Да. Андэр латэ пистромэ кода, со када доԥэнэн. Котэ ԥэнэнпэ, кай амэ найпросто кадя тэ патяс андо Дэл, ай тэ гиндосарас и тэ полас, васо амэ патяс (Римлянам 12:1; 1 Иоанна 5:20). Давайте диқаса, сар и Библия када доԥэнэн.

•   Кода, сар стерди и люма и, кай пэр латэ исин жызня, доԥэнэн, кай о Дэл исин. Андэ Библия пистромэ: «Канешно, кажно цэр варико строий, ай кодэва, ко стердя вся, када о Дэл» (Евреям 3:4). Кадэла прости алава драго доԥэнэн лэ манушэнди, савэндэ бари образования и савэ фартэ годявэрнэ, кай о Дэл па чачимастэ исин. a

•   Мануш арақадёлпэ кодэлэса, кай камэл тэ полэл, васо жувэл. И сар прожал и время, кадэла гиндоря на ужантар. Но кала о мануш полэл, кай лэсти трэбуй о Дэл, во камэл май бут тэ уӷанэн пала лэстэ и тэ служый лэсти. Ай кадяжэ о мануш лэл тэ пристол о зор, кай тэ уӷанэн, васо во жувэл (Матфея 5:3; Откровение 4:11). Кода, кай о мануш полэл, кай лэсти трэбуй о Дэл, када най корко пэстар ляпэ. Када и сыкавэл, кай о Дэл исин. Инке када сыкавэл, кай о Дэл любий лэ манушэн и камэл, кай вонэ тэ уӷанэн пала лэстэ (Матфея 4:4).

•   Вся, со пистромэ андэ Библия бут викоря палпалэ, пала кода, со авэла англэ, исполнисайля точно кадя андэ кодэя время, андэ сави ԥэнэнаспэ. Када доԥэнэн, кай нэ можэт кацаво тэ жал манушэстар (2 Петра 1:21).

•   О Дэл «амбладя и ԥув ни пэр со» (Иов 26:7). Кала запистромэ сас кадэла алава, и мануша андэ кодэя время гиндонас, кай и ԥув тердёлас по гурув, по бало, по слоно или инке пэ варисаво авэр жывотно. Вижал, кодэла, ко пистросардя и Библия, ӷанэнас май бут, чем и мануша, савэ жувэнас андэ кодэя время. Кадяжэ андэ Библия пистромэ, кай и ԥув круӷло (Исаия 40:22). Мануша полэн, кай кацавэ гиндоря андэ кодэя время, моӷли тэ авэн кати лэ Дэвлэстар.

•   И мануша пушэн: «Если о Дэл любий, васо кадя бут ԥаримос и васо через и қандиря кадя бут биды?» (Титу 1:16). Через кода, кай и мануша на полэн, васо вся кадя, вонэ парашэн тэ патян андо Дэл. Но андэ Библия росԥэнэнпэ пала када.