Na pa but timpo, o guverno cerisco le Devlesco va raila pa sea le manușa, i phuv va avela iech than zurales șucar, cai le manușa va traina ande iech than andi pacea hai va cherena buchi anda sea pengo ilo. O Del șutea le Isus Cristosos te rail pa i phuv. Na cadea sar but conducători de aghies, sea so va cherela o Isus va avela ando miștimos le manușengo. Vo va raila pa amende pherdo iubirea, va avela iech rege lașio, îndurătorii hai orta. (Isaia 11:4)

Le manușa ci va mai cherena diferențe mașcar pende anda codoia că aven anda aver culturi sau thema. Le manușa pa sea i phuv va avena iech poporo unime. (Revelația 7:9, 10) Savore va iubina le Devles hai codolen de pașa lende hai va cherena buchi ande iech than andi pacea caște pheren o scopo cai sas le Devles mai anglal, te len sama pi phuv, lengo chăr. (Psalmo 115:16)

Cana o Regato le Devlesco va raila pa i phuv, o Creatoro va încărela tela controlo i clima hai i vremea va avela perfecto. (Psalmo 24:1, 2) Cana sas pi phuv, o Isus așadea iech baro brâșând, hai cadea sicadea so daștil te cherel le zuralimaia cai dea-les lesche o Del. (Marcu 4:39, 41) Tela o raimos le Cristososco, chonic ci va mai darala catar le dezastrea naturalo. O Regato le Devlesco va anela pale pacea mașcar le manușa hai le animalea hai va lela sama ca chonic te na mai distrugil i phuv. (Osea 2:18)

Sea le manușen va avela-le iech sastimos perfecto. Chonic ci va mai avela nasfalo, ci va mai phuriola hai ci va mai merela. (Isaia 35:5, 6) I phuv va avela sa cadea de șucar hai uji sar codoia cai sas le iechto manușen andi bar le Edenoschi. Mai but, i phuv va dela but haben, sar ando Eden, hai sea le manușen pa i phuv va avela-le but haben caște train. (Geneza 2:9) Cadea sar le israeliți anda puraimos, ando Paradiso savore ‘va hana manro ji cana va ciailiona’. (Levitico 26:4, 5)

Tela o guverno le Devlesco, sea le manușa va bucurina-pe paceatar, va avena lașe hai va phiravena-pe șucar iech avereia. Ci va mai avena războaia, chonic ci va camela te avel o mai zuralo hai savoren va avela-le so trebun-le. I Biblia phenel: „Fiesavo va beșela tela peschi răz hai tela pesco smochino hai chonic ci va mai cherela-le te izdran”. (Mica 4:3, 4)

Fiesavi familia va beșela ande pesco chăr hai ci va darana că va hasarena-les. Andi lumea nevi, i buchi va anela amenghe but bucuria. I Biblia phenel că chonic ‘ci va chinio-la de ivea’. (Isaia 65:21-23)

I Biblia phenel: „I phuv va avela pherdi catar o prinjianimos le Iehovasco”. (Isaia 11:9) Atunci, le manușa va sichiona catar lengo Creatoro, o Iehova, cai lesco goghiaverimos ci sfârșil-pe, hai va avela te sichion anda le șucar buchia cai cărdea-le. Von ci va mai folosina pengo prinjianimos caște cheren arme sau caște cheren nasul averenghe. (Isaia 2:4) Tha, va sichiona te train andi pacea iech averența hai te len sama pi phuv (Psalmo 37:11)

O Del cărdea pherdo iubirea i phuv caște bucurisaras-ame fiesave ghiesestar. Vo camel ca le manușa te train veșnico pi phuv. (Psalmo 37:29; Isaia 45:18) Caște pherel pesco scopo, o Del „va nachavela o merimos anda sea o timpo”. (Isaia 25:8) I Biblia phenel: „O merimos ci va mai avela. Nici roimos, nici necazo, nici duch ci va mai avena”. (Revelația 21:4) O Del va cherela te daștin te train veșnico vi codola cai va avena salvime cana va distrugila cadai lumea nasul, hai vi codola cai va avena jiuvindime andi lumea nevi. (Ioan 5:28, 29; Faptele 24:15)

 Milioanea manușa pa sea i phuv pregătin-pe încă de acana anda iech nevo începuto, cai si cadea de pașă. Chiar cana sile imperfecți, von den penghi zor te aven le manușa cai o Del camel len andi lumea nevi. Von sichion anda o Iehova Del hai anda codo cas bișialdea vo, o Isus Cristos. (Ioan 17:3)

Prinjiar mai but anda sar daștis te așes andi viața cana va avela o sfârșito cadala lumeaco hai te trais na pa but timpo ande iech lumea mai lași. Sichio i Biblia gratuime ieche Martoreia le Iehovasco, anda o lil Bucurisar-tu viațatar anda sea o timpo!.