LECȚIA 26
Sostar si nasulimos hai duch?
Cana avel andi viața le manușenghi iech buchi cai duchavel-le zurales but, si normalo ca von te pușen-pe: „Sostar?”. Ce șucar că i Biblia del răspunso claro cadale pușimaste!
1. Sar andea o Satan o nasulimos andi lumea?
O Satan o Beng, ci mai camlea te așunel le Devlestar hai șiutea-pe contra lesche. Vo camlea ca savore te aven tela lesco vast, anda codoia athadea le dintune manușen, le Adamos hai la Eva, caște aven vi von contra le Devlesche. O Beng țârdea le manușen de leschi rig prin iech hohaimos cai phendea-les la Evache. (Geneza 3:1-5) Vo cărdea-la te pachial că o Iehova garavelas latar vareso lașio hai că le manușa avenas mai fericime dacă ci așunenas le Devlestar. O iechto hohaimos cai phendea-les o Satan, sas cana phendea la Evache că ci va merela. Anda codoia, i Biblia phenel că o Satan si „iech hohamno hai o dad le hohaimasco”. (Ioan 8:44)
2. So alosarde o Adam hai i Eva te cheren?
O Iehova dea anda sea o ilo le Adamos hai la Eva sea so trebulas lenghe. Vo phendea lenghe că daștinas te han anda orisavo cașt anda i bar le Edenoschi, tha numa anda iech te na han. (Geneza 2:15-17) Cu sea cadala, von alosarde te han chiar anda codo cașt. I Eva „lea anda lesco rodo hai halea”, hai pala codoia „halea” vi o Adam. (Geneza 3:6) Niciech anda lende ci așundea le Devlestar. Anda codoia că o Adam hai i Eva sas-le perfecți, sas ande lende te cheren so si mișto. Von alosarde te na așunen le Devlestar; von camle cadai buchi. Cadea, von păcătuisarde hai sicade că ci camen ca o Del te phenel lenghe so te cheren hai so te na cheren. Cadal buchia ande lenghe but duch. (Geneza 3:16-19)
3. So buchi nasul cărde amenghe o Adam hai i Eva?
Cana păcătuisarde, o Adam hai i Eva arăsle imperfecți hai anda codoia, cana năștisaile, vi lenghe șiave sas-le sa cadea. „Prin iech corcoro manuș avilea o păcato andi lumea hai prin o păcato o merimos, hai cadea o merimos nachlea ca sea le manușa”. (Romani 5:12)
Cadea că, sostar sam duchade? Si mai but motivea. Poiechdata sam duchade anda codoia că las decizii nasul. Aver data sam duchade anda codoia că aver manușa len decizii nasul. Hai poiechdata sam duchade anda codoia că sam ando than nelașio co momento nelașio. (Citisaren Eclesiasto 9:11.)
HACHIAR MAI MIȘTO
Va avela te hachiares sostar daisaras te phenas că na o Del si doșalo anda o nasulimos hai i duch cai si aghies andi lumea hai va avela te diches so si ande lesco ilo cana amen sam duchade.
4. Con si doșalo anda codoia că amen sam duchade?
But manușa pachian că i lumea si tela o zuralimos le Devlesco. Savo si o ciacimos? Dichen o MATERIALO VIDEO.
Citisaren Iacov 1:13 hai 1 Ioan 5:19 hai pala codoia den duma:
-
Si o Del doșalo anda i duch hai o nasulimos cai si aghies andi lumea?
5. Sar arăslea i lumea de cana si tela o zuralimos le Benghesco?
Citisaren Geneza 3:1-6 hai pala codoia den duma:
-
So hohaimos phendea o Satan? (Dich le versetea 4 hai 5.)
-
Sar cărdea o Satan le manușen te pachian că o Iehova garavelas lendar vareso lașio?
-
Sas ciacimos le Satanos cana phendea că le manușa ci trebun te așunen le Iehovastar caște aven fericime?
Citisaren Eclesiasto 8:9 hai pala codoia den duma:
-
Sar jian le buchia de cana i lumea ci si tela o zuralimos le Iehovasco?
-
O Adam hai i Eva sas-le perfecți hai beșenas ando Paradiso. Tha așunde le Benghestar hai așile contra o Iehova
-
De cana von alosarde te așunen le Benghestar, i lumea si iech than pherdo păcato, duch hai merimos
-
O Iehova va chosela o păcato, i duch hai o merimos. Le manușa va avena pale perfecți hai va traina ando Paradiso
6. O Iehova dichel amari duch
So si ando ilo le Devlesco cana dichel că sam duchade? Dich so scriisarde o rege David hai o apostolo Petru. Citisaren Psalmo 31:7 hai 1 Petru 5:7 hai pala codoia den duma:
-
So si ande chio ilo cana jianes că o Iehova dichel chi duch hai că duchal-les tutar?
7. O Del va chosela sea le ducha
Citisaren Isaia 65:17 hai Revelația 21:3, 4 hai pala codoia den duma:
-
O Iehova phenel că va chosela sea le ducha. Sar zuriarel chio ilo te jianes cadai buchi?
Jianglean că?
Cana phendea o iechto hohaimos, o Satan meliardea o anav le Iehovasco. Vo cărdea le manușen te pachian că o Iehova silo neorta hai bi iubireaco. Tha na pa but timpo, o Iehova va ujiarela pesco anav pale cana va chosela i duch hai cadea, va sicavela că le manușa daștin te aven ciaces fericime numai tela lesco zuralimos. I mai importanto buchi anda o universo si te avel sfințome o anav le Iehovasco. (Matei 6:9, 10)
UNII MANUȘA PHENEN: „Sam duchade anda codoia că o Del zumavel-ame”.
-
Tu so pheneias lenghe?
SO SICHILEAM
O Satan o Beng hai le iechto manușa sile doșale anda o nasulimos cai si andi lumea. O Iehova si zurales duchado cana dichel amari duch hai na pa but timpo, va chosela-la.
So dichleam
-
So hohaimos phendea o Beng la Evache?
-
So buchi nasul cărde amenghe o Adam hai i Eva?
-
Catar jianas că o Iehova si duchado cana dichel amari duch?
RODE MAI BUT
Va avela te diches so phenel i Biblia că si o păcato.
Va avela te citis anda o iechto hohaimos cai phendea-les o Beng anda o Iehova andi bar le Edenoschi.
„Sostar mechel o Del i suferința?” (O Turno de veghe, 1 ianuaria 2014)
Chio ilo va avela sastiardo cana va aracheia o răspunso ca iech pușimos pharo.
„Sostar sas o Holocausto? Sostar ci așadea-les o Del?” (Articolo pa amaro site-o)
Va avela te diches so hachiardea iech murș cana dichlea i duch le manușenghi de pașa leste.
Poate că fal-tu
PUȘIMATA ȘIUTINE BUTIVAR
So si o studio biblico le Martorența le Iehovasche?
Ande cado studio biblico gratuime le Martorența le Iehovasche, daștis te folosis orisavi Biblia cames. Daștis te achares ca o studio sea chi familia sau oricas cames.
