати тэ парашэл тэ холявэл пэ ԥэй, сави найдраго обжыляпэ ласа? Вой бут со стердя. Пэ лично изучения вой розля, васо трэбуй тэ простисарас (Псалом 130:3, 4). Ла Линда ля лэ одестар кацаво гиндо: кала амэ простисарас, о Иегова тожэ простий амэн (Ефесо 4:32—5:2). И вой ԥэндя: «Мандэ сас по ди кацаво, ԥэнэса, манца дэл дума екжэно о Иегова».
Прожыля время, и Линда смоӷла тэ одмэкэл и холи и парашэля тэ холявэл. Вой анда вся оди простисардя ла ԥья, и акана вонэ дажэ подружки. И Линда ля инке май анда ди тэ служый лэ Иеговасти. Патя: о Иегова поможыя и тути тэ стерэс кадя жэ.
