Le articolea cai sas mai anglal sicade că na pa but timpo o Del va anela o sfârșito cadala lumeaco nasul hai sea le pharimata cai voi andea-le ci va mai avena. Daisaras te pachias ciaces cadai buchi. Sostar? O Cuvânto le Devlesco, i Biblia, phenel amenghe:

„I lumea nachel”. (1 IOAN 2:17)

Daisaras te avas siguri că va avena vi manușa cai va așena andi viața anda codoia că sa codo verseto phenel:

„Con cherel i voia le Devleschi așel anda sea o timpo”.

Anda codoia, dacă camas te așias andi viața, trebul te cheras i voia le Devleschi. Caște dichas savi si i voia le Devleschi, trebul mai anglal te prinjianas-les.

O Isus phendea: „Cadaia însemnol i viața veșnico: te arăsăn te prinjianen tut, o corcoro ciacio Del”. (Ioan 17:3) Caște așias andi viața pala o sfârșito hai te traisaras veșnico, trebul ‘te arăsas te prinjianas’ le Devles. Trebul te jianas mai but sar că o Del existil sar te prinjianas chichiva buchia anda leste. Trebul te avas amala leia. Ca iech amalimos te avel chidino, trebul te beșas ande iech than amare amaleia. Sa cadea si vi le buchia ando amalimos le Devleia. Te dichas chichiva bare ciacimata andai Biblia cai ajutin-ame te phandas iech șucar amalimos le Devleia hai te încăras-les.

Caște așias andi viața, si importanto te zuriaras amaro pachiamos ande fiesavo ghies. Tha o Isus phendea: „Tha, vo phendea lesche parpale: „Si scriime: «O manuș te na trail numai manreia, tha vi orisave cuvântoia cai înclel anda o mui le Iehovasco”. (Matei 4:4)

Aghies, arachas le cuvintea le Iehovasche andi Biblia. Chichi va avela te studiis mai but cado lil sfânto, va avela te sichios bare ciacimata anda so cărdea, so cherel hai so va cherela o Del andal manușa.

So daștis te cheres dacă cames te ascultis le Devlestar, tha si tuche pharo te meches le buchia cai vo phenel că sile greșime? Dacă san ande cadai situația, iech prinjianimos exacto anda o Del daștil te ajutil tut.

Sar exemplo, iech jiuvli, casche va avela te phenas Sakura, cai sas-la iech viața imoralo, începosardea te studiil i Biblia. Voi așundea anda i porunca le Devleschi te ‘nașel catar i imoralitarea sexualo’. (1 Corinteni 6:18) I Sakura manglea le Devles te del-la zuralimos hai daisardea te mechel i viața imoralo cai sas-la. Cu sea cadala, voi trebul mai dur te așel contra le tentații. Voi phenel: „Cana avel ande mânri goghi gânduri imoralo, rughiv-ma le Iehovasche hai phenav lesche sea so si ande mânro ilo, hai jianav că vo ci mechel-ma corcori ande cadai lupta. I rugăciunea ajutisardea-ma te pașioav mai but le Iehovastar”. Cadea sar i Sakura, milioanea manușa arăsăn te prinjianen le Devles. Vo del-le o zuralimos caște cheren paruimata hai te avel-le iech viața ciaci ande lesche iacha. (Filipeni 4:13)

Chichi va avela te prinjianes mai mișto le Devles, cadichi chio amalimos leia va avela vi mai chidino hai va avela te arăsăs ‘te aves prinjiando lestar’. (Galateni 4:9; Psalmo 25:14) Cadea, va avela te așes andi viața cana va avela o sfârșito hai va avela te trais andi lumea nevi le Devleschi. Tha sar va avela i viața andi lumea nevi? O articolo cai avel sicavel o răspunso.