LECȚIA 57
So trebul te cheres dacă cărdean iech baro păcato?
Chiar cana iubis but le Iehovas hai des chi zor te na cheres vareso cai daștil te duchavel-les, poiechdata va avela te cheres greșeli. Cu sea cadala, chichiva păcatea si mai bare sar aver păcatea. (1 Corinteni 6:9, 10) Dacă cheres iech baro păcato, na bâstăr că o Iehova dichel-tu cuci vi mai dur hai camel te iertil-tu hai te ajutil-tu.
1. So trebul te cheras ca o Iehova te iertil-ame?
Codola cai iubin le Iehovas sile zurales duchade cana den penghi sama anda o baro păcato cai cărde-les. Tha o Iehova zuriarel-le prin so phendea pesche slujitorenghe: „Chiar cana tumare păcatea sile sar o pohtan zurales lolo, va avena cărde parne sar o iv”. (Isaia 1:18) Cana sicavas căința anda sea o ilo, o Iehova iertil-ame cu sea. So si i căința? I căința si cana fal-ame pharo anda sea o ilo, ci mai cheras so si nasul hai mangas zurales le Iehovas te iertil-ame. Pala codoia, das sea amari zor te paruvas o modo sar gândisaras, te na mai cheras le buchia nasul cai îngărde-ame caring codo păcato hai te avel amen iech phiraimos ujo, cadea sar manghel amendar o Iehova. (Citisaren Isaia 55:6, 7.)
2. Sar ajutil-ame o Iehova prin le phure cana cheras iech păcato?
Cana cheras iech baro păcato, o Iehova phenel amenghe ‘te acharas amende le phure la congregațiache’. (Citisaren Iacov 5:14, 15.) Cadal murșa sas-le numime prin o spirito sfânto hai von iubin le Iehovas hai lesche bacrean. Von sas-le sicade sar te ajutin-ame te avel amen pale iech amalimos chidino le Iehovaia. (Galateni 6:1)
Sar ajutin-ame le phure cana cheras iech baro păcato? Dui sau trin phure va sicavena amenghe andai Biblia sostar sas nasul so cărdeam. Mai but, von va dena-ame sfaturi hai va zuriarena-ame te na mai cheras pale o păcato. Cana varecon cherel iech baro păcato hai ci căil-pe, le phure duriaren-les andai congregația caște na peravel vi averen, hai cadea sea i congregația sili ferime.
HACHIAR MAI MIȘTO
Va avela te diches sostar si cuci o modo sar ajutil-ame o Iehova cana cheras iech baro păcato.
3. Caște avas pale sasteveste spiritualo, trebul te das duma anda o păcato cai cărdeam-les
Le Iehovas duchaven-les zurales but amare păcatea, anda codoia trebul te phenas-le lesche. Citisaren Psalmo 32:1-5 hai pala codoia den duma:
-
Ando than te garavas amare păcatea, sostar si ande amaro miștimos te phenas-le le Iehovasche?
Cana phenas le Iehovasche amare păcatea hai mangas ajutorii catar le phure, va avela-ame pale liniștea. Dichen o MATERIALO VIDEO hai pala codoia den duma:
-
Sar ajutisarde le phure cadale phrales caște risarel-pe pale co Iehova?
Trebul te das duma anda sea o ilo le phurența. Von camen te ajutin-ame. Citisaren Iacov 5:16 hai pala codoia den duma:
-
Sostar si mai ușoro le phurenghe te ajutin-ame cana phenas lenghe ciaces so cărdeam?
Phen chio păcato, av sincero le phurența hai mech le Iehovas te ajutil-tu pherdo iubirea
4. O Iehova sicavel îndurarea codolenghe cai cărde păcato
Dacă varecon cai cărdea iech baro păcato ci camel te cherel so manghel amendar o Iehova, silo duriardo andai congregația hai amen ci mai beșas lesa. Citisaren 1 Corinteni 5:6, 11 hai pala codoia den duma:
-
Cadea sar iech „țâra plămădeala cherel te bariol sea o humer”, sa cadea, varecon cai cărdea iech păcato tha ci camel te paruvel-pe, daștil te cherel nasul andi congregația. Sar?
Le phure len-pe pala o Iehova hai pherde îndurarea, den penghi zor te roden hai te ajutin codolen cai sas-le duriarde andai congregația. But anda cadala risaren-pe pale andi congregația, pala iech timpo. Chiar cana duchadea-le o fapto că sas-le ortosarde, cadaia ajutisardea-le te den penghi sama că so cărde sas nasul. (Psalmo 141:5)
Sar sicavel o Iehova lașimos, îndurarea hai iubirea, prin o modo sar phiravel-pe codolența cai cărde iech păcato?
5. O Iehova iertil-ame cana căisaras-ame
O Isus sicadea amenghe iech exemplo cai ajutil-ame te hachiaras so si ando ilo le Iehovasco cana varecon căil-pe. Citisaren Luca 15:1-7 hai pala codoia den duma:
-
Anda cadal versetea, so sichios anda o Iehova?
Citisaren Ezechiel 33:11 hai pala codoia den duma:
-
So trebul te cheras caște dichiol-pe amari căința?
Cadea sar iech păstorii, o Iehova lel sama pherdo iubirea pesche bacreandar
UNII MANUȘA PHENEN: „Darav că dacă va avela te phenav le phurenghe o păcato cai cărdem-les, va avena te duriaren man andai congregația”.
-
Cana varecon va phenela tuche cadea, tu so va avela te phenes lesche?
SO SICHILEAM
Dacă cheras iech păcato baro tha fal-ame zurales pharo hai camas anda ilo te na mai cheras cadai greșeala, o Iehova va iertila-ame.
So dichleam
-
Sostar si ande amaro miștimos cana phenas amare păcatea le Iehovasche?
-
So trebul te cheras ca amare păcatea te aven iertime?
-
Sostar trebul te mangas ajutorii catar le phure dacă cărdeam iech baro păcato?
RODE MAI BUT
Va avela te diches sar simțosardea iech murș i îndurarea le Iehovaschi cadea sar sili sicadi ando Isaia 1:18.
Te na bâstras niciechdata că o Iehova silo îndurătorii (5:02)
Sar den penghi zor le phure, te ajutin codolen cai cărde iech baro păcato?
Va avela te diches sar sicavel-pe iubirea hai îndurarea codolenghe cai păcătuin hai ci camen te paruven pengo phiraimos.
Andi relatarea „Trebulas te risarav-ma pale co Iehova”, va avela te diches sostar iech murș cai duriardea-pe catar o ciacimos, simțosardea că o Iehova țârdea-les pale peste.
„I Biblia paruvel i viața le manușenghi” (O Turno de veghe, 1 aprilia 2012)
Poate că fal-tu
PUȘIMATA ȘIUTINE BUTIVAR
So si o studio biblico le Martorența le Iehovasche?
Ande cado studio biblico gratuime le Martorența le Iehovasche, daștis te folosis orisavi Biblia cames. Daștis te achares ca o studio sea chi familia sau oricas cames.
