LECȚIA 16
So cărdea o Isus cana sas-lo pi phuv?
But manușa gândisaren-pe co Isus sar ca iech țâno șiavoro, ca iech goghiaver profeto sau ca iech manuș cai merel. Tha anda so vo cărdea cana sas-lo pi phuv, daisaras te sichioas but buchia anda leste. Sar? Ande cadai lecția, va avela te dichas chichiva anda le mai bare buchia cai cărdea-le o Isus hai sar cadala daștin te ajutin-tu.
1. Savi sas i mai importanto buchi cai cărdea-la o Isus?
I mai importanto buchi cai cărdea-la o Isus sas ‘te phenel i vestea lași anda o Regato le Devlesco’. (Citisaren Luca 4:43.) Vo phendea le manușenghe i vestea lași că o Del va anela iech regato, sau iech guverno, cai va chosela cu sea le pharimata le manușenghe. a Trin bărșa hai dipaș, o Isus cărdea buchi phares caște phenel le manușenghe cadai șucar vestea. (Matei 9:35)
2. Sostar cărdea o Isus miracolea?
I Biblia del duma anda but ‘buchia zuralimasche, minuni hai semnea, save o Del cărdea-le prin o Isus’. (Faptele 2:22) O Del dea le Isusos o zuralimos te încărel tela o controlo i natura, te del haben mii manușenghe, te sastiarel le nasfalen, hai chiar te jiuvindil le mulen. (Matei 8:23-27; 14:15-21; Marcu 6:56; Luca 7:11-17) Le miracolea cai cărdea-le o Isus sicade claro că o Del bișaldea-les pi phuv. Mai but, von sicade că le Iehovas siles o zuralimos te chosel cu sea le pharimata le manușenghe.
3. So sichioas anda o modo sar o Isus traisardea peschi viața?
O Isus așundea le Iehovastar ande orisavi buchi. (Citisaren Ioan 8:29.) Chiar cana but manușa camle te așaven-les, o Isus cărdea sea so manglea lestar o Iehova sea leschi viața, ji co merimos. Vo sicadea că iech manuș daștil te slujil le Devlesche vi cana si lesche pharo. Cadea că, o Isus ‘mechlea amenghe iech modelo caște uștaras chichi mai exacto pe lesche urme’. (1 Petru 2:21)
HACHIAR MAI MIȘTO
Va avela te diches sar phendea o Isus i vestea lași le manușenghe hai sar cărdea miracolea.
4. O Isus phendea le manușenghe i vestea lași
O Isus phirdea șăla kilometri pe le droma pherde prafo, caște phenel chichi mai bute manușenghe i vestea lași. Citisaren Luca 8:1 hai pala codoia den duma:
-
Phendea o Isus i vestea lași numai codolenghe cai chidenas-pe pașa leste caște așunen-les?
-
Sar dea o Isus sea peschi zor caște arachel le manușen?
O Del phendea de mai anglal că o Mesia va avela te phenel i vestea lași. Citisaren Isaia 61:1, 2 hai pala codoia den duma:
-
Sar pherdea o Isus cadai profeția?
-
Pachias că le manușen de aghies silen nevoia te așunen vi von i vestea lași?
5. O Isus sicadea le manușen cuci ciacimata
O Isus na numai phendea le manușenghe i vestea lași anda o Regato le Devlesco, tha vi phendea lenghe sicaimata cai daștinas te ajutin-le. Te dichas chichiva exemplea anda i Predica pa o plain cai o Isus phendea-la. Citisaren Matei 6:14, 34 hai 7:12 hai pala codoia den duma:
-
So sfaturi lașe dea o Isus ande cadal versetea?
-
Pachias că cadal sfaturi daștin te ajutin vi aghies le manușen?
6. O Isus cărdea miracolea
O Iehova dea le Isusos o zuralimos te cherel but miracolea. Caște dichen iech exemplo, citisaren Marcu 5:25-34 sau dichen o MATERIALO VIDEO hai pala codoia den duma.
-
So pachiaia i jiuvli nasfali anda o materialo video?
-
So buchia anda cadai relatarea pusade chio ilo?
Citisaren Ioan 5:36 hai pala codoia den duma:
-
So sicade anda o Isus le miracolea cai vo cărdea-le?
Jianglean că?
Le mai but buchia cai prinjianas-le anda o Isus sile anda le ștar lila biblico cai bușion Evanghelii: Matei, Marcu, Luca hai Ioan. Fiesavo scriitorii phendea aver buchia anda o Isus. Cana citisaras sea le ștar lila, arăsas te hachiaras sea i viața le Isusoschi.
-
O MATEI
sas o iechto cai scriisardea peschi evanghelia. Vo dea duma anda le sicaimata le Isusosche, tha vi mai but sicadea so phendea o Isus anda o Regato le Devlesco.
-
O MARCU
scriisardea i mai harni evanghelia. Vo dea duma harnes anda but buchia cai cărdea-le o Isus.
-
O LUCA
del duma anda chichi de importanto sas anda o Isus te manghel-pe le Devlesche hai vi anda sar vo phiradea-pe le jiuvleanța.
-
O IOAN
sicavel amenghe sar dea duma o Isus pesche amalența pașarde hai avere manușența. Cadaia ajutil-ame te prinjianas-les mai mișto.
UNII MANUȘA PHENEN: „O Isus avilea pi phuv numai caște cherel miracolea”.
-
Tu pachias că mai cărdea vi aver vareso?
SO SICHILEAM
O Isus phendea le manușenghe i vestea lași anda o Regato le Devlesco, cărdea miracolea hai așundea le Iehovastar ande orisavi buchi.
So dichleam
-
Savi sas i mai importanto buchi cai cărdea-la o Isus cana sas-lo pi phuv?
-
So sicaven le miracolea cai cărdea-le o Isus?
-
So sicaimata cai daștin te ajutin-ame phendea-le o Isus?
RODE MAI BUT
Anda soste dea duma o Isus o mai but?
„O Regato le Devlesco – So si anda o Isus” (O Turno de veghe, 1 octombria 2014)
Va avela te diches sostar daisaras te pachias zurales că le miracolea cai cărdea-le o Isus sas-le ciaces.
„So daisaras te sichioas anda le miracolea cai cărdea-le o Isus?” (O Turno de veghe, 15 iulia 2004)
Va avela te citisares anda sar parudea i viața ieche manușeschi o exemplo le Isusosco.
„Traisardem numai anda mande” (O Turno de veghe, 1 octombria 2014)
Va avela te araches iech lista le buchianța importanto anda i viața le Isusoschi andi ordinea cai întâmplosarde-pe.
a Ande le lecții 31-33, va avela te sichios mai but buchia anda o Regato le Devlesco sau, sar mai phenel-pe lesche, i Împărăția le Devleschi.
Poate că fal-tu
PUȘIMATA ȘIUTINE BUTIVAR
So si o studio biblico le Martorența le Iehovasche?
Ande cado studio biblico gratuime le Martorența le Iehovasche, daștis te folosis orisavi Biblia cames. Daștis te achares ca o studio sea chi familia sau oricas cames.
