LECȚIA 19
Sile le Martori le Iehovasche le ciace creștini?
Amen, le Martori le Iehovasche, pachias că sam le ciace creștini. Sostar? Va avela te diches ande soste pachias amen, sostar phiravas cado anav hai sar sicavas amari iubirea iech caring aver.
1. Ande soste pachian le Martori le Iehovasche?
O Isus phendea: ‘O Cuvânto [le Devlesco] si o ciacimos’. (Ioan 17:17) Cadea sar o Isus, le Martori le Iehovasche sicade sea o timpo că lengo pachiamos bazol-pe po Cuvânto le Devlesco. Sar exemplo, te dichas sar cărde von cadaia ande amare ghiesa. Ando bărș 1870, chichiva manușa le ileia ujo astarde de studiin i Biblia caște hachiaren ciaces so camlea voi te phenel. Von șiute pengo pachiamos ande so phenel i Biblia, chiar cana le changherea sicade le manușen aver buchia. Pala codoia, von astarde te phenen vi averenghe le ciacimata biblico cai arachle-le. a
2. Sostar amaro anav si „Martori le Iehovasche”?
O Iehova phenel codolenghe cai anen lesche închinarea „martori”, anda codoia că von phenen o ciacimos anda leste. (Evrei 11:4–12:1) Sar exemplo, andel puraimata, o Del phendea pesche slujitorenghe: „Tumen san mânre martori”. (Citisaren Isaia 43:10.) Vi anda o Isus i Biblia phenel că si „o Martoro fidelo”. (Revelația 1:5) Anda codoia, ando bărș 1931 leam o anav sar „Martori le Iehovasche”. Das-ame bare te phiravas cado anav.
3. Sar sicaven le Martori le Iehovasche iubirea, cadea sar o Isus?
O Isus iubisardea cadea de but pesche discipolen, că dichlea-le sar peschi familia. (Citisaren Marcu 3:35.) Sa cadea, le Martori le Iehovasche sile iech familia phangli pe sea i phuv. Anda codoia phenas amenghe phrala hai pheia. (Filimon 1, 2) Mai but, cheras pala i porunca: „Iubin sea le phralen”. (1 Petru 2:17) Le Martori le Iehovasche sicaven cadai iubirea ande mai but feluri. Sar exemplo, von sile pașa penghe phrala hai pheia pa sea i phuv caște ajutin-le cana nachen prin pharimata.
HACHIAR MAI MIȘTO
Va avela te prinjianes mai mișto so cărde le Martori le Iehovasche andel bărșa cai nachle hai va avela te diches mai but buchia cai sicaven că sam le ciace creștini.
Sea-l buchia ande save pachian le ciace creștini sile andai Biblia hai von den duma vi averenghe anda cadala
4. Sea-l buchia ande save pachias sile andai Biblia
O Iehova phendea de mai anglal că o ciacimos andai Biblia va avela hachiardo sea mai mișto. Citisaren Daniel 12:4 hai i nota de telal hai pala codoia den duma:
-
Cadea sar sicadea o verseto, so avelas ‘te bariol’ cana le slujitori le Devlesche avenas te studiin mai dur i Biblia?
Va avela te diches sar chichiva manușa rodenas o ciacimos ando Cuvânto le Devlesco. Iech anda lende sas Charles Russell. Dichen o MATERIALO VIDEO hai pala codoia den duma:
-
Sar studiisarde i Biblia o Charles Russell hai le coaver Studenți andi Biblia?
Jianglean că?
Poiechdata, parudeam chichiva buchia ande save pachiaiam. Sostar? Cadea sar o cham vazdel-pe de teharin po cerii hai ajutil-ame te dichas țâra po țâra sea mai mișto le buchia, sa cadea vi o Del ajutil-ame te hachiaras țâra po țâra sea mai mișto lesco Cuvânto. (Citisaren Proverbe 4:18.) Si ciaces, i Biblia ci paruvel-pe. Cu sea cadala, cana hachiaras-la mai mișto, daștil-pe că trebul te paruvas chichiva buchia ande save pachiaiam.
