LECȚIA 12
So va ajutila-tu te studiis mai dur i Biblia?
O studio la Bibliaco si sar cana tu cames te jias varecai, tha o drom na-i sea o timpo ușoro. Cu sea cadala, jianes că va avela-tu but miștimata dacă jias mai dur pe cado drom. Poiechdata daștil-pe te gândis-tu că va avela tuche mai ușoro dacă meches o studio. Sostar si mișto te des chi zor hai te studiis mai dur i Biblia? So daștil te ajutil-tu te cheres cadai buchi vi cana naches prin pharimata?
1. Sostar si cuci o studio la Bibliaco?
„O Cuvânto le Devlesco silo jiuvindo hai zuralo.” (Evrei 4:12) I Biblia si cuci anda codoia că phenel amenghe le gânduri le Devlesche hai so si ande lesco ilo cana dichel caring tute. Voi ajutil-tu te prinjianes mai but buchia, cherel-tu mai goghiaver hai del-tu speranța. Tha i mai bari buchi si că i Biblia daștil te ajutil-tu te aves amal le Iehovaia. Cana studiis i Biblia, meches ca laco zuralimos te cherel chi viața mai șucar.
2. Sostar si mișto te hachiares că o ciacimos biblico si cuci?
Le ciacimata andai Biblia sile sar o sumnacai. Anda codoia i Biblia phenel amenghe ‘te chinas o ciacimos hai te na bichinas-les’. (Proverbe 23:23) Dacă dichas cuci o ciacimos biblico, va avela te das sea amari zor caște studiisaras mai dur, vi cana nachas prin pharimata. (Citisaren Proverbe 2:4, 5.)
3. Sar daștil o Iehova te ajutil-tu te studiis mai dur?
Anda codoia că si Codo cai cărdea-tu hai chio Amal, o Iehova camel te ajutil-tu te prinjianes-les mai mișto. Vo si O Mai Zuralo hai daștil te ‘cherel buchi ande tute caște cames hai vi del-tu i zor caște cheres so trebul’. (Citisaren Filipeni 2:13.) Dacă poiechdata ci mai cames cadea de but te studiis sau te cheres paruimata, vo daștil te ajutil-tu. Dacă si tut pharimata sau varecon așel tuche contra, o Del daștil te del-tu vi mai but zuralimos te naches părdal cadala. Mang sea o timpo le Iehovastar te ajutil-tu te studiis mai dur i Biblia. (1 Tesaloniceni 5:17)
HACHIAR MAI MIȘTO
Va avela te diches sar daștis te na meches o studio, chiar cana si tut but buchia te cheres sau aver așen tuche contra. Pala codoia, va avela te hachiares sar va ajutila-tu o Iehova te studiis mai dur.
4. Sicav că o studio biblico si zurales importanto anda tute
Poiechdata simțosaras că si amen cadea de but buchia te cheras, că na-i amen timpo te studiisaras i Biblia. So daștil te ajutil-ame? Citisaren Filipeni 1:10 hai pala codoia den duma:
-
Save si ‘le buchia mai importanto’ andi viața?
-
Sar daștis te sicaves că o studio biblico si zurales importanto anda tute?
-
Dacă șios ande iech vaso chișai hai pala codoia cames te șios vi bara, cadalen ci va mai avela len than
-
Dacă șios mai anglal le bara, va avela than te șios vi chișai. Sa cadea, dacă șios po iechto than andi viața le buchia mai importanto, va avela-tu timpo te cheres vi aver buchia
Anda codoia că o Del șiutea ande amaro ilo i nevoia te prinjianas-les hai te anas lesche închinarea, trebul te studiisaras i Biblia. Citisaren Matei 5:3 hai pala codoia den duma:
-
Ce miștimata si amen cana șioas o studio biblico po iechto than ande amari viața?
5. Na mech-tu, chiar cana aver așen tuche contra
Poiechdata, unii manușa daștinas te phenen tuche te na mai studiis i Biblia. Ita so cărdea o Francesco. Dichen o MATERIALO VIDEO hai pala codoia den duma:
-
So cărde i dei hai le amala le tărnesche Francesco, cana vo phendea lenghe so sichiolas andai Biblia?
-
Sar sas-lo vo pochindo parpale anda codoia că ci mechlea-pe?
Citisaren 2 Timotei 2:24, 25 hai pala codoia den duma:
-
So phenen chi familia hai che amala anda so sichios?
-
Cadea sar sicaven cadal versetea, so trebulas te cheres cana varecon phenel tuche te na mai studiis i Biblia? Sostar?
6. Pachia-tu ando Iehova că va ajutila-tu
Cana pașioas mai but le Iehovastar, camas vi mai but te avas lesche plăcuți. Cu sea cadala, daștil-pe te avel amenghe pharo te cheras le paruimata cai trebul caște traisaras cadea sar vo camel. Dacă vi anda tute si pharo, na mech-tu. O Iehova va ajutila-tu. Dichen o MATERIALO VIDEO hai pala codoia den duma:
-
Ce paruimata cărdea o Jim caște avel plăcuto le Iehovasche?
-
So placiaia-tu o mai but anda lesco exemplo?
Citisaren Evrei 11:6 hai pala codoia den duma:
-
So va cherela o Iehova anda codola cai „roden-les anda sasto ilo”, adică anda codola cai den penghi zor caște prinjianen-les hai te bucurin lesco ilo?
-
Tu so pachias că si ando ilo le Iehovasco cana dichel că tu des sea chi zor caște studiis i Biblia?
UNII MANUȘA DAȘTINAS TE PUȘEN-TU: „Sostar studiis i Biblia?”.
-
So pheneias lenghe?
SO SICHILEAM
Chiar dacă ci va avela tuche sea o timpo ușoro, o studio la Bibliaco daștil te ajutil-tu te bucuris-tu viațatar anda sea o timpo. Șiu chio pachiamos ando Iehova mai dur, hai vo va pochinela-tu parpale.
So dichleam
-
Sostar le ciacimata biblico sile cuci anda tute?
-
Sar daștis te sicaves că ‘les sama le buchiandar mai importanto’?
-
Sostar trebul te manghes le Iehovastar ajutorii caște studiis mai dur i Biblia?
RODE MAI BUT
Va avela te diches ștar buchia cai ajutisarde bute manușen te folosin mișto pengo timpo.
„Sfaturi caște folosin mișto tumaro timpo” (Ușten!, februaria 2014)
Va avela te diches sar ajutisardea o Iehova iecha jiuvlea cai laco rrom ci hachiardea sostar dea voi sea peschi zor caște avel plăcuto le Devlesche.
Va avela te diches ce miștimata andea ieche murșesche cai si avocato, o fapto că leschi rromni ci mechlea o studio.
Butivar, anda le Martori le Iehovasche phenel-pe că rimosaren familii. Si ciaces?
„Rimosaren le Martori le Iehovasche le familii sau zuriaren-le?” (Articolo pa amaro site-o)
Poate că fal-tu
PUȘIMATA ȘIUTINE BUTIVAR
So si o studio biblico le Martorența le Iehovasche?
Ande cado studio biblico gratuime le Martorența le Iehovasche, daștis te folosis orisavi Biblia cames. Daștis te achares ca o studio sea chi familia sau oricas cames.
