Anda 1 ji ande 3 septembria 2023, le phrala hai le pheia cai den duma i șib rromani (România) chidine-pe ande iech than ca lengo baro congreso anda 2023, „Aven răbdători!”. Chiar cana andel bărșa cai nachle încărde-pe congresea ande aver șiba rromane, cado sas o dintuno congreso baro andi șib rromani (România), ande savo le phrala daisarde te aven ande iech than. Cadale congresoste, cai încărdea-pe ca i Sala andal Congresea andai Turda (România) line partea 1 353 jene. Cadal phrala hai rroma, avile andai Austria, Belgia, Franța, Germania, Italia, Marea Britanie, Republica Moldova hai România. Cado congreso parudea ando miștimos i viața le 26 jenenghi cai bolde-pe.

O phral Gage Fleegle, cai slujil ando Corpo de Guvernare, încărdea le teme cai phandade fiesavo anda le trin ghiesa anda o congreso. Vo sicadea o șucar phanglimos cai si aghies mașcar le slujitori le Iehovasche hai zuriardea savoren cai sas code te slujin mai dur le Iehovasche pherde răbdarea hai chidine ande iech than. Le cuvântări cai încărdea-len o phral Fleegle sas-le sicade prin videoconferința vi ca aver dui congresea, iech andi sib vlașico (română) hai ocoaver ando limbajo le semnengo vlașico, cai sas-le chidine cam 900 jene.

Iech phral rrom phendea: „Sas vareso cadea de șucar că ci va avela te bâstras-les niciechdata! So baro miștimos dea amen o Iehova, te avel amen iech congreso ande amari șib!”. O Iraklis Exarcheas, o phral cai vizitil le congregații hai cai del duma i șib rromani (România), phendea: „Pachiav zurales că cado congreso arăslea ca i goghi hai ando ilo sea le phralengo hai le rromengo cai sas-le chidine cade. Cado congreso cărdea ca mânro ilo te pachial hai te hachiarel vi mai but că o Iehova lel sama catar sea le manușa. So șucar daro dea amen o Iehova!”.

Amare ile sile pherde bucuria anda amare phrala cai den duma i șib rromani (România) hai cai chidine-pe cadale congresoste caște anen pachiv le Iehovasche ande iech than hai caște aven sicade lestar. (Psalmo 26:12)