5. Cheras cadea sar sicavel o anav cai phiravas-les
Sostar leam o anav sar Martori le Iehovasche? Dichen o MATERIALO VIDEO hai pala codoia den duma:
-
Sostar o anav sar Martori le Iehovasche silo mișto alosardo?
Sostar alosardea o Iehova manușa caște aven lesche martori? Ca von te sicaven că vo si o corcoro ciacio Del, anda codoia că phenen-pe but hohaimata anda leste. Te dichas dui anda cadal hohaimata.
Si religii cai sicaven le manușen că o Del camel te avel len imagini cana anen lesche închinarea. Citisaren Levitico 26:1 hai pala codoia den duma:
-
Savo si o ciacimos? Sar dichel o Iehova le idoli?
Chichiva manușa cai si ando șăro la changhereaco phenen că o Isus si o Del. Citisaren Ioan 20:17 hai pala codoia den duma:
-
Savo si o ciacimos? Si o Del hai o Isus iech hai sa codo jeno?
-
So si ande chio ilo cana jianes că o Iehova bișaldea pesche Martoren te phenen o ciacimos anda leste hai anda lesco Șiavo?
6. Iubisaras-ame iech averes
I Biblia phenel că le creștini sile sar le părți anda o corpo le manușesco. Citisaren 1 Corinteni 12:25, 26 hai pala codoia den duma:
-
So trebul te cheren le ciace creștini cana lenghe phrala sile duchade?
-
Sar dichlean că sicaven le Martori le Iehovasche penghi iubirea?
Cana le Martori le Iehovasche anda iech rig la phuveachi sile duchade, lenghe phrala pa sea i phuv aven sigo lende caște ajutin-le. Dichen o MATERIALO VIDEO cai sicavel iech exemplo hai pala codoia den duma:
-
Sostar daisaras te phenas că prin o ajutorii cai den-les averenghe, le Martori le Iehovasche sicaven penghi iubirea?
Le ciace creștini sicaven iubirea caring codola cai nachen prin pharimata
UNII MANUȘA PHENEN: „Le Martori le Iehovasche sile iech nevi religia”.
-
De cana phenel o Iehova pesche slujitorenghe „martori”?
SO SICHILEAM
Le Martori le Iehovasche sile le ciace creștini. Amen sam iech familia pe sea i phuv, pachias ande soste phenel i Biblia hai phenas le manușenghe o ciacimos anda o Iehova.
So dichleam
-
Sostar leam o anav sar Martori le Iehovasche?
-
Sar phiravas-ame iech avereia?
-
Tu pachias că le Martori le Iehovasche sile le ciace creștini?
RODE MAI BUT
Va avela te prinjianes mai but buchia anda amari istoria.
Va avela te diches sar sicade le Martori le Iehovasche că chichiva sicaimata cai phenenas-le le rașaia sas-le hohamne.
Va avela te araches răspunsuri ca le pușimata cai daștias te șios-le tuche anda le Martori le Iehovasche.
„Pușimata șiutine butivar andal Martori le Iehovasche” (Articolo pa amaro site-o)
O Stephen cărdea but buchia nasul anda codoia că sas-lo pherdo ura. Va avela te diches so cărdea-les te paruvel peschi viața.
„Mânri viața sas sea mai nasul” (O Turno de veghe, 1 iulia 2015)
a Amari revista O Turno de veghe sicavel le ciacimata andai Biblia anda o bărș 1879.
Poate că fal-tu
PUȘIMATA ȘIUTINE BUTIVAR
So si o studio biblico le Martorența le Iehovasche?
Ande cado studio biblico gratuime le Martorența le Iehovasche, daștis te folosis orisavi Biblia cames. Daștis te achares ca o studio sea chi familia sau oricas cames.
