Бэзэх — када вся, со терэлпэ най па лэ Дэвлэско законо. Када можэт тэ авэл любо дила, со андо ди или гиндоря, савэ лэ Дэвлэсти нэ уӷодни. Кардэ кадяжэ ужал, кала жан против лэ Дэвлэско законо, када кала о мануш терэл нэправильно или нэправильно андэ лэ Дэвлэстирэ яқа (1 Иоанна 3:4; 5:17). Андэ Библия инке ԥэнэнпэ, кай бэзэх, — када кала о мануш на терэл кода, со правильно (Иакова 4:17).

 Пэ шыба, пэ савэ спэрва пистрояспэ и Библия, о алав бэзэх означает «мимо», када тэ на попэрэс андэ цэль. Дэсавэ воиноря андэ дэлмутни время андо Израилё фартэ драго ӷанэнас тэ шувидэн и бара анда праща, и нико андар лэндэ «на шувидэлас мимо». Кадэла алава кадяжэ можно тэ пэрэандярэн, сар «на терэлас бэзэх» (Судей 20:16). Вижал, тэ терэс бэзэх — када тэ на попэрэс андэ цэль. Ай и цэль андэ кода, кай о мануш тэ жувэл вся па лэ Дэвлэско совершэно законо.

 Лэ Дэвлэстэ, сар Создателёстэ, исин право тэ стол разни законоря важ и мануша (Откровение 4:11). Амэ даса отчёто лэсти пала пэстири дила (Римлянам 14:12).

Ай можэт о мануш вобще тэ на терэл бэзэх?

 Нэ можэт. Андэ Библия ԥэнэнпэ: «Всаворэ стердэ бэзэх и хасардэ лэ Дэвлэстири слава» (Римлянам 3:23; 1 Царей 8:46; Экклезиаст 7:20; 1 Иоанна 1:8). Сар када вижыля?

 Пэрви мануша, о Адамо и Ева, спэрва на сас ӷрешни, важ кода кай о Дэл создал лэн совершэни, сар и во (Бытие 1:27). Но кала вонэ на канглэ лэ Дэвлэс, вонэ ашэлэ ӷрешни (Бытие 3:5, 6, 17—19). Лэндирэ бэяцэ, савэ жылэ лэндар, тожэ ашэлэ ӷрешни и нэсовершэни. Када например, сар дэсавэ бэятонэнди пэрэжал о насвалимос пэстирэ родителёнэндар (Римлянам 5:12). Акэ васо о израильско царё о Давидо ԥэндя: «Мэ дошало андо бэзэх инке тоди, сар авелэм пэ люма» (Псалом 51:5).

Можно тэ ԥэнэс, кай ек бэзэх можэт тэ авэл май баро аврэстар?

 Да, можно. Например андэ Библия ԥэнэнпэ, кай андэ дэлмутни время «и мануша, савэ жувэнас андо Содомо, слинэ найлашэ мануша и терэнас баро бэзэх против Иегова» и «лэнго бэзэх фартэ баро» (Бытие 13:13; 18:20). Роздиқаса трин маменторя, саво бэзэх можэт тэ авэл баро, ай саво най.

1.   Пэскати дэ баро бэзэх? И Библия фэрий амэн кацавэ бэзэхэндар, кала терэн билажавардимос, тэлён лэ хохавнэ дэвлэнди, чорэн, матён, дилярэн пэ ловэ, умарэн аврэн или драбатярэн (1 Коринфянам 6:9—11; Откровение 21:8). Но сар дицол анда Библия, кацавэ бэзэха на шонпэ пэ кодэла ӷрехоря, савэ терэн нэобдумано, нэчайно, например ӷрешын алавэнца или диласа, сави анэн найлашымос аврэнди (Притчи 12:18; Эфесянам 4:31, 32). И всаек андэ Библия ԥэнэнпэ, кай амэ тэ на гиндосарас, кай андэ дэсавэ ӷрехоря нинай нисо. Важ кода кай если амэ терас найбаро бэзэх, када можэт тэ анэн каринг май баро бэзэх против Дэл (Матфеё 5:27, 28).

2.   Васо о мануш када терэл? Дэсавэ бэзэха о мануш терэл, важ кода кай на ӷанэн лэ Дэвлэско законо (Деяния 17:30; 1 Тимофею 1:13). Хоть и Библия и на виправий кацаво бэзэх, но вой терэл розличия кодэлэ бэзэхэстар, саво о мануш спецыально терэл, кала жал против лэ Дэвлэско законо (Числа 15:30, 31). Кала о мануш спецыально терэл бэзэх, када жал анда лэско найлашо ди (Иеремия 16:12).

3.   Пэскати дэ часто о мануш терэл бэзэх? И Библия терэл розличия, кала о мануш еқвар стердя бэзэх и кала терэл лэс долӷо (1 Иоанна 3:4—8). О Дэл сындой кодэлэн, ко спецыально терэл бэзэх, дажэ посли кода, кала уӷанэн, кай када нэправильно (Евреям 10:26, 27).

 Кала о мануш терэл баро бэзэх, лэсти можэт тэ авэл ԥарэс по ди. Акэ со, например, пистросардя о царё Давидо: «Май вучес мэрнэ шэрэстар вазгляпэ мэрно бэзэх; во сар нэвыносимо ӷрузо, фартэ ԥаро важ мандэ» (Псалом 38:4). Андэ Библия исин гиндо, саво подритярэл: «Мэк о найлашо мануш ашавэл пэско дром, и кодэва, ко загиндосардя тэ терэл о найлашымос, пэстирэ гиндоря. Мэк рисавэл каринг о Иегова, саво лэс жалуия анда оди, и каринг амаро Дэл, важ кода кай во анда оди простия» (Исайя 55:7